C. C. A. Christensen (1831–1912), Saints Driven from Jackson County Missouri, c. 1878, tempera on muslin, 77 ¼ × 113 inches. Brigham Young University Museum of Art, nodra isolisoli na makubui C. C. A. Christensen, 1970

6–12 ni Sepiteba

Vunau kei na Veiyalayalati 98–101

“Dou Tiko Lo, Mo Dou Kila Niu sa Kalou”

Ni o wilika na Vunau kei na Veiyalayalati 98–101, dikeva matua na vakasama kei na nanuma eso era yaco mai. Ena vukei iko vakacava na nomu cakacakataka na veika oqo mo yaco mo vakataka na tamata sa vinakata na Kalou?

Vola na Veika o Uqeti Kina

Vei ira na Yalododonu e na 1830 vakacaca, o Independence, Missouri, a vanua yalataki dina. A “sa koto ena loma donu” kei Saioni (raica na Vunau kei na veiyalayalati na 57:3)—na koro levu ni Kalou e vuravura—ka ra sa solibula cecere kina mera tara. Vei ira, na nodra vakasoqoni na Yalododonu e kea a dua na gauna marautaki ka lagilagi taumada ni bera na iKarua ni Lako Mai. Ia o ira era tiko volekati ira ena vanua o ya sa duatani na nodra rai. E nodra ile na kena tukuni ni Kalou sa solia na vanua vei ira na Yalododonu, ka ra sa lomavakatani tiko ena revurevu vakapolitiki, bula vakailavo, kei na bula raraba ni vuqa na tamata mai na dua tale na matalotu tawakilai sa toso tiko mai vakatotolo ki na vanua o ya. Sega ni dede sa vuki na kauwai ki na veivakarerei, mai na veivakarerei ki na veivakacacani kei na tiko yavavala. Ena Julai 1833, e a vakarusai na valenivolavola ni tabaivola ni Lotu, ka ena Noveba era a vakasaurarataki na Yalododonu me ra biuta na nodra veivale e Jackson County, Missouri.

A tiko vakayawa sara yani o Josefa Simici ena 800 vakacaca na maile e Kirtland, ka qai yaco yani vua na itukutuku oqo ni oti e vica na macawa. Ia sa kila tu na Turaga na veika sa yaco tiko, ka sa vakatakila vei Nona Parofita na ivakavuvuli ni tiko sautu kei na veivakayaloqaqataki ka na vakacegui ira na Yalododonu—na ivakavuvuli ka rawa talega ni vukei keda ena gauna eda sotava kina na veivakacacani, ena gauna e sega ni yaco na noda gagadre savasava, se ni da gadreva me tukuni tale mai ni noda rarawa ena veisiga ena qai yaco ga, vakacava ga, “mera na vakaduavatataki [meda] vinaka kina” (Vunau kei na Veiyalayalati 98: 3).

Raica na Yalododonu, 1:171–93; “Waiting for the Word of the Lord,” Revelations in Context, 196–201.

Vakasama ni Vuli iVolanikalou ni Tamata Yadua

Vunau kei na Veiyalayalati 98:1–3, 11–14.; 101:1–16

Sa rawa mera cakacaka vata na noqu veivakatovolei meu vinaka kina.

E so na noda veivakararawa ni bula oqo e vu mai ena noda digidigi vakaikeda. Eso tale era vu mai ena nodra digidigi na tani. Ia ena so na gauna e sega ni dua me beitaki—e sa yaco ga na veika ca. Se cava ga e vakavuna, sa rawa ni veivuke na veika dredre me vakayacora na inaki vakalou. Ni ko wilika na veika a kaya na Turaga me baleta na nodra bula dredre na Yalododonu ena Vunau kei na Veiyalayalati 98:1–3, 11–14 kei na 101:1–16, na cava o kunea me rawa ni vukei iko mo vorata na nomu veivakatovolei eso? Ena vakayarayarataka vakacava na veitikina oqo na sala o raica kina na veibolebole eso o sotava? Vakasamataka vakatitobu ena sala sa cakacaka vata kina na nomu veivakatovolei eso mo vinaka kina ka vakayacora na inaki ni Kalou ki na nomu bula.

Raica talega na 2 Nifai 2:2; Vunau kei na Veiyalayalati 90:24.

Vunau kei na Veiyalayalati 98:23–48

E vinakati au na Turaga meu vakasaqara na vakacegu ena Nona sala.

Me vaka ni sega ni veika kece era tiko ena Vunau kei na Veiyalayalati 98:23–48 ena yaco ki na nomu veimaliwai vakaiiko kei ira na tani, na ivakavuvuli cava eso o raica me na rawa ni dusimaki iko ni o sa vakacalai mai vei ira na tani? Ena rawa ni veivuke mera makataki na vosa se malanivosa eso e vakamacalataki kina na sala e vinakata na Turaga vei ira na Yalododonu me ra walia kina na veivorati e Missouri.

Raica talega na Jeffrey R. Holland, “Na Veiqaravi ni Veivakaduavatataki,” Ensign se Liaona, Nove. 2018, 77–79.

iTukutuku mai na O Karisito kei na Cauravou Vutuniyau, mai vei Heinrich Hofmann.

Vunau kei na Veiyalayalati 100

Na Turaga ena karoni ira era qaravi Koya.

Ni oti ga e vica na macawa ni sa kila o Josefa na veivakacacani mai Missouri, a kerei koya e dua na saumaki vou me gole i Kenada me laki wasea kina na kosipeli kei rau na luvena tagane. A vakadonuya o Josefa, e dina ga ni a lomaleqataka me biuta nona matavuvale, vakabibi ena vuku ni veivakacacani kei na veivakarerei ki na nona matavuvale kei na Lotu. Ena nodrau ilakolako ki Kenada, rau a masu o Josefa kei na nona itokani, o Sidney Rigdon, me rau vakacegui, ka yaco mai ena wase 100 na isaunimasu mai vua na Turaga. Na cava o kunea ena isaunimasu ni Turaga ni rawa ni veivakadeitaki ka vukei rau?

E rairai o sa sotava talega na gauna eso a gadrevi kina mo vakarautaka vakatautauvata nomu kauwai ki na nomu ilesilesi Vakalotu kei na nomu kauwai ki na nomu vuvale. Ena rawa me vukei iko vakacava na vosa ni Turaga ena wase 100 ena ituvaki vakaoqori?

Raica talega na “A Mission to Canada,” Revelations in Context, 202–7.

Vunau kei na Veiyalayalati 101:43–65

Na vakamuri ni ivakasala ni Kalou e vukea meu taqomaki.

Na vosa vakatautauvata ena Vunau kei na Veiyalayalati 101:43–62 a soli me vakamacalataka na cava na vuna a vakatara kina na Turaga vei ira na Yalododonu me ra vakasavi tani mai Saioni. Ni o wilika na veitikina oqo, o raica beka eso na veika o tautauvata kina kei ira na tamata dauveiqaravi ena vosa vakatautauvata? Ko na tarogi iko beka: Au dau taroga lesu beka li na ivakaro ni Kalou? Ena yaco vakacava na lailai ni vakabauta se yalayala me vakatara “na meca” me veivakayarayarataki ki na noqu bula? Meu na vakaraitaka vakacava vua na Kalou niu sa “guta [meu] tuberi ena sala dodonu ka kilikili [meu] vakabulai kina”? (raica na tikina e 63–65).

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 98:16, 39–40.Na cava e tiko ena veitikina oqo e rawa ni vukei keda me tiko vakalevu cake na sautu ena noda matavuvale? E rawa ni o lagata e dua na sere me baleta na tiko sautu se na veivosoti, me vaka na “Vakananuma Na Dina” (Sere ni Lotu, naba 165). Era na marautaka beka na gonelalai mera dramataka ni ra veivosoti vakai ira.

Vunau kei na Veiyalayalati 99.Ena gauna a kacivi kina o John Murdock me biuta na nona vuvale “me vunautaka [na] kosipeli tawavakaiyalayala” (tikina e 1), e a se qai lesu walega mai ena dua na kaulotu dredre, ka vakayabaki na kena dede e Missouri (raica na “John Murdock’s Missions to Missouri,” Revelations in Context, 87–89). Na cava eda kunea ena wase 99 ka a rawa beka me veivukei se veivakayaloqaqataki vei Baraca Murdock? Na itukutuku cava ni Turaga kivei keda e tiko ena ivakatakila oqo?

Vunau kei na Veiyalayalati 100:16; 101:3–5, 18.Ni o wilika oti na veitikina oqo, sa rawa mo veivosakitaki na sala mera vakatakata kina na kaukamea na kenadau me vagalalataki na veika ca ka qai bulia vou ena kena tukilaki tiko vakavuqa (raica na vidio “The Refiner’s Fire” ena ChurchofJesusChrist.org). Sa rawa mo ni vulica vata talega na kena vakasavasavataki na veika tale eso, me vakataka na wai se masima. Ena rawa beka mo dou vakasavasavataka se samaka e dua na ka vakamatavuvale. Na cava na vuna eda vinakata kina meda yalosavasava? Na cava era vakavulica vei keda na ivakaraitaki oqo ena sala e rawa ni vukei keda kina na noda veivakatovolei meda “tamata yalosavasava”?

Vunau kei na Veiyalayalati 101:22–36.E rawa beka ni a vukei ira vakacava na Yalododonu ka sotava tiko na veivakacacani na veitikina oqo? Ena vukei ira beka vakacava na tamata ka lomarere tu me baleta na ituvaki ni noda vuravura nikua?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Na sere sa vakaturi: “Ni Vukei Au Mai Noqu Kalou,” Nodra iVolanisere na Lalai, 52.

Vakatorocaketaki na Vuli ni Tamata Yadua

Vakaraica na ivakavuvuli. E vakavulica o Elder Richard G. Scott: “Ni ko vaqara na kilaka vakayalo, vakaraica na ivakavuvuli. … Na ivakavuvuli sai koya na dina umani, kovuti tu mera taurivaki ena veituvaki raraba ni bula” (“Rawati ni Kilaka Vakayalo,” Ensign, Nove. 1993, 86).

Sa Kama o Missouri, mai vei Glen S. Hopkinson