Valeniveivesu e Kaceji

22–28 ni Noveba

Vunau kei na Veiyalayalati 135–136

O koya “A Dregata na Nona iLesilesi kei na Nona Cakacaka ena Nona Dra”

Ena nomu vakavakarau mo vakavulica na Vunau kei na Veiyalayalati 135–36, vakaraica na ivakavuvuli e sa vakauqeta na nomu bula. E rawa ni vakasamataka me vukei ira vakacava na ituvatuva oqo na gone me ra vuli ka bulataka na ivakavuvuli oqo.

Vola na Veika o Vakauqeti Kina

Sureta na Veiwasei

Sureti ira na gone me ra wasea eso na ka era nanuma ni ra vulica me baleti Josefa Simici kei na ka a rawata. Vakaraitaka na iyaloyalo eso mai na yabaki oqo Lako Mai, Mo Muri Au—Baleta na Tamata Yadua kei na Matavuvale se mai na tabana ni itaviqaravi sa oti me vukei ira.

Vakavulica na iVunau: Gone Sobu

Vunau kei na Veiyalayalati 135:1–2

O Josefa Simici kei Airame Simici a solia na nodrau bula me baleta na kosipeli i Jisu Karisito.

Na itukutuku ni nodrau vakamatei o Josefa kei Airame Simici e rawa ni vukei ira na gone me vakila na vakavinavinaka me baleta na nodrau ivakadinadina kei na solibula na Turaga oqo.

iTaviqaravi e Rawa ni Caka

• Vakayagataka na “Wase 57: Na Parofita e sa Vakamatei” (iTalanoa mai na Vunau kei na Veiyalayalati, 201 – 5) me tukuna vei ira na gone me baleta na sala e mate kina na Parofita o Josefa Simici kei na tuakana o Airame Simici. Se me dua na gone me tukuna na italanoa. Wasea na nomu ivakadinadina ni Josefa Simici e dua dina na parofita ka ni a solia na nona bula vua na Turaga kei na Nona kosipeli.

• Wasea vata kei ira na gone e vica na tikina mai na Vola i Momani a wilika o Airame Simici ni bera ni a gole ki na valeniveivesu e Kaceji, volai ena Vunau kei na Veiyalayalati na 135:5. Veitalanoataka na sala e vakacegui Airame kina na tikina oqo. Wasea na ivolanikalou ka na kauta mai vei iko na vakacegu ni ko sa na lomaleqa se yalorarawa.

Vunau kei na Veiyalayalati 135:3

O Josefa Simici e dua na Parofita ni Kalou.

Ena loma ni yabaki, era sa kila na gone na veika e vakatakila mai na Turaga vua na Parofita o Josefa Simici. Sa rawa mo vukei ira mera nanuma ka vakavinavinakataka na sala e vakalougatataka kina na nodra bula na cakacaka nei Josefa.

iTaviqaravi e Rawa ni Caka

• Vakaraitaka na ivakatakarakara ka matataka na cakacaka ni Parofita o Josefa Simici, me vaka na iVola i Momani, na Vunau kei na Veiyalayalati, se e dua na iyaloyalo ni daukaulotu, se dua na valetabu. Vakayagataka na malanivosa mai na Vunau kei na Veiyalayalati 135:3, wasea vei ira na gone eso na ka e cakava na Turaga vei Josefa Simici me baleta na noda vakabulai. Sureti ira na gone mera digitaka e dua vei ira na veika oqo ka wasea na vuna era vakavinakavinaka kina.

• Ni ra rokataka tiko na gone na tabana ni itaviqaravi ena macawa oqo, lagata se vakatagitaka na sere me baleti Josefa Simici, me vaka na “Dokai Koya” (sere ni Lotu, naba 15). Wasea na nomu vakila eso me baleta na Parofita.

  

  Na Parofita ni Amerika, mai vei Del Parson

Vunau kei na Veiyalayalati 136

E solia vei keda na Kalou na ivakaro me vukei keda.

Era a sotava na Yalododonu e vuqa na veivakatovolei ena veiyabaki ni oti na mate nei Josefa Simici. E rawa vakacava me vukei ira na gone o vakavulica na ivakasala a solia na Turaga vei ira na Yalododonu?

iTaviqaravi e Rawa ni Caka

• Wasea vata kei ira na gone eso na bolebole era a sotava na Yalododonu ni ra biuti Nauvu ka vakasoqoni vata tale i Winita Kuota (raica na wase 60 kei na62 ena iTalanoa mai na Vunau kei na Veiyalayalati, 211–16, 222–24). Biuta e dua na iyaloyalo ni Valetabu e Nauvoo ena dua na yasa ni rumu, ka bulia e dua na ivakaruru rawarawa ena yasa kadua—de biu vata dua na itutuvi kei eso na idabedabe se me dua na teveli. Sureti ira na gone me ra sokumuni voleka toka ki na iyaloyalo, ka tukuna vei ira ni sa sivi e dua veimama na yabaki ni oti na mate nei Josefa Simici, era vakasaurarataki na Yalododonu me ra biuti Nauvu. Sureti ira na gone me ra lako tani mai na valetabu ka soqoni vata yani ki na nodra ivakaruru me matataka na ilakolako ki Winita Kuota.

• Vakamacalataka ni a solia na Turaga e dua na ivakatakila vei Biriqemu Yaga, ka kunei ena Vunau kei na Veiyalayalati 136, me ra vukei ira na Yalododonu ena nodra lakovoli ki na buca o Salt Lake. Wilika e vica na malanivosa mai na wase 136 era tiko kina na ivakasala ka rawa mera kila vakavinaka na gonelalai, ka sureti ira me ra matanataka se droinitaka na ka ea kerea na Turaga me ra cakava na Yalododonu ni ra lako tu. Me kena ivakaraitaki, e rawa ni ra droinitaka na gone na nodra vakasuka e dua na ka era a kerea mai vua e dua na itokani, se rawa ni ra lagata na sere ni Lalai ni ra meke wavokita e dua na (matadravu vakarairai) yasanibuka ni vakatotomuri (raica na tikina 25, 28).

Vakavulica na iVunau: Gone Qase Cake

Vunau kei na Veiyalayalati 135

Erau a solia na nodrau bula o Josefa Simici kei Airame Simici me baleta na kosipeli i Jisu Karisito.

Ni ra rogoca me baleta na nodrau solibula o Josefa Simici kei Airame Simici e rawa ni vaqaqacotaka na nodra vakabauta na gone kei na nodra gagadre me ra dau dina ki na nodra ivakadinadina.

iTaviqaravi e Rawa ni Caka

• Kerei ira na gone me ra wasea na veika era kila me baleta na sala rau a vakamatei kina o Josefa kei Airame Simici. Kevaka era gadreva na veivuke, vagolei ira ki Vunau kei na Veiyalayalati 135:1 se “Wase 57: Na Parofita e sa Vakamatei” (Vunau kei na Veiyalayalati iTalanoa, 201–5). Sureti ira na gone mera raitayalotaka ni ira a vakaitikotiko e Nauvu ena gauna e mate kina na parofita. Kerei ira mera wasea na veika era na a vakila. Wasea na nomu ivakadinadina baleti Josefa Simici, ka vakauqeti ira na gone me ra kitaka vakakina.

• Vakaraitaka na kedra iyaloyalo na parofita (raica na Gospel Art Book, naba 14, 18,67). Na cava eso na ka e vakarota vei keda na Tamada Vakalomalagi me da cakava? Vakamacalataka ni sa yalataka na Turaga me vakalougatataki ira na Nona Parofita me baleta na nodra solibula tiko ki na nona veiqaravi (raica na Maciu 10:39).

Vunau kei na Veiyalayalati 135:3

O Josefa Simici e sa dua na Parofita ni Kalou.

Me vakataki ira kece na parofita, o Josefa Simici e vakadinadinataki Jisu Karisito ka vakavulica vei keda na sala me da lako mai kina Vua. Vukei ira na gone me ra raica na sala e rawata kina na nona ilesilesi o Josefa Simici.

iTaviqaravi e Rawa ni Caka

• Wilika vata na Vunau kei na Veiyalayalati 135: 3, ka kerei ira na gone me ra raica na veika e rawata o Josefa Simici. Vola ena vava ni volavola na veika era sa kunea. Sureti ira na gone mera digitaka e dua vei ira na veika oqo ka wasea na vuna era vakavinakavinaka kina.

• Vakayaloqaqataki ira na gone yadua mera vakasamataka e dua na itokani se na nodra daulomani ka sega ni kilai Josefa Simici vinaka sara. Na cava era na kaya ke taroga na tamata o ya, “Na cava sa rui bibi kina vei iko o Josefa Simici?” Sureti ira na gone me ra vakatovotovotaka na cava era na kaya vua na tamata oqo.

Vunau kei na Veiyalayalati 136:4, 10–11, 18–30

E rawa ni vakalougatataki au na Turaga niu tovolea tiko vakaukauwa.

Ni oti na nona vakamatei o Josefa Simici, era a cemuri mai Nauvu na Yalododonu. Ea liutaki ira o Biriqemu Yaga ki Winita Kuota, ka ra vakavakarau vakavinaka ki na dua na ilakolako balavu sara ki na buca o Salt Lake.

iTaviqaravi e Rawa ni Caka

• Vakamacalataka vakalekaleka na veika era sotava na Yalododonu ni oti na vakamatei nei Parofita o Josefa Simici (raica na Wase 58, 60, kei na 62 ena Vunau kei na Veiyalayalati iTalanoa, tabana e 206–8, 211–16, 222–24). Sureti ira na gone me ra raitayaloyalotaka ena vakacava beka na nodra nanuma kevaka era a biuta na nodra veivale ka kunea e dua na vanua vou ka vakaitikotiko ena loma ni lekutu. Vakamacalataka ena Vunau kei na Veiyalayalati 136, a solia na Turaga na ivakasala me vukei ira na Yalododonu ena nodra ilakolako. Lesia vei ira yadua na gone e vica na tikina mai na ivakatakila oqo, me vaka na tikina 4, 10–11, 18–30, ka kerei ira na gone mera kunea yadua e dua na ka e rawa ni vukei ira ena nodra lomaocaoca se rere.

• Vukei ira na gone me ra vakasamataka na veivakatovolei era dau sotava nikua. Sureti ira mera raica e dua na ka ena wase 136 e rawa ni ra wasea me ra vakayaloqaqataka kina e dua e sotava tiko e dua na veivakatovolei. Me raica talega na gone na itukutuku ni veivakayaloqaqataki ena “Ka Talei, Ka Talei” (Sere ni Lotu, naba 17), e dua na sere e a lagata na Yalododonu ena nodra ilakolako.

Vakauqeta na Vuli e Vale

Sureti ira na gone me ra wasea vata kei ira na nodra matavuvale se vei dua nodra itokani na vuna era vakavinavinakataka kina na Parofita o Josefa Simici.

Vakatorocaketaki Noda Veivakavulici

Era dau waribariba na gone. O na rairai nanuma ena so na gauna ni nodra igu na gone ena veivagolei tani mai na vuli. Ia e rawa ni o vakayagataka na nodra waribariba ena nomu sureti ira mera droinitaka, dau lagata, se matanataka e dua na ivakavuvuli ni kosipeli (raica na Veivakavulici ena iVakarau ni iVakabula, 25–26).