Sa Yaco mai na Tagane sa qai Vakawati, mai vei Elizabeth Gibbons

15–21 ni Noveba

Vunau kei na Veiyalayalati 133–134

“Mo Dou Vakarautaki Kemudou ena Nona Lako mai na Tagane sa qai Vakawati”

Vakasamataka na nodra gagadre na gone o vakavulica—o ira era sa vulica tiko mai vale vakakina o ira era sega. E rawa vakacava mo vukei ira me ra veivakavulici vakai ira baleta na veika era sa vulica?

Vola na Veika o Vakauqeti Kina

Sureta na Veiwasei

Vakaraitaka e dua na iyaloyalo oa vakayagataka ena dua na lesoni ni Lalai oti toka ga, ka sureti ira na gone mera wasea na ka era nanuma mai na lesoni.

Vakavulica na iVunau: Gone Sobu

Vunau kei na Veiyalayalati 133:19–21, 25

Ena lako tale mai o Jisu Karisito.

Ena wase 133, e a vakamacalataka na Karua ni Nona Lakomai na Turaga ka sureta na Nona tamata me ra vakavakarau ki na lagilagi ni gauna oqo. E rawa vakacava mo vukei ira na gone me ra vakanamata tu ki na lesu mai ni iVakabula?

iTaviqaravi e Rawa ni Caka

• Vunia e dua na iyaloyalo ni Karua ni Lesumai ni iVakabula dakuna e dua na isulu, me vaka na isulu e dua na ilatilati (sa rawa mo vakayagataka na iyaloyalo ena ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale se na Gospel Art Book, naba 66). Sureti ira na gone me ra veivukevuke ena tosoya vakatikitiki na “ilatilati” ka vakatakarakarataka ni ra rai tiko mai na dua na katubaleka. Kerei ira mera wasea na veika era na vakila kevaka me ra a rai yani ki katubaleka ka a raici Jisu ni siro sobu tiko mai lomalagi. Wilika na malanivosa “dou lako yani ka veitata kaya” (tikina e 19), ka vukei ira na gone me ra tokaruataka na malanivosa.

• Ena ruku ni idabedabe ni gone yadua, vunia kina e dua na iyaloyalo e tukuna tiko na ka eda rawa ni cakava me vakavakarau ki na ikarua ni lako mai nei Jisu Karisito (me vakataka na wilika na ivolanikalou, wasea na kosipeli, se qaravi ira noda matavuvale). Me ra vaqara na gone na iyaloyalo, ka veiwasei na kena vakayacori na veika oqo e vukea vakacava meda sa vakarau meda sotava kina na iVakabula ni sa lesu mai.

• Lagata e dua na sere, me baleta na iKarua ni Nona Lako Mai na iVakabula, vaka na “Ena Lesu Tale Beka Mai” (iVolanisere ni Gonelalai, 46). Wasea na nomu loloma vua na iVakabula kei na nomu vakila me baleta na Nona lesu tale mai ki vuravura. Sureti ira na gone mera wasea na veika era vakila.

Vunau kei na Veiyalayalati 133:52–53

O Jisu Karisito e dau loloma ka dau yalovinaka.

E vakamacalataka na veitikina oqo e vuqa na sala sa vakaraitaka kina na Turaga na “yalololoma levu” vei ira na Nona tamata. Na cava o rawa ni cakava mo vukei ira kina na gone me ra vakila na loloma ni iVakabula?

iTaviqaravi e Rawa ni Caka

• Vakaraitaka e dua na iyaloyalo e vakaraitaka ni sa dauloloma ka yalovinaka o Jisu (raica na Gospel Art Book, naba 42,47). Kerei ira na gone me ra wasea eso na ka e sa cakava o Jisu me vakaraitaka na Nona loloma kei na yalovinaka. Wilika na malanivosa “era na tukuna na yalololoma levu ni nodra Turaga” (tikina e 52.), ka vukei ira na gone me ra vakasamataka na sala era rawa ni tukuna kina vei ira tale eso me baleta na loloma ni iVakabula.

• Lagata vata e dua na sere baleti Jisu, vaka na “Jisu sa Wekada Ga” (Volanisere ni Gonelalai, 37). Wasea na nomu ivakadinadina me baleta na sala cava sa vakaraitaka kina na Nona loloma na iVakabula vei iko.

Vunau kei na Veiyalayalati 134:5

E vinakata na Turaga meu talairawarawa ki na lawa.

Ira na gonelalai e dau tu na lawa me ra muria e vale, e koronivuli, kei na veivanua tale eso. Sa rawa mo vukei ira mera kila deivaki ni na Turaga e namaka vei keda me da muria na lawa kei na lawa ni noda vanua vakaitikotiko se na matanitu.

iTaviqaravi e Rawa ni Caka

• Sureti ira na gone mera cakava e dua na qito rawarawa ka sega ni muria na lawa, ka mera qai qitora tale vata kei na lawa. Era vukei keda vakacava na lawa? Vakaraitaka na nomu vakavinavinaka me baleta na lawa ni vanua.

• Vukei ira na gone me ra cavuqaqataka na i katinikarua ni yavu ni vakabauta. Vakabibitaka na veivosa, me vaka na “talairawarawa, rokova, ka tokona,” ka veivosakitaka vata kei ira na gone na cava na ibalebale ni veivosa oqori. Wasea vei ira na cava na vuna e bibi kina na talairawarawa ki na lawa.

Vakavulica na iVunau: Gone Qase Cake

Vunau kei na Veiyalayalati 133:4–5, 14–15

E vinakata na Turaga me’u savasava.

Vunau kei na Veiyalayalati 133 e rawa ni vukei ira na gone mera kila vakavinaka na sala mera maroroi ira me ra savasava mai na veivakauqeti ni vuravura wavoliti ira.

iTaviqaravi e Rawa ni Caka

• Sureti ira na gone me ra wilika na “Pepeli, Papiloni” ena iDusidusi ki na iVolanikalou (scriptures.ChurchofJesusChrist.org) me vaqaqa na cava o Papiloni kei na ka e matataka. Qai wilika vata na Vunau kei na Veiyalayalati 133:4–5, 14–15. Na cava na kena ibalebale mo “dou lako tani mai Papiloni”? (tikina e 5). Na cava eso na vanua kei na ituvaki na Turaga e vinakata meda lako tani mai kina? Na cava eda rawa ni cakava meda levei ira?

• Biuta e dua na ivakatakilakila ena dua na yasa ni rumu e kaya “Saioni,” ka vakabira na ivakatakilakila e dua tale ena yasana kadua e kaya “Papiloni.” Vola ena veitiki ni pepa na vosa mai na Vunau kei na Veiyalayalati 133:4–5, 14–15 ka vakamacalataki Saioni se Papiloni (me vakataka na “daucakaca,” “savasava,” se “nodra vakarusai”), ka sureti ira na gone me biuta na pepa yadua ena ruku ni ivakatakilakila e veiganiti.

Vunau kei na Veiyalayalati 133:19–25, 46–52

O Jisu ena veiliutaki e vuravura.

E kaya o Elder D. Todd Christofferson, “E sa bibi duadua me vakarautaki na vuravura ki na iKarua ni Lako Mai ni Turaga o Jisu Karisito” (“Vakavakarau ki na Lesu mai ni Turaga,” Ensign se Liaona, Me 2019, 81). O na vukei ira vakacava na gone me ra kila na sala era rawa ni vakaitavi kina ena cakacaka bibi oqo?

iTaviqaravi e Rawa ni Caka

• Vakaraitaka na iyaloyalo mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka sureti ira na gone me ra wasea na ka era kila me baleta na iKarua ni Lako Mai nei Jisu Karisito. Oti o ya, ni ra vakayagataka tiko na Vunau kei na Veiyalayalati 133:19–25, 46–52, sureti ira mera kuria eso na ka ki na nodra lisi. Wasea na nomu ivakadinadina ni iKarua ni Lako Mai ena dua na siga marautaki vei ira na Yalododonu.

• Me vukei ira na gone me ra kila na tikina e 19, vosa vei ira me baleta ni ivakarau e dua na yalewa vakawati ki na nona vakamau (e dua beka sa qai vakamau e rawa ni veivuke ena veivosaki oqo). Eda sa qai vaka vakacava e dua na yalewa ka vakarautaki “me baleta na nona lako mai na Tagane sa qai Vakawati,” o Jisu Karisito? Kevaka o nanuma ni na veivuke, raicalesu vata kei ira na gone na italanoa vakaibalebale ni tini na goneyalewa (raica na Maciu 25:1–13). Na cava na vuna e bibi kina me ra vakavakarau ki na ikarua ni lako mai ni iVakabula? Na cava eda rawa ni cakava qo me da vakavakarau kina?

Vunau kei na Veiyalayalati 134:1–2

E vinakata na Turaga meu talairawarawa ki na lawa.

E dina ni sa duatani na ituvaki ni matanitu e vuravura taucoko, na Turaga e vinakata meda “tokona ka tutaka na … matanitu [eda] sa vakatikotiko kina” (Vunau kei na Veiyalayalati 134:5).

iTaviqaravi e Rawa ni Caka

• Sureti ira na gone me vola na (ivakarau) lawa se na lawa era muria. Na cava beka na ituvaki ni bula kevaka e sega ni dua e talairawarawa ki na veilawa oqo? Wilika na Vunau kei na Veiyalayalati 134:1– 2 kei ira na gone, vukei ira me ra kila e dua na vosa se na malanivosa era sega ni kila rawa. Na cava na vuna e vinakata kina vei keda na Turaga meda va matanitu kei na lawa?

• Vola na vosa se na malanivosa yadua mai na ikatinikadua kei na ikatinikarua ni yavu ni vakabauta ena pepa tikidua duidui. Kumuna vata na tiki ni pepa, ka kerei ira na gone me ra cakacaka vata me ra biuta ena kena ituvatuva dodonu. Eda na vakaraitaka vakacava ni da vakabauta na veika e vakavulica na yavu ni vakabauta oqo?

Vakauqeta na Vuli e Vale

Solia vei ira yadua na gone e dua na taro me ra taroga kina e dua na lewe ni matavuvale e vale. Me kena ivakaraitaki, kevaka o sa vulica me baleta na iKarua n i Lako Mai ni iVakabula, e dua na gone ena rawa ni taroga, “Na cava eda rawa ni cakava me da vakavakarau me baleta na lesu tale mai nei Jisu?”

Vakatorocaketaki Noda Veivakavulici

(Segata)Vakasaqara mo kilai ira vinaka na gone o vakavulica. O sa kilai ira na gone o vakavulica. Ena rairai gadrevi me na (moici)vakavoui na vakasama eso ena ituvatuva oqo me sotava vakavinaka na gagadre ni nomu kalasi. Me vukei iko, raica na itaviqaravi vakatututaki ena ituvatuva oqo, sega walega vei ira e vakatabakidua ki na nodra yabaki na gone o vakavulica. (Raica na Veivakavulici ena iVakarau ni iVakabula,7