Oi Keda Kei Ira vata Kei Ira kei Keda, mai vei Caitlin Connolly

1–7 ni Noveba

Vunau kei na Veiyalayalati 125–128

“Na Domo ni Mamarau Vei Ira na Bula kei Ira na Mate”

Nanuma mo vola na veika o vakila ni ko vulica na Vunau kei na Veiyalayalati 125–28 mo rawa ni vakasamataka tiko ka wasea vei ira na tamata.

Vola na Veika o Uqeti Kina

Ena Okosita ni 1840, a vakarorogo tiko ena yalorarawa o Jane Neyman vua na Parofita Josefa Simici ni vosa tiko ena lotu ni veibulu nei nona itokani o Seymour Brunson. Se qai mate oti toka ga na luvei Jane cauravou o Cyrus. A vakuria na nona rarawa ni o Cyrus a se bera tu ni papitaiso, ka sa lomaleqa o Jane ni sa na yaco oqo ki na yalona me tawamudu. Sa kila o Josefa na nanuma nei Jane; ka a dau lomatarotaka tu oqo o Josefa baleti tuakana o Alvin, ka a mate ni bera ni papitaiso. Sa qai laki veiwasei na Parofita vata kei Jane, kei ira na tamata kecega ena gauna ni veibulu, me baleta na veika sa vakatakila mai na Turaga vei koya me baleti ira era sa mate ka sega ni ciqoma na cakacaka vakalotu ni kosipeli—kei na cava eda na vukei ira kina.

Na ivunau ni papitaiso me baleti ira na mate era a marautaka na Yalododonu; e gole yani vakatotolo na nodra vakasama vei ira na itubutubu era sa takali yani, tubunigone, kei na lewe ni matavuvale. Ia oqo sa tiko na nodra inuinui! A marau vata kei ira o Josefa, ka a cavuta na vosa ni reki, ka veivagumatuataki me vakaraitaka na veika e vakavulici koya kina na Turaga me baleta na nodra vakabulai na mate: “Me ra kaila ena reki na veiulunivanua, ia dou kaila vakadomoilevu na veibuca; dou seretaka na nona lagilagi na nomudou Tui Tawamudu oi kemudou na veiwasawasa kei na vanua mamaca!” (Vunau kei na Veiyalayalati 128:23).

Raica na Yalododonu, 1:415–27; “Letters on Baptism for the Dead,” Revelations in Context, 272–76.

Vakasama ni Vuli iVolanikalou ni Tamata Yadua

Vunau kei na Veiyalayalati 126

E vinakata na Turaga meu qarava na noqu vuvale.

Ni sa lesu ki vale mai na vica na ilesilesi vaka-kaulotu ki Igiladi, a ciqoma o Brigham Young e dua tale na veikacivi mai vua na Turaga—me “qaravi iratou ga na [nona] matavuvale” (tikina e 3), ka ra a sotava na veika dredre ena nona lako tu. Ni ko vakasamataka vakatitobu na kena oqo kei na so tale na ivakasala ena wase 126 me baleti iko, vakasamataka na vosa oqo nei Peresitedi Bonnie L. Oscarson, na Peresitedi Raraba ni Gone Yalewa e liu:

“Nanuma tiko ni so na gagadre bibi cake era na rairai tu sara ga e matamu. Tekivutaka na nomu veiqaravi ena nomu itikotiko kei na loma ni nomu matavuvale. Oqo na veimaliwai ena rawa ni tawamudu. Ena gauna mada ga—vakabibi kevaka e—sega ni vinaka tu na ituvaki ni nomu matavuvale, sa rawa mo vakasaqara na sala mo veiqaravi, veilaveti, ka veivaqaqacotaki. Tekivu ena vanua ga o tu kina, lomani ira ga, ka ra vakarautaka na matavuvale o gadreva mo tiko kina ena veisiga ni mataka” (“Na Gagadre sa Tu e Matada,” Ensign se Liaona, Nove. 2017, 27).

Raica talega na “Take Special Care of Your Family,” Revelations in Context, 242–49.

Vunau kei na Veiyalayalati 127:2–4

E kila na Turaga na noqu reki kei na rarawa.

Na veibeitaki vakailasu kei na veivakarerei me vesu a vakasaurarataki Josefa Simici tale me vunitaki koya ena Okosita ni 1842. Ia na vosa e a vola vei ira na Yalododonu ena gauna oqo (sa mai Vunau kei na Veiyalayalati 127) sa sinai ena vakanuinui kei na reki. Na cava e vakavulica vei iko na tikina 2–4 me baleta na Kalou? me baleta na nomu rawa ni sotava na nomu vakatovolei?

Sa rawa mo vola na sala sa tokoni iko tiko kina na Turaga ena “wai titobu” ni nomu bula.

Vunau kei na Veiyalayalati 127:5–8; 128:1-8

“Na veika kecega dou vola e vuravura ena volai mai lomalagi.”

Ni o wilika na Vunau kei na Veiyalayalati 127:5–8; 128:1–8, vakaraica na vuna a solia kina na Turaga vei Josefa Simici na idusidusi vakaoqo me baleta na volai ni papitaisotaki ena vukudra na mate. Na cava e vakavullica oqo vei iko me baleta na Turaga kei na Nona cakacaka?

Ni da cakava na veiqaravi ena valetabu me baleta na noda qase e liu e vauca na yaloda vei ira.

Vunau kei na Veiyalayalati 128:5–25

Na nodra vakabulai na noqu qase e liu sa ka bibi ki na noqu vakabulai.

E sa matata vinaka ni veika sa vakatakila na Kalou maivei Josefa Simici na vuna era gadreva kina na noda qase e liu era sega ni papitaiso rawa ena bula oqo meda veivuke ki na nodra vakabulai. Ia na cava o nanuma ni sa “yaga ka veiganiti ki na noda vakabulai” na nodra vakabulai na noda qase e liu? (raica na Vunau kei na Veiyalayalati 128:15–18; vakuri ena matanivola kala).

E vakavulica natikina e 5 ni cakacaka vakalotu ni papitaiso ena vukudra na mate a vakarautaki “ni sa bera ni tauyavutaki ko vuravura.” Na cava e vakavulica vei iko na dina oqo me baleta na Kalou kei na Nona ituvatuva? Na cava beka sa vakuria na itukutuku nei Peresitedi Henry B. Eyring “Vakasoqoni Vata na Matavuvale ni Kalou” mo kila vinaka kina? (Ensign se Liaona, Me 2017, 19–22).

A vakayagataka o Josefa Simici na veimalanivosa me vaka na “kaukauwa ni veivauci,” “semati ena isema,” ka “vakataucokotaki na duavata” ni a veivakavulici me baleta na cakacaka vakalotu ni matabete, kei na papitaiso ena vukudra na mate. Vakaraica oqo kei na veimalanivosa era tautauvata ena nomu wilika na Vunau kei na Veiyalayalati 128:5–25. Na cava soti eso na veika oqori, maivei Jisu Karisito, ni na laki vauci vata ena vuku ni cakacaka vakalotu ni matabete ena vukudra na mate? Na cava na vuna e vosa vinaka kina na “kaukauwa” me vakamacalataka kina na vunau ni nodra vakabulai na mate? (raica na tikina e 9–11).

Na cava e uqeti iko baleta na vosa nei Josefa Simici ena tikina e 19-25? Era vakauqeti iko vakacava na veitikina oqo baleta na veiqaravi ni valetabu baleti ira nomu qase e liu? me baleti Jisu Karisito? Na cava o vakila o sa vakauqeti kina mo cakava? (raica na FamilySearch.org/discovery me baleta na vakasama).

Raica talega na 1 Korinica 15:29; Dale G. Renlund, “Cakacaka ni Valetabu kei na Tuva Kawa: Veivauci kei na Veivakabulai,” Ensign se Liaona, Me 2018, 46–49; “A Sacrifice of Time” and “Their Hearts Are Bound to You,” vidio, ChurchofJesusChrist.org.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 126.Na wiliki ni ivakasala oqo vei Brigham Young e rawa ni vakauqeti ira nomu matavuvale mera tukuna na ivakarau e rawa ni vakayagataki vakalevu cake na gauna ni “qaravi” (tikina e 3) kemudou mada.

Vunau kei na Veiyalayalati 128:15–18.Na cava eso na veivakalougatataki ni veivakabulai kei na veivakauasivitaki ni cakacaka ni tuva kawa? Sa rawa mo raica eso na vakasama ena vidio “The Promised Blessings of Family History” (ChurchofJesusChrist.org) se ena sere baleta na tuva kawa, me vakataka na “iTuvatuva ni Noqu Kawa” (Nodra iVolanisere na Lalai, 100).

Vunau kei na Veiyalayalati 128:18.Sa rawa mo cakava e dua na itui pepa ka volai kina na yacadra na lewe ni vuvale kei ira na qase e liu ena isema yadua me vakaraitaka kina na tuvakawa kei na cakacaka ni valetabu e vakavuna na “semati ki na isema” e kovuti keda vata kei ira na noda qase e liu. Sa rawa mo cakava eso na vakadidike ena FamilySearch.org mera laurai na ikuri ni lewe ni matavuvale ka raica na balavu ni nomu isema sa tubu cake tiko.

Vunau kei na Veiyalayalati 128:19–23.Sa rawa vei ira na lewe ni matavuvale mera vakasaqara ena veitikina oqo na vosa e vakaraitaka na marau nei Josefa Simici me baleta na kosipeli i Jisu Karisito kei na nodra vakabulai na mate. Sa rawa ni ra wasea na vuvale na veika era sotava ka ra sa marautaka talega kina na cakacaka oqo—se o rawa mo vakasaqara vata na veika e sotavi ena FamilySearch.org/discovery.

Me ikuri ni vakasama baleta na nodra vakavulici na gone, raica na ituvatuva ni macawa oqo ena Lako Mai, Mo Muri Au—Baleta na Lalai.

Na sere sa vakaturi: “iTuvatuva ni Noqu Kawa,” iVolanisere ni Gonelalai, 100.

Domo ni Vakalesuimai

Papitaiso ena Vukudra na Mate, “E Dua na Ulutaga Vou ka Lagilagi”

Na droini oqo e vakaraitaka tiko na tobu ni papitaiso ni Valetabu e Nauvoo ni vakataqari toka ena tinikarua na bulumakau.

O Phebe kei Wilford Woodruff

A vakaitikotiko voleka o Phebe Woodruff e Nauvoo ena gauna sa tekivu veivakavulici tiko kina o Josefa Simici ena vuku ni papitaiso baleti ira na mate. A vola kina na veika oqo vei watina, o Wilford, ka a veiqaravi tiko vakadaukaulotu e Igiladi:

“Sa vulica o Baraca Josefa … mai na ivakatakila ni o ira ena lotu oqo sa rawa me ra papitaisotaki ena vukudra e dua vei ira na wekadra era sa mate era a sega mada ni rogoca na kosipeli oqo, sa vakakina sara mada ga vei ira na nodra gone, itubutubu, tacidra, ganedra, tubunigone, momo kei na nei. … Ni ra sa papitaiso ena vukudra na nodra itokani era sa sereki mai na vale ni veivesu ka rawa ni ra tauri ira ena tucake tale ka kauti ira mai ki na matanitu vakasilesitieli—na ivunau oqo sa ciqomi tiko ena lotu ka ra sa gole tiko yani ki liu vakalewelevu, ka so era sa papitaisotaki kina vaka 16 …ena dua na siga.”¹

E muri a qai kaya kina o Wilford Woodruff baleta na ivakavuvuli oqo: “Ena gauna ga au sa rogoca kina a lade na yaloqu ena reki. … Au sa toso ga ki liu ka a papitaisotaki baleti ira kece na wekaqu era sa mate au rawa ni vakasamataka. … Au vakila niu via kaya aleluia ni sa yaco mai na ivakatakila ka vakaraitaki mai kina vei keda na nodra papitaiso na mate. Au vakila ni sa noda na dodonu meda rekitaka na veivakalougatataki ni Lomalagi.”²

Vilate Kimball

Me vakataki Sisita Woodruff, a rogoca o Vilate Kimball me baleta na papitaiso ena vukudra na mate ena gauna a lako tu kina na watina o Heber, me laki vunautaka na kosipeli. A volavola vua o Vilate:

“Sa mai dolava oqo o Peresitedi Smith e dua na ulutaga vou ka lagilagi … sa vakavuna kina e dua na veivakavoutaki ena loma ni lotu. Oya, na veipapitaisotaki me baleti ira na mate. A vosa kina o Paula ena imatai ni Korinica ena wase 15 ena tikina e 29. E sa ciqoma o Josefa e dua na kena ivakamacala vakavotukana sara ena iVakatakila. … Sa ikoya na dodonu ni Lotu oqo me ra papitaisotaki me baleta na nodra kawa ka ra sa mate ni se bera ni basika mai na Kosipeli oqo; ka lesu sara mada ga vei ira naTukadra kei na Budra vakarua. Ni vakayacori oqo, eda sa matataki ira tiko; ka solia vei ira na madigi mera na tucake mai ena imatai ni tucaketale. A kaya o koya ni na vunautaki na Kosipeli vei ira… ia e sega ni dua na yalo me na papitaisotaki. … Me vaka ni sa vunautaki tiko eke na ivakarau oqo, sa dau vakayavalati tiko ga na wai. Ena gauna ni koniferedi sa laki yacova sara na walu ki na tini na iTalatala Qase era sa tu e wai mera veipapitaisotaki. … Au a via papitaisotaki me baleti Tinaqu. Au sa cakacakataka meu waraka nomu lesu mai vale, ia na iotioti ni gauna a vosa kina o Josefa baleta na ulutaga oqo, a vakasalataka na tamata yadua mera lako yani ka laki cakava, ka sereki ira sara vakatotolo na wekadra mai na vesuki tu. Io au sa vakasamataka tiko meu sa gole yani ena macawa oqo, ni vica vei ira eda veivolekati tiko era na gole yani. E so era sa papitaisotaki oti vakavica. … O sa raica kina ni sa soli na madigi vei keda kece. E sega beka ni vunau lagilagi oqo?”³

Phebe Chase

Ena gauna sa caka oti kina na tobu ni papitaiso ena Valetabu e Nauvoo, sa laki vakayacori e kea na papitaiso ena vukudra na mate ka sa sega tale ena uciwai. A volavola o Phebe Chase, a vakaitikotiko e Nauvoo, kivei tinana me baleta na valetabu, ka vakamacalataka na tobu ni papitaiso ni sa vanua “eda rawa ni papitaisotaki baleti ira na noda mate ka yaco meda dauveivakabulai ena Ulunivanua ko Saioni.” A tomana tale na nona vakamacala ni ena tobu oqo, “Au a sa papitaisotaki me baleti tamaqu daulomani kei ira kece na noqu itokani era sa mate. … Ia au sa vinakata oqo meu kila na yacai tamamu kei Tinamu meu rawa ni sereki rau, niu sa gadreva meu vakacegui ira na Mate. … Sa vosa tale mai na Turaga ka sa vakalesuamai na ivalavala makawa.”⁴

Sally Randall

Ena nona volavola kivei ira na nona itokani kei na matavuvale me baleta na papitaiso ena vukudra na mate, a nanuma o Sally Randall na takali nei luvena tagane o George:

“Isa sa qai dua na gauna dredre sara vei au ka vaka se bera niu rawa ni veivakaduavatataki me vakakina, ia … sa papitaiso o tamana me baleti koya ka sa dua na ka lagilagi ni da sa vakabauta ka ciqoma na taucoko ni kosipeli me vaka sa vunautaki tu oqo ka rawa ni papitaisotaki me baleti ira kece na itokani era sa mate ka vakabulai ira ena kena yawa ki muri eda rawa ni kilai ira.

“Au vinakata mo vola vei au na imatai ni yacadra kece era sa mate eda semati tu vei ira me yacova sara vei ira na tukada kei na buda ena ivakarau cava ga. Au vinakata meu cakava na veika au rawata meu vakabulai ira na noqu itokani kau na marau vakalevu kevaka e so vei kemuni mo ni lako mai ka vukei au me baleta ni oqo sa dua na cakacaka levu me dua e cakava duadua ga. … Au sa namaka tiko mo na kaya ni oqo e dua na ivunau vakatani ia o na raica ni sa ka dina.”⁵

iDusidusi

1. Phebe Woodruff letter to Wilford Woodruff, Oct. 6, 1840, Church History Library, Salt Lake City; vakavoutaki ni sipeli kei na pagitueti.

2. Wilford Woodruff, “Remarks,” Deseret News, May 27, 1857, 91; vakavoutaki na pagitueti.

3. iVola nei Vilate Kimball kivei Heber C. Kimball, Oct. 11, 1840, Church History Library, Salt Lake City; vakavoutaki na sipeli kei na pagitueti.

4. iVola nei Phebe Chase, sega na tikinisiga, Church History Library, Salt Lake City; vakavoutaki na sipeli kei na pagitueti. Ena imatai ni gauna era sa cakava kina na Yalododonu mera papitaisotaki ena vukudra na mate, eso na gauna eso vei ira sa papitaisotaki ena vukudra na nodra qase e liu tagane se yalewa. E a qai vakaraitaki e muri ni dodonu ga vei ira na tagane mera papitaiso baleti ira na tagane kei na yalewa vei ira na yalewa.

5. Sally Randall ivola, 21 ni Epe., 1844, Church History Library, Salt Lake City; vakavoutaki na sipeli kei na pagitueti.

Na tobu ni papitaiso ena Valetabu e Ogden Utah e vakatikori toka ena dakudra e tinikarua na bulumakau.