“ວັນທີ 6–12 ເດືອນກັນຍາ. ຄຳສອນ ແລະ ພັນທະສັນຍາ 98–101: ‘ຈົ່ງສະຫງົບ ແລະ ຮູ້ວ່າເຮົາຄືພຣະເຈົ້າ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 6–12 ເດືອນກັນຍາ. ຄຳສອນ ແລະ ພັນທະສັນຍາ 98–101,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ໄພ່ພົນແລ່ນໜີຈາກກຸ່ມອັນຕະພານ

ຊີ ຊີ ເອ ຄຣິສເຕັນເຊັນ (1831–1912), Saints Driven from Jackson County Missouri [ໄພ່ພົນຖືກຂັບໄລ່ອອກຈາກເຂດແຈ໊ກສັນ ລັດມີເຊີຣີ], ປະມານ 1878, ສີຖາວອນແຫ້ງໄວ ເທິງຜ້າຝ້າຍມັດສະລິນ, 77 ¼ × 113 ນິ້ວ. ຫໍພິພິດທະພັນສິລະປະຂອງມະຫາວິທະຍາໄລ ບຣິກຳ ຢັງ, ຂອງຂວັນຈາກຫລານຂອງ ຊີ ຊີ ເອ ຄຣິສເຕັນເຊັນ, 1970

ວັນທີ 6–12 ເດືອນກັນຍາ

ຄຳສອນ ແລະ ພັນທະສັນຍາ 98–101

“ຈົ່ງສະຫງົບ ແລະ ຮູ້ວ່າເຮົາຄືພຣະເຈົ້າ”

ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 98–101, ໃຫ້ເອົາໃຈໃສ່ຕໍ່ຄວາມຄິດ ແລະ ຄວາມປະທັບໃຈທີ່ມາສູ່ທ່ານ. ການເຮັດຕາມຄວາມຄິດ ແລະ ຄວາມປະທັບໃຈ ຊ່ວຍທ່ານໃຫ້ກາຍເປັນບຸກຄົນທີ່ພຣະເຈົ້າປະສົງໃຫ້ທ່ານເປັນແນວໃດ?

ບັນທຶກຄວາມປະທັບໃຈຂອງທ່ານ

ສຳລັບໄພ່ພົນໃນຊ່ວງໄລຍະຊຸມປີ 1830, ເມືອງອິນດີເພັນເດັນສ໌, ລັດມີເຊີຣີ, ໄດ້ເປັນແຜ່ນດິນແຫ່ງຄຳສັນຍາແທ້ໆ. ມັນແມ່ນ “ສະຖານທີ່ສູນກາງ” ຂອງຊີໂອນ (ເບິ່ງ ຄຳສອນ ແລະ ພັນທະສັນຍາ 57:3)—ເມືອງຂອງພຣະເຈົ້າຢູ່ເທິງໂລກ—ຊຶ່ງເຂົາເຈົ້າໄດ້ເສຍສະລະຢ່າງຫລວງຫລາຍເພື່ອສ້າງມັນຂຶ້ນ. ສຳລັບເຂົາເຈົ້າແລ້ວ, ການເຕົ້າໂຮມຂອງໄພ່ພົນຢູ່ທີ່ນັ້ນ ເປັນສິ່ງທີ່ໜ້າຕື່ນເຕັ້ນ ແລະ ສະຫງ່າລາສີ ກ່ອນການສະເດັດມາຄັ້ງທີສອງ. ແຕ່ເພື່ອນບ້ານຂອງເຂົາເຈົ້າທີ່ອາໄສຢູ່ໃນຂົງເຂດນັ້ນ ບໍ່ໄດ້ຄິດຄືກັນກັບເຂົາເຈົ້າ. ພວກເຂົາມີບັນຫາເລື່ອງການປະກາດວ່າ ພຣະເຈົ້າໄດ້ມອບດິນແດນແຖວນັ້ນໃຫ້ໄພ່ພົນ, ແລະ ພວກເຂົາກໍບໍ່ສະບາຍໃຈກັບເລື່ອງການເມືອງ, ເສດຖະກິດ, ແລະ ຜົນສະທ້ອນທາງດ້ານສັງຄົມ ທີ່ມີຜູ້ຄົນຢ່າງຫລວງຫລາຍຈາກສາດສະໜາທີ່ພວກເຂົາບໍ່ຄຸ້ນເຄີຍ ຍ້າຍມາຢູ່ໃນຂົງເຂດນັ້ນຢ່າງວ່ອງໄວ. ບໍ່ດົນຄວາມກັງວົນໄດ້ກາຍເປັນໄພຄຸກຄາມ, ແລະ ໄພຄຸກຄາມໄດ້ກາຍເປັນການຂົ່ມເຫັງ ແລະ ຄວາມຮຸນແຮງ. ໃນເດືອນກໍລະກົດ 1833, ຫ້ອງການພິມຂອງສາດສະໜາຈັກໄດ້ຖືກທຳລາຍ, ແລະ ໃນເດືອນພະຈິກ ໄພ່ພົນໄດ້ຖືກບັງຄັບໃຫ້ປະຖິ້ມບ້ານເຮືອນຂອງເຂົາເຈົ້າ ຢູ່ໃນເຂດແຈ໊ກສັນ, ລັດມີເຊີຣີ.

ໂຈເຊັບ ສະມິດ ໄດ້ຢູ່ຫ່າງໄກຈາກເມືອງເຄີດແລນ ຫລາຍກວ່າ 800 ໄມ (1288 ກິໂລແມັດ), ແລະ ຂ່າວນັ້ນຕ້ອງໃຊ້ເວລາໜຶ່ງອາທິດຈຶ່ງໄປເຖິງເພິ່ນ. ແຕ່ພຣະຜູ້ເປັນເຈົ້າຮູ້ວ່າມີຫຍັງເກີດຂຶ້ນ, ແລະ ພຣະອົງໄດ້ເປີດເຜີຍຫລັກທຳແຫ່ງຄວາມສະຫງົບ ແລະ ກຳລັງໃຈ ແກ່ສາດສະດາຂອງພຣະອົງ ທີ່ຈະປອບໂຍນໄພ່ພົນໄດ້—ຫລັກທຳເຫລົ່ານັ້ນກໍສາມາດຊ່ວຍເຮົາໃນເວລາທີ່ເຮົາປະເຊີນກັບການຂົ່ມເຫັງ, ເວລາທີ່ຄວາມປະສົງອັນຊອບທຳຂອງເຮົາບໍ່ໄດ້ຮັບຄຳຕອບ, ຫລື ເວລາທີ່ເຮົາຕ້ອງການ ການເຕືອນໃຈວ່າ ຄວາມທຸກປະຈຳວັນຂອງເຮົາ ຈະ, “ທຳງານນຳກັນເພື່ອຄວາມດີ [ຂອງເຮົາ]” ໃນທີ່ສຸດ (ຄຳສອນ ແລະ ພັນທະສັນຍາ 98:3).

ເບິ່ງ Saints, 1:171–93; “Waiting for the Word of the Lord,” Revelations in Context, 196–201.

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 98:1–3, 11–14; 101:1–16

ການທົດລອງຂອງເຮົາສາມາດທຳງານນຳກັນເພື່ອຄວາມດີຂອງເຮົາ.

ຄວາມທຸກບາງຢ່າງໃນຊີວິດຂອງເຮົາ ເກີດຂຶ້ນຈາກການເລືອກຂອງເຮົາເອງ. ບາງຢ່າງເກີດຂຶ້ນຈາກການເລືອກຂອງຄົນອື່ນ. ແລະ ບາງເທື່ອກໍບໍ່ໄດ້ເປັນຄວາມຜິດຂອງຜູ້ໃດ—ຢູ່ຊື່ໆສິ່ງທີ່ບໍ່ດີກໍເກີດຂຶ້ນເອງ. ບໍ່ວ່າຈະເປັນດ້ວຍເຫດໃດ, ຄວາມຍາກລຳບາກສາມາດຊ່ວຍໃຫ້ຈຸດປະສົງທີ່ສູງສົ່ງບັນລຸຄວາມສຳເລັດໄດ້. ຂະນະທີ່ທ່ານອ່ານສິ່ງທີ່ພຣະຜູ້ເປັນເຈົ້າໄດ້ກ່າວກ່ຽວກັບຄວາມຍາກລຳບາກຂອງໄພ່ພົນ ຢູ່ໃນ ຄຳສອນ ແລະ ພັນທະສັນຍາ 98:1–3, 11–14 ແລະ 101:1–16, ທ່ານພົບເຫັນຫຍັງແດ່ທີ່ສາມາດຊ່ວຍທ່ານກັບການທົດລອງຂອງທ່ານ? ຂໍ້ເຫລົ່ານີ້ສາມາດເປັນອິດທິພົນຕໍ່ວິທີທີ່ທ່ານເບິ່ງການທ້າທາຍທີ່ທ່ານປະເຊີນແນວໃດແດ່? ໃຫ້ໄຕ່ຕອງວິທີທີ່ການທົດລອງຂອງທ່ານໄດ້ທຳງານນຳກັນເພື່ອຄວາມດີຂອງທ່ານ ແລະ ເພື່ອບັນລຸຈຸດປະສົງຂອງພຣະເຈົ້າໃນຊີວິດຂອງທ່ານແນວໃດແດ່.

ເບິ່ງ 2 ນີໄຟ 2:2; ຄຳສອນ ແລະ ພັນທະສັນຍາ 90:24 ນຳອີກ.

ຄຳສອນ ແລະ ພັນທະສັນຍາ 98:23–48

ພຣະຜູ້ເປັນເຈົ້າປະສົງໃຫ້ເຮົາສະແຫວງຫາຄວາມສະຫງົບ ຢູ່ໃນວິທີທາງຂອງພຣະອົງ.

ເຖິງແມ່ນວ່າບໍ່ແມ່ນທຸກສິ່ງຢູ່ໃນ ຄຳສອນ ແລະ ພັນທະສັນຍາ 98:23–48 ຈະຖືກນຳໃຊ້ກັບການພົບປະສັງສັນຂອງທ່ານເປັນສ່ວນຕົວກັບຄົນອື່ນ, ແຕ່ຫລັກທຳຢ່າງໃດແດ່ທີ່ທ່ານພົບເຫັນວ່າ ສາມາດຊີ້ນຳທ່ານ ເມື່ອຄົນອື່ນເຮັດຜິດຕໍ່ທ່ານ? ມັນອາດເປັນປະໂຫຍດທີ່ຈະໝາຍຂໍ້ຄວາມ ຫລື ສຳນວນ ທີ່ບັນຍາຍວິທີທີ່ພຣະຜູ້ເປັນເຈົ້າປະສົງໃຫ້ໄພ່ພົນຈັດການກັບການຂັດແຍ້ງຢູ່ໃນລັດມີເຊີຣີ.

ເບິ່ງ Jeffrey R. Holland, “The Ministry of Reconciliation,” Ensign ຫລື Liahona, Nov. 2018, 77–79 ນຳອີກ.

ລາຍລະອຽດຈາກ Christ and the Rich Young Ruler [ພຣະຄຣິດ ແລະ ເຈົ້ານາຍມະຫາເສດຖີໜຸ່ມ], ໂດຍ ເຮັນຣິກ ຮ໊ອບແມນ

ຄຳສອນ ແລະ ພັນທະສັນຍາ 100

ພຣະຜູ້ເປັນເຈົ້າຈະດູແລຜູ້ທີ່ຮັບໃຊ້ພຣະອົງ.

ພຽງສອງສາມອາທິດຫລັງຈາກໂຈເຊັບໄດ້ຍິນເລື່ອງການຂົ່ມເຫັງຢູ່ໃນລັດມີເຊີຣີ, ຜູ້ປ່ຽນໃຈເຫລື້ອມໃສໃໝ່ຄົນໜຶ່ງໄດ້ຂໍໃຫ້ເພິ່ນເດີນທາງໄປປະເທດການາດາ ເພື່ອແບ່ງປັນພຣະກິດຕິຄຸນໃຫ້ກັບພວກລູກຊາຍຂອງລາວ. ໂຈເຊັບກໍໄດ້ຕົກລົງ, ເຖິງແມ່ນເພິ່ນມີຄວາມເປັນຫ່ວງກັບຄອບຄົວຂອງເພິ່ນ, ໂດຍສະເພາະ ເພາະການຂົ່ມເຫັງ ແລະ ໄພຄຸກຄາມທີ່ເກີດກັບຄອບຄົວຂອງເພິ່ນ ແລະ ສາດສະໜາຈັກ. ໃນລະຫວ່າງການເດີນທາງໄປການາດາ, ໂຈເຊັບ ແລະ ຊິດນີ ຣິກດອນ ຄູ່ສອນຂອງເພິ່ນ ໄດ້ອະທິຖານຂໍຄວາມປອບໂຍນ, ແລະ ພາກທີ 100 ຄືຄຳຕອບຂອງພຣະຜູ້ເປັນເຈົ້າສຳລັບພວກເພິ່ນ. ທ່ານພົບເຫັນຫຍັງແດ່ຢູ່ໃນຄຳຕອບຂອງພຣະຜູ້ເປັນເຈົ້າ ທີ່ໃຫ້ຄວາມໝັ້ນໃຈ ແລະ ຊ່ວຍພວກເພິ່ນ?

ບາງທີທ່ານອາດເຄີຍມີປະສົບການທີ່ຮຽກຮ້ອງທ່ານໃຫ້ພິຈາລະນາຄວາມເປັນຫ່ວງລະຫວ່າງໜ້າທີ່ຮັບຜິດຊອບໃນສາດສະໜາຈັກ ແລະ ຄອບຄົວຂອງທ່ານເອງ. ພຣະຄຳຂອງພຣະຜູ້ເປັນເຈົ້າຢູ່ໃນ ພາກທີ 100 ຊ່ວຍທ່ານໃນສະຖານະການເຊັ່ນນັ້ນແນວໃດ?

ເບິ່ງ “A Mission to Canada,” Revelations in Context, 202–7 ນຳອີກ.

ຄຳສອນ ແລະ ພັນທະສັນຍາ 101:43–65

ການເຮັດຕາມຄຳແນະນຳຂອງພຣະເຈົ້າ ຊ່ວຍເຮົາໃຫ້ປອດໄພ.

ຄຳອຸປະມາຢູ່ໃນ ຄຳສອນ ແລະ ພັນທະສັນຍາ 101:43–62 ໄດ້ຖືກມອບໃຫ້ ເພື່ອອະທິບາຍເຫດຜົນທີ່ພຣະຜູ້ເປັນເຈົ້າໄດ້ປ່ອຍໃຫ້ໄພ່ພົນຖືກຂັບໄລ່ອອກຈາກຊີໂອນ. ຂະນະທີ່ທ່ານອ່ານຂໍ້ເຫລົ່ານີ້, ທ່ານເຫັນສິ່ງໃດບໍທີ່ຄ້າຍຄືກັນລະຫວ່າງຕົວທ່ານເອງ ແລະ ຄົນໃຊ້ຢູ່ໃນຄຳອຸປະມານີ້? ທ່ານອາດຖາມຕົວເອງວ່າ: ເຮົາເຄີຍສົງໃສພຣະບັນຍັດຂອງພຣະເຈົ້າບໍ? ການຂາດສັດທາ ຫລື ຄວາມຕັ້ງໃຈ ປ່ອຍໃຫ້ “ສັດຕູ” ມີອິດທິພົນໃນຊີວິດຂອງເຮົາແນວໃດ? ເຮົາຈະສາມາດສະແດງໃຫ້ພຣະເຈົ້າເຫັນວ່າ ເຮົາ “ເຕັມໃຈຮັບການແນະນຳໃນວິທີທີ່ຖືກຕ້ອງ ແລະ ເໝາະສົມສຳລັບຄວາມລອດ [ຂອງເຮົາ]” ແນວໃດ? (ເບິ່ງ ຂໍ້ທີ 63–65).

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 98:16, 39–40.ຂໍ້ເຫລົ່ານີ້ສາມາດຊ່ວຍເຮົາໃຫ້ມີຄວາມສະຫງົບຢູ່ໃນຄອບຄົວຂອງເຮົາແນວໃດ? ພວກທ່ານສາມາດຮ້ອງເພງກ່ຽວກັບຄວາມສະຫງົບ ຫລື ການໃຫ້ອະໄພ, ດັ່ງເຊັ່ນ “ພຣະບິດາໂປດຟັງເຮົາວອນ” (ເພງສວດ ແລະ ເພງຂອງເດັກນ້ອຍ, 23). ເດັກນ້ອຍອາດມັກຫລິ້ນລະຄອນກ້ອມ ເລື່ອງການໃຫ້ອະໄພກັນແລະກັນ.

ຄຳສອນ ແລະ ພັນທະສັນຍາ 99.ຕອນຈອນ ເມີດ໊ອກ ໄດ້ຖືກເອີ້ນໃຫ້ຈາກບ້ານເຮືອນຂອງລາວ “ເພື່ອປະກາດພຣະກິດຕິຄຸນອັນເປັນນິດ” (ຂໍ້ທີ 1), ລາວຫາກໍກັບມາຈາກການເຜີຍແຜ່ທີ່ລຳບາກ ເປັນເວລາໜຶ່ງປີຢູ່ໃນລັດມີເຊີຣີ (ເບິ່ງ “John Murdock’s Missions to Missouri,” Revelations in Context, 87–89). ເຮົາພົບເຫັນຫຍັງແດ່ຢູ່ໃນ ພາກທີ 99 ທີ່ອາດເປັນປະໂຫຍດ ຫລື ເປັນກຳລັງໃຈໃຫ້ແກ່ບຣາເດີ ເມີດ໊ອກ? ຂ່າວສານໃດແດ່ທີ່ພຣະຜູ້ເປັນເຈົ້າມີສຳລັບເຮົາຢູ່ໃນການເປີດເຜີຍນີ້?

ຄຳສອນ ແລະ ພັນທະສັນຍາ 100:16; 101:3–5, 18.ຫລັງຈາກການອ່ານຂໍ້ເຫລົ່ານີ້, ພວກທ່ານສາມາດສົນທະນາກ່ຽວກັບວິທີທີ່ຊ່າງຕີເຫລັກໃຊ້ເຕົາໄຟຮ້ອນທີ່ສຸດ ເພື່ອກຳຈັດສິ່ງທີ່ບໍ່ບໍລິສຸດອອກຈາກເຫລັກ ແລະ ໃຊ້ໄມ້ຄ້ອນຕີເຫລັກ ຕີແລ້ວຕີອີກ ເພື່ອຫລໍ່ຫລອມເຫລັກ (ໃຫ້ເບິ່ງ ວິດີໂອ “The Refiner’s Fire” ຢູ່ທີ່ ChurchofJesusChrist.org). ພວກທ່ານກໍຄວນຮຽນຮູ້ນຳກັນກ່ຽວກັບວິທີທີ່ສິ່ງອື່ນໆຖືກເຮັດໃຫ້ບໍລິສຸດ, ດັ່ງເຊັ່ນນ້ຳ ຫລື ເກືອ. ບາງທີພວກທ່ານສາມາດຊຳລະບາງສິ່ງໃຫ້ບໍລິສຸດ ຫລື ສະອາດ ນຳກັນເປັນຄອບຄົວ. ເປັນຫຍັງເຮົາຈຶ່ງຢາກກາຍເປັນຄົນບໍລິສຸດ? ຕົວຢ່າງເຫລົ່ານີ້ສິດສອນເຮົາຫຍັງແດ່ກ່ຽວກັບວິທີທີ່ການທົດລອງຂອງເຮົາ ສາມາດຊ່ວຍເຮົາໃຫ້ກາຍເປັນ “ຜູ້ຄົນທີ່ບໍລິສຸດ”?

ຄຳສອນ ແລະ ພັນທະສັນຍາ 101:22–36.ຂໍ້ເຫລົ່ານີ້ໄດ້ຊ່ວຍໄພ່ພົນຜູ້ທີ່ປະເຊີນກັບການຂົ່ມເຫັງແນວໃດ? ຂໍ້ເຫລົ່ານີ້ຊ່ວຍຜູ້ຄົນທີ່ຮູ້ສຶກຢ້ານກົວກ່ຽວກັບສະພາບການຂອງໂລກໃນທຸກວັນນີ້ແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ກ້າເຮັດສິ່ງຖືກ,” ເພງສວດ ແລະ ເພງຂອງເດັກນ້ອຍ, 70.

ການປັບປຸງການສຶກສາສ່ວນຕົວ

ຊອກຫາຫລັກທຳ. ແອວເດີ ຣິເຈີດ ຈີ ສະກາດ ໄດ້ສິດສອນວ່າ: “ເມື່ອທ່ານສະແຫວງຫາຄວາມຮູ້ທາງວິນຍານ, ຄົ້ນຄວ້າຫລັກທຳ. … ຫລັກທຳຄືຄວາມຈິງທີ່ເຂັ້ມຂຸ້ນ, ເຕັມໄປດ້ວຍສິ່ງທີ່ສາມາດນຳໄປໃຊ້ກັບສະຖານະການຕ່າງໆ ທີ່ແຕກຕ່າງກັນ” (“Acquiring Spiritual Knowledge,” Ensign, Nov. 1993, 86).