O Josefa Simici e Nauvoo, 1840, mai vei Theodore Gorka

8–14 ni Noveba

Vunau kei na Veiyalayalati 129–132

“Ia Ni Da sa Rawata e Dua na Veivakalougatataki Mai Vua na Kalou, Sa Rawa ena Vuku ni Da sa Talairawarawa”

Na Wase 129–32 e vakavulica e vuqa na ivakavuvuli talei, e vica walega era sa vakabibitaki toka ena ituvatuva oqo. Na dina cava so o sa kunea?

Vola na Veika o Uqeti Kina

A kaya kina o Brigham Young me baleti Josefa Simici, “Sa rawa vua me vakarawarawataka na veika vakalomalagi me ra kila vinaka o ira na tamata wale” (ena Nodra iVakavuvuli na Peresitedi ni Lotu: Josefa Simici, 499–500). E vaka me dina oqo ena nona ivakavuvuli na Parofita mai Nauvoo ena 1840, eso vei ira era sa volai tu ena Vunau kei na Veiyalayalati 129–32. E vakacava tu na ituvaki ni iVakabula? “Ni tamata me vakataki keda ga.” E vakacava tu na ituvaki kei lomalagi? “Ia na ivakarau ni veimaliwai sa tu vei keda eke ena tu talega vei keda mai kea” (Vunau kei na Veiyalayalati 130:1–2), kei na noda veimaliwai vakamatavuvale vakamareqeti duadua ena vuravura oqo, kevaka e vauci ena lewa dodonu, sa “na dei vinaka tu” ena vuravura ka tarava (Vunau kei na Veiyalayalati 132:19). Na dina vakaoqo e rawa ni yaco ko lomalagi me voleka sara mai—lagilagi, ia e rawa meda yacova.

Ia, ena so na gauna ena kerei keda na Kalou me da cakava na veika e logaloga ca ka sega ni da yacova rawa. Ki na vuqa na Yalododonu, na levu na watina a dua na ivunau vakaoqori. Na ivakaro me vakawatitaka na yalewa tale eso a dua na veivakatovolei dredre sara ni vakabauta vei Josefa Simici, o Emma na watina, kei ira kece sara era a ciqoma. Ni gadrevi me lako sivita na veivakatovolei oqo, era na sega walega ni gadrevi mera taleitaka tiko na kosipeli vakalesui mai; ia sa gadrevi mera vakabauta tiko na Kalou ena kena titobu cake sara mai na nodra dui gagadre se nanuma ga. Na ivunau oqo sa sega tale ni tiko nikua, ia na nodra ivakaraitaki yalodina era a bulataka se yaco tikoga. Ia na ivakaraitaki o ya sa vakauqeti keda ena gauna eda sa kerei meda cakava na noda dui “isoro ena talairawarawa” (Vunau kei na Veiyalayalati 132:50).

Vakasama ni Vuli iVolanikalou ni Tamata Yadua

Vunau kei na Veiyalayalati 130–31

A vakaraitaka mai o Josefa Simici na dina baleta na Lewetolu Vakalou kei na “vuravura sa bera mai.”

O na rairai raica ena wase 130–31 e rogo duidui toka vakalailai mai na iwase tale e so mai na Vunau kei na Veiyalayalati. Oqo e baleta ni wase 130–31 e yavutaki mai na itukutuku nei William Clayton, e dua vei ira na sekeriteri nei Josefa Simici, a rogoca ni a vakavulica tiko o Josefa Simici. Me kena isoqoni, na wase kece oqo sa vakataka na kumuni ni dina ka sega ni ivakatakila e cokovata, ka veivakayarayarataki. Sa vakakina, e tiko eso na ulutaga kilai levu ena kedra maliwa e vuqa na dina eso oqo. Me vakataka, mo na wilika na wase 130–131 ka vakasamataka tiko na taro oqo: Na cava au sa vulica baleta na Kalou? Na cava au sa vulica me baleta na bula ni oti na bula oqo? E tara vakacava na noqu bula na kila-ka oqo?

Raica talega na “Our Hearts Rejoiced to Hear Him Speak,” Revelations in Context, 277–80.

Vunau kei na Veiyalayalati 131:1–4; 132:7, 13-25

Sa vakayacora rawa na Tamada Vakalomalagi me sa tawamudu na matavuvale.

E dua na dina veivakacegui sa vakalesui mai vua na Parofita Josefa Simici o ya ni vakamau kei na veiwekani vakavuvale e rawa me tawamudu. Na Turaga sa vakalesua mai vei Josefa Simici na cakacaka vakalotu kei na lewa e gadrevi me tawamudu kina na veiwekani oqo (raica na Vunau kei na Veiyalayalati 132:7,18–19). Vakasamataka mada na nomu veiwekani vakamatavuvale se o nuitaka tiko me dua e ni mataka ena nomu wilika na Vunau kei na Veiyalayalati 131: 1–4; 132: 7, 13–15. E vakayaco-ka vakacava na veitikina oqo ena nomu nanuma baleta na veiwekani oqo?

Ia ena so na gauna, na ivakavuvuli ni matavuvale tawamudu e sega soti ni veivakacegui—e rawa ni veivakaogai, vakakina na rarawa, ena gauna e sega ni veidonui kina na ituvaki ni matavuvale kei na savasava vakasilesitieli. Ena gauna sa lomaleqataka kina o Peresitedi Henry B. Eyring e dua na leqa vakaoqo ena nona matavuvale, a ciqoma na ivakasala vuku oqo mai na dua na lewe ni Kuoramu ni iApositolo Le Tinikarua: “Mo bula kilikili kaya vaka-matanitu vaka-silesitieli, ena qai yaco na ituvatuva ni matavuvale me totoka cake sara mai na kena o rawa ni vakasamataka.” (ena “Na iTikotiko e Vakaicili Kina na Yalo ni Turaga,” Ensign se Liaona, Me 2019, 25). Ena vakalougatataki iko vakacava na ivakasala oqo ena ituvaki nikua ni nomu matavuvale?

Raica talega na Kristen M. Oaks, “To the Singles of the Church” (lotu ni Vakarau ni Vuli ni Lotu ni itabagone qase cake, Sept. 11, 2011), broadcasts.ChurchofJesusChrist.org.

Na veiwekani vakamatavuvale e rawa me caka me tawamudu ena cakacaka vakalotu ni valetabu.

Vunau kei na Veiyalayalati 132:1–2, 29–40

Sa vakadonui vua na Kalou na vakamau vakalevu ena gauna ga e vakarota kina o Koya.

Ki vua e dua sa wilika na Veiyalayalati Makawa sa rairai vakataroga voli tiko baleti Eparaama, Aisake, Jekope, Mosese, kei ira tale eso ena nodra vakamautaka e vica vata na watidra. Era sa cala tiko beka ena veibutakoci o ira na turaga vinaka oqo? Se sa vakadonuya beka na Kalou na nodra ivalavala oqo? Vakaraica na isau ni taro ena Vunau kei na Veiyalayalati 132:1–2, 29–40.

Na vakawati ena kedrau maliwa e dua na tagane kei na yalewa sai koya na tudei ni vakamau ni Kalou (raica na ikau ni wase ni Ai Vakaro Raraba 1; raica talega na Jekope 2:27, 30). Ia, e dau yaco na gauna ena itukutuku ni veigauna ni a vakarota na Kalou vei ira na luvena me ra vakatovotovotaka me levu na watidra.

Na veiyabaki taumada ni Lotu sa vakalesui mai a dua vei ira na veigauna eso a sega ni okati kina. Ni oti na kena ciqomi na ivakaro oqo, a cakava o Josefa Simici kei na so tale na Yalododonu Edaidai na vakamau vakalewelevu. Kevaka o gadreva mo vulica vakalevu na veika ni vakamau vakalewelevu ena kedra maliwa na Yalododonu Edaidai, raica na “Mercy Thompson and the Revelation on Marriage” (Revelations in Context, 281–93); Saints, 1:290–92, 432–35, 482–92, 502–4; “Plural Marriage in The Church of Jesus Christ of Latter-day Saints” (Gospel Topics, topics.ChurchofJesusChrist.org); “Why Was It Necessary for Joseph Smith and Others to Practice Polygamy?” (vidio, ChurchofJesusChrist.org).

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 130:2, 18–19; 132:13, 19.O na vakayagataka vakacava na veitikina oqo me vukea na nomu matavuvale me vakaliuca kina na veika e tawamudu? E rairai rawa mo vakatawana e dua na katonisulu se beqi vata kei na iyaya e matataka tiko na veika oqori, me vaka ena Vunau kei na Veiyalayalati 130: 2, 18–19; 132: 19, eda rawa ni kauta vata kei keda ki na bula sa bera mai, me vaka na itaba ni matavuvale se na ivolanikalou. Na cava e vakavulica na Vunau kei na Veiyalayalati 132:13 me baleta na veika ni vuravura? Oqo ena veimuataki ki na dua na veivosaki me baleta na vakanamata ki na veika e tawamudu.

Vunau kei na Veiyalayalati 130:20–21.O rawa ni lagata na sere me baleta na vakavinavinaka, me vakataka na “Wilika na Nomu Kalougata” (Sere ni Lotu, naba 144), ka vola na veivakalougatataki era sa ciqoma na nomu matavuvale ki na talairawarawa ki na lawa ni Kalou. Na veivakalougatataki cava eda nuitaka meda ciqoma? Eda na ciqoma vakacava na veivakalougatataki oqori?

Vunau kei na Veiyalayalati 131:1–4; 132:15-19.Na vidio “Marriage Is Sacred” (ChurchofJesusChrist.org) ena rawa me vukea na nomu vuvale me veivosakitaka na dina ena veitikina oqo. Na cava beka na nanuma ni Turaga baleta na vakamau? Eda na cakava vakacava—se da vakamau se sega—me vakavakarau ki na vakamau tawamudu?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Na sere sa vakaturi: “Matavuvale Me Tawamudu Tu,” Nodra iVolanisere na Lalai, 98.

Vakatorocaketaki ni Vuli ni Tamata Yadua

Vakasaqara na dina vakosipeli Ena so na gauna na dina ni kosipeli e dau tukuni vakadodonu; ena so tale na gauna era dau vakaibalebaletaki ena dua na italanoa se ivakaraitaki. Ni ko sa wilika, mo tarogi iko, “Na dina tawamudu cava e vakavulici tiko ena veitikina oqo?

E dua na rumu ni veivauci ena Valetabu e Paris France.