Vulaitubutubu ni vale ni veivesu mai Lipati, mai vei Al Rounds

18–24 ni Okotova

Vunau kei na Veiyalayalati 121–123

“Oi Kemuni na Kalou, Ko Ni Sa Tiko Evei?”

Ni ko vulica na Vunau kei na Veiyalayalati 121–23, vakasamataka na veika era sa kila oti tu na gone ena nomu kalasi. Masulaka mo kila na sala mo tara cake kina mai na veika era sa kila tu.

Vola na Veika o Vakauqeti Kina

Sureta na Veiwasei

Kevaka o vakauqeti ira na gone mera wasea e dua na ka era sa vulica ena kalasi ena macawa sa oti ki na nodra matavuvale, solia vei ira na gauna mera wasea na veika era sotava.

Vakavulica na iVunau: Gone Sobu

Vunau kei na Veiyalayalati 121:7–8; 122:7

Na gauna dredre e rawa ni yaco me da vinaka kina.

Na vosa ni Turaga vei Josefa Simici ena vale ni veivesu e Lipati(Libeti) e vakarautaka na madigi meda vukei ira na gone me ra kila ni so na gauna e dau dredre na bula, ia na Tamada Vakalomalagi kei Jisu Karisito e rawa ni vukei keda.

iTaviqaravi e Rawa ni Caka

• Sureti ira na gone me ra vakarogoca na vosa “yalovakacegu” ni o wasea vei ira “Wase 46: Josefa Simici ena Vale ni veivesu e Lipati” (iTalanoa mai na Vunau kei na Veiyalayalati, 172–74) se Vunau kei na Veiyalayalati 121: 7–8. Vukei na gone me ra vakasamataka na sala eso eda rawa ni vakanuinui kina vua na Turaga me vaka a cakava o Josefa me rawa ni da vakila na vakacegu. Vakamacalataka ni dina ga ni a sotava o Josefa na veika dredre, na Turaga a tiko vata kei koya.

• Me vukei ira na gone me kila na noda veivakatovolei sa “[noda] vinaka cake” (Vunau kei na Veiyalayalati 122:7), tukuna vei ira ni tubu vakacava noda masela na gauna eda colata kina e dua na ka bibi. Me vaka era sa laveta cake e dua na iyaya bibi se ra cakacaka vakaukauwa. Vakamacalataka ni lako curuma na gauna dredre e vukea na tubu na yaloda—kevaka eda vuki vua na Turaga me veivuke. Wasea eso na kena ivakaraitaki e rawa ni semati ira na gone o vakavulica. Sureti ira me ra cavuta vata kei iko na malanivosa “Na veika kece oqo … [meda] vinaka cake.”

Vunau kei na Veiyalayalati 122:8

O Jisu Karisito e kila na veika au vakila.

Ena vale ni veivesu e Lipati, a kaya o Jisu Karisito vei Josefa Simici ni o Koya ea siro sobu sara ki na ruku ni veika kecega (raica na Vunau kei na Veiyalayalati 122:8). Sa kena ibalebale oqo ni sa kila ko Koya na veika eda sa sotava tiko ka rawa ni da gole Vua.

iTaviqaravi e Rawa ni Caka

• Me vukei ira na gone me ra vulica me ra gole vei Karisito ni ra sotava na veika dredre, kerei ira mera vakaraitaka vei iko na kedra irairai ni ra sa rarawa se mavoa se rere. O cei e rawa ni vukei keda ni da sa vakila mai na veika oqo? Wilika na Vunau kei na Veiyalayalati 122:8, ka vakamacalataka ni sa kena ibalebale oqo ni o Jisu Karisito e kila na veika eda vakila, ka sa rawa me vukei keda oKoya.

• Lagata vata na “Jisu ni a Gonelailai” (iVolanisere ni Gonelalai, 34), ka vakadinadinataka ni ko Jisu Karisito e rawa ni vukei keda baleta ni sa kila oKoya na veika eda vakila.

  

  Ko Jisu e kila vakavinaka na noda rarawa. Kakua ni Yaco Noqu Lewa, Me Yaco Ga na Nomuni, mai vei Walter Rane.

Vunau kei na Veiyalayalati 123:17

E vinakata na Kalou me’u cakava ena yalomarau na veika au rawata.

Dina ga ni vesu tu e vale ni veivesu o Josefa Simici kara a vakasavi tani na Yalododonu mai na nodra veivale, a vakayaloqaqataki ira na Yalododonu me ra “kitaka na veika kecega eda rawata ena yalo mamarau.”

iTaviqaravi e Rawa ni Caka

• Wilika vei ira na gone na Vunau kei na Veiyalayalati 123:17, ka sureti ira mera tucake ka kaila ni ra sa rogoca na vosa “yalo mamarau.” Sureti ira me ra raitayaloyalotaka ni ra cakava tiko na cakacaka ni veiqaravi ena yalo mamarau.

• Ni lagata vata e dua na sere baleta na veiqaravi, me vaka na “Ni Da Dau Veivuke Tu” (iVolanisere ni Gonelalai, 108B). Vukea na gone me ra vakasamataka na sala eso era rawa ni qarava kina nodra matavuvale kei na nodra itokani ena mamarau.

Vakavulica na iVunau: Gone Qase Cake

Vunau kei na Veiyalayalati 121:7–9; 122:7–9

E rawa ni vinaka vei au na noqu veivakatovolei.

E dua na sala me vakacegui Josefa Simici na iVakabula ni a vakararawataki tiko ena vale ni veivesu e Lipati oya ni a vakavulici koya ni “na veika kece oqori ko na yalomatua kina, ka vinaka cake” (Vunau kei na Veiyalayalati 122:7). Na dina oqo e rawa ni vakalougatataki ira na gone ni ra sotava na nodra veivakatovolei.

iTaviqaravi e Rawa ni Caka

• Sureti ira na gone me ra wasea na veika era kila me baleta na veika a sotava o Josefa Simici ena vale ni veivesu kei na nodra vakasaurarataki na Yalododonu mai Misuri (raica na wase 45–47 ni iTalanoa mai na Vunau kei na Veiyalayalati, 167–75). Tarogi ira na gone na vakacava beka na nodra nanuma kevaka ni o ira o Josefa Simici se dua vei ira na Yalododonu ena gauna oqo. Wilika vata kei ira na gone Vunau kei na Veiyalayalati 121:7–9; 122:7–9, ka sureti ira me ra vakasaqara e dua na ka e kaya na Turaga ena kauta mai vei ira na vakacegu. Ena “vinaka cake” vakacava vei keda ni da sotava na dredre?

• Kerea e rua na gone me rau taura na dui mua ni wa me balavu ni dodo takosova na rumu. Kerea e dua tale na gone me kinita e dua ga na vanua ena wa. Wilika na Vunau kei na Veiyalayalati 121:7–8, ka vakamacalataka ni na wa sa vakatakarakarataka tiko na vei yabaki ni bula tawamudu, na vanua lailai e kinita tiko e vaka na noda veiyabaki ni tu e vuravura. Na cava e kena ibalebale ni na veivakatovolei e vuravura e sa “lekaleka wale ga”?

• Vukei ira na gone me ra raitayaloyalotaka ena vakacava tu kevaka era curu e vale ni veivesu e Lipati me va na vula? Na cava eda na calata vakalevu? Eda na vakayagataka vakacava na noda gauna? Na cava a vulica o Josefa Simici ena Vunau kei na Veiyalayalati 121:7–9; 122:7–9 ka vukei koya me vosota rawa na veika oqo a sotavi? Vakayaloqaqataki ira na gone me ra vola e dua na ivola vua e dua e lako curuma tiko e dua na gauna dredre, ka vakatura mera vakayagataka e dua na ka mai na Vunau kei na Veiyalayalati 121:7–9; 122:7–9 ena nodra ivola.

Vunau kei na Veiyalayalati 121:34–46

Sa dodonu me da ivalavala dodonu me noda na “kaukauwa vakalomalagi.”

Vukei ira na gone o vakavulica mera kila ni rawa ni tiko ena noda bula na kaukauwa ni Kalou kevaka wale ga eda sa tamata ivalavala dodonu.

iTaviqaravi e Rawa ni Caka

• Droinitaka e dua na laini ena vosa kaukauwa cake ena dua na mua kei na kaukauwa e lailai mai na dua tale. Droinitaka e dua idusi me dusi ki na lomadonu ni laini. Digitaka eso na vosa se na malanivosa mai na Vunau kei na Veiyalayalati 121:34–46 me ra vakavulici ni vakalailaitaki se vakalevutaka vakacava ena noda bula na kaukauwa vakalomalagi (me vaka na “ubia na noda ivalavala ca,” “viavialevu,” “yalomalua,” kei na “loloma”). Sureti ira na gone me ra veivukevuke me tomika e dua na vosa, ka vakatulewataka kevaka e vakalailai se tubu ena kaukauwa na vosa oya, ka tosoya vata na idusi. Veitalanoa vata kei ira na gone me baleta na tamata era kila ka sa sotava e dua na veivakayarayarataki vinaka kivei ira na tamata tani baleta ni ra muria na ivakasala ni Turaga ena veitikina oqo.

• Wilika na Vunau kei na Veiyalayalati 121:41–42, 45, ka kerei ira na gone mera vola na itovo vinaka ena veitikina oqo ka vinakata na Turaga me noda. Vukei ira me ra vakamatatataka eso na vosa era sega ni kila. Lesia vei ira yadua na gone e dua na ivakarau, ka vukei ira me ra vakasamataka e dua na sala e rawa ni ra vakaraitaka kina. Ena gauna era sa wasea kece, kerei ira mera wilika na tikina e 45–46 ka vola na veivakalougatataki era na ciqoma kevaka era vakatorocaketaka na ivakarau vinaka.

• Wilika vata na imatai ni laini ena Vunau kei na Veiyalayalati 121:46. E rawa vakacava me “sala vata voli kei iko” na Yalo Tabu? Lagati vata na “The Holy Ghost” (Children’s Songbook, 105) se dua tale na sere me baleta na isolisoli ni Yalo Tabu. Na cava e vakavulica vei keda na sere me baleta na vuna eda gadreva kina na Yalo Tabu me noda itokani tudei?

Vakauqeta na Vuli e Vale

Sureti ira na gone me ra vakasamataka e dua e sotava tiko e dua na gauna dredre. Vukei ira mera dusia e dua na ka a vulica o Josefa Simici ena vale ni veivesu e Lipati e rawa ni ra wasea vata kei na tamata o ya.

Vakatorocaketaki Noda Veivakavulici

Tokona na Vuli e Vale “Era sa qasenivuli ni kosipeli bibi duadua na itubutubu kivei ira na luvedra—sa nodra ruarua na itavi bibi kei na kaukauwa levu duadua me ra vakayarayarataka na luvedra (raica Nai Vakarua 6:6–7). Ni o vakavulici ira na gone ena lotu, vakasaqara ena masumasu na sala eso me ra tokoni kina nodra itubutubu ena nodra itavi bibi” (Veituberi ena iVakarau ni iVakabula, 25).