Totoka o Nauvu, mai vei Larry Winborg

25–31 ni Okotova

Vunau kei na Veiyalayalati 124–125

“Dua na Vale ki na Yacaqu”

Na lesoni cava mai na Vunau kei na Veiyalayalati 124–25 era gadreva na gone me ra vulica? Vakasamataka vakatitobu na taro oqo ni ko vulica tiko ena macawa oqo.

Vola na Veika o Vakauqeti Kina

Sureta na Veiwasei

Vakaraitaka e dua na iyaloyalo ni valetabu e voleka duadua vei iko. Tarogi ira na gone na cava era kila baleta na valetabu. Laivi ira me ra wasea na nodra nanuma me baleta na nodra na lako ki na valetabu ena dua na siga.

Vakavulica na iVunau: Gone Sobu

Vunau kei na Veiyalayalati 124:15,20

O Jisu e dau marau ni’u tovolea me’u caka vinaka.

Mai na ivakatakila sa volai tu ena wase 124, na Turaga e vakaraitaka nona veivakadonui vei Airame Simici kei Joji Mila baleta ni rau a sasagataka tiko me ra muri Koya. O na vukei ira vakacava na gone me ra kila ni sa marautaka na Turaga ni ra saga tiko mera cakava na ka vinaka?

iTaviqaravi e Rawa ni Caka

• Vukei na gone me ra vakasamataka na veika e rawa ni ra cakava e vinaka. Vakaraitaka na iyaloyalo me soli vakasama vei ira (sa rawa mo raica eso ena Gospel Art Book se mekesini ni Lotu). Kerei ira na gone me ra dusia na vinaka vakaoqo. Wilika na Vunau kei na Veiyalayalati 124:15 vei ira na gone, ka kerei ira me ra vakarorogo ki na nona nanuma na Turaga ni ko Airame Simici e digitaka me caka vinaka. Na cava e vakila o Jisu ni da saga meda cakava na veika vinaka?

• Solia vei ira na gone na pepa e buli vaka na uto, ka kerei ira me ra droinitaka na iyaloyalo eso ni ra cakava tiko na veika vinaka. Kerei ira me ra wasea na veika era droinitaka ena kalasi. Na cava eda na vakila ni da digitaka me da cakavinaka? Vakadinadinataka ni o Jisu e marau ni da saga meda cakava na ka dodonu.

• Lagata e dua na sere me baleta na ka e vinakata o Jisu meda cakava, me vaka na “Meu Rarama i Jisu” (iVolanisere ni Gonelalai, 38).

Vunau kei na Veiyalayalati 124:28–29, 39

A vakarota ira na Nona tamata o Jisu me ra tara na valetabu.

Na valetabu sa tiki tudei tu mai ni ituvatuva nei Tamada Vakalomalagi vei ira na Lluvena. Ni o vakavulici ira na gone me ra kila vakamatata na bibi ni kena rokovi na valetabu.

iTaviqaravi e Rawa ni Caka

• Vukei ira na gone me ra kila ni ra sa kunea ga e dua vanua vou na Yalododonu mai Nauvu, na Turaga a tukuna vei ira me ra tara na valetabu (raica na “Wase 50: Na Yalododonu mai Nauvu” iTalanoa mai na Vunau kei na Veiyalayalati, 183–84, se na kena vidio ena ChurchofJesusChrist.org). Sureti ira na gone me vaka era tara vaqito tiko e dua na valetabu.

• Wilika vata kei ira na gone na malanivosa oqo: “Noqu vale tabu, ka ra sa dau vakaroti na tamata me ra tara ena yacaqu” (Vunau kei na Veiyalayalati 124:39). Laivi ira na gone me ra taura tu na iyaloyalo ni dua na valetabu makawa (raica na Gospel Art Book, naba 52 se na tabana ni itaviqaravi ena macawa oqo) kei na iyaloyalo ni valetabu ena nomu vanua. Vakamacalataka ni Tamada Vakalomalagi kei Jisu Karisito sa dau vakaroti ira na Nodrau tamata me ra tara na valetabu—ena gauna makawa kei na noda gauna oqo. Wasea na vosa kei na malanivosa mai na Vunau kei na Veiyalayalati 124:28–29 me vukei ira na gone me ra kila vakavinaka na cava na vuna e vinakata kina na Turaga me da tara valetabu.

• Sureti ira na gone me ra vakalewena na tabana na itaviqaravi ena macawa oqo me vukei ira me ra kila ni da sa tamata ni Kalou ka ni na tamata ni Kalou sa dau vakaroti me tara na valetabu.

Vakavulica na iVunau: Gone Qase Cake

Vunau kei na Veiyalayalati 124:12–21

E marau na Turaga ni’u sa yalodina.

Ena wase 124, ea vakacaucautaka kina na Turaga e vica na Yalododonu ena vuku ni nodra yalodina. Na Nona vosa e rawa ni vukei ira na gone me ra raica na ivakarau e dodonu me ra tara cake.

iTaviqaravi e Rawa ni Caka

• Digitaka eso na itagede vinaka e tukuni ena Vunau kei na Veiyalayalati 124:12–21, ka vola ena vava ni volavola wavokita e dua na iyaloyalo ni iVakabula. Kerei ira na gone me ra vakasaqaqara ena tikina e 12–21, ka vakasaqara na vosa oqo. Vukei ira me ra kila na vosa ka ra sega ni kila vakavinaka tu. Me vaka na tikina oqo, na cava e vakila na Turaga me baleta na tamata era vakatorocaketaka na ivakarau oqo?

Vunau kei na Veiyalayalati 124:28–30, 38–41

E vakaroti ira na Nona tamata o Jisu me ra tara valetabu.

O ira na gone o vakavulica ena qase cake me ra lako ki na valetabu ka laki vakaitavi ena cakacaka vakalotu ni valetabu. Na cava o rawa ni vakayacora me vukea nodra vakavakarau?

iTaviqaravi e Rawa ni Caka

• Ubia e dua na iyaloyalo se droini ni valetabu. Sureti ira na gone me ra wilika na Vunau kei na Veiyalayalati 124:38–41 me baleta na ivakatakilakila me baleta na veika e tiko ena iyaloyalo. Me ra kunea na gone na iyaloyalo ka veivosakitaka na cava era vakavulica na tikina oqo me baleta na vuna e vinakati keda kina na Turaga me da tara valetabu.

• Sureti ira na gone me ra wilika na Vunau kei na Veiyalayalati 124:28–30 me vakasaqara na vuna e solia kina vei Josefa Simici na Turaga me baleta na kena tarai cake na valetabu e Nauvu. Wasea na nomu nanuma me baleta na valetabu kei na veika beka oa sotava ena kena qaravi tiko na nodra papitaiso me baleti ira na mate. Vukei ira na gone me ra vakatulewataka na balavu ni gauna ena yaco ni bera ni ra sa qase cake me ra vakayacora na papitaiso me baleti ira na mate ena valetabu.

• Kevaka e tiko na nomu ivolatara ni valetabu, vakaraitaka vei ira na gone, se sureta e dua na itabagone ena tabanalevu me vakaraitaka vei ira na gone na nona ivolatara. Tukuna vei ira na gone na cava na vuna e bibi kina me dua na ivolatara ni valetabu kei na veika eda gadreva me da cakava me rawata kina e dua. Vakayaloqaqataki ira me ra tekivu vakavakarau ena gauna oqo me ra rawata na nodra dui ivolatara.

  

  Josefa Simici ena Valetabu mai Nauvu, mai vei Gary E. Smith.

Vunau kei na Veiyalayalati 124:91–92

E dua na veivakalougatataki vakapeteriaki e rawa ni solia vei au na veidusimaki vakauqeti .

Kevaka o sa ciqoma na nomu veivakalougatataki vakapeteriaki, railesuva ni bera ni vakavulici vei ira na gone me baleta na veivakalougatataki oqo. Na cava na vuna o sa vakavinavinaka kina me baleta na nomu veivakalougatataki vakapeteriaki? O na vakauqeti ira vakacava na gone me ra vakavakarau me ra ciqoma na nodra?

iTaviqaravi e Rawa ni Caka

• Sureta e dua vei ira na gone me wilika na Vunau kei na Veiyalayalati 124:91–92, ka sureti ira ena kalasi me ra vakarogoca na cava ea kacivi Airame Simici na Turagame cakava. Na cava era kila na gone me baleta na veivakalougatataki vakapeteriaki? Kevaka o sa ciqoma na nomu veivakalougatataki vakapeteriaki, vakaraitaka vei ira na gone na kena irairai. (Nanuma ni ka tabu na usutu ni itukutuku ni nomu veivakalougatataki vakapeteriaki.) Vakamacalataka ni veivakalougatataki vakapeteriaki e veivakalougatataki uasivi eda ciqoma mai vei ira na peteriaki. Na veivakalougatataki oqo ena rawa ni vukei keda meda vulica vakalevu cake me baleti keda kei na veika e vinakata na Tamada Vakalomalagi meda cakava.

• Vakasamataka mo sureta e dua na itubutubu se veitacini ni dua vei ira na gone o vakavulica me ra wasea ki na kalasi na cava na vuna era vakavinavinakataka kina na nodra veivakalougatataki vakapeteriaki. Kerei ira mera wasea na sala era sa lewa era vinakata me ra taura kina na nodra veivakalougatataki. Wasea na nomu ivakadinadina me baleta na veivakalougatataki vakapeteriaki.

Vakauqeta na Vuli e Vale

Sureti ira na gone me ra wasea vata kei na dua na lewe ni matavuvale e dua na ka era sa vulica me baleta na valetabu kei na vuna era na vinakata me ra lako kina ki na valetabu ena dua na siga.

Vakatorocaketaki Noda Veivakavulici

O ira na gone e rawa ni ra kila na veivakayarayarataki ni Yalo Tabu. Vakavulica vei ira na gone ni yalo vakacegu, loloma, kei na lomavinaka e tiko vei ira ni ra tukuni se lagati Jisu Karisito kei na Nona kosipeli e sa vu mai na Yalo Tabu. Na veiyalo oqo sa rawa ni tara cake na nodra ivakadinadina.