“ວັນທີ 3–9 ເດືອນພຶດສະພາ. ຄຳສອນ ແລະ ພັນທະສັນຍາ 46–48: ‘ຈົ່ງສະແຫວງຫາຂອງປະທານທີ່ດີທີ່ສຸດຢ່າງຕັ້ງໃຈ,’” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ວັນທີ 3–9 ເດືອນພຶດສະພາ. ຄຳສອນ ແລະ ພັນທະສັນຍາ 46–48,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
The Camp Meeting [ການປະຊຸມຢູ່ຄ້າຍ], ໂດຍ ເວີດທິງຕັນ ວິດເດຼດ
ວັນທີ 3–9 ເດືອນພຶດສະພາ
ຄຳສອນ ແລະ ພັນທະສັນຍາ 46–48
“ຈົ່ງສະແຫວງຫາຂອງປະທານທີ່ດີທີ່ສຸດຢ່າງຕັ້ງໃຈ”
ຂະນະທີ່ທ່ານອ່ານ ຄຳສອນ ແລະ ພັນທະສັນຍາ 46–48, ໃຫ້ບັນທຶກຄວາມປະທັບໃຈທີ່ທ່ານໄດ້ຮັບ. ແລ້ວ ທ່ານຄວນຖາມ, ດັ່ງທີ່ແອວເດີ ຣິເຈີດ ຈີ ສະກາດ ໄດ້ແນະນຳ, “ຍັງມີຫຍັງຕື່ມອີກທີ່ຂ້າພຣະອົງຄວນຮູ້?” (“To Acquire Spiritual Guidance” Ensign ຫລື Liahona, Nov. 2009, 8).
ບັນທຶກຄວາມປະທັບໃຈຂອງທ່ານ
ຂະນະທີ່ ພາລີ ພີ ພະແຣັດ, ອໍລີເວີ ຄາວເດີຣີ, ຊີບາ ພີເຕີສັນ, ແລະ ພີເຕີ ວິດເມີ ຜູ້ລູກ ອອກຈາກເມືອງເຄີດແລນ ໄປຫາສະຖານທີ່ທຳງານແຫ່ງອື່ນໆ, ພວກເພິ່ນໄດ້ປະຜູ້ປ່ຽນໃຈເຫລື້ອມໃສຫລາຍກວ່າໜຶ່ງຮ້ອຍຄົນໄວ້ຢູ່ທີ່ນັ້ນ ຜູ້ທີ່ເຕັມໄປດ້ວຍຄວາມກະຕືລືລົ້ນ ແຕ່ຂາດປະສົບການ ແລະ ການຊີ້ນຳ. ມັນບໍ່ມີປຶ້ມຄູ່ມືແນະນຳ, ບໍ່ມີການປະຊຸມອົບຮົມຜູ້ນຳ, ບໍ່ມີການຖ່າຍທອດກອງປະຊຸມໃຫຍ່ສາມັນ—ຕາມຈິງແລ້ວ, ມັນມີພຣະຄຳພີມໍມອນບໍ່ເທົ່າໃດເຫລັ້ມໃຫ້ຜູ້ຄົນອ່ານ. ຜູ້ທີ່ຫາກໍເຊື່ອຖືຫລາຍຄົນເຫລົ່ານີ້ໄດ້ຖືກພາມາຫາພຣະກິດຕິຄຸນທີ່ຖືກຟື້ນຟູ ໂດຍຄຳສັນຍາຂອງການສະແດງໃຫ້ປະຈັກທີ່ໜ້າອັດສະຈັນຂອງພຣະວິນຍານ, ໂດຍສະເພາະຜູ້ທີ່ຮູ້ກ່ຽວກັບເລື່ອງນີ້ ຈາກການສຶກສາພຣະຄຳພີໃໝ່ (ເບິ່ງ, ຍົກຕົວຢ່າງ, 1 ໂກຣິນໂທ 12:1–11). ບໍ່ດົນ, ກໍມີການນະມັດສະການທີ່ສະແດງອອກໃນທາງທີ່ຜິດປົກກະຕິ—ລວມທັງການລົ້ມລົງຢູ່ພື້ນດິນ ຫລື ການເລືອໄປແບບງູ—ໄດ້ຖືກນຳເຂົ້າສູ່ກອງປະຊຸມໂບດຂອງພວກເຂົາ. ຫລາຍຄົນພົບວ່າ ມັນຍາກທີ່ຈະເບິ່ງອອກວ່າ ການສະແດງໃຫ້ປະຈັກອັນໃດທີ່ເປັນຂອງພຣະວິນຍານ ແລະ ອັນໃດທີ່ບໍ່ໄດ້ເປັນ. ໂດຍທີ່ເຫັນຄວາມສັບສົນ, ໂຈເຊັບ ສະມິດ ຈຶ່ງໄດ້ອະທິຖານຂໍຄວາມຊ່ວຍເຫລືອ. ຄຳຕອບຂອງພຣະຜູ້ເປັນເຈົ້າ ແມ່ນມີຄ່າເທົ່າໆກັນໃນທຸກວັນນີ້, ເມື່ອຜູ້ຄົນປະຕິເສດ ຫລື ບໍ່ເອົາໃຈໃສ່ຕໍ່ສິ່ງທີ່ເປັນຂອງພຣະວິນຍານສະເໝີ. ພຣະຜູ້ເປັນເຈົ້າໄດ້ເປີດເຜີຍວ່າ ການສະແດງໃຫ້ປະຈັກທາງວິນຍານແມ່ນມີຈິງແທ້ ແລະ ຈະໃຫ້ຄວາມແຈ່ມແຈ້ງວ່າມັນແມ່ນຫຍັງ—ຂອງປະທານຈາກພຣະບິດາເທິງສະຫວັນທີ່ຊົງຮັກ, “ມອບໃຫ້ເພື່ອຜົນປະໂຫຍດຂອງຜູ້ທີ່ຮັກ [ພຣະອົງ] ແລະ ຮັກສາພຣະບັນຍັດທັງໝົດ [ຂອງພຣະອົງ]” (ຄຳສອນ ແລະ ພັນທະສັນຍາ 46:9).
ແນວຄິດສຳລັບການສຶກສາພຣະຄຳພີເປັນສ່ວນຕົວ
ຄຳສອນ ແລະ ພັນທະສັນຍາ 46:1–6
ຜູ້ທີ່ສະແຫວງຫາຢ່າງພາກພຽນທຸກຄົນ ຍິນດີຕ້ອນຮັບສູ່ການນະມັດສະການ ໃນສາດສະໜາຈັກຂອງພຣະຜູ້ເປັນເຈົ້າ.
ການປະຊຸມຂອງສາດສະໜາຈັກຂອງພຣະເຢຊູຄຣິດແຫ່ງໄພ່ພົນຍຸກສຸດທ້າຍ ຄວນເປັນໜຶ່ງໃນການເຕົ້າໂຮມຢ່າງອົບອຸ່ນ ແລະ ໃຫ້ການດົນໃຈຫລາຍທີ່ສຸດ ຢູ່ໃນໂລກ. ພຣະຜູ້ເປັນເຈົ້າແນະນຳພວກເຮົາແນວໃດ ຢູ່ໃນ ຄຳສອນ ແລະ ພັນທະສັນຍາ 46:1–6 ເພື່ອຮັບຕ້ອນຜູ້ທີ່ມາຮ່ວມການປະຊຸມຂອງພວກເຮົາ? ໝູ່ເພື່ອນ ແລະ ຜູ້ຄົນຢູ່ໃນຄຸ້ມບ້ານຂອງທ່ານ ຮູ້ສຶກອົບອຸ່ນຢູ່ບໍ ໃນພິທີນະມັດສະການຂອງຫວອດທ່ານ? ທ່ານເຮັດຫຍັງແດ່ເພື່ອເຮັດໃຫ້ການປະຊຸມໂບດຂອງພວກທ່ານເປັນບ່ອນທີ່ຜູ້ຄົນຢາກກັບຄືນມາ? ໃຫ້ໄຕ່ຕອງວິທີທີ່ທ່ານພະຍາຍາມ ທີ່ຈະເຮັດຕາມພຣະວິນຍານບໍລິສຸດ ຢູ່ໃນການປະຊຸມໂບດ ສາມາດເປັນຜົນກະທົບຕໍ່ປະສົບການຂອງທ່ານແນວໃດ.
ເບິ່ງ 3 ນີໄຟ 18:22–23; ໂມໂຣໄນ 6:5–9 ນຳອີກ.
ຄຳສອນ ແລະ ພັນທະສັນຍາ 46:7–33
ພຣະເຈົ້າໄດ້ມອບຂອງປະທານທາງວິນຍານ ເພື່ອເປັນພອນໃຫ້ແກ່ລູກໆຂອງພຣະອົງ.
ໄພ່ພົນລຸ້ນທຳອິດໄດ້ເຊື່ອໃນຂອງປະທານທາງວິນຍານ ແຕ່ຕ້ອງການ ການນຳພາກ່ຽວກັບຈຸດປະສົງຂອງ ຂອງປະທານເຫລົ່ານັ້ນ. ຂະນະທີ່ທ່ານສຶກສາກ່ຽວກັບຂອງປະທານແຫ່ງພຣະວິນຍານ ໂດຍໃຊ້ ຄຳສອນ ແລະ ພັນທະສັນຍາ 46:7–33, ໃຫ້ໄຕ່ຕອງເຖິງຄວາມສຳຄັນທີ່ທ່ານ “ຈື່ຈຳສະເໝີວ່າ ມັນຖືກມອບໃຫ້ເພື່ອສິ່ງໃດ” (ຂໍ້ທີ 8). ໃຫ້ພິຈາລະນາວິທີທີ່ຂໍ້ເຫລົ່ານີ້ກ່ຽວຂ້ອງກັບບົດຄວາມຂອງແອວເດີ ຣໍເບີດ ດີ ແຮວສ໌ ແນວໃດ ທີ່ວ່າ: “ຂອງປະທານເຫລົ່ານີ້ຖືກມອບໃຫ້ແກ່ຜູ້ທີ່ຊື່ສັດຕໍ່ພຣະຄຣິດ. ຂອງປະທານຈະຊ່ວຍເຮົາໃຫ້ຮູ້ ແລະ ສິດສອນຄວາມຈິງເຖິງພຣະກິດຕິຄຸນ. ຂອງປະທານຈະຊ່ວຍເຮົາໃຫ້ເປັນພອນແກ່ຄົນອື່ນ. ຂອງປະທານຈະນຳພາເຮົາກັບຄືນໄປຫາພຣະບິດາເທິງສະຫວັນ” (“Gifts of the Spirit,” Ensign, Feb. 2002, 16). ທ່ານຮຽນຮູ້ຫຍັງອີກແດ່ ຈາກຂໍ້ເຫລົ່ານີ້ ກ່ຽວກັບການສະແດງໃຫ້ປະຈັກທາງວິນຍານ? ຄວາມຈິງເຫລົ່ານີ້ຊ່ວຍທ່ານ “ບໍ່ [ໃຫ້] ຖືກຫລອກລວງ”? ແນວໃດ (ຂໍ້ທີ 8).
ໃຫ້ໄຕ່ຕອງວ່າ ຂອງປະທານທາງວິນຍານຄືຫຍັງ—ແລະ ວິທີທີ່ທ່ານສາມາດໃຊ້ມັນ “ເພື່ອຜົນປະໂຫຍດຂອງລູກໆຂອງພຣະເຈົ້າ” ແນວໃດ (ຂໍ້ທີ 26). ຖ້າຫາກທ່ານມີປິຕຸພອນ, ມັນອາດຈະບອກເຖິງຂອງປະທານທີ່ທ່ານໄດ້ຮັບ.
ພຣະຜູ້ເປັນເຈົ້າປະສົງໃຫ້ສາດສະໜາຈັກຂອງພຣະອົງບັນທຶກປະຫວັດສາດໄວ້.
ການເອີ້ນຂອງຈອນ ວິດເມີ ແມ່ນເພື່ອໃຫ້ຮັກສາປະຫວັດສາດຂອງສາດສະໜາຈັກ ສືບຕໍ່ປະເພນີຂອງການມີຜູ້ບັນທຶກ ຊຶ່ງທຳກັນມາເປັນເວລາດົນນານໃນບັນດາຜູ້ຄົນຂອງພຣະເຈົ້າ (ເບິ່ງ 2 ນີໄຟ 29:11–12; ໂມເຊ 6:5; ອັບຣາຮາມ 1:28, 31). ຕາມຈິງແລ້ວ, ຕຳແໜ່ງຂອງນັກປະຫວັດສາດ ແລະ ຜູ້ບັນທຶກຂອງສາດສະໜາຈັກ ກໍຍັງມີຢູ່ໃນທຸກວັນນີ້. ທ່ານຄິດວ່າເປັນຫຍັງການບັນທຶກປະຫວັດສາດ ຈຶ່ງສຳຄັນຫລາຍແທ້ໆຕໍ່ພຣະຜູ້ເປັນເຈົ້າ? ໃຫ້ໄຕ່ຕອງສິ່ງນີ້ ຂະນະທີ່ທ່ານອ່ານຄຳແນະນຳຂອງພຣະອົງ ຕໍ່ຈອນ ວິດເມີ ກ່ຽວກັບການມອບໝາຍນີ້ ຢູ່ໃນ ພາກທີ 47. ພ້ອມນີ້ ກໍໃຫ້ຄິດກ່ຽວກັບປະສົບການສ່ວນຕົວໃດໜຶ່ງນຳອີກ ທີ່ທ່ານຕ້ອງບັນທຶກໄວ້. ຍົກຕົວຢ່າງ, ພຣະຜູ້ເປັນເຈົ້າໄດ້ສິດສອນຫຍັງແກ່ທ່ານ ທີ່ທ່ານຢາກຮັກສາໄວ້?
ຂະນະທີ່ທ່ານໄຕ່ຕອງກ່ຽວກັບຄຳຖາມເຫລົ່ານີ້, ໃຫ້ພິຈາລະນາຄວາມຮູ້ນີ້ ຈາກແອວເດີ ມາລິນ ເຄ ເຈັນເຊັນ ແຫ່ງສາວົກເຈັດສິບ, ຜູ້ໄດ້ຮັບໃຊ້ເປັນນັກປະຫວັດສາດ ແລະ ຜູ້ບັນທຶກຂອງສາດສະໜາຈັກ ຈາກປີ 2005 ເຖິງປີ 2012:
“ພວກເຮົາຮັກສາບັນທຶກເພື່ອຊ່ວຍພວກເຮົາຈື່ຈຳ. … ພວກເຮົາມີຄວາມປາດຖະໜາທີ່ຈະຊ່ວຍເຫລືອສະມາຊິກຂອງສາດສະໜາຈັກ ໃຫ້ໄດ້ຮັບສິ່ງທີ່ດີເລີດ ທີ່ພຣະເຈົ້າໄດ້ກະທຳເພື່ອລູກໆຂອງພຣະອົງ. … ບົດຮຽນຈາກອະດີດຊ່ວຍເຮົາໃຫ້ສາມາດປະເຊີນກັບປະຈຸບັນຂອງເຮົາ ແລະ ໃຫ້ຄວາມຫວັງແກ່ເຮົາສຳລັບອະນາຄົດຂອງເຮົາ” (“There Shall Be a Record Kept among You,” Ensign, Dec. 2007, 28, 33).
ເພື່ອຮຽນຮູ້ຕື່ມອີກກ່ຽວກັບວຽກງານທີ່ກຳລັງເກີດຂຶ້ນຢູ່ໃນເວລານີ້ ພາຍໃຕ້ການຊີ້ນຳຂອງນັກປະຫວັດສາດຂອງສາດສະໜາຈັກ, ໃຫ້ເບິ່ງທີ່ history.ChurchofJesusChrist.org.
ຈອນ ວິດເມີ ໄດ້ຖືກເອີ້ນໃຫ້ບັນທຶກປະຫວັດສາດຂອງສາດສະໜາຈັກ.
ແນວຄິດສຳລັບການສຶກສາພຣະຄຳພີເປັນຄອບຄົວ ແລະ ການສັງສັນໃນຕອນແລງ
-
ຄຳສອນ ແລະ ພັນທະສັນຍາ 46:2–6.ເຮົາສາມາດເຮັດຫຍັງເປັນຄອບຄົວ ເພື່ອໃຫ້ແນ່ໃຈວ່າ ຄົນອື່ນຈະຮູ້ສຶກອົບອຸ່ນຢູ່ໃນການປະຊຸມໂບດຂອງພວກເຮົາ? (ເບິ່ງ 3 ນີໄຟ 18:22–23 ນຳອີກ). ຮູບພາບທີ່ມາກັບໂຄງຮ່າງນີ້ ສາມາດຕື່ມໃສ່ການສົນທະນານີ້.
-
ຄຳສອນ ແລະ ພັນທະສັນຍາ 46:7–26.ຂອງປະທານທາງວິນຍານຢ່າງໃດແດ່ທີ່ເຮົາເຫັນຢູ່ໃນກັນແລະກັນ? ຂອງປະທານເຫລົ່ານັ້ນສາມາດເປັນພອນໃຫ້ແກ່ຄອບຄົວຂອງເຮົາແນວໃດ?
-
ຄຳສອນ ແລະ ພັນທະສັນຍາ 47.ທ່ານຈະຊຸກຍູ້ຄອບຄົວຂອງທ່ານໃຫ້ບັນທຶກປະຫວັດສ່ວນຕົວຕະຫລອດອາທິດນີ້ໄດ້ແນວໃດ? ທ່ານສາມາດແບ່ງປັນບາງຢ່າງຈາກບັນທຶກສ່ວນຕົວຂອງທ່ານ ຫລື ແບ່ງປັນເລື່ອງລາວກ່ຽວກັບບັນພະບຸລຸດຄົນໃດຄົນໜຶ່ງ (ເບິ່ງ FamilySearch.org). ບາງຄອບຄົວໄດ້ຈັດເວລາສີ່ຫ້ານາທີໄວ້ ໃນແຕ່ລະອາທິດ ເພື່ອໃຫ້ທຸກຄົນຂຽນເລື່ອງລາວໄວ້ໃນບັນທຶກສ່ວນຕົວຂອງເຂົາເຈົ້າ. ທ່ານອາດໃຫ້ແນວຄິດບາງຢ່າງ ໃນການບັນທຶກ, ດັ່ງເຊັ່ນ “ມີຫຍັງເກີດຂຶ້ນໃນອາທິດນີ້ ທີ່ເຈົ້າຢາກໃຫ້ລູກຫລານຮູ້ຈັກ?” ຫລື “ເຈົ້າໄດ້ເຫັນພຣະຫັດຂອງພຣະຜູ້ເປັນເຈົ້າ ຢູ່ໃນຊີວິດຂອງເຈົ້າແນວໃດ ໃນອາທິດນີ້?” ເດັກນ້ອຍສາມາດແຕ້ມຮູບກ່ຽວກັບປະສົບການຂອງພວກເຂົາ, ຫລື ທ່ານສາມາດອັດສຽງຂອງພວກເຂົາໄວ້ ຂະນະທີ່ພວກເຂົາເລົ່າເລື່ອງ. ພອນຢ່າງໃດແດ່ທີ່ມາຈາກການບັນທຶກ “ປະຫວັດສາດເປັນປະຈຳ”? (ຂໍ້ທີ 1).
-
ຄຳສອນ ແລະ ພັນທະສັນຍາ 48.ໄພ່ພົນຢູ່ໃນລັດໂອໄຮໂອ ໄດ້ຖືກບັນຊາໃຫ້ແບ່ງປັນທີ່ດິນຂອງຕົນໃຫ້ກັບຜູ້ທີ່ຍ້າຍມາຢູ່ລັດໂອໄຮໂອ ຈາກສະຫະລັດອາເມຣິກາພາກຕາເວັນອອກ. ເຮົາສາມາດແບ່ງປັນສິ່ງໃດ ເພື່ອສະໜອງຄວາມຕ້ອງການຂອງຄົນອື່ນ?
ສຳລັບແນວຄິດເພີ່ມເຕີມກ່ຽວກັບການສິດສອນເດັກນ້ອຍ, ໃຫ້ເບິ່ງ ໂຄງຮ່າງຂອງອາທິດນີ້ ຢູ່ໃນ ຈົ່ງຕາມເຮົາມາ—ສຳລັບຊັ້ນປະຖົມໄວ.
ເພງແນະນຳ: “ຄວາມເມດຕາເລີ່ມຈາກເຮົາ” (ເພງສວດ ແລະ ເພງຂອງເດັກນ້ອຍ, 69).
ການປັບປຸງການສິດສອນຂອງເຮົາ
ໃຊ້ເລື່ອງເລົ່າ ແລະ ຕົວຢ່າງ. ພຣະຜູ້ຊ່ວຍໃຫ້ລອດມັກໃຊ້ເລື່ອງເລົ່າ ແລະ ຄຳອຸປະມາ ເພື່ອສິດສອນຫລັກທຳພຣະກິດຕິຄຸນ. ໃຫ້ຄິດຫາຕົວຢ່າງ ແລະ ເລື່ອງເລົ່າຈາກຊີວິດຂອງທ່ານເອງ ທີ່ສາມາດເຮັດໃຫ້ຫລັກທຳພຣະກິດຕິຄຸນເປັນຕົນເປັນໂຕຂຶ້ນມາ ສຳລັບຄອບຄົວຂອງທ່ານ (ເບິ່ງ Teaching in the Savior’s Way, 22).
ພຣະບິດາເທິງສະຫວັນມອບຂອງປະທານທາງວິນຍານໃຫ້ແກ່ລູກໆຂອງພຣະອົງ ເພື່ອເປັນພອນໃຫ້ແກ່ຄົນອື່ນ.