“ແນວຄິດເພື່ອປັບປຸງການສຶກສາພຣະຄຳພີເປັນສ່ວນຕົວຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: ຄຳສອນ ແລະ ພັນທະສັນຍາ 2021 (2020)
“ແນວຄິດເພື່ອປັບປຸງການສຶກສາພຣະຄຳພີເປັນສ່ວນຕົວຂອງທ່ານ,” ຈົ່ງຕາມເຮົາມາ—ສຳລັບບຸກຄົນ ແລະ ຄອບຄົວ: 2021
ແນວຄິດເພື່ອປັບປຸງການສຶກສາພຣະຄຳພີເປັນສ່ວນຕົວຂອງທ່ານ
ຕໍ່ໄປນີ້ແມ່ນວິທີທີ່ລຽບງ່າຍ ເພື່ອສົ່ງເສີມການສຶກສາຂອງທ່ານກ່ຽວກັບພຣະຄຳຂອງພຣະເຈົ້າ ຢູ່ໃນພຣະຄຳພີ.
ອະທິຖານເພື່ອການດົນໃຈ
ພຣະຄຳພີຄືພຣະຄຳຂອງພຣະເຈົ້າ, ສະນັ້ນ ຈົ່ງທູນຂໍໃຫ້ພຣະອົງຊ່ວຍໃຫ້ເຂົ້າໃຈພຣະຄຳພີ.
ຊອກຫາຄວາມຈິງກ່ຽວກັບພຣະເຢຊູຄຣິດ
ພຣະຄຳພີສິດສອນເຮົາວ່າ ທຸກສິ່ງເປັນພະຍານເຖິງພຣະຄຣິດ (ເບິ່ງ 2 ນີໄຟ 11:4; ໂມເຊ 6:63), ສະນັ້ນ ໃຫ້ຄິດທີ່ຈະໝາຍເຫດ ແລະ ໝາຍຂໍ້ທີ່ເປັນພະຍານເຖິງພຣະຜູ້ຊ່ວຍໃຫ້ລອດ, ມີຄວາມຮັກຢ່າງເລິກຊຶ້ງຕໍ່ພຣະອົງ, ແລະ ສິດສອນວິທີທີ່ຈະຕິດຕາມພຣະອົງ.
ຊອກຫາຖ້ອຍຄຳ ແລະ ສຳນວນທີ່ດົນໃຈ
ທ່ານອາດພົບເຫັນຖ້ອຍຄຳ ແລະ ສຳນວນບາງອັນຢູ່ໃນພຣະຄຳພີ ທີ່ປະທັບໃຈທ່ານ, ຄືກັບວ່າມັນຖືກຂຽນໄວ້ສຳລັບທ່ານໂດຍສະເພາະ. ທ່ານອາດຮູ້ສຶກວ່າ ມັນກ່ຽວຂ້ອງກັບທ່ານ ແລະ ດົນໃຈ ແລະ ກະຕຸ້ນທ່ານ. ໃຫ້ຄິດທີ່ຈະໝາຍມັນຢູ່ໃນພຣະຄຳພີຂອງທ່ານ ຫລື ຂຽນມັນໄວ້ຢູ່ໃນປຶ້ມບັນທຶກການສຶກສາສ່ວນຕົວຂອງທ່ານ.
ຊອກຫາຄວາມຈິງຂອງພຣະກິດຕິຄຸນ
ບາງເທື່ອຄວາມຈິງຂອງພຣະກິດຕິຄຸນ (ສ່ວນຫລາຍແລ້ວຖືກເອີ້ນວ່າ ຄຳສອນ ຫລື ຫລັກທຳ) ກ່າວກົງໄປກົງມາ, ແລະ ບາງເທື່ອມັນກ່າວຜ່ານທາງຕົວຢ່າງ ຫລື ເລື່ອງລາວ. ໃຫ້ຖາມຕົວເອງວ່າ, “ຄວາມຈິງນິລັນດອນຢ່າງໃດແດ່ທີ່ສິດສອນຢູ່ໃນຂໍ້ເຫລົ່ານີ້?”
ເຊື່ອຟັງພຣະວິນຍານ
ໃຫ້ເອົາໃຈໃສ່ຕໍ່ຄວາມນຶກຄິດ ແລະ ຄວາມຮູ້ສຶກຂອງທ່ານ, ເຖິງແມ່ນວ່າມັນບໍ່ກ່ຽວຂ້ອງກັບສິ່ງທີ່ທ່ານກຳລັງອ່ານຢູ່ກໍຕາມ. ຄວາມປະທັບໃຈເຫລົ່ານັ້ນອາດເປັນສິ່ງທີ່ພຣະບິດາເທິງສະຫວັນປະສົງໃຫ້ທ່ານຮຽນຮູ້.
ປຽບທຽບພຣະຄຳພີໃສ່ກັບຊີວິດຂອງທ່ານ
ໃຫ້ພິຈາລະນາວິທີທີ່ເລື່ອງລາວ ແລະ ຄຳສອນທີ່ທ່ານກຳລັງອ່ານຢູ່ ກ່ຽວຂ້ອງກັບຊີວິດຂອງທ່ານແນວໃດ. ຍົກຕົວຢ່າງ, ທ່ານສາມາດຖາມຕົວເອງວ່າ, “ປະສົບການໃດແດ່ທີ່ເຮົາເຄີຍມີ ທີ່ຄ້າຍຄືກັນກັບສິ່ງທີ່ເຮົາກຳລັງອ່ານຢູ່ນີ້?” ຫລື “ເຮັດແນວໃດເຮົາຈຶ່ງຈະສາມາດເຮັດຕາມຕົວຢ່າງຂອງບຸກຄົນນີ້ ຢູ່ໃນພຣະຄຳພີໄດ້?”
ຖາມຄຳຖາມຂະນະທີ່ທ່ານສຶກສາ
ຂະນະທີ່ທ່ານສຶກສາພຣະຄຳພີ, ອາດມີຄຳຖາມທີ່ເຂົ້າມາສູ່ຈິດໃຈຂອງທ່ານ. ຄຳຖາມເຫລົ່ານີ້ອາດກ່ຽວຂ້ອງກັບສິ່ງທີ່ທ່ານກຳລັງອ່ານຢູ່ ຫລື ກັບຊີວິດຂອງທ່ານໂດຍທົ່ວໄປ. ໃຫ້ໄຕ່ຕອງຄຳຖາມເຫລົ່ານີ້ ແລະ ຊອກຫາຄຳຕອບ ຂະນະທີ່ທ່ານສຶກສາພຣະຄຳພີຕໍ່ໄປ.
ໃຊ້ແຫລ່ງຊ່ວຍເຫລືອການສຶກສາພຣະຄຳພີ
ເພື່ອຈະໄດ້ຄວາມຮູ້ເພີ່ມເຕີມຈາກຂໍ້ທີ່ທ່ານອ່ານ, ໃຫ້ໃຊ້ໝາຍເຫດຢູ່ທາງລຸ່ມໜ້າປຶ້ມ, Topical Guide, Bible Dictionary, ຄູ່ມືພຣະຄຳພີ (scriptures.ChurchofJesusChrist.org), ແລະ ແຫລ່ງຊ່ວຍເຫລືອການສຶກສາຢ່າງອື່ນໆ.
ໃຫ້ພິຈາລະນາສະພາບການຂອງພຣະຄຳພີ
ທ່ານສາມາດພົບເຫັນຄວາມຮູ້ທີ່ມີຄວາມໝາຍກ່ຽວກັບຂໍ້ພຣະຄຳພີ ຂະນະທີ່ທ່ານພິຈາລະນາເນື້ອຫາຂອງມັນ, ລວມທັງສະຖານະການ ຫລື ສະຖານທີ່ຂອງຂໍ້ພຣະຄຳພີ. ຍົກຕົວຢ່າງ, ການຮູ້ຈັກເບື້ອງຫລັງ ແລະ ຄວາມເຊື່ອຖືຂອງຜູ້ຄົນ ທີ່ພຣະເຈົ້າກ່າວກັບ ສາມາດຊ່ວຍທ່ານໃຫ້ເຂົ້າໃຈເຈດຕະນາຂອງພຣະຄຳຂອງພຣະອົງຫລາຍກວ່າເກົ່າ.
ບັນທຶກຄວາມຄິດ ແລະ ຄວາມຮູ້ສຶກຂອງທ່ານ
ມັນມີຫລາຍວິທີທາງທີ່ຈະບັນທຶກຄວາມປະທັບໃຈ ທີ່ມາສູ່ທ່ານ ຂະນະທີ່ທ່ານສຶກສາ. ຍົກຕົວຢ່າງ, ທ່ານສາມາດໝາຍຂໍ້ຄວາມ ຫລື ສຳນວນທີ່ມີຄວາມໝາຍ ແລະ ບັນທຶກຄວາມຄິດຂອງທ່ານໄວ້ ເປັນຄຳໝາຍເຫດຢູ່ໃນພຣະຄຳພີຂອງທ່ານ. ທ່ານກໍສາມາດບັນທຶກຄວາມຮູ້, ຄວາມຮູ້ສຶກ, ແລະ ຄວາມປະທັບໃຈ ທີ່ທ່ານໄດ້ຮັບ ໄວ້ໃນປຶ້ມບັນທຶກສ່ວນຕົວນຳອີກ.
ສຶກສາຖ້ອຍຄຳຂອງສາດສະດາ ແລະ ອັກຄະສາວົກ ຂອງຍຸກສຸດທ້າຍ
ໃຫ້ອ່ານສິ່ງທີ່ສາດສະດາ ແລະ ອັກຄະສາວົກຂອງຍຸກສຸດທ້າຍໄດ້ສິດສອນ ກ່ຽວກັບຫລັກທຳ ທີ່ທ່ານພົບເຫັນຢູ່ໃນພຣະຄຳພີ (ຍົກຕົວຢ່າງ, ເບິ່ງ conference.ChurchofJesusChrist.org ແລະ ວາລະສານຂອງສາດສະໜາຈັກ).
ແບ່ງປັນຄວາມຮູ້
ການສົນທະນາຄວາມຮູ້ຈາກການສຶກສາສ່ວນຕົວຂອງທ່ານ ບໍ່ພຽງແຕ່ເປັນວິທີທີ່ດີ ທີ່ຈະສິດສອນຄົນອື່ນເທົ່ານັ້ນ, ແຕ່ມັນຍັງຈະຊ່ວຍໃຫ້ທ່ານເຂົ້າໃຈສິ່ງທີ່ທ່ານໄດ້ອ່ານຫລາຍຂຶ້ນກວ່າເກົ່ານຳອີກ.
ດຳລົງຊີວິດຕາມສິ່ງທີ່ທ່ານໄດ້ຮຽນຮູ້
ການສຶກສາພຣະຄຳພີ ບໍ່ຄວນພຽງແຕ່ດົນໃຈເຮົາເທົ່ານັ້ນ ແຕ່ຍັງນຳພາເຮົາໃຫ້ປ່ຽນວິທີທີ່ເຮົາດຳລົງຊີວິດນຳອີກ. ໃຫ້ເຊື່ອຟັງຕາມສິ່ງທີ່ພຣະວິນຍານກະຕຸ້ນທ່ານໃຫ້ເຮັດ ຂະນະທີ່ທ່ານອ່ານ, ແລະ ແລ້ວໃຫ້ຕັ້ງໃຈເຮັດຕາມການກະຕຸ້ນເຫລົ່ານັ້ນ.
ແອວເດີ ເດວິດ ເອ ແບ໊ດນາ ໄດ້ກ່າວວ່າ: “ເຮົາບໍ່ຄວນຄາດຫວັງໃຫ້ສາດສະໜາຈັກ ໃນຖານະອົງການສິດສອນ ຫລື ບອກເຮົາທຸກສິ່ງທີ່ເຮົາຕ້ອງການທີ່ຈະຮູ້ ແລະ ເຮັດ ເພື່ອຈະກາຍເປັນສານຸສິດທີ່ອຸທິດຕົນ ແລະ ອົດທົນຢ່າງກ້າຫານຈົນເຖິງທີ່ສຸດ. ແຕ່, ຄວາມຮັບຜິດຊອບສ່ວນຕົວຂອງເຮົາ ແມ່ນທີ່ຈະຮຽນຮູ້ສິ່ງທີ່ເຮົາຄວນຮຽນຮູ້, ດຳລົງຊີວິດຕາມທີ່ເຮົາຮູ້ວ່າ ເຮົາຄວນເຮັດ, ແລະ ກາຍເປັນຜູ້ຄົນທີ່ພຣະອາຈານປະສົງໃຫ້ເຮົາກາຍເປັນ. ແລະ ບ້ານເຮືອນຂອງເຮົາກໍເປັນສະຖານທີ່ ທີ່ດີທີ່ສຸດສຳລັບການຮຽນຮູ້, ການດຳລົງຊີວິດ, ແລະ ການກາຍເປັນ” (“Prepared to Obtain Every Needful Thing,” Ensign ຫລື Liahona, May 2019, 102).