20–26 ni Sepiteba

Vunau kei na Veiyalayalati 106–108

“Me Tadolavi Vei Ira Ko Lomalagi”

E vakavulica o Elder Ulisses Soares, “Eda gadreva meda tiko ga kei [na iVakabula], meda dromuci keda ena ivolanikalou, rekitaki keda kina, vulica na Nona vunau, ka segata tiko meda bulataka na Nona ivakarau ni bula” (“Meu na Kila Vinaka Vakacava?” Ensign se Liaona, Me 2019, 7). Ni ko sa luvuci iko ena Vunau kei na Veiyalayalati, 106–8, vola na sala eso o rawa ni segata mo bulataka kina na dina o sa raica.

Vola na Veika o Uqeti Kina

Ni ko raica ena imatai ni gauna, na Vunau kei na Veiyalayalati 107 ena vaka toka me dua na ituvatuva ni tutu vakamatabete ki na dua na yavu ni veiliutaki ena Lotu ni Turaga. Sa dina sara, ena gauna a tabaki kina na ivakatakila oqo, sa veiulabaleti na levu ni lewe ni Lotu ki na nodra gugumatua e vica wale na iliuliu sa tu rawa. Koya gona esa gadrevi vakaidina ka veivuke vakalevu na tuvai ni nodra itavi kei na ilesiilesi na Mataveiliutaki Taumada, na Kuoramu ni iApositolo Le Tinikarua, Vitusagavulu, bisopi, kei na mataveiliutaki ni kuoramu. Ia e tiko e levu cake sara na ka ki na veidusimaki vakalou ena wase 107 mai na tauyavutaki wale ga ni tutu kei na kuoramu ni matabete. Eke a vakavulica vei keda na Turaga e dua na ivakarau ni matabete makawa e a “tauyavutaki ena gauna i Atama” (tikina e 41). A kena inaki mai na ivakatekivu me rawa kina vei ira na luve ni Kalou—oka kina o iko—me ra ciqoma na cakacakatabu vakalotu bula ni kosipeli ka marautaka “ni veivakalougatataki kece sara vakayalo ni lotu—me tu vua na dodonu me ciqoma na veika vuni ni matanitu vakalomalagi, [ka] me tadolavi vei ira ko lomalagi” (tikina 18–19).

Raica na “Restoring the Ancient Order,” Revelations in Context, 208–12.

Vakasama ni Vuli iVolanikalou ni Tamata Yadua

Vunau kei na Veiyalayalati 106; 108

Na Turaga sa dau vakasalataka, vakayaloqaqataka, ka tokoni ira sa kaciva o Koya mera veiqaravi.

Ena Vunau kei na Veiyalayalati 106 kei na 108, sa solia na Turaga na ivakasala kei na yalayala kivei rau e lewe rua na lewenilotu a kacivi me rau veiqaravi ena loma ni Lotu. Na malanivosa cava soti ena ivakatakila eso oqo e solia na veivakayaloqaqataki kei na veivakararamataki me baleta na nomuni veiqaravi ena matanitu ni Kalou? Oqo e rua mo ni vakasamataka:

• O sa ciqoma vakacava na “loloma soli wale kei na veivakataudeitaki” mo rawa ni “tu kina”? Vunau kei na Veiyalayalati 106:8).

• E rawa vakacava mo “sa qaqarauni vakalevu cake oqo ena rokovi ni nomu yalayala,” se veiyalayalati? Vunau kei na Veiyalayalati 108:3).

Na cava eso tale na malanivosa mai na wase 106 kei na 108 era vakaibalebale vei iko?

Raica talega na Russell M. Nelson, “Veiqaravi ena Kaukauwa kei na Lewa ni Kalou,” Ensign se Liaona, Me 2018, 68–75; “Warren Cowdery,” Revelations in Context, 219–23; “‘Wrought Upon’ to Seek a Revelation,” Revelations in Context, 224–28.

Vunau kei na Veiyalayalati 107

Sa liutaka na Turaga na Nona Lotu ena lewa ni matabete.

Ena nomu vulica na Vakalesui mai ni kosipeli, o sa rairai raica beka ni Turaga e sega ni dau vakamacalataka vakataucoko e veigauna e dua na ivunau ena dua ga na ivakatakila. Ia, e sa vakatakila mai o Koya na veika ena “vosa ena vosa” (Vunau kei na Veiyalayalati 98:12) ena ituvaki ga sa gadrevi kina. E dina ga ni sa solia oti mai na Turaga na ivakasala me baleta na matabete e liu sara ena 1829 (raica, me ivakaraitaki, wase 20 kei na 84), ka solia na ikuri ni vakasala vei ira na Yalododonu ena 1835 me baleta na itutu ni matabete digitaki e gadrevi me liutaka ka dusimaka na nona qele ni sipi sa tubu cake tiko.

Ni o wilika me baleta na itutu ni matabete oqo, sa rawa mo vakasamataka na sala mo tokoni ira kina na veiqaravi tiko ena veikacivi oqo ena nomu “veivakabauti, yalodina, kei na masumasu” (Vunau kei na Veiyalayalati 107:22).

• Na Mataveiliutaki Taumada kei na Peresitedi ni Lotu (tikina e 9, 21–22, 65–66, 91–92)

• Na iApositolo Le Tinikarua (tikina 23–24, 33–35, 38,58)

• Vitusagavulu (tikina e 25–26, 34, 93–97)

• Bisopi (tikina e 13–17, 68–76, 87–88)

Vunau kei na Veiyalayalati 107:1–20

Era na vakarautaka na cakacaka vakalotu ni matabete na veivakalougatataki vakayalo ka vakayago vei ira kece na luvena na Tamada Vakalomalagi.

E vakavulica o Elder Neil L. Andersen: “Na matabete sa ikoya na kaukauwa kei na lewa ni Kalou ka a soli me baleta na nodra vakabulai kei na vakalougatataki ni tamata kece sara—tagane, yalewa, kei na gonelalai. … Ni da sa buladodonu, na cakacaka vakalotu ni matabete ena vakalevutaka na noda bula e vuravura ka vakarautaki keda ki na yalayala totoka sa soli tu ki na vuravura sa tu mai liu” (“Na Kaukauwa ena Matabete,” Ensign se Liaona, Nove. 2013, 92). Ni o wilika na Vunau kei na Veiyalayalati 107:1–20 (raica vakabibi na tikina e 18–20) kei na vo ni itukutuku nei Elder Andersen, raica mo vola na veivakauqeti baleta na sala sa vakabulabulataka kina na nomu bula na kaukauwa ni Kalou e vuravura ka vakarautaki iko ki na veigauna tawamudu. Na cava o sa cakava tiko mo ciqoma vakataucoko—ka vukei ira na tani ni ciqoma—na veivakalougatataki oqori?

Raica talega na Vunau kei na Veiyalayalati 84:19–27; Dallin H. Oaks, “Na iDola kei na Lewa ni Matabete,” Ensign se Liaona, Me 2014, 49–52.

Vunau kei na Veiyalayalati 107:41–57

E vakalougatataka na matavuvale na matabete.

A vinakata o Atama vei ira na nona kawa me ra vakalougatataki mai na matabete. Na yalayala cava soti a ciqoma o koya? (raica na tikina 42, 55). Ni o wilika na veika a cakava o Atama, vakasamataka na nomu gagadre me baleta na nomu matavuvale me ra marautaka na veivakalougatataki ni matabete. Na cava soti o sa vakauqeti ni vakayacora mo vukea na nomu matavuvale me ciqoma na veivakalougatataki oqo?

Sa Vosa Vakalougatataka Na Nona Kawa o Atama, mai vei Clark Kelley Price

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 106:6.Na cava e rawa ni cakava na noda matavuvale me vakavuna na “reki e lomalagi”?

Vunau kei na Veiyalayalati 107:22.Na cava eda sa cakava tiko mera tokoni kina na noda iliuliu “ena … yalodei, vakabauta kei na masumasu”?

Vunau kei na Veiyalayalati 107:27–31, 85.Na ivakavuvuli era tuberi kina na matabose ni Lotu e rawa talega ni vukei keda meda veivakasalataki vakamatavuvale. Na veivakavuvuli cava ena veitikina oqo e rawa ni da vakayagataka ena noda matabose ni matavuvale? (M. Russell Ballard, “Matabose ni Matavuvale,” Ensign se Liaona Me 2016, 63–65.)

Vunau kei na Veiyalayalati 107:99–100.Solia ki na dua na lewe ni matavuvale e dua na ivola ni ivakasala me baleta e dua na cakacaka ni vale, ka sureti koya me digitaka na sala me vakayacora kina: ena gumatua, vucesa, se na tawawiliki ni vola ni ivakasala. Mera qai saravi koya tiko na vo ni vuvale ni sa cakava tiko na nona itavi ka vakilakila na sala cava a digitaka o koya. Me qai dua tale ena matavuvale me cakava. Na cava na vuna e gadreva ruarua kina na Turaga meda na vulica na noda itavi ka vakayacora sara ena gugumatua? (Raica na Becky Craven, “Qarauna se Vakawalena,” Ensign se Liaona, Me 2019, 9–11.)

Vunau kei na Veiyalayalati 108:7.Eda na veivaqaqacotaki vakacava vakai keda ena noda veivosaki? ena noda masu? ena noda vakamamasu, se veivakayaloqaqataki? ena veika kece eda cakava? Sa rawa mo digitaka e dua vei ira oqo mo ni cakacakataka vakamatavuvale.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Sere vakaturi: “Mai, Rogoca Na Domo Ni Parofita,” Sere ni Lotu, naba 12.

Vakatorocaketaki ni Vuli ni Tamata Yadudua

Vola na Veivakauqeti. Ni yaco mai na veivakauqeti vakayalo se rai titobu, vola sara. Ni ko vakayacora oqo, o sa vakaraitaka vua na Turaga ni bibi vei iko na Nona veidusimaki. (Raica na Veivakavulici ena iVakarau ni iVakabula, 12, 30.)

Sa Vakalougatataki Eparama o Melikiseteki, mai vei Walter Rane.