20–26 ni Sepiteba

Vunau kei na Veiyalayalati 106–108

“Me Tadolavi Vei Ira Ko Lomalagi”

Vakasamataka vakatitobu na veika o kila me baleti ira na gone o vakavulica. Na mataqali itaviqaravi cava ena kauti ira mai vakavoleka vua na iVakabula? Na itaviqaravi me baleti ira na gone sobu ena ituvatuva oqo e rawa ni moici me ganiti ira na gone qase cake, se kena veibasai.

Vola na Veika o Vakauqeti Kina

Sureta na Veiwasei

Vakaraitaka vei ira na gone na kedra itaba na iliuliu ni Lotu, me vakataka na parofita, na iApositolo, na Mataveiliutaki Raraba ni Lalai, kei na eso tale na Vakaitutu Raraba kei na Vakailesilesi. Sureti ira na gone me ra tukuna na cava e cakava o ira na iliuliu oqo kei na vuna era vakavinavinakataka kina.

Vakavulica na iVunau: Gone Sobu

Vunau kei na Veiyalayalati 107:18–20, 42–56

Au sa vakalougatataki ena vuku ni matabete.

Ira kece na luvena na Tamada Vakalomalagi ena rawa ni ciqoma na veivakalougatataki e lako mai ena matabete. Vakasamataka na sala e rawa ni o vukei ira na gone o vakatavulica kina na vakavinavinaka me baleta na veivakalougatataki oya.

iTaviqaravi e Rawa ni Caka

• Droinitaka ena papa ni volavola e dua na iyaloyalo me matataka na “me tadolavi vei [keda] ko lomalagi” (Vunau kei na Veiyalayalati 107:19) ena vuku ni matabete (me vaka na rarama ni cilava botea na o loaloa). Solia vei ira na gone na iyaloyalo eso e matataka na veivakalougatataki e lako mai ena matabete, me vakataka na papitaiso, na sakaramede, kei na valetabu. Sureti ira me ra wasea na vuna era vakavinavinakataka kina na veivakalougatataki ena nodra iyaloyalo, ka me ra biuta mai na rarama ni cilava na nodra iyaloyalo ena papa ni volavola. Wasea na ivakadinadina ni rawa ni da rawata na veivakalougatataki oqo baleta ni sa vakalesuya mai na Tamada Vakalomalagi na matabete.

• Cakava e dua na sala ena vuloa, ka solia vei ira na gone na iyaloyalo ni cakacaka vakalotu ni matabete era na gadreva me rawa ni ra muria kina na sala lesu vua na Tamada Vakalomalagi (raica na Gospel Art Book, naba 103–8, 119–20). Vukei ira na gone me biuta na cakacaka vakalotu va ituvatuva ena salatu.

• Vakaraitaka e dua na iyaloyalo i Atama kei Ivi kei na nodra matavuvale (raica na tabana ni itaviqaravi ni macawa oqo se na Gospel Art Book, naba 5). Era na raica na gone na iyaloyalo, na vakacava nodrau nanuma o Atama kei Ivi me baleta na nodrau matavuvale. Vakayagataka na Vunau kei na Veiyalayalati 107:53–56 mera wasea vata kei ira na gone na veika a cakava ko Atama me vakaraitaka ni sa lomani ira na nona matavuvale. Wasea na nomu ivakadinadina na cava me baleta na matabete e sa veivakalougatataki vei iko kei na nomu matavuvale.

• Vayacana ni lewe ni matavuvale ka sa tabaki ki na matabete ko Atama ka tiko ena Vunau kei na Veiyalayalati 107:42–50, ka kerei ira na gone mera wilika e vica na tamata era sa tabaki. Vukei ira mera kila deivaki na cava e vinakata kina o Atama me tiko na matabete vei ira kece na nona lewe ni matavuvale. Sureti ira na gone mera wasea na gauna ni ra sa ciqoma se na nodra matavuvale na veivakalougatataki mai na matabete.

Vunau kei na Veiyalayalati 108:7

Au rawa ni vakauqeti ira tale eso.

Era rawa mada ga ni ra muria na gone na ivakasala me vakauqeti ira na tani “ena nomu vosa kecega, nomu masumasu kecega, … kei na nomu ivalavala kecega.”

iTaviqaravi e Rawa ni Caka

• Droinitaka e dua na tamata ena vava ni volavola, ka kerei ira na gone me ra tukuna eso na ka e rawa ni cakava na tamata me ra kaukauwa cake vakayago. (O rawa ni dronitaka na masela levu vua na tamata ni sa tukuna mai na gone eso na ka). Wilika na Vunau kei na Veiyalayalati 108:7, ka tarogi ira na gone me ra vakarogoca na sala eso eda rawa “vakauqeta na [taciqu kei na ganequ].” Vakamacalataka e dua na vosa ka rawa me dredre.

• Vukei ira na gone e vakasamataki ira na tamata era kila ka gadrevi na veivakauqeti. Na cava eda rawa ni kaya vei ira se cakava ena vukudra? Cakacaka vata na kadi vei ira na tamata oqo, se vakayaloqaqataki ira na gone me ra nanumi ira ena nodra masu yadua kei na masu vakamatavuvale.

Vakavulica na iVunau: Gone Qase Cake

Vunau kei na Veiyalayalati 107:1–8, 13–14, 18–20

Na matabete ena vukea me’u lesu vua na Tamada Vakalomalagi.

Na Matabete i Melikiseteki kei na Matabete i Eroni a vakalesui mai me vukea na luve ni Kalou meda lesu tale Vua. Vukei ira na gone o vakavulica me ra kila na cava soti na itavi duidui ni matabete kei na sala era na vukei keda meda lesu tale vua na Kalou.

iTaviqaravi e Rawa ni Caka

• Sureti ira na gone mera vakasaqara ena Vunau kei na Veiyalayalati 107:1–8, 13–14, 18–20 me baleta na bibi ni veivosa kei na malanivosa e vakavulici ira me baleta na matabete. Na cava na nodra itavi o ira sa tiko vei ira na matabete? E vukei keda vakacava na matabete meda lesu tale vua na Tamada Vakalomalagi?

• Vola na taro ena rawa ni saumi ena Vunau kei na Veiyalayalati 107:1–8, 13–14, 18–20, me vaka “Na cava e dua tale na yaca ni Matabete i Melikiseteki?” Solia vei ira na gone e vica na miniti mera vakasaqara na kena isau mai na tikina oqo ki vei ira na taro era rawa ni rawata. Wasea vei ira na gone na veivakalougatataki o sa ciqoma mai na matabete.

• Wilika vata kei ira na gone me baleta na i Melikiseteki ena Bible Dictionary se iDusidusi ki na iVolanikalou (scriptures.ChurchofJesusChrist.org). Na cava eda vulica mai na nona bula me baleta na kena ibalebale me cakacakataka na lewa ni matabete?

Vunau kei na Veiyalayalati 107:21–26, 33–35, 65–66

Era na liutaka na italai digitaki ni Turaga na nona Lotu.

Na veika cava soti e sa taracake na nomu ivakadinadina me baleti ira na iliuliu ni Lotu? O na vukei ira vakacava na gone me ra tara cake na nodra dui ivakadinadina?

E vakavulica vei keda na parofita na ka e vinakata na Kalou meda kila.

iTaviqaravi e Rawa ni Caka

• Vakabira ena papa ni volavola e dua na iyaloyalo ni Vakaitutu Raraba kei na Vakailesilesi mai na ilavelave ni koniferedi wale tikoga oqo ni Ensign se Liaona. Ni ra wilika na gone na Vunau kei na Veiyalayalati 107:21–26, 33–35, 65–66, sureti ira mera vola ena vava ni volavola na veika era sa vulica me baleta na itavi ni so vei ira na iliuliu oqo. Cava na vuna eda vakavinavinakataka kina na nodra veidusimaki? Veiwasei kei ira ni ko a rawata vakacava e dua na ivakadinadina baleti ira na parofita kei na apositolo.

• Vola ena vava ni volavola na vosa yalodei, vakabauta, kei na masu . Taroga ira na gone ena sala eda rawa ni tokona kina na Mataveiliutaki Taumada ni Lotu ena noda yalodei, vakabauta kei na masu (raica na Vunau kei na Veiyalayalati na 107:22). Na cava na vuna e bibi kina me ra tokoni na italai digitaki ni Turaga?

Vunau kei na Veiyalayalati 108:3

Na noqu bulataka na noqu veiyalayalati e kauta mai na veivakalougatataki.

Vakasamataka na sala mo vukei ira kina na gone o vakavulica me ra “qaqarauni vinaka … rokova tiko na [nodra] yalayala,” se veidinadinati. Ena vakalougatataki ira vakacava ni ra cakava na ka oqo ena gauna oqo kei na vei siga mai muri?

iTaviqaravi e Rawa ni Caka

• Sureti ira na gone me ra cakava e dua na ka e gadrevi vakavinaka kina na vakarorogo me rawa, me vaka ni ra tovolea mera vakatawana e dua na bilo wai ka sega ni kasova i ra. Na cava e yaco ni da sega ni qaqarauni? Sureti ira me ra wilika na Vunau kei na Veiyalayalati108:3 ka kunea na ka sa kerei Lyman Sherman me qaqarauni kina. Vola vei ira na gone na vosa ni yalayala era sa cakava vata kei na Tamada Vakalomalagi ni ra sa papitaiso ka vakaivotavota ena sakaramede. Vukei ira me ra vakasamataka eso na sala e rawa ni ra rokova kina na yalayala eso oqo.

• Lagata e dua na sere vata kei ira na gone baleta na maroroi ni veiyalayalati, me vaka na “Meu Dina Tu” (iVolanisere ni Gonelalai, 85). Vukei ira mera cakava e dua ivakatakilakila kei na dua na malanivosa mai na sere ka vakananumi ira mera maroroya na nodra veiyalayalati, ka vakayaloqaqataki ira mera vakabira na nodra ivakatakilakila mai vale.

• Solia vei ira na gone na tiki eso ni vosa nei Sisita Becky Craven “Na Qaqarauni kei na Vakawelewele” (Ensign se Liaona, Me 2019, 9–11), ka kerei ira me ra wasea e dua na ka e vakauqeti ira me ra qarauna vakalevu cake me baleta na bulataki ni nodra veiyalayalati.

Vakauqeta na Vuli e Vale

Dau veitaratara kei na nodra itubutubu na gone o vakatavulica tiko mera vakauqeti ira ena nodra sasaga me ra vakavulica na kosipeli e vale. O rawa ni tukuna vei ira me baleta e dua na ka a wasea na luvedra ena Lalai era a vulica mai vale.

Vakatorocaketaki Noda Veivakavulici

Moica na itaviqaravi me sotava na gagadre. Kakua ni raica na veituvatuva oqo me ivakaro e dodonu mo muria ni o veivakavulici. Ia, vakayagataka me ra ivurevure ni nomu vakauqeti ni o vakasamataka vagumatua na nodra gagadre na gone o vakavulica. Ena so na gauna, o na vakauqeti mo moica na itaviqaravi se ulutaga me baleti ira na gone sobu me vakavulici vei ira na gone qase cake, se na kena veibasai.