“ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)

“ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021

ແນວຄິດເພື່ອປັບປຸງການສຶກສາພຣະຄຳພີເປັນຄອບຄົວຂອງທ່ານ

ການສຶກສາພຣະຄຳພີເປັນຄອບຄົວເປັນປະຈຳ ເປັນວິທີທາງທີ່ມີພະລັງ ທີ່ຈະຊ່ວຍຄອບຄົວຂອງທ່ານໃຫ້ຮຽນຮູ້ພຣະກິດຕິຄຸນ. ການອ່ານຫລາຍ ຫລື ການອ່ານດົນ ແມ່ນບໍ່ສຳຄັນເທົ່າກັບການໃຊ້ຄວາມພະຍາຍາມຢ່າງບໍ່ປ່ຽນແປງ. ເມື່ອທ່ານເຮັດໃຫ້ການສຶກສາພຣະຄຳພີເປັນພາກສ່ວນໜຶ່ງທີ່ສຳຄັນຂອງຊີວິດຄອບຄົວຂອງທ່ານ, ແລ້ວທ່ານຈະຊ່ວຍສະມາຊິກໃນຄອບຄົວຂອງທ່ານ ໃຫ້ເຂົ້າໃກ້ຊິດກັນແລະກັນ ແລະ ກັບພຣະເຢຊູຄຣິດຫລາຍຂຶ້ນ ແລະ ສ້າງປະຈັກພະຍານຂອງເຂົາເຈົ້າ ຢູ່ເທິງພື້ນຖານຂອງພຣະຄຳຂອງພຣະອົງ.

ໃຫ້ພິຈາລະນາຄຳຖາມດັ່ງຕໍ່ໄປນີ້:

ທ່ານຈະສາມາດຊຸກຍູ້ສະມາຊິກໃນຄອບຄົວໃຫ້ສຶກສາພຣະຄຳພີດ້ວຍຕົວເອງໄດ້ແນວໃດ?
ທ່ານສາມາດເຮັດຫຍັງແດ່ເພື່ອເຊື້ອເຊີນສະມາຊິກໃນຄອບຄົວໃຫ້ແບ່ງປັນສິ່ງທີ່ເຂົາເຈົ້າຮຽນຮູ້?
ທ່ານຈະສາມາດເນັ້ນໜັກຫລັກທຳທີ່ທ່ານໄດ້ຮຽນຮູ້ຢູ່ໃນຄຳສອນ ແລະ ພັນທະສັນຍາ ໃນຊ່ວງເວລາການສິດສອນແຕ່ລະວັນແນວໃດ?

ຈົ່ງຈື່ຈຳໄວ້ວ່າ ບ້ານເຮືອນເປັນສະຖານທີ່ ທີ່ດີເລີດສຳລັບການຮຽນຮູ້ພຣະກິດຕິຄຸນ. ທ່ານສາມາດຮຽນຮູ້ ແລະ ສິດສອນພຣະກິດຕິຄຸນຢູ່ທີ່ບ້ານ ໃນວິທີທາງທີ່ຫ້ອງຮຽນຂອງສາດສະໜາຈັກບໍ່ສາມາດເຮັດໄດ້. ໃຫ້ຮູ້ຈັກສ້າງສັນ ຂະນະທີ່ທ່ານຄິດຫາວິທີທາງ ທີ່ຈະຊ່ວຍເຫລືອຄອບຄົວຂອງທ່ານ ໃຫ້ຮຽນຮູ້ຈາກພຣະຄຳພີ.

ແນວຄິດສຳລັບກິດຈະກຳ

ໃຫ້ພິຈາລະນາແນວຄິດບາງຢ່າງດັ່ງຕໍ່ໄປນີ້ ເພື່ອສົ່ງເສີມການສຶກສາພຣະຄຳພີເປັນຄອບຄົວຂອງທ່ານ:

ໃຊ້ເພງ

ໃຫ້ຮ້ອງເພງທີ່ສະໜັບສະໜູນຫລັກທຳທີ່ສິດສອນຢູ່ໃນພຣະຄຳພີ. ເພງສວດ ແລະ ເພງຂອງເດັກນ້ອຍທີ່ແນະນຳ ໄດ້ຖືກລະບຸໄວ້ຢູ່ໃນໂຄງຮ່າງໃນແຕ່ລະອາທິດ. ທ່ານອາດຖາມຄຳຖາມກ່ຽວກັບຖ້ອຍຄຳ ຫລື ສຳນວນຂອງເນື້ອເພງ. ນອກເໜືອໄປຈາກການຮ້ອງເພງແລ້ວ, ຄອບຄົວຂອງທ່ານຍັງສາມາດສະແດງທ່າທີ່ເຂົ້າກັບເພງ ຫລື ຟັງເພງເບົາໆ ຂະນະທີ່ເຮັດກິດຈະກຳຢ່າງອື່ນໆ.

ແບ່ງປັນຂໍ້ພຣະຄຳພີທີ່ມີຄວາມໝາຍ

ໃຫ້ເວລາສະມາຊິກໃນຄອບຄົວ ທີ່ຈະແບ່ງປັນຂໍ້ພຣະຄຳພີ ທີ່ເຂົາເຈົ້າພົບເຫັນວ່າມີຄວາມໝາຍລະຫວ່າງການສຶກສາສ່ວນຕົວຂອງເຂົາເຈົ້າ.

ໃຊ້ຄຳຂອງທ່ານເອງ

ເຊື້ອເຊີນສະມາຊິກໃນຄອບຄົວໃຫ້ກ່າວສະຫລຸບດ້ວຍຄຳຂອງຕົວເອງ ເຖິງສິ່ງທີ່ເຂົາເຈົ້າໄດ້ຮຽນຮູ້ຈາກພຣະຄຳພີທີ່ພວກທ່ານສຶກສາ.

ນຳໃຊ້ພຣະຄຳພີໃນຊີວິດຂອງທ່ານ

ຫລັງຈາກໄດ້ອ່ານຂໍ້ພຣະຄຳພີແລ້ວ, ໃຫ້ຂໍໃຫ້ສະມາຊິກໃນຄອບຄົວແບ່ງປັນວິທີທີ່ຂ່າວສານກ່ຽວຂ້ອງກັບຊີວິດຂອງເຂົາເຈົ້າແນວໃດ.

ຖາມຄຳຖາມ

ເຊື້ອເຊີນສະມາຊິກໃນຄອບຄົວໃຫ້ຖາມກ່ຽວກັບພຣະກິດຕິຄຸນ, ແລະ ແລ້ວໃຫ້ໃຊ້ເວລາຊອກຫາຂໍ້ພຣະຄຳພີທີ່ສາມາດຊ່ວຍຕອບຄຳຖາມດັ່ງກ່າວ.

ສະແດງຂໍ້ພຣະຄຳພີ

ໃຫ້ເລືອກເອົາຂໍ້ໜຶ່ງທີ່ທ່ານເຫັນວ່າ ມັນມີຄວາມໝາຍ, ແລະ ໃຫ້ສະແດງມັນໄວ້ບ່ອນທີ່ສະມາຊິກໃນຄອບຄົວສາມາດຫລຽວເຫັນມັນໄດ້ເລື້ອຍໆ. ເຊື້ອເຊີນສະມາຊິກໃນຄອບຄົວຄົນອື່ນໆ ໃຫ້ເລືອກຂໍ້ພຣະຄຳພີ ເພື່ອສະແດງ.

ຂຽນລາຍການຂໍ້ພຣະຄຳພີ

ນຳກັນເປັນຄອບຄົວ, ໃຫ້ເລືອກເອົາພຣະຄຳພີຫລາຍຂໍ້ ເພື່ອວ່າພວກທ່ານຈະໄດ້ສົນທະນາ ລະຫວ່າງອາທິດທີ່ຈະມາເຖິງ.

ທ່ອງຈຳຂໍ້ພຣະຄຳພີ

ໃຫ້ເລືອກເອົາຂໍ້ພຣະຄຳພີໃດໜຶ່ງ ທີ່ມີຄວາມໝາຍຕໍ່ຄອບຄົວຂອງທ່ານ, ແລະ ໃຫ້ເຊື້ອເຊີນສະມາຊິກໃນຄອບຄົວທ່ອງຈຳມັນ ໂດຍການກ່າວລຶ້ມຄືນທຸກວັນ ຫລື ຫລິ້ນເກມທ່ອງຈຳ.

ແບ່ງປັນບົດຮຽນທີ່ໃຊ້ສິ່ງຂອງ

ໃຫ້ຊອກຫາສິ່ງຂອງທີ່ກ່ຽວພັນກັບບົດ ແລະ ຂໍ້ທີ່ພວກທ່ານກຳລັງອ່ານເປັນຄອບຄົວ. ເຊື້ອເຊີນສະມາຊິກໃນຄອບຄົວໃຫ້ເວົ້າລົມກັນກ່ຽວກັບວິທີທີ່ສິ່ງຂອງກ່ຽວພັນກັບການສິດສອນຢູ່ໃນພຣະຄຳພີແນວໃດ.

ເລືອກຫົວຂໍ້

ໃຫ້ສະມາຊິກໃນຄອບຄົວປ່ຽນກັນເລືອກເອົາຫົວຂໍ້ທີ່ຄອບຄົວຈະສຶກສານຳກັນ. ໃຫ້ໃຊ້ Topical Guide, Bible Dictionary, ຫລື ຄູ່ມືພຣະຄຳພີ (scriptures.ChurchofJesusChrist.org) ເພື່ອຊອກຫາຂໍ້ພຣະຄຳພີ ທີ່ກ່ຽວກັບຫົວຂໍ້.

ແຕ້ມຮູບ

ໃຫ້ອ່ານສອງສາມຂໍ້ເປັນຄອບຄົວ, ແລະ ແລ້ວປ່ອຍໃຫ້ສະມາຊິກໃນຄອບຄົວແຕ້ມບາງສິ່ງທີ່ກ່ຽວພັນກັບສິ່ງທີ່ພວກທ່ານໄດ້ອ່ານ. ໃຫ້ໃຊ້ເວລາສົນທະນາກ່ຽວກັບຮູບແຕ້ມຂອງກັນແລະກັນ.

ສະແດງຕາມເລື່ອງ

ຫລັງຈາກອ່ານເລື່ອງໃດເລື່ອງໜຶ່ງແລ້ວ, ໃຫ້ເຊື້ອເຊີນສະມາຊິກໃນຄອບຄົວສະແດງຕາມເລື່ອງນັ້ນ. ຫລັງຈາກນັ້ນ, ໃຫ້ເວົ້າລົມກັນກ່ຽວກັບວິທີທີ່ເລື່ອງເລົ່າກ່ຽວພັນກັບສິ່ງທີ່ພວກທ່ານໄດ້ປະເຊີນເປັນສ່ວນບຸກຄົນ ແລະ ເປັນຄອບຄົວແນວໃດ.

ການສິດສອນເດັກນ້ອຍ

ຖ້າຫາກທ່ານມີເດັກນ້ອຍຢູ່ໃນຄອບຄົວຂອງທ່ານ, ຕໍ່ໄປນີ້ແມ່ນກິດຈະກຳບາງຢ່າງ ທີ່ສາມາດຊ່ວຍພວກເຂົາໃຫ້ຮຽນຮູ້:

ຮ້ອງເພງ

ເພງສວດ ແລະ ເພງຕ່າງໆຈາກ ເພງສວດ ແລະ ເພງຂອງເດັກນ້ອຍ ສິດສອນຄຳສອນຢ່າງມີພະລັງ. ແຕ່ລະໂຄງຮ່າງຢູ່ໃນແຫລ່ງນີ້ມີເພງແນະນຳລວມຢູ່ດ້ວຍ. ທ່ານກໍສາມາດໃຊ້ ດັດຊະນີລາຍຊື່ເພງ ຢູ່ທາງໜ້າປຶ້ມ ເພງສວດ ແລະ ເພງຂອງເດັກນ້ອຍ ເພື່ອຊອກຫາເພງ ທີ່ກ່ຽວພັນກັບຫລັກທຳພຣະກິດຕິຄຸນ ທີ່ທ່ານສິດສອນຢູ່. ໃຫ້ຊ່ວຍລູກໆຂອງທ່ານ ປຽບທຽບຂ່າວສານຂອງເພງໃສ່ກັບຊີວິດຂອງພວກເຂົາ.

ຟັງ ຫລື ສະແດງຕາມເລື່ອງ

ເດັກນ້ອຍມັກເລື່ອງເລົ່າຕ່າງໆ—ຈາກພຣະຄຳພີ, ຈາກຊີວິດຂອງທ່ານ, ຈາກປະຫວັດສາດຂອງສາດສະໜາຈັກ, ຫລື ຈາກວາລະສານຂອງສາດສະໜາຈັກ. ໃຫ້ຫາວິທີເພື່ອໃຫ້ພວກເຂົາມີສ່ວນຮ່ວມໃນການເລົ່າເລື່ອງ. ພວກເຂົາສາມາດຈັບຮູບພາບ ຫລື ສິ່ງຂອງ, ແຕ້ມຮູບກ່ຽວກັບສິ່ງທີ່ພວກເຂົາໄດ້ຍິນ, ສະແດງຕາມເລື່ອງ, ຫລື ແມ່ນແຕ່ຊ່ວຍເລົ່າເລື່ອງ. ໃຫ້ຊ່ວຍລູກໆຂອງທ່ານຮັບຮູ້ຄວາມຈິງຂອງພຣະກິດຕິຄຸນ ຢູ່ໃນເລື່ອງລາວທີ່ທ່ານແບ່ງປັນ.

ອ່ານພຣະຄຳພີ

ເດັກນ້ອຍອາດບໍ່ສາມາດອ່ານເກັ່ງເທື່ອ, ແຕ່ທ່ານຍັງສາມາດໃຫ້ພວກເຂົາມີພາກສ່ວນໃນການຮຽນຮູ້ຈາກພຣະຄຳພີ. ທ່ານອາດຕ້ອງເນັ້ນພຽງແຕ່ຂໍ້ດຽວ, ສຳນວນທີ່ສຳຄັນໃດໜຶ່ງ, ຫລື ຄຳໜຶ່ງ.

ເບິ່ງຮູບພາບ ຫລື ເບິ່ງວິດີໂອ

ຖາມຄຳຖາມກ່ຽວກັບຮູບພາບ ຫລື ວິດີໂອ ທີ່ກ່ຽວພັນກັບຫລັກທຳພຣະກິດຕິຄຸນທີ່ພວກທ່ານສົນທະນາ. ຍົກຕົວຢ່າງ, ທ່ານສາມາດຖາມວ່າ, “ມີຫຍັງເກີດຂຶ້ນຢູ່ໃນຮູບພາບນີ້? ມັນເຮັດໃຫ້ພວກເຈົ້າຮູ້ສຶກແນວໃດ?” ແອພ ຫ້ອງສະໝຸດພຣະກິດຕິຄຸນ, Gospel Media Library ທີ່ ChurchofJesusChrist.org, ແລະ children.ChurchofJesusChrist.org ເປັນບ່ອນທີ່ດີ ທີ່ຈະຊອກຫາຮູບພາບ ແລະ ວິດີໂອ.

ສ້າງ

ເດັກນ້ອຍສາມາດສ້າງ, ແຕ້ມ, ຫລື ລະບາຍສີໃສ່ບາງສິ່ງ ທີ່ກ່ຽວກັບເລື່ອງເລົ່າ ຫລື ຫລັກທຳທີ່ພວກເຂົາຮຽນຮູ້.

ມີສ່ວນຮ່ວມໃນບົດຮຽນທີ່ໃຊ້ສິ່ງຂອງ

ບົດຮຽນທີ່ໃຊ້ສິ່ງຂອງແບບລຽບງ່າຍ ສາມາດຊ່ວຍລູກໆຂອງທ່ານ ໃຫ້ເຂົ້າໃຈຫລັກທຳພຣະກິດຕິຄຸນ ທີ່ຍາກທີ່ຈະເຂົ້າໃຈໄດ້. ເມື່ອໃຊ້ບົດຮຽນທີ່ໃຊ້ສິ່ງຂອງ, ໃຫ້ຊອກຫາວິທີທີ່ປ່ອຍໃຫ້ລູກໆຂອງທ່ານມີສ່ວນຮ່ວມນຳ. ພວກເຂົາຈະຮຽນຮູ້ຈາກປະສົບການທີ່ໄດ້ສຳພັດ ຫລາຍກວ່າພຽງແຕ່ໄດ້ນັ່ງເບິ່ງການສາທິດເທົ່ານັ້ນ.

ຫລິ້ນລະຄອນກ້ອມ

ເມື່ອເດັກນ້ອຍຫລິ້ນລະຄອນກ້ອມກ່ຽວກັບສະພາບການທີ່ພວກເຂົາຂ້ອນຂ້າງຈະປະເຊີນໃນຊີວິດຈິງ, ພວກເຂົາຈະສາມາດເຂົ້າໃຈຫລາຍຂຶ້ນເຖິງຫລັກທຳພຣະກິດຕິຄຸນ ທີ່ກ່ຽວພັນກັບຊີວິດຂອງພວກເຂົາ.

ເຮັດກິດຈະກຳຢ່າງເກົ່າຄືນອີກ

ເດັກນ້ອຍອາດຕ້ອງໄດ້ຍິນຄວາມຄິດນັ້ນຫລາຍເທື່ອ ກ່ອນຈະເຂົ້າໃຈ. ຍົກຕົວຢ່າງ, ທ່ານອາດແບ່ງປັນເລື່ອງໃດເລື່ອງໜຶ່ງຈາກພຣະຄຳພີຫລາຍເທື່ອ ໃນຫລາຍວິທີທາງ—ອ່ານຈາກພຣະຄຳພີ, ສະຫລຸບດ້ວຍຄຳຂອງທ່ານເອງ, ປ່ອຍໃຫ້ລູກໆຂອງທ່ານຊ່ວຍເລົ່າເລື່ອງ, ຊັກຊວນພວກເຂົາໃຫ້ສະແດງຕາມເລື່ອງ, ແລະ ອື່ນໆ.

ທຳການເຊື່ອມໂຍງເຂົ້າກັບຈຸດເປົ້າໝາຍຂອງຄວາມເຕີບໂຕສ່ວນຕົວຂອງພວກເຂົາ

ການສຶກສາພຣະຄຳພີເປັນຄອບຄົວສາມາດໃຫ້ການດົນໃຈແກ່ຊາວໜຸ່ມ ແລະ ເດັກນ້ອຍ ເພື່ອຕັ້ງເປົ້າໝາຍສຳລັບຄວາມເຕີບໂຕທາງວິນຍານ, ທາງຮ່າງກາຍ, ທາງສະຕິປັນຍາ, ແລະ ທາງສັງຄົມຂອງພວກເຂົາ (ເບິ່ງ ລູກາ 2:52).

ການສິດສອນຊາວໜຸ່ມ

ຖ້າຫາກທ່ານມີຊາວໜຸ່ມຢູ່ໃນຄອບຄົວຂອງທ່ານ, ຕໍ່ໄປນີ້ແມ່ນກິດຈະກຳບາງຢ່າງ ທີ່ສາມາດຊ່ວຍພວກເຂົາໃຫ້ຮຽນຮູ້:

ເຊື້ອເຊີນພວກເຂົາໃຫ້ສິດສອນ

ຕາມປົກກະຕິແລ້ວ ເຮົາຮຽນຮູ້ຫລາຍກວ່າເກົ່າເມື່ອເຮົາສິດສອນບາງສິ່ງ ແທນທີ່ພຽງແຕ່ນັ່ງຟັງເທົ່ານັ້ນ. ໃຫ້ໂອກາດແກ່ຊາວໜຸ່ມຂອງທ່ານ ທີ່ຈະນຳພາການສົນທະນາຂອງຄອບຄົວກ່ຽວກັບພຣະຄຳພີ.

ທຳການເຊື່ອມໂຍງເຂົ້າກັບຫ້ອງຮຽນສາດສະໜາ

ນັກຮຽນໃນຫ້ອງຮຽນສາດສະໜາປີນີ້ ກໍສຶກສາຄຳສອນ ແລະ ພັນທະສັນຍາ. ຖ້າຫາກຊາວໜຸ່ມຂອງທ່ານໄປຮ່ວມຫ້ອງຮຽນສາດສະໜາ, ໃຫ້ເຊື້ອເຊີນພວກເຂົາໃຫ້ແບ່ງປັນສິ່ງທີ່ພວກເຂົາໄດ້ຮຽນຮູ້ຢູ່ທີ່ນັ້ນ.

ປຽບທຽບພຣະຄຳພີ

ບາງເທື່ອຊາວໜຸ່ມມີບັນຫາທີ່ຈະເຫັນຄຳສອນ ແລະ ຫລັກທຳ ຢູ່ໃນພຣະຄຳພີເຊື່ອມໂຍງເຂົ້າກັບຊີວິດຂອງພວກເຂົາ. ຊ່ວຍພວກເຂົາໃຫ້ເຫັນວິທີທີ່ເລື່ອງລາວ ແລະ ການສິດສອນຢູ່ໃນພຣະຄຳພີກ່ຽວຂ້ອງກັບສະຖານະການທີ່ພວກເຂົາປະເຊີນຢູ່ທີ່ບ້ານ, ໂຮງຮຽນ, ຫລື ກັບໝູ່ເພື່ອນຂອງພວກເຂົາແນວໃດ.

ຖາມຄຳຖາມທີ່ຊຸກຍູ້ການໄຕ່ຕອງ

ຊາວໜຸ່ມຫລາຍຄົນຕອບຄຳຖາມໄດ້ດີ ທີ່ໃຫ້ພວກເຂົາສະແດງຄວາມຄິດ ແລະ ຄວາມຮູ້ສຶກຂອງພວກເຂົາກ່ຽວກັບພຣະຄຳພີ ແທນທີ່ພຽງແຕ່ກ່າວລຶ້ມສິ່ງທີ່ກ່າວຢູ່ໃນພຣະຄຳພີເທົ່ານັ້ນ. ຍົກຕົວຢ່າງ, ທ່ານສາມາດຖາມວ່າ, “ພຣະຜູ້ເປັນເຈົ້າອາດສິດສອນເຈົ້າຫຍັງແດ່ຢູ່ໃນຂໍ້ເຫລົ່ານີ້?” ຫລື “ເຈົ້າຄິດວ່າເປັນຫຍັງການເປີດເຜີຍນີ້ຈະມີຄວາມໝາຍຫລາຍພຽງໃດຕໍ່ໄພ່ພົນຢູ່ໃນຊ່ວງໄລຍະຊຸມປີ 1830?”

ທຳການເຊື່ອມໂຍງເຂົ້າກັບຈຸດເປົ້າໝາຍຂອງຄວາມເຕີບໂຕສ່ວນຕົວຂອງພວກເຂົາ

ເປີດໃຈຕໍ່ຄຳຖາມຂອງພວກເຂົາ

ຄຳຖາມຈາກຊາວໜຸ່ມເປັນໂອກາດທີ່ດີເລີດ ທີ່ຈະແບ່ງປັນຄວາມຈິງ ແລະ ສະແຫວງຫາຄວາມເຂົ້າໃຈເລື່ອງຫົວຂໍ້ທີ່ພວກເຂົາສົນໃຈດ້ວຍໃຈຈິງ. ຢ່າຢ້ານຄຳຖາມຂອງພວກເຂົາ ຫລື ຄິດວ່າມັນບໍ່ສຳຄັນ, ແມ່ນແຕ່ເບິ່ງຄືວ່າມັນບໍ່ກ່ຽວຂ້ອງກັບຫົວຂໍ້ທີ່ສົນທະນາກໍຕາມ. ຖ້າທ່ານບໍ່ມີຄຳຕອບສຳລັບທຸກຂໍ້ ກໍບໍ່ເປັນຫຍັງ. ບ້ານເຮືອນເປັນສະຖານທີ່ ທີ່ດີເລີດ ທີ່ຈະຊອກຫາຄຳຕອບນຳກັນ.

ຊຸກຍູ້ພວກເຂົາໃຫ້ແບ່ງປັນຄວາມຮູ້ຂອງພວກເຂົາ

ທ່ານມີມຸມມອງທີ່ດີເດັ່ນ ແລະ ມີຄວາມຮູ້ທີ່ຈະປະກອບສ່ວນໃນການສຶກສາພຣະຄຳພີເປັນຄອບຄົວ. ໃຫ້ພວກເຂົາຮູ້ວ່າ ທ່ານສົນໃຈໃນສິ່ງທີ່ພຣະວິນຍານກຳລັງສິດສອນພວກເຂົາກ່ຽວກັບພຣະຄຳພີ. ທ່ານກໍຍັງສາມາດຂໍໃຫ້ພວກເຂົາແບ່ງປັນຄວາມຮູ້ຈາກການສຶກສາສ່ວນຕົວຂອງພວກເຂົາ.

ປັບຕົວໄດ້

ຖ້າຫາກທ່ານມີຊາວໜຸ່ມຜູ້ທີ່ບໍ່ຢາກມີສ່ວນຮ່ວມໃນການສຶກສາພຣະຄຳພີເປັນຄອບຄົວ, ໃຫ້ຊອກຫາວິທີອື່ນທີ່ຈະເຊື່ອມໂຍງເຂົ້າກັບພວກເຂົາ. ຍົກຕົວຢ່າງ, ໃຫ້ທ່ານເວົ້າເລື່ອງພຣະກິດຕິຄຸນແບບທຳມະຊາດໃນການສົນທະນາຂອງທ່ານ ຫລື ແບ່ງປັນຂໍ້ພຣະຄຳພີທີ່ມີຄວາມໝາຍ ໃນວິທີທີ່ບໍ່ເປັນການສັ່ງສອນ ຫລື ການຄວບຄຸມຊິໄດ້ບໍ? ການສຶກສາພຣະຄຳພີບໍ່ຈຳເປັນຕ້ອງເປັນແບບຄືກັນຢູ່ໃນທຸກຄອບຄົວ. ເດັກນ້ອຍບາງຄົນອາດຕອບຮັບໄດ້ດີກວ່າ ໃນການສຶກສາພຣະຄຳພີແບບສອງຕໍ່ສອງ. ໃຫ້ອະທິຖານ ແລະ ເຮັດຕາມການກະຕຸ້ນຂອງພຣະວິນຍານ.

ປະທານຣະໂຊ ເອັມ ແນວສັນ ໄດ້ກ່າວວ່າ: “ຂ້າພະເຈົ້າສັນຍາວ່າ ເມື່ອເຮົາທຳງານຢ່າງພາກພຽນ ເພື່ອສ້ອມແປງບ້ານເຮືອນຂອງເຮົາ ໃຫ້ເປັນສູນກາງຮຽນຮູ້ພຣະກິດຕິຄຸນ, ແລ້ວເມື່ອເວລາຜ່ານໄປ ວັນຊະບາໂຕ ຂອງທ່ານ ຈະເປັນມື້ທີ່ມີຄວາມສຸກຫລາຍແທ້ໆ. ລູກໆຂອງທ່ານ ຈະຕື່ນເຕັ້ນ ທີ່ຈະຮຽນຮູ້ ແລະ ດຳລົງຊີວິດຕາມຄຳສອນຂອງພຣະຜູ້ຊ່ວຍໃຫ້ລອດ, ແລະ ອິດທິພົນຂອງຜູ້ປໍລະປັກ ໃນຊີວິດຂອງທ່ານ ແລະ ໃນບ້ານເຮືອນຂອງທ່ານ ຈະລົດນ້ອຍຖອຍລົງ. ການປ່ຽນແປງໃນຄອບຄົວຂອງທ່ານ ຈະເປັນສິ່ງທີ່ໜ້າຕື່ນເຕັ້ນ ແລະ ຄ້ຳຈູນ” (“Becoming Exemplary Latter-day Saints,” Ensign ຫລື Liahona, Nov. 2018, 113).