NaValetabu e Katiladi, mai vei Jon McNaughton

27 ni Sepiteba–3 ni Okotova

Vunau kei na Veiyalayalati 109–110

“Ni Sa Nomuni Vale, na Nomuni Vanua Tabu”

Me sotava na veika vakayalo me vulica na Vunau kei na Veiyalayalati 109–10 kei ira na gone ena nomu kalasi, mo segata taumada mo sotava na veika vakayalo ena nomu vulica ga vakataki iko na ivolanikalou oqo.

Vola na Veika o Vakauqeti Kina

Sureta na Veiwasei

Vakaraitaka na iyaloyalo eso ka na rawa ni vukei ira na gone mera nanuma ka wasea na veika era sa vulica me baleta na ivakavuvuli se na veika e yaco ena Vunau kei na Veiyalayalati 109–10. E rawa ni o vakaraitaka na iyaloyalo ni ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale.

Vakavulica na iVunau: Gone Sobu

Vunau kei na Veiyalayalati 109:12–13; 110:1–7

Na valetabu e vale ni Turaga

Vakasamataka na sala o na vukei ira kina na gone me ra vakila na rokovi ni vale ni Turaga ka nanamaki ga ki na siga ni ra na curu rawa ki na “[Nona] vanua tabu” (Vunau kei na Veiyalayalati 109:13).

iTaviqaravi e Rawa ni Caka

• Kerei ira na gone me ra tukuna vei iko e dua na ka era taleitaka me baleta na nodra vale. Vakaraitaka vei ira na gone e dua na iyaloyalo ni valetabu e Katiladi, ka vakayagataka na Vunau kei na Veiyalayalati 109:12–13; 110:1–7 me tukuna vei ira baleta na siga sa vakatabui kina na valetabu ka sa yaco me vale ni Turaga (raica talega “Wase 39: Sa Vakatabui na Valetabu e Katiladi,” iTalanoa mai na Vunau kei na Veiyalayalati,154). Me vakaraitaka ni valetabu e sa vale ni Turaga, wilika na veika oqo mai na masu ni veivakatabui ka a solia o Josefa Simici: “Ni sa nomuni vale, na nomuni vanua tabu” (Vunau kei na Veiyalayalati 109:13). Kerei ira na gone me ra wasea eso na ka era taleitaka me baleta na valetabu.

• Solia vei ira yadua na gone e dua na iyaloyalo ni dua na valetabu, se sureti ira mera droinitaka e dua. Lagata vata kei ira na gone e dua na sere baleta na valetabu, me vaka na “I Love to See the Temple” (Children’s Songbook,95). Sureti ira na gone mera taura cake na nodra iyaloyalo ena veigauna kece era lagata kina na vosa “valetabu.” Vakamatatataka vei ira tale eso na vosa ena sere ka vakavulica vei keda e dua na ka bibi me baleta na valetabu. Tukuna vei ira na gone na nomu nanuma me baleta na valetabu ka ko kila vakacava ni sa vale ni Turaga.

Vunau kei na Veiyalayalati 110

Na idola ni matabete e gadrevi me qaravi kina na cakacaka ni Kalou sa tiko ena Lotu nikua.

Na valetabu e Katiladi e bibi ki na itukutuku makawa ni Lotu. O Jisu Karisito a rairai mai kina, vata kei na so na parofita ni gauna makawa. O ira na parofita oqo era solia na idola eso ni matabete vei Josefa Simici ka gadrevi me qarava na cakacaka ni Kalou edaidai.

iTaviqaravi e Rawa ni Caka

• Vakayagataka na tabana ni itaviqaravi ena macawa oqo se “Wase 40: Na Raivotu ena Valetabu mai Katiladi” (iTalanoa mai na Vunau kei na Veiyalayalati, 155–57) me tukuna vei ira na gone me baleta na tamata vakalomalagi ka ra a sikova na valetabu. Wasea na veimalanivosa mai na Vunau kei na Veiyalayalati 110 ka a vukei iko kei ira na gone me ra kila na bibi ni veika tabu a yaco oqo.

• Vakaraitaka vei ira na gone eso na idola, ka veivosakitaka na veika era cakava na idola. Me ra veivukevuke na taura tu na idola ka me dolava na katuba lokataki. Ni ra vakayacora vakakina, vakamacalataka ni o Josefa Simici a ciqoma na idola ni matabete ena Valetabu e Katiladi. Oqo na idola me tadolava rawa kina na kaukauwa kei na veivakalougatataki me rawa ni da cakava na cakacaka ni Kalou ena Nona Lotu, me vakataka na wasei ni kosipeli ka vakayacora na cakacaka ni valetabu.

• Me vukei ira na gone mera kila vakavinaka na idola ea solia o Ilaija vei Josefa Simici, lagata vata e dua na sere me baleti Ilaija se na itukutuku ni matavuvale, me vaka na “Truth from Elijah” (Children’s Songbook, 90–91). Tukuna vei ira me baleta e dua na ka o a sotava ka vukea na kena muataki na yalomu ki vei ira na nomu qase e liu. Kerei ira na gone me ra wasea eso na ka era kila me baleta e dua na tubudra se dua tale nodra qase e liu.

Vakavulica na iVunau: Gone Qase Cake

Vunau kei na Veiyalayalati 109; 110:1–10

Na valetabu e vale ni Turaga

O na wasea vakacava vata kei ira na gone na nomu lomana na vale ni Turaga? Vakasamataka na sala o na vakauqeti ira mera na ciqoma na ibole nei Elder Quentin L. Cook “vei keda yadua, vanua cava ga e da bula kina, meda raici keda ena valetabu” (“Raici Iko Ena Valetabu,” Ensign se Liaona, Me 2016, 98).

iTaviqaravi e Rawa ni Caka

• Digitaka na veitikina mai na wase 109 se 110 o vakila ni vakabibitaka na veivakalougatataki ni valetabu (eso e vakaturi tiko ena ituvatuva ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Vola ena vava ni volavola na veivakalougatataki oqo, ka sureti ira na gone mera vakasaqara na tikina eso ko ni digitaka mo ni kunea kina na veivakalougatataki oya. Eda rawa ni vakamacalataka vakacava vua e dua na cava e bibi kina vei keda na valetabu?

• Kerei ira na gone me ra wilika lo na Vunau kei na Veiyalayalati 110:1–10, ka sureti ira mera wasea na veika era vulica me baleti Jisu Karisito, se na valetabu mai na veitikina oqo. Sureta na gone mera droinitaka e dua na kedra iyaloyalo kei na iVakabula i loma ni valetabu.

• Kerei ira na gone me ra vakasamataka mada e dua na itokani e tovolea tiko me kunea na nodra vale. E rawa vakacava meda vukei noda itokani me kila na mataqali vale cava e noda? Eda na kila vakacava ni valetabu e sa vale ni Turaga? Wilika na Vunau kei na Veiyalayalati 109:12–13 vata kei ira na gone, ka tukuna vei ira o kila vakacava ni valetabu sa vale ni Turaga. Vakaraitaka na iyaloyalo ni valetabu, ka laivi ira na gone me ra wasea na nodra nanuma me baleta na vale ni Turaga.

• Lagata vata kei ira na gone “Na Yalo ni Noda Kalou” (Sere ni Lotu, naba 2), ka tukuna vei ira ni a lagati na sere ena vakatabui ni valetabu e Katiladi—kei na vakatabui ni valetabu nikua. Na cava na vuna sa ikoya oqo e dua na sere vinaka me baleta na vakatabui ni valetabu e Katiladi?

  

  Sa tu na itutu ni vunau ni matabete ena muana ruarua ni Valetabu e Katiladi.

Vunau kei na Veiyalayalati 110:11–16

Na idola ni matabete e gadrevi me qaravi kina na cakacaka ni Kalou sa tiko ena Lotu nikua.

Ea kaya o Elder Gary E. Stevenson, “Na luvena taucoko na Tamada Vakalomalagi era [sa] lokataki tu e taudaku ni cakacaka vakalotu ni veivakabulai ni kosipeli i Jisu Karisito—me yacova na veivakalesui mai vakalou mai vei [Mosese, Ilaisa, kei Ilaija]” (“Evei na Ki kei na Lewa ni Matabete?” Ensign se Liaona, Me 2016, 30).

iTaviqaravi e Rawa ni Caka

• Sureti ira na gone mera vakasaqara ena Vunau kei na Veiyalayalati 110:11–16 na yacadra na lewe tolu na parofita makawa era a rairai mai ena Valetabu e Katiladi. Vukei ira mera vaqara na vosa ena veitikina oqo ka vakamacalataka na cava era a “solia”, se biuta na parofita yadua vei Josefa Simici kei Oliva Kaudari. Sa rawa mo raica e dua na ivakamacala veivukei ena “Wase 40: Na Raivotu ena Valetabu mai Katiladi” (iTalanoa mai na Vunau kei na Veiyalayalati, 156–57).

• Wasea na ivakamacala oqo me baleta na idola ni matabete mai vei Peresitedi Russell M. Nelson: “Ena nomu taga e tu kina e dua na idola ki na nomuni itikotiko se na motoka. Na idola ni matabete, ena yasana kadua, sa sega ni tarai rawa ka sega ni laurai rawa. Era ‘waqaca’ na lewa ni matabete” (“Nomu iTavi Yadua ni Matabete,” Ensign se Liaona, Nove. 2003, 45–46). Me vakaraitaki na bibi ni idola ni matabete, veivosakitaka vata kei ira na gone na leqa ena kena yali e dua na idola ni vale se na ki ni motoka. E tautauvata vakacava oqo kei na leqa ni idola ni matabete ka ra sa yali? Vukei ira na gone mera kila e tiko vei cei na idola ni matabete ka ra vakayagataki vakacava na idola oqo me dolava na veivakalougatataki vei keda kece na luve ni Kalou (raica na “iDola ni Matabete,” Tudei ena Vakabauta, 126–27).

• Me vakamacalataka vakalevu na vakalesuimai ni idola ena Valetabu e Katiladi, vakaraitaka na vidio “By the Hand of Elijah the Prophet” (ChurchofJesusChrist.org). Veivosakitaka na cava eda rawa ni cakava meda vakaitavi kina ena cakacaka ka dolava na idola nei Ilaija. Se vakaraitaka na vidio “Gatherers in the Kingdom” (ChurchofJesusChrist.org) ka veitalanoataka na sala e rawa ni da veivuke me vakasoqoni ira na luvena na Tamada Vakalomalagi mera lesu Vua.

Vakauqeta na Vuli e Vale

Sureti ira na gone mera vakayagataka ena macawa oqo na tabana ni itaviqaravi se e dua na iyaloyalo ka ra droinitaka ena gauna ni kalasi me ra vakavulica e dua na ka era sa vulica nikua me baleta na valetabu, se na idola ni matabete ena nodra matavuvale.

Vakatorocaketaki Noda Veivakavulici

Vakarautaka e dua na draki ni dauloloma, ka dau vakarokoroko. “Na nomu ivakaraitaki e dua na veivakauqeti kaukauwa ki na ivakarau ni bula vei ira na [gone]. … Mai na nomu vosa kei na itovo, vakaraitaka ni ko taleitaka na kosipeli ka o kauwaitaka nodra tubu cake vakayalo” (Veivakavulici ena iVakarau ni iVakabula, 15).