Keda vata kei Ira kei Ira vata kei Keda, mai vei Caitlin Connolly

1–7 ni Noveba

Vunau kei na Veiyalayalati 125–128

“Na Domo ni Mamarau vei Ira na Bula kei Ira na Mate”

Kevaka o vakavulici ira tiko na gone sobu ka gadreva na ikuri ni veivuke, raica na “Sotava Nodra Gagadre na Gonelalai Sobu ena ivurevure ni vuli oqo.

Vola na Veika o Vakauqeti Kina

Sureta na Veiwasei

Vukei ira na gone me ra vakasamataka e dua na ka era sa vulica mai vale ena macawa oqo, se ena Lalai. Solia vei ira e vica na miniti mera droinitaka na iyaloyalo ni cava era vakasamataka ka wasea ki na kalasi.

Vakavulica na iVunau: Gone Sobu

Vunau kei na Veiyalayalati 126:3

Au lomana na noqu matavuvale.

Ni lesu mai i vale o Biriqemu Yaga ni oti nona vunautaka tiko na kosipeli, ea tukuna vua na Turaga me na vakanamata ki na nona qarava na nona matavuvale.

iTaviqaravi e Rawa ni Caka

• Wasea vata kei ira na gone na itukutuku me baleti Biriqemu Yaga ena “Wase 50: na Yalododonu mai Nauvu” (iTalanoa mai na Vunau kei na Veiyalayalati, 184), se umana vata na Vunau kei na Veiyalayalati 126 ena nomu vosa. Wilika na Vunau kei na Veiyalayalati 126:3 kivei ira na gone, ka vakadreta na malanivosa “qaravi iratou ga na nomu matavuvale.” Na cava na kena ibalebale me qaravi na noda matavuvale? Vukei ira na gone mera vakasamataka eso na sala era rawa ni vakaraitaka nodra loloma vei ira na lewe ni nodra matavuvale.

• Ni bera na kalasi, sureti ira na gone me ra kauta mai e dua na iyaloyalo ni nodra matavuvale (se kerei ira mera droinitaka na iyaloyalo eso). Qai kerei ira mera wasea na veika era taleitaka me baleta na nodra matavuvale. Wasea e dua na iyaloyalo ni nomu matavuvale, ka vakayacora vakakina. Vakamacalataka na vuna e vinakata kina na Tamada Vakalomalagi meda qaravi ira na noda lewe ni matavuvale. Lagata e dua na sere e vakavulica na dina oqo, vaka na “When We’re Helping” (Children’s Songbook, 198).

Vunau kei na Veiyalayalati 128:5, 12

Ira kece na luve ni Kalou sa gadreva na madigi me ra papitaiso.

Me ikuri ni veivukei vei ira na luvedra ena nodra vakavakarau me ra vakayacora na nodra veiyalayalati ni papitaiso, vakavulica vei ira ni rawa ni da vukei ira era sa mate ka sega ni papitaiso mera ciqoma na veivakalougatataki vata ga.

iTaviqaravi e Rawa ni Caka

• Vakaraitaka e dua na iyaloyalo kei Jisu Karisito ni papitaisotaki (raica na Gospel Art Book, naba 35), se vakaraitaka na vidio “Na Papitaiso i Jisu Karisito” (ChurchofJesusChrist.org). Kerei ira na gone kevaka era sa raica e dua me papitaiso. Na cava era nanuma baleta na ka oya? Vakayagataka na iyaloyalo se vidio mo vakaraitaka vei ira na gone ni gauna eda sa papitaiso kina, eda lako sobu kece ena loma ni wai ka qai lesu cake, me vaka ga a vakayacora o Jisu. Dolava na Vunau kei na Veiyalayalati 128:12, ka vakamacalataka ni o Josefa Simici e vakavulica ni papitaiso e vakananuma vei keda na Tucaketale mai na mate.

• Tukuna vei ira na gone me baleta e dua tale o kila (me vaka e dua na qase e liu) era sa mate yani ka sega tu ni papitaiso. Wilika na Vunau kei na Veiyalayalati 128:5, ka me ra veivukevuke ena taura tiko e dua na iyaloyalo ni dua na tobu ni papitaiso ni valetabu (raica na ituvatuva ena macawa oqo ena Lako Mai, Mo Muri Au—Me Baleta na Tamata Yadua kei na Matavuvale). Vakadinadinataka ni Tamada Vakalomalagi e vakatarai keda meda papitaisotaki e vuravura me baleti ira na tamata era sa mate. Oqo na sala sa rawa kina ni papitaiso ka cakava na veiyalayalati vata kei Koya o ira kece na luve ni Kalou.

Vunau kei na Veiyalayalati 128:18

Na Tamada Vakalomalagi e vinakati au meu vulica noqu ituvatuva ni kawa.

E tu na sala rawarawa me rawa ni ra vakaitavi kina na gone ena cakacaka ni tuva kawa. Vukei ira mera vakila na loloma me baleti ira na tamata mai na nodra vuni kawa.

iTaviqaravi e Rawa ni Caka

• Bulia e dua na isema ni pepa vata kei na yacadra na tamata ena nomu matavuvale (raica na tabana ni itaviqaravi ena macawa oqo), ka kauta mai me ivakaraitaka ki na kalasi. Tukuna vei ira e vica na ka me baleta na tamata ena nomu isema. Wilika vei ira na gone mai na Vunau kei na Veiyalayalati 128:18, ka vakamacalataka ni vakavulica o Josefa Simici ni “sa dua na isema kaukauwa … me umani vata na qase kei ira na gone.” Vukei ira na gone me ra cakava na sinucodo ni nodra dui matavuvale, ka sureti ira me ra kauta na sinucodo e vale ka vukei ira mera kuria na yacadra na qase e liu o nodra itubutubu.

• Kerei ira na gone me ra wasea eso na ka me baleta e dua vei ira na tubudra. Tukuna vei ira e dua na nomu italanoa taleitaki me baleta na nomu itubutubu se o ira na tubumu. Vakaraitaka na iyaloyalo ke rawa. Vakayaloqaqataki ira na gone me ra vulica vakalevu cake me baleta na tubudra kei na so tale na qase e liu.

Vakavulica na iVunau: Gone Qase Cake

Vunau kei na Veiyalayalati 126

Au rawa ni veivuke me qarava na noqu matavuvale.

E rawa vakacava mo vukei ira na gone o vakavulica me ra veiqaravi vei ira na lewe ni nodra matavuvale ena sala e vakaibalebale cake?

iTaviqaravi e Rawa ni Caka

• Wilika vata na Vunau kei na Veiyalayalati 126:3. Na cava beka na vuna e kerei Biriqemu Yaga kina o Tamada Vakalomalagi me “qaravi iratou ga na [nona] matavuvale”? Eda rawa vakacava ni cakava vakakina vei ira na noda matavuvale? Vola na veika e rawa ni da cakava meda qarava kina na noda matavuvale. Na noda vakayacora na veika oqo e vukei keda vakacava meda na vakataka sara na Tamada Vakalomalagi?

• Wasea vata kei ira na italanoa ni gonelalai na makubui Sisita Carole M. Stephens o Porter (raica na “Sa Kena iNaki Meda Reki Vakalevu,” Ensign se Liaona, Nove. 2013, 115). Na cava a cakava o Porter me taqomaka kina na nona matavuvale? E rawa vakacava ni da vakamuria na nona ivakaraitaki?

Vunau kei na Veiyalayalati 128:1, 15–18

Na papitaiso ena vukudra na mate e vakatubura e “dua na isema kaukauwa” vei ira na noqu qase e liu kei au.

E vakavulica o Josefa Simici ni papitaiso ena vukudra na mate e vauci keda ki vei ira na noda qase e liu me vaka e dua na isema ni dua na sinucodo. E rawa vakacava mo vukei ira na gone me ra vakila na reki e yaco mai ni vulici me baleta na noda qase e liu ka raica ni sa vakayacori na cakacaka ni valetabu ena vukudra?

iTaviqaravi e Rawa ni Caka

• Wasea na kalasi ki na rua na ilawalawa, ka kerea na imatai ni lawalawa mera wilika na Vunau kei na Veiyalayalati 128:1 me vaqaqa na ulutaga cava e vakatawana na vakasama nei Josefa Simici. Kerea na ilawalawa kadua mera wilika na tikina e 17 ka raica na cava na ulutaga vakatoka o koya me “kena ka lagilagi duadua.” Mera wasea na veika era sa kunea, ka veivosakitaka na vuna sa rui lagilagi kina na ulutaga oqo. Kevaka e rawa, sureta e dua na itabagone e sa cakava oti na papitaisotaki ena vukudra na mate me wasea na veika e sotava ka vakamacalataka na cava na vuna eda cakava kina na cakacaka oqo.

• Vakasamataka mo vakayagataka e dua na lesoni me vakaraitaka kina ni da gadreva me ra vukei kina na noda qase e liu era a sega ni papitaiso. Me kena ivakaraitaki, vakaraitaka e dua na isolisoli se e dua na ivakalomavinaka, ia biuta e na vanua era sega ni yacova rawa na gone. Tukuna vei ira na gone ni rawa ni nona na solisoli oya ia me kua ni gole tani mai na nona idabedabe. Tarogi ira na vo ni gone na cava e rawa ni ra cakava me ra vukea na gone me ciqoma na ka oya. Wilika vata na Vunau kei na Veiyalayalati 128:15, ka veitalanoataka na kena semati ki na lesoni.

• Sureti ira na gone me ra cakava e dua na sinucodo pepa vata kei na yacadra na nodra itubutubu, tubudra, na tubudra vakarua, kei na so tale (raica na tabana ni itaviqaravi me baleta na lesoni oqo). Kevaka era sega ni kila na gone na yacadra na nodra qase, vakayaloqaqataki ira me ra kila na yacadra ka vola ena sinucodo e vale. Wilika vata na Vunau kei na Veiyalayalati 128:18 ka vakasaqara na cava na “isema kaukauwa” ka cakava na noda tuva kawa me “veisemati e taucoko.” Tukuna vei ira e dua na italanoa me baleta e dua na qase e liu ka vukei iko mo semati tikoga vua. Se vakaraitaka na vidio “Courage: I Think I Get It from Him” (ChurchofJesusChrist.org).

• Vakaraitaka vei ira na gone e dua na ivolatara ni valetabu, ka tukuna vei ira o na rawata vakacava e dua. Vukei ira me ra vakanamata me rawati na nodra ivolacuru ni valetabu me ra na rawa ni lako ki valetabu ka papitaiso e vukudra na nodra qase.

  

  Eda rawa ni kunea na yacadra na noda qase e liu ka vakayacora na cakacaka vakalotu ni valetabu ena vukudra.

Vakauqeta na Vuli e Vale

Sureti ira na gone me ra kerea e dua e vale me vukea nodra vulica eso tale na ka me baleta na nodra ituvatuva ni kawa. Era rawa ni kerea me ra rogoca na italanoa me baleta e dua nodra qase se na vakayagataki ni FamilySearch.org mera kunea kina na yacadra na qase e liu era a sega ni papitaiso.

Vakatorocaketaki Noda Veivakavulici

Laivi ira na gone mera vakaraitaka na nodra dau bulibuli ka. Ena gauna ni nodra tara-ka, droinitaka se rokataka na gone e dua na ka baleta na italanoa se ivakavuvuli era sa vulica tiko, era dau nanuma vakavinaka cake. Era rawa talega ni ra vakayagataka na veika era vakarautaka me ra vakavulici ira eso tale. (Raica na Veivakavulici ena iVakarau ni Vakabula, 25.)