Wase 45

Na iLawalawa Dauvakacaca e Missouri

(1833)

Eso vei ira na Yalo dodonu era vakaitikotiko e Far West e Missouri. E tiko kina o Josefa Simici. Era yalomarau na tamata. Era tara na veivale vivinaka kei na koronivuli.

Era sega ga ni tiko sautu vakadede o ira na Yalo dodonu. Ni ra mai vakacaca o ira na tamata vakatubu ca. Ka lasutaka na veika me baleti ira na Yalo dodonu. Era veikauyaka tale ga na itukutuku lasu me baleti ira na iliuliu ni Lotu.

Era sa lalawa na tamata ca me ra vakamavoataki na Yalo dodonu.

Era sa vakayacora na dauvakacaca e vuqa na ka. Ka cemuri ira na Yalo dodonu mai na nodra veivale.

Sa vakamai na nodra vale ka vakacacani na nodra iteitei.

Era kanakuita eso na tamata, ka so era bala ki valeniveivesu.

Era vakalolomataki na marama ka mate sara eso mai vei ira na dauvakacaca.

E kovana tiko o Mr Boggs e Missouri. Era sa lasutaki koya o ira na dauvakacaca me baleti ira na Yalo dodonu.

Sa vakaroti ira na sotia o Mr Boggs me ra vakamatei na Yalo dodonu era sega ni biuti Missouri. Era sa marau na dauvakacaca. Ka cakava tale eso na ka ca. Me qai sega ni tarovi ira na kovana.

Eso vei ira na Yalo dodonu era tiko ena dua na koro ka yacana o Haun’s Mill. Ena dua na siga era a cakacaka tiko eso ena nodra were. Ka so tale ga era cakacaka tiko e vale. Sa lakovi ira yani ko ira na dauvakacaca ka sikabotei ira.

Era sa dro na Yalo dodonu kina dua na vale tara ena tolo ni kau. Ka qai laulauvana mai vei ira na dauvakacaca, ena maliwa ni kau ena lalaga ni vale.

Era sa vakamatei o ira na Yalo dodonu era vuni tu mai vei ira na dauvakacaca. Eso talega na gone era lauvana mate.

Sa qai vakailoataki na nodra vale kei na qiqi ni Yalo dodonu mai vei ira na dauvakacaca. Era sa vakamatei kina e vuqa. Ka ra sa tu taudua ga na yalewa kei ira na gone.

Sa qai vesu e muri o Josefa Simici kei ira na iliuliu eso ni Lotu. Era vakaroti na sotia me ra vanalaki Josefa kei ira na nona itokani.

E qai sega ni muria na lewa o koya na nodra iliuliu na sotia. Sa besetaka me rau lauvana o Josefa kei ira eso. Ni kaya ni sa na okati me laba.

Era sa qai bala ki valeniveivesu o Josefa kei ira na nona itokani. Sa vesuki na ligadra ena sinucodo. E liliwa vakalevu na loma ni valeniveivesu. Me ratou qai davo tu ga ena vuloa liliwa.

Era sa tamata ca o ira na yadra. Era dau ruru ka talanoa vakasisila. Era qai talanoataka na nodra butakoci ka vakamatei o ira na Yalo dodonu. Ra tukuna talega na nodra vakasaurarataki ira na yalewa kei ira na gone. Era sa qoqolou ka dokadokataka tiko me bogi taucoko ko ya.

Sa besetaka ko Josefa na veika era tukuna tiko. E sega ni via rogoca tale e dua na ka. Ni sa tucake ka vakaroti ira ena yaca i Jisu Karisito me ra galu. Sa kaya, “Rauta! De dua vei kedaru ena kautani na nona bula.” Era sa rere na yadra. Eratou sa vakaraitaka vei Josefa na nodratou yalo rarawa ena veika eratou vakayacora. Me ratou dabe galugalu tu ena tutu ni rumu.

E dua tiko na Apositolo ko Brigham Young. E kerei ira na Yalo dodonu me ra mai soqoni vata ni se tu e valeniveivesu o Josefa Simici. Sa vakarota vei ira o Brigham Young me ra biuti Missouri. E vuqa vei ira na Yalo dodonu era dravudravua. Ka sega na nodra ose se qiqi. Era sa yalataka o ira era soqoni me ra vukei ira na Yalo dodonu dravudravua me ra toki.

Era sa biuti Missouri ko ira na Yalo dodonu. E donuya na vulaililiwa ka sa batabata dina na draki. Era saga na dauvakacaca me ra vakalolomataki. Ka taura vakailoa kina na nodra ose kei na bulumakau.

Sa qai cavutu ki Quincy e Illinois o ira na Yalo dodonu. Era sa dau mai lomani vei ira na lewei Quincy.

Sa marau o Mr Boggs kei ira na so na nona i tokani ena nodra lako o ira na Yalo dodonu. Ko ira ga ka sa qai vo era tiko e vale ni veivesu.