“ວັນທີ 12–18 ເດືອນກໍລະກົດ. ຄຳສອນ ແລະ ພັນທະສັນຍາ 77–80: ‘ເຮົາຈະນຳພາເຈົ້າໄປ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 12–18 ເດືອນກໍລະກົດ. ຄຳສອນ ແລະ ພັນທະສັນຍາ 77–80,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
Going Home [ເດີນທາງກັບບ້ານ], ໂດຍ ຢອງຊຸງ ຄິມ
ວັນທີ 12–18 ເດືອນກໍລະກົດ
ຄຳສອນ ແລະ ພັນທະສັນຍາ 77–80
“ເຮົາຈະນຳພາເຈົ້າໄປ”
ພຣະຜູ້ເປັນເຈົ້າໄດ້ບອກໂຈເຊັບ ສະມິດ ວ່າພຣະອົງຈະ “ກ່າວຄຳແຫ່ງປັນຍາໃສ່ຫູ [ຂອງເພິ່ນ]” (ຄຳສອນ ແລະ ພັນທະສັນຍາ 78:2). ຄຳແຫ່ງປັນຍາຢ່າງໃດ ທີ່ທ່ານໄດ້ຮັບຂະນະທີ່ທ່ານສຶກສາ ຄຳສອນ ແລະ ພັນທະສັນຍາ 77–80?
ບັນທຶກຄວາມປະທັບໃຈຂອງທ່ານ
ໜ້ອຍກວ່າສອງປີ ຫລັງຈາກສາດສະໜາຈັກຂອງພຣະເຢຊູຄຣິດໄດ້ຖືກຟື້ນຟູ, ມັນໄດ້ເຕີບໂຕ ມີສະມາຊິກຫລາຍກວ່າ 2,000 ຄົນ ແລະ ໄດ້ຂະຫຍາຍອອກຢ່າງໄວ. ໃນເດືອນມີນາ ປີ 1832 ໂຈເຊັບ ສະມິດ ໄດ້ພົບກັບຜູ້ນຳຂອງສາດສະໜາຈັກຄົນອື່ນໆ “ເພື່ອສົນທະນາກ່ຽວກັບທຸລະກິດຂອງສາດສະໜາຈັກ”: ຄວາມຈຳເປັນຕ້ອງຈັດພິມການເປີດເຜີຍ, ການຊື້ທີ່ດິນເພື່ອເຕົ້າໂຮມ, ແລະ ການດູແລຄົນຍາກຈົນ (ເບິ່ງ ຄຳສອນ ແລະ ພັນທະສັນຍາ 78, ຫົວຂໍ້ພາກ). ເພື່ອສະໜອງຄວາມຕ້ອງການເຫລົ່ານີ້, ພຣະຜູ້ເປັນເຈົ້າຈຶ່ງໄດ້ເອີ້ນຜູ້ນຳຂອງສາດສະໜາຈັກຈຳນວນໜ້ອຍໜຶ່ງ ໃຫ້ຈັດຕັ້ງກຸ່ມທຸລະກິດເອກະພາບຂຶ້ນ, ເປັນກຸ່ມທີ່ຮ່ວມມືກັນໃນ “ອຸດົມການກ້າວໄປໜ້າ” ຂອງພຣະຜູ້ເປັນເຈົ້າ (ຂໍ້ທີ 4) ຢູ່ໃນເຂດເຫລົ່ານີ້. ແຕ່ເຖິງແມ່ນໃນການບໍລິຫານງານເຊັ່ນນັ້ນ, ພຣະຜູ້ເປັນເຈົ້າຍັງເອົາໃຈໃສ່ຕໍ່ສິ່ງທີ່ເປັນນິລັນດອນ. ໃນທີ່ສຸດ, ຈຸດປະສົງຂອງການມີໂຮງພິມ ຫລື ມີຮ້ານຄ້າ—ຄືກັນກັບທຸກສິ່ງອື່ນໆໃນອານາຈັກຂອງພຣະເຈົ້າ—ແມ່ນເປັນການກະກຽມລູກໆຂອງພຣະອົງ ເພື່ອຮັບເອົາ “ສະຖານທີ່ໃນໂລກຊັ້ນສູງ” ແລະ “ຄວາມຮັ່ງມີແຫ່ງຊົ່ວນິລັນດອນ” (ຂໍ້ທີ 7, 18). ແລະ ຖ້າຫາກພອນເຫລົ່ານັ້ນເປັນເລື່ອງຍາກທີ່ຈະເຂົ້າໃຈໄດ້ໃນເວລານີ້, ໃນທ່າມກາງຄວາມຫຍຸ້ງເຫຍີງຂອງຊີວິດປະຈຳວັນ, ພຣະອົງຍັງຮັບຮອງວ່າ, “ຈົ່ງເບີກບານເຖີດ, ເພາະເຮົາຈະນຳພາເຈົ້າໄປ” (ຂໍ້ທີ 18).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ພຣະເຈົ້າເປີດເຜີຍຄວາມລຶກລັບຂອງພຣະອົງຕໍ່ຜູ້ທີ່ສະແຫວງຫາທີ່ຈະຮູ້ຄວາມລຶກລັບ.
ສິບສອງປີຫລັງຈາກພາບທີ່ມາໃຫ້ເຫັນຄັ້ງທຳອິດ, ຄຳເຊື້ອເຊີນຢູ່ໃນ ຢາໂກໂບ 1:5 ໃຫ້ “ທູນຂໍຈາກພຣະເຈົ້າ” ຍັງສືບຕໍ່ນຳພາໂຈເຊັບ ສະມິດ ເມື່ອເພິ່ນຂາດສະຕິປັນຍາ. ເມື່ອເພິ່ນ ແລະ ຊິດນີ ຣິກດອນ ມີຄຳຖາມກ່ຽວກັບປຶ້ມພຣະບັນຍັດ ຂະນະທີ່ພວກເພິ່ນທຳງານແປພຣະຄຣິສຕະທຳຄຳພີ ທີ່ໄດ້ຮັບການດົນໃຈ, ຕາມປົກກະຕິແລ້ວ ໂຈເຊັບໄດ້ສະແຫວງຫາສະຕິປັນຍາຈາກພຣະເຈົ້າ. ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 77, ໃຫ້ຄິດທີ່ຈະບັນທຶກຄວາມຮູ້ຂອງທ່ານ ຢູ່ໃນບົດທີ່ກ່ຽວຂ້ອງ ຢູ່ໃນປຶ້ມພຣະບັນຍັດ.
ນອກເໜືອຈາກນັ້ນ, ໃຫ້ໄຕ່ຕອງວິທີທີ່ທ່ານສາມາດເຮັດຕາມຕົວຢ່າງຂອງສາດສະດາໂຈເຊັບ ເມື່ອທ່ານສຶກສາພຣະຄຳພີ. ທ່ານສາມາດທູນຖາມພຣະບິດາເທິງສະຫວັນວ່າ, “ຂ້ານ້ອຍຕ້ອງເຂົ້າໃຈສິ່ງໃດ?”
Translation of the Bible [ການແປພຣະຄຣິສຕະທຳຄຳພີ], ໂດຍ ລີສ໌ ລີມັນ ສະວິນໂດ
ກຸ່ມທຸລະກິດເອກະພາບ ຄືຫຍັງ?
ກຸ່ມທຸລະກິດເອກະພາບໄດ້ຖືກຈັດຕັ້ງຂຶ້ນເພື່ອຄວບຄຸມການຈັດພິມ ແລະ ທຸລະກິດຂອງສາດສະໜາຈັກ ຢູ່ໃນລັດໂອໄຮໂອ ແລະ ລັດມີເຊີຣີ. ກຸ່ມນີ້ຮ່ວມດ້ວຍ ໂຈເຊັບ ສະມິດ, ນິວເອັນ ເຄ ວິດນີ, ແລະ ຜູ້ນຳຂອງສາດສະໜາຈັກຄົນອື່ນ ໄດ້ເອົາຊັບສິນມາລວມເຂົ້າກັນ ເພື່ອສະໜອງຄວາມຕ້ອງການທາງໂລກ ຂອງສາດສະໜາຈັກທີ່ກຳລັງເຕີບໂຕຂຶ້ນ. ໜ້າເສຍໃຈທີ່ກຸ່ມທຸລະກິດເອກະພາບໄດ້ຕົກຢູ່ໃນສະພາບທີ່ມີໜີ້ສິນ ແລະ ຍຸບໄປ ໃນປີ 1834 ເມື່ອບໍ່ສາມາດຄວບຄຸມໜີ້ສິນໄດ້.
ຄຳສອນ ແລະ ພັນທະສັນຍາ 78:1–7
ເຮົາສາມາດຊ່ວຍໃຫ້ “ອຸດົມການຂອງສາດສະໜາຈັກກ້າວໄປໜ້າ”.
ພຣະຜູ້ເປັນເຈົ້າໄດ້ບອກໂຈເຊັບ ສະມິດ ແລະ ຜູ້ນຳຂອງສາດສະໜາຈັກຄົນອື່ນໆວ່າ ການຄວບຄຸມຮ້ານຄ້າ ແລະ ໂຮງພິມ ຈະຊ່ວຍ “ໃຫ້ອຸດົມການກ້າວໄປໜ້າ, ຊຶ່ງເຈົ້າໄດ້ສະໜັບສະໜູນ” (ຄຳສອນ ແລະ ພັນທະສັນຍາ 78:4). ທ່ານວ່າ ແມ່ນຫຍັງຄື “ອຸດົມການ” ຂອງສາດສະໜາຈັກ? ໃຫ້ໄຕ່ຕອງເລື່ອງນີ້ ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 78:1–7. ບາງທີການຄິດກ່ຽວກັບຂໍ້ເຫລົ່ານີ້ ສາມາດມີອິດທິພົນຕໍ່ວິທີທີ່ທ່ານຈະບັນລຸການເອີ້ນຂອງທ່ານໃນສາດສະໜາຈັກ ຫລື ການຮັບໃຊ້ຄອບຄົວຂອງທ່ານ. ການຮັບໃຊ້ຂອງທ່ານ ຊ່ວຍໃຫ້ “ອຸດົມການຂອງພຣະຜູ້ເປັນເຈົ້າກ້າວໄປໜ້າ” ແນວໃດ? ການກະກຽມຕົວທ່ານສຳລັບ “ສະຖານທີ່ໃນໂລກຊັ້ນສູງ” ເປັນຈັ່ງໃດ? (ຂໍ້ທີ 7).
ຄຳສອນ ແລະ ພັນທະສັນຍາ 78:17–22
ພຣະຜູ້ເປັນເຈົ້າຈະນຳພາເຮົາໄປ.
ທ່ານເຄີຍຮູ້ສຶກຄືກັນກັບເດັກນ້ອຍໆຢູ່ບໍ, ບາງທີເປັນເພາະບາງສິ່ງທີ່ທ່ານ “ຍັງບໍ່ເຂົ້າໃຈ” ຫລື “ບໍ່ສາມາດທົນຕໍ່”? (ຄຳສອນ ແລະ ພັນທະສັນຍາ 78:17–18). ໃຫ້ຊອກຫາຄຳແນະນຳຢູ່ໃນຂໍ້ເຫລົ່ານີ້ ທີ່ສາມາດຊ່ວຍທ່ານໃຫ້ “ເບີກບານ” (ຂໍ້ທີ 18) ໃນເວລາເຊັ່ນນັ້ນ. ທ່ານຄິດວ່າເປັນຫຍັງບາງເທື່ອພຣະຜູ້ເປັນເຈົ້າຈຶ່ງເອີ້ນຜູ້ຕິດຕາມພຣະອົງວ່າ “ເດັກນ້ອຍໆ”? (ຂໍ້ທີ 17). ທ່ານກໍສາມາດໄຕ່ຕອງເຖິງວິທີທີ່ພຣະຜູ້ເປັນເຈົ້າ ອາດ “ນຳພາທ່ານໄປ” ແນວໃດ (ຂໍ້ທີ 18).
ຄຳສອນ ແລະ ພັນທະສັນຍາ 79–80
ການເອີ້ນໃຫ້ຮັບໃຊ້ພຣະເຈົ້າ ມີຄວາມສຳຄັນຫລາຍກວ່າບ່ອນທີ່ເຮົາຮັບໃຊ້.
ກ່ຽວກັບ ຄຳສອນ ແລະ ພັນທະສັນຍາ 80, ແອວເດີ ເດວິດ ເອ ແບ໊ດນາ ໄດ້ສິດສອນວ່າ, “ບາງເທື່ອ ບົດຮຽນຢ່າງໜຶ່ງທີ່ພຣະຜູ້ຊ່ວຍໃຫ້ລອດກຳລັງສອນເຮົາຢູ່ໃນການເປີດເຜີຍນີ້ ຄືການມອບໝາຍໃຫ້ອອກແຮງງານໃນເຂດໃດເຂດໜຶ່ງໂດຍສະເພາະນັ້ນກໍຈຳເປັນ ແລະ ສຳຄັນ ແຕ່ເປັນສິ່ງສຳຄັນອັນດັບສອງຮອງການເອີ້ນສູ່ວຽກງານ” (“Called to the Work,” Ensign ຫລື Liahona, May 2017, 68). ໃຫ້ຄິດກ່ຽວກັບການເອີ້ນໃນປະຈຸບັນ ແລະ ໃນອະດີດຂອງທ່ານ ໃນສາດສະໜາຈັກ. ມີປະສົບການໃດແດ່ທີ່ໄດ້ຊ່ວຍທ່ານໃຫ້ຮຽນຮູ້ວ່າ ຖ້ອຍຄຳຂອງແອວເດີ ແບ໊ດນາ ເປັນຄວາມຈິງ? ມີບົດຮຽນເພີ່ມເຕີມຢ່າງໃດແດ່ ທີ່ທ່ານພົບເຫັນ ຢູ່ໃນ ຄຳສອນ ແລະ ພັນທະສັນຍາ 79–80 ທີ່ສາມາດຊ່ວຍບາງຄົນຜູ້ຫາກໍໄດ້ຮັບການເອີ້ນ?
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 77:2.ຫລັງຈາກການອ່ານຂໍ້ນີ້, ສະມາຊິກໃນຄອບຄົວສາມາດແຕ້ມຮູບ ທີ່ເຂົາເຈົ້າມັກ ດັ່ງເຊັ່ນ “ສັດ, … ສິ່ງທີ່ໄຕ່, … [ຫລື] ນົກໃນອາກາດ” ທີ່ຖືກສ້າງຂຶ້ນໂດຍພຣະເຈົ້າ. ເຮົາຮຽນຮູ້ຫຍັງແດ່ກ່ຽວກັບການສ້າງຂອງພຣະເຈົ້າ ຈາກຂໍ້ນີ້? (ເບິ່ງ ຄຳສອນ ແລະ ພັນທະສັນຍາ 59:16–20 ນຳອີກ). ພວກທ່ານກໍສາມາດຮ້ອງເພງໜຶ່ງກ່ຽວກັບການສ້າງຂອງພຣະເຈົ້າ, ດັ່ງເຊັ່ນ “ອະທິຖານຄອບຄົວ” (ເພງສວດ ແລະ ເພງຂອງເດັກນ້ອຍ, 73), ແລະ ສະແດງຮູບພາບທີ່ມາກັບໂຄງຮ່າງນີ້.
-
ຄຳສອນ ແລະ ພັນທະສັນຍາ 77:14.ຂໍ້ນີ້ອະທິບາຍວ່າ ໂຢຮັນໄດ້ກິນປຶ້ມທີ່ເປັນຕົວແທນໃຫ້ແກ່ພາລະກິດຂອງເພິ່ນ ທີ່ຈະເຕົ້າໂຮມອິດສະຣາເອນ. ສັນຍາລັກຂອງການກິນ ແນະນຳກ່ຽວກັບວິທີທີ່ເຮົາຄວນເຂົ້າຫາບົດບາດຂອງເຮົາ ໃນການເຕົ້າໂຮມອິດສະຣາເອນ ຫລື ໃນການເຮັດສິ່ງອື່ນໆ ທີ່ພຣະຜູ້ເປັນເຈົ້າປະສົງໃຫ້ເຮົາເຮັດແນວໃດ? ຕໍ່ໄປນີ້ແມ່ນຂໍ້ພຣະຄຳພີຈຳນວນໜຶ່ງ ຊຶ່ງໃນນັ້ນການກິນໄດ້ຖືກໃຊ້ ເພື່ອສິດສອນເຖິງຄວາມຈິງທາງວິນຍານ: ໂຢຮັນ 6:48–51; 2 ນີໄຟ 32:3; ໂມໂຣໄນ 4. ບາງທີທ່ານສາມາດເຮັດອາຫານທີ່ຄອບຄົວມັກ ເພື່ອກິນນຳກັນ ລະຫວ່າງການສົນທະນາ.
-
ຄຳສອນ ແລະ ພັນທະສັນຍາ 78:17–19.ສະມາຊິກໃນຄອບຄົວສາມາດແຕ້ມຮູບ ເຖິງພອນທີ່ມາຈາກພຣະເຈົ້າ ທີ່ເຂົາເຈົ້າມີຄວາມຂອບຄຸນ. ເຮົາກຳລັງເຮັດສິ່ງໃດເພື່ອສະແດງໃຫ້ເຫັນເຖິງຄວາມຂອບຄຸນຂອງເຮົາສຳລັບພອນເຫລົ່ານີ້? ທ່ານກໍສາມາດສົນທະນາວິທີທີ່ຄອບຄົວຂອງທ່ານກຳລັງເຮັດຕາມຄຳແນະນຳ ໃຫ້ຮັບ “ທຸກສິ່ງທັງປວງດ້ວຍຄວາມຂອບຄຸນ” (ຂໍ້ທີ 19). ພຣະຜູ້ເປັນເຈົ້າສັນຍາຫຍັງແດ່ຕໍ່ຜູ້ທີ່ເຮັດ?
-
ຄຳສອນ ແລະ ພັນທະສັນຍາ 79:1.ໃຫ້ແບ່ງປັນປະຈັກພະຍານຂອງທ່ານເຖິງ “ອຳນາດ” ທີ່ທ່ານໄດ້ຮັບ ເມື່ອທ່ານຖືກແຕ່ງຕັ້ງ ຫລື ແຕ່ງຕັ້ງເປັນທາງການ ຕໍ່ການເອີ້ນໃນສາດສະໜາຈັກ. ຂອງປະທານ ແລະ ການດົນໃຈສະເພາະຢ່າງໃດແດ່ ທີ່ພຣະຜູ້ເປັນເຈົ້າ ປະທານໃຫ້ທ່ານ ຂະນະທີ່ທ່ານຮັບໃຊ້?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ນັບພຣະພອນຂອງທ່ານ,” ເພງສວດ ແລະ ເພງຂອງເດັກນ້ອຍ, 8.
ການປັບປຸງການສິດສອນຂອງເຮົາ
ແຕ້ມຮູບ. ນຳກັນເປັນຄອບຄົວ, ພວກທ່ານສາມາດອ່ານສອງສາມຂໍ້ ແລະ ແລ້ວປ່ອຍໃຫ້ສະມາຊິກໃນຄອບຄົວແຕ້ມບາງສິ່ງທີ່ກ່ຽວພັນກັບສິ່ງທີ່ພວກທ່ານໄດ້ອ່ານ. ສະແດງຮູບໄວ້ຫລາຍບ່ອນຢູ່ໃນເຮືອນຂອງທ່ານ ເພື່ອເຕືອນຄອບຄົວຂອງທ່ານເຖິງຫລັກທຳທີ່ພວກທ່ານໄດ້ຮຽນຮູ້.
God’s Garden [ອຸດທະຍານຂອງພຣະເຈົ້າ], ໂດຍ ແຊມ ລໍເລີ