“ວັນທີ 16–22 ເດືອນສິງຫາ. ຄຳສອນ ແລະ ພັນທະສັນຍາ 89–92: ‘ຫລັກທຳພ້ອມດ້ວຍຄຳສັນຍາ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ວັນທີ 16–22 ເດືອນສິງຫາ. ຄຳສອນ ແລະ ພັນທະສັນຍາ 89–92,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ຮູບພາບ

ຜູ້ຊາຍກັບຜູ້ຍິງກຳລັງເຮັດອາຫານ

ວັນທີ 16–22 ເດືອນສິງຫາ

ຄຳສອນ ແລະ ພັນທະສັນຍາ 89–92

“ຫລັກທຳພ້ອມດ້ວຍຄຳສັນຍາ”

ໃຫ້ສຶກສາ ຄຳສອນ ແລະ ພັນທະສັນຍາ 89–92 ດ້ວຍການອະທິຖານ, ແລະ ບັນທຶກຄວາມປະທັບໃຈທາງວິນຍານໃດໆ ທີ່ທ່ານໄດ້ຮັບ. ໃຫ້ມີຄວາມຮູ້ສຶກໄວຕໍ່ວິທີທີ່ “ພຣະວິນຍານສະແດງຄວາມຈິງໃຫ້ປະຈັກ” ແກ່ທ່ານ ຂະນະທີ່ທ່ານສຶກສາ (ຄຳສອນ ແລະ ພັນທະສັນຍາ 91:4).

ບັນທຶກຄວາມປະທັບໃຈຂອງທ່ານ

ຢູ່ໃນໂຮງຮຽນຂອງສາດສະດາ, ສາດສະດາໂຈເຊັບ ສະມິດ ໄດ້ສິດສອນພວກແອວເດີຂອງອິດສະຣາເອນ ກ່ຽວກັບການສ້າງສາອານາຈັກຂອງພຣະເຈົ້າຢູ່ເທິງໂລກ. ເຂົາເຈົ້າໄດ້ສົນທະນາກ່ຽວກັບຄວາມຈິງທາງວິນຍານ, ໄດ້ອະທິຖານນຳກັນ, ຖືສິນອົດເຂົ້າ, ແລະ ກະກຽມທີ່ຈະສັ່ງສອນພຣະກິດຕິຄຸນ. ແຕ່ໄດ້ມີບາງສິ່ງກ່ຽວກັບບັນຍາກາດທີ່ອາດເບິ່ງຄືວ່າແປກຕໍ່ເຮົາໃນປະຈຸບັນ, ແລະ ເບິ່ງຄືວ່າມັນບໍ່ຖືກຕ້ອງຕໍ່ນາງເອມມາ ສະມິດ ຄືກັນ. ລະຫວ່າງການປະຊຸມ, ພວກຜູ້ຊາຍໄດ້ສູບຢາ, ຊຶ່ງບໍ່ໄດ້ເປັນເລື່ອງທີ່ຜິດປົກກະຕິສຳລັບສະໄໝນັ້ນ, ແຕ່ມັນເຮັດໃຫ້ພື້ນຫ້ອງທີ່ເປັນໄມ້ ເປື້ອນດຳ ແລະ ມີກິ່ນແຮງ. ນາງເອມມາໄດ້ບອກໂຈເຊັບກ່ຽວກັບຄວາມເປັນຫ່ວງຂອງນາງ, ແລະ ໂຈເຊັບໄດ້ທູນຖາມພຣະຜູ້ເປັນເຈົ້າ. ຄຳຕອບແມ່ນການເປີດເຜີຍທີ່ເກີນກວ່າເລື່ອງການສູບຢາ ແລະ ຮອຍເປື້ອນຢູ່ພື້ນຫ້ອງ. ການເປີດເຜີຍດັ່ງກ່າວໄດ້ມອບ “ຫລັກທຳພ້ອມດ້ວຍຄຳສັນຍາ” ໃຫ້ແກ່ໄພ່ພົນ, ຫລາຍລຸ້ນຄົນຕໍ່ໆໄປ—ສັນຍາເຖິງສຸຂະພາບທີ່ແຂງແຮງ, “ສະຕິປັນຍາ,” ແລະ “ຂຸມຊັບແຫ່ງຄວາມຮູ້ທີ່ຍິ່ງໃຫຍ່” (ຄຳສອນ ແລະ ພັນທະສັນຍາ 89:3, 19).

ຮູບພາບ

ຮູບເຄື່ອງໝາຍການສຶກສາສ່ວນຕົວ

ແນວຄິດສຳລັບການສຶກສາພຣະຄຳພີເປັນສ່ວນຕົວ

ຄຳສອນ ແລະ ພັນທະສັນຍາ 89

ພຣະວາຈາແຫ່ງປັນຍາ ຄື “ຫລັກທຳພ້ອມດ້ວຍຄຳສັນຍາ.”

ເມື່ອພວກແອວເດີຢູ່ໃນໂຮງຮຽນຂອງສາດສະດາໄດ້ຍິນໂຈເຊັບ ສະມິດ ອ່ານພຣະວາຈາແຫ່ງປັນຍາ ເປັນເທື່ອທຳອິດ, ເຂົາເຈົ້າກໍໄດ້ “ໂຍນກອກຢາ ແລະ ປ່ຽງຢາດູດໃສ່ກອງໄຟທັນທີ” (Saints, 1:168). ໃນເວລານັ້ນ, ພຣະວາຈາແຫ່ງປັນຍາ ຖືກນັບຖືວ່າເປັນຄຳເຕືອນຫລາຍກວ່າເປັນພຣະບັນຍັດ, ແຕ່ເຂົາເຈົ້າຢາກສະແດງຄວາມເຕັມໃຈທີ່ຈະເຊື່ອຟັງ. ບາງເທື່ອທ່ານເຄີຍ “ໄດ້ໂຍນ” ສິ່ງທີ່ພຣະວາຈາແຫ່ງປັນຍາເຕືອນຕ້ານ ອອກໄປຈາກຊີວິດຂອງທ່ານມາແລ້ວ, ແຕ່ທ່ານສາມາດຮຽນຮູ້ສິ່ງໃດແດ່ຕື່ມອີກ ຈາກການເປີດເຜີຍນີ້? ໃຫ້ພິຈາລະນາແນວຄິດເຫລົ່ານີ້:

ຊອກຫາສຳນວນທີ່ທ່ານອາດບໍ່ໄດ້ສັງເກດ—ຫລື ບໍ່ຄິດຫຍັງຫລາຍກັບມັນ—ມາກ່ອນ. ທ່ານຮຽນຮູ້ຫຍັງແດ່ຈາກສຳນວນເຫລົ່ານັ້ນ?
ຄຳສອນ ແລະ ພັນທະສັນຍາ 89 ບັນຈຸຄຳສັນຍາຫລາຍຢ່າງ (ເບິ່ງ ຂໍ້ທີ 18–21). ທ່ານຄິດວ່າ ຄຳສັນຍາເຫລົ່ານີ້ ໝາຍຄວາມວ່າແນວໃດ?
ການເປີດເຜີຍນີ້ສິດສອນທ່ານຫຍັງແດ່ກ່ຽວກັບພຣະຜູ້ເປັນເຈົ້າ?
ມີຕົວຢ່າງໃດແດ່ທີ່ທ່ານໄດ້ເຫັນກ່ຽວກັບ “ຄວາມຊົ່ວຮ້າຍ ແລະ ແຜນການ … ໃນຫົວໃຈຂອງມະນຸດ ທີ່ວາງແຜນຮ້າຍ”? (ຂໍ້ທີ 4).
ໃຫ້ຄິດວ່າ ການເປີດເຜີຍເປັນ “ຫລັກທຳພ້ອມດ້ວຍຄຳສັນຍາ” (ຂໍ້ທີ 3)—ເປັນຄວາມຈິງທີ່ຍືນຍົງ ຊຶ່ງນຳພາເລື່ອງການຕັດສິນໃຈ—ບໍ່ແມ່ນພຽງແຕ່ເປັນລາຍການທີ່ຕ້ອງເຮັດ ແລະ ບໍ່ເຮັດເທົ່ານັ້ນ. ຫລັກທຳໃດແດ່ທີ່ທ່ານພົບເຫັນວ່າ ສາມາດນຳພາທ່ານໃນການຕັດສິນໃຈຂອງທ່ານ?

ສາດສະດາໃນສະໄໝໃໝ່ກໍໄດ້ເຕືອນຄືກັນ ເຖິງສິ່ງຕ່າງໆທີ່ອັນຕະລາຍ ແລະ ການປະພຶດທີ່ນອກເໜືອໄປຈາກສິ່ງທີ່ຖືກກ່າວເຖິງຢູ່ໃນ ພຣະວາຈາແຫ່ງປັນຍາ (ເບິ່ງ “ສຸຂະພາບທາງຮ່າງກາຍ ແລະ ຈິດໃຈ,” ສຳລັບຄວາມເຂັ້ມແຂງຂອງຊາວໜຸ່ມ, 25–27). ທ່ານຖືກກະຕຸ້ນໃຫ້ເຮັດຫຍັງ ເພື່ອຮັກສາຈິດໃຈ ແລະ ຮ່າງກາຍຂອງທ່ານໃຫ້ດີກວ່າເກົ່າ?

ເບິ່ງ ດານີເອນ 1; 1 ໂກຣິນໂທ 6:19–20 ນຳອີກ.

ພຣະວາຈາແຫ່ງປັນຍາສິດສອນເຮົາໃຫ້ດູແລຮ່າງກາຍຂອງເຮົາ.

ຄຳສອນ ແລະ ພັນທະສັນຍາ 90:1–17

ຝ່າຍປະທານສູງສຸດດຳລົງ “ຂໍກະແຈຂອງອານາຈັກ.”

ໃນ ພາກທີ 90, ພຣະຜູ້ເປັນເຈົ້າໄດ້ໃຫ້ຄຳແນະນຳກ່ຽວກັບ “ການປະຕິບັດສາດສະໜາກິດ ແລະ ໃນການເປັນຝ່າຍປະທານ” (ຂໍ້ທີ 12) ຂອງໂຈເຊັບ ສະມິດ, ຊິດນີ ຣິກດອນ, ແລະ ເຟຣ໌ເດຣິກ ຈີ ວິວລຽມສ໌—ສະມາຊິກຂອງກຸ່ມທີ່ເຮົາເອີ້ນໃນປະຈຸບັນນີ້ວ່າ ຝ່າຍປະທານສູງສຸດ. ທ່ານຮຽນຮູ້ຫຍັງແດ່ກ່ຽວກັບຝ່າຍປະທານສູງສຸດຈາກ ຂໍ້ທີ 1–17? ໃຫ້ທົບທວນຂ່າວສານເມື່ອບໍ່ດົນມານີ້ ຈາກສະມາຊິກຂອງຝ່າຍປະທານສູງສຸດ. ຖ້ອຍຄຳຂອງພວກເພິ່ນ “ເປີດເຜີຍເຖິງຄວາມລຶກລັບຂອງອານາຈັກ” ແກ່ທ່ານແນວໃດ? (ຂໍ້ທີ 14). ພວກເພິ່ນ “ຈັດຕັ້ງພາລະກິດທັງໝົດຂອງສາດສະໜາຈັກ ແລະ ອານາຈັກໃຫ້ເປັນລະບຽບ” ແນວໃດ? (ຂໍ້ທີ 16).

ເບິ່ງ Henry B. Eyring, “The Power of Sustaining Faith,” Ensign ຫລື Liahona, May 2019, 58–60 ນຳອີກ.

ຄຳສອນ ແລະ ພັນທະສັນຍາ 90:24

“ທຸກສິ່ງທັງປວງຈະທຳງານນຳກັນໄປເພື່ອຄວາມດີ [ຂອງເຮົາ].”

ໃຫ້ໄຕ່ຕອງປະສົບການໃດໜຶ່ງທີ່ທ່ານເຄີຍມີ ຊຶ່ງເປັນພະຍານເຖິງຄຳສັນຍາຂອງພຣະຜູ້ເປັນເຈົ້າ ຢູ່ໃນ ຄຳສອນ ແລະ ພັນທະສັນຍາ 90:24. ໃຫ້ຄິດທີ່ຈະບັນທຶກປະສົບການຂອງທ່ານໄວ້ ແລະ ແບ່ງປັນມັນກັບສະມາຊິກໃນຄອບຄົວ ຫລື ຄົນທີ່ທ່ານຮັກ—ບາງທີກັບບາງຄົນທີ່ຕ້ອງການຄວາມໝັ້ນໃຈ ຫລື ກຳລັງໃຈ. ຖ້າຫາກມີພອນໃດທີ່ທ່ານຍັງລໍຖ້າຢູ່, ໃຫ້ໄຕ່ຕອງສິ່ງທີ່ທ່ານສາມາດເຮັດ ເພື່ອຄົງຢູ່ຢ່າງຊື່ສັດ ຂະນະທີ່ທ່ານລໍຖ້າທີ່ຈະໄດ້ເຫັນວິທີທີ່ “ທຸກສິ່ງທັງປວງຈະທຳງານນຳກັນໄປເພື່ອຄວາມດີຂອງ [ທ່ານ].”

ຄຳສອນ ແລະ ພັນທະສັນຍາ 90:28–31

ວີແອນນາ ແຈ໊ກກີ ແມ່ນໃຜ?

ວີແອນນາ ແຈ໊ກກີ ໄດ້ເກີດໃນວັນທີ 10 ເດືອນມິຖຸນາ, 1787, ໃນລັດມາສາຊູເສດສ໌. ເປັນຜູ້ຍິງແຫ່ງສັດທາ ທີ່ມີຊັບສິນຫລາຍ, ນາງວີແອນນາໄດ້ພົບກັບຜູ້ສອນສາດສະໜາ ເປັນເທື່ອທຳອິດ ໃນປີ 1831. ຫລັງຈາກທີ່ໄດ້ຮັບການເປັນພະຍານທາງວິນຍານ ວ່າຂ່າວສານຂອງເຂົາເຈົ້າເປັນຄວາມຈິງ, ນາງຈຶ່ງໄດ້ເດີນທາງໄປພົບກັບສາດສະດາ ໃນເມືອງເຄີດແລນ, ລັດໂອໄຮໂອ, ບ່ອນທີ່ນາງໄດ້ຮັບບັບຕິສະມາ.

ນາງວີແອນນາໄດ້ເຊື່ອຟັງຄຳແນະນຳຂອງພຣະຜູ້ເປັນເຈົ້າແກ່ນາງ ຢູ່ໃນ ຄຳສອນ ແລະ ພັນທະສັນຍາ 90:28–31. ການອຸທິດຖວາຍຂອງນາງໃຫ້ແກ່ພຣະຜູ້ເປັນເຈົ້າ, ລວມທັງການບໍລິຈາກທີ່ນາງໄດ້ມອບໃຫ້ກ່ອນແລ້ວ ຢູ່ໃນເມືອງເຄີດແລນ, ໄດ້ເກີດຂຶ້ນໃນເວລາທີ່ສຳຄັນສຳລັບສາດສະໜາຈັກ, ຕອນທີ່ຜູ້ນຳພະຍາຍາມທີ່ຈະຊື້ທີ່ດິນ ບ່ອນທີ່ພຣະວິຫານເຄີດແລນ ຈະຖືກສ້າງຂຶ້ນ. ນາງວີແອນນາໄດ້ “ຊື່ສັດ, ແລະ ບໍ່ … ກຽດຄ້ານ” ຕະຫລອດຊີວິດຂອງນາງ ແລະ ໃນທີ່ສຸດກໍສາມາດ “ຕັ້ງຖິ່ນຖານຢ່າງສັນຕິ” (ຂໍ້ທີ 31) ຢູ່ໃນຮ່ອມພູເຊົາເລັກ, ບ່ອນທີ່ນາງໄດ້ເສຍຊີວິດ ຕອນມີອາຍຸ 96 ປີ.

ຮູບພາບ

ຮູບເຄື່ອງໝາຍການສຶກສາເປັນຄອບຄົວ

ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ

ຄຳສອນ ແລະ ພັນທະສັນຍາ 89.ສະມາຊິກໃນຄອບຄົວຂອງທ່ານອາດມັກແຕ້ມຮູບ ຫລື ຊອກຫາຮູບອາຫານ ແລະ ສິ່ງຂອງຢ່າງອື່ນໆ ທີ່ກ່າວເຖິງຢູ່ໃນ ຄຳສອນ ແລະ ພັນທະສັນຍາ 89. ແລ້ວທ່ານສາມາດຫລິ້ນເກມ—ສະມາຊິກໃນຄອບຄົວສາມາດປ່ຽນຜຽນກັນເລືອກເອົາຮູບໃດຮູບໜຶ່ງ, ຖິ້ມຮູບທີ່ເຮົາບໍ່ຄວນໃຊ້ລົງໃນກະໂລ່ງຂີ້ເຫຍື້ອ ແລະ ເອົາສິ່ງທີ່ເຮົາຄວນໃຊ້ ວາງໃສ່ຈານ. ຄຳສັນຍາຢູ່ໃນ ຂໍ້ທີ 18–21 ໄດ້ເກີດຂຶ້ນຢູ່ໃນຊີວິດຂອງເຮົາແນວໃດ?

ການອ່ານ “ສຸຂະພາບທາງຮ່າງກາຍ ແລະ ຈິດໃຈ” ຢູ່ໃນປຶ້ມ ສຳລັບຄວາມເຂັ້ມແຂງຂອງຊາວໜຸ່ມ (25–27) ສາມາດກະຕຸ້ນການສົນທະນາກ່ຽວກັບວິທີອື່ນໆ ທີ່ຈະດູແລສຸຂະພາບ ແລະ ກ່ຽວກັບພອນທີ່ພຣະເຈົ້າສັນຍາ.

ຄຳສອນ ແລະ ພັນທະສັນຍາ 90:5.ໃຫ້ເວົ້າລົມກັນເຖິງວິທີທີ່ພວກທ່ານ “ຮັບການເປີດເຜີຍຈາກ [ສາດສະດາ] ຂອງພຣະເຈົ້າ” ແນວໃດ. ເຮົາຈະສະແດງວ່າ ການເປີດເຜີຍບໍ່ໄດ້ເປັນ “ເລື່ອງເລັກນ້ອຍ” ຕໍ່ເຮົາແນວໃດ?

ຄຳສອນ ແລະ ພັນທະສັນຍາ 91.ພວກທ່ານຄວນສົນທະນາເລື່ອງຄຳແນະນຳຂອງພຣະຜູ້ເປັນເຈົ້າກ່ຽວກັບ ອາພໍກະຣາຟາ (ເບິ່ງ ຂໍ້ທີ 1–2) ກ່ຽວຂ້ອງກັບສື່ມວນຊົນທີ່ຄອບຄົວຂອງທ່ານປະເຊີນໃນທຸກວັນນີ້ແນວໃດ (ເບິ່ງ ຄູ່ມືພຣະຄຳພີ, “ອາພໍກະຣາຟາ,” scriptures.ChurchofJesusChrist.org ນຳອີກ). ທ່ານກໍສາມາດແບ່ງປັນປະສົບການນຳອີກ ເມື່ອ “ຄວາມສະຫວ່າງໂດຍພຣະວິນຍານ” (ຂໍ້ທີ 5) ໄດ້ຊ່ວຍທ່ານເບິ່ງອອກລະຫວ່າງຄວາມຈິງ ແລະ ຄວາມບໍ່ຈິງ.

ຄຳສອນ ແລະ ພັນທະສັນຍາ 92:2.ການເປັນ “ສະມາຊິກທີ່ເຂັ້ມແຂງ” ຂອງສາດສະໜາຈັກ ໝາຍຄວາມວ່າແນວໃດ?

ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.

ເພງແນະນຳ: “ພຣະເຈົ້າມອບພຣະວິຫານແກ່ເຮົາ,” ເພງສວດ ແລະ ເພງຂອງເດັກນ້ອຍ, 68.

ການປັບປຸງການສິດສອນຂອງເຮົາ

ໃຊ້ຫລາຍສິ່ງ. ໃຫ້ຊອກຫາຫລາຍວິທີທາງທີ່ຈະໃຫ້ຄອບຄົວຂອງທ່ານສົນໃຈກັບການສຶກສາພຣະຄຳພີເປັນຄອບຄົວ. ຍົກຕົວຢ່າງ, ສະມາຊິກໃນຄອບຄົວສາມາດຮ້ອງເພງສວດ ຫລື ເພງຂອງເດັກນ້ອຍ ທີ່ກ່ຽວຂ້ອງກັບຂໍ້ນີ້, ແຕ້ມຮູບຕາມສິ່ງທີ່ເຂົາເຈົ້າໄດ້ອ່ານ, ຫລື ກ່າວສະຫລຸບຂໍ້ນີ້ ດ້ວຍຖ້ອຍຄຳຂອງຕົວເອງ.