Valeniveivesu e Carthage

22–28 ni Noveba

Vunau kei na Veiyalayalati 135–136

O Koya “Sa Dregata na Nona iLesilesi kei na Nona Cakacaka ena Nona Dra”

Ni o vulica na Vunau kei na Veiyalayalati 135–36, ena rawa ni uqeti iko na Turaga ena raiyawa eso me vukei iko ni tutaka na ka o sa wilika. Ni yaco oqori, vola na ka sa vakavulici iko kina o Koya.

Vola na Veika o Uqeti Kina

Na yakavi ni ka 27 ni June, 1844, rau a tiko tale kina e valeniveivesu o Josefa kei Hyrum Smith, vata kei John Taylor kei Willard Richards. Eratou vakabauta ni a sega ni dua na nodratou cala, ia eratou sa soli iratou ga yani, ka nuitaka me na tarova na nodra vakacacani na Yalododonu e Nauvoo. Oqo a sega ni matai ni gauna ki na meca ni Lotu mera biuti Parofita Josefa e valeniveivesu, ia ena gauna oqo e vaka me sa kila ni sa na sega ni lesu bula tale. Eratou qai saga na veivakacegui vakaveitokani ena nodratou wilika na iVola i Momani ka laga serenilotu. Ia a qai rogo na cabolo ni dakai, ka ni vica walega na miniti sa mai mudu kina na bula i Josefa Simici kei na tuakana o Hyrum Smith.

Ia a sega ni mai mudu e kea na inaki vakalou eratou sa mai ciqoma. Ka a sega ni mai mudu kina na Vakalesuimai ni kosipeli i Jisu Karisito. Sa levu sara na cakacaka me vakayacori ka levu na ivakatakila me na dusimaka na Lotu. Na vakamatei ni Parofita a sega ni vakamatea rawa na cakacaka ni Kalou.

Raica na Yalododonu, 1:521–52.

Vakasama ni Vuli iVolanikalou ni Tamata Yadua

Vunau kei na Veiyalayalati 135; 136:37–39

Rau sa mai dregata o Josefa Simici kei Hyrum Smith na nodrau ivakadinadina ena nodrau dra.

Raitayaloyalotaka na ituvaki ni yalomu kevaka o a tiko beka mai Nauvoo ena gauna rau a vakamatei kina o Josefa kei Hyrum Smith (raica na Yalododonu, 1:554–55). O na saga beka vakacava me vakaibalebale kina na veivakamatei oqo? Na Vunau kei na Veiyalayalati 135, a tabaki taumada ni oti toka e tolu na vula mai na siga ni veivakamatei, ena rawa ni veivuke. Sa rawa ni o makataka na vosa kei na malanivosa eso ka na vakavurea vei iko na kilaka kei na veivakadeitaki. Na cava o na kaya vua e dua e taroga, “Na cava na vuna a vakatara kina na Kalou me vakamatei na Nona Parofita?”

Raica talega na Vunau kei na Veiyalayalati 5:21–22; 6:29–30; “Remembering the Martyrdom,” Revelations in Context, 299–306; Nodra iVakavuvuli na Peresitedi ni Lotu: Josefa Simici, 522–23, 529–40.

Vunau kei na Veiyalayalati 135:3

Sa levu sara na ka sa cakava o Josefa Simici me baleta na noda vakabulai mai vua e dua tale ka vakavo ga o Jisu Karisito.

Vakasamataka na veivakalougatataki sa yaco mai vei iko vaka e dua na lewe ni Lotu i Jisu Karisito. E vica vei ira sa ivatuka ni lesilesi a vakataucokotaka na Parofita o Josefa Simici? Na Vunau kei na Veiyalayalati 135:3 e vakatoka eso na ka levu a vakataucokotaka o Josefa Simici ena 24 na yabaki ni oti na Matai ni Raivotu. Era sa vakayacoka vakacava na ka oqo vei iko kei na nomu veiwekani kei na Tamada Vakalomalagi kei Jisu Karisito? Sa rawa mo vola na nomu ivakadinadina me baleta na Parofita o Josefa Simici. O cei beka ena gadreva me rogoca na nomu ivakadinadina?

Vunau kei na Veiyalayalati 136

Na Turaga sa soli vakasala vei au ena noqu “ilakolako” ena bula oqo.

Ni oti nodra vakasavi tani mai Nauvoo, era a sotava na Yalododonu e dua na ilakolako balavu ki na Buca o Salt Lake, ia na matai ni vica na drau na maile a berabera ka ca sara. O Brigham Young, ka sa liutaka tiko na Lotu ena gauna oqo vaka Peresitedi ni iApositolo Le Tinikarua, sa lomaleqataka se ra na bulataka vakacava na Yalododonu na vo ni ilakolako. A vakarautaka o koya e dua na itikotiko vakawawa ka vakatokai me Winter Quarters ka masuta na veidusimaki. Me kena isau, a solia vua na Turaga e dua na ivakatakila, oqo na wase 136. Ena veika tale eso, sa veivakananumi na ivakatakila oqo vei ira na Yalododonu “ni nodra ivalavala ena ilakolako sa ka bibi me vaka na nodra icavacava” ka “vukea ni veisautaka na itosotoso ki na ra mai na dua na luluqa ki na dua na ka bibi e wasei tu vakayalo” (“This Shall Be Our Covenant,” Revelations in Context, 308).

Vakasamataka tiko na itukutuku oqo ni ko vulica na wase 136. Na ivakasala cava o raica e rawa ni vukea me vukici e dua na veivakatovolei dredre ki na nomu bula “ki na dua na gauna vakayalo … e bibi”? Mo vakasamataka talega vakatitobu na ivakasala ena vukei iko mo vakayacora rawa na lewa ni Turaga ena nomu bula, me vaka a vukei ira na Yalododonu taumada ena nodra ilakolako dredre ki na Ra.

Raica talega na “This Shall Be Our Covenant,” Revelations in Context, 307–14; Church History Topics, “Succession of Church Leadership,” ChurchofJesusChrist.org/study/history/topics.

Winter Quaters, mai vei Greg Olsen

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 135:1, 3.Me vukea na lewe ni vuvale me kila vakamatata na ibalebale ni a “dregata na nona ilesilesi kei na nona cakacaka ena nona dra” o Josefa Simici, sa rawa ni sarava na nomu vuvale na vidio “Testimony of the Book of Mormon” (ChurchofJesusChrist.org; raica talega na Jeffrey R. Holland, “Taqomaki ni Yalo,” Ensign se Liaona, Nove. 2009, 88–90). Era sa vakauqeti keda vakacava na veitikina oqo? Eda na yalodina tikoga vakacava ki na noda ivakadinadina, ke sega mada ga ni kerei meda solia na noda bula ena vukudrau?

Vunau kei na Veiyalayalati 135:3.Me veivosakitaki na ka e vakaibalebaletaki ena itukutuku ni o Josefa Simici a cakava “e levu cake na ka, vakavo ga o Jisu, me baleta na vakabulai ni tamata ena vuravura oqo, mai na dua tale na tamata,” navuca ni railesuva na ka esa vulica na nomu matavuvale me baleti Josefa Simici ena yabaki oqo. Sa rawa mo vakayagataka na yaloyalo eso mai na ivurevure oqo me vukei ira ni nanuma na ka era sa vulica ka sureti ira me ra wasea eso na italanoa taleitaki se ivakavuvuli. Na cava na vuna eda vakavinavinakataki Josefa Simici na Parofita kina kei na ka sa vakataucokotaka na Turaga ena vukuna? Sa rawa me saravi talega na vidio “Joseph Smith: The Prophet of the Restoration” (ChurchofJesusChrist.org).

Vunau kei na Veiyalayalati 136.Ena gauna sa vakatakila kina na Turaga na wase 136, sa balavu, ka dredre sara na nodra ilakolako ki liu na Yalododonu, ena veiliutaki nei Brigham Young (raica na wase 58, 60, kei na 62 ena iTalanoa ena Vunau kei na Veiyalayalati, 206–8, 211–16, 222–24). Ni dou wilika vata na wase 136, vakasamataka na veika dredre ena rairai sotava na nomu matavuvale. Na ivakasala cava eda raica ena ivakatakila oqo e rawa ni vukei keda ni rawata na veivuke kei na kaukauwa ni Turaga?

Vunau kei na Veiyalayalati 136:4.Na cava na kena ibalebale na “bula muria na veicakacaka vakalotu ni Turaga”? E sa vakayacoka vakacava ki na noda bula ni veisiga na veicakacaka vakalotu eda sa ciqoma?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Na sere vakaturi: “Dokai Koya,” Sere ni Lotu, naba 15.

Vakatorocaketaki na Vuli ni Tamata Yadua

Vakaraica na loloma ni Kalou. E vakatavulica o Peresitedi M. Russell Ballard, “[Na] kosipeli esa kosipeli ni loloma—lomana na Kalou ka lomana na tamata kecega” (“God’s Love for His Children,” Ensign, Me 1988, 59). Ni o wilika na ivolanikalou, navuca mo vola se makataka na ivakadinadina eso ni loloma ni Kalou.

Sa Sega na Loloma E Dua na Tamata Me Uasivi Cake ena Ka Oqo, mai vei Casey Childs