“Wase 32: Na iSoqosoqo Lewe ni Lotu i Jisu Karisito e Kirtland: Maji–Jiune 1833,” iTukuni mai na Vunau kei na Veiyalayalati (2002), 123–25
“Wase 32,” iTukuni mai na Vunau kei na Veiyalayalati, 123–25
Wase 32
Na iSoqosoqo Lewe ni Lotu i Jisu Karisito e Kirtland
(Maji–Jiune 1833)
Sa parofita ni Lotu i Jisu Karisito o Josefa Simici. Ka dusimaka vei Josefa na Turaga me ra vukei koya eso na tamata. Me ra wili me nona ivukevuke. Me rau nona ivukevuke o Sidney Rigdon kei Frederick G. Williams. E ratou wiliki me Veiliutaki Taumada ena Lotu.
V&V 81:1; 90:6
Sa iliuliu ni Lotu ena gauna oqo na parofita ka bula tiko. O koya kei irau na nona ivukevuke eratou vakatokai me Veiliutaki Taumada.
Eratou sa lesi o Josefa Simici kei rau na nona ivukevuke ena dua na soqoni e Kirtland. E soqoni bibi sara. Ka ni ra vakayagataka taucoko na sakaramede o ira na tiko kina.
Ena vica na macawa ki muri, sa qai tauyavutaka ko Josefa Simici na imatai ni iteki ni Lotu. Era okati kina iteki o ira na lewe ni Lotu ka tiko veivolekati. O ira na Yalo dodonu taucoko e Kirtland era lewena na imatai ni iteki. Sa vuqa tu na iteki ena gauna oqo.
Ka qai tukuna ko Jisu me ra tosoya tiko ga na nodra tara vale ni Lotu ko ira na Yalo dodonu. Me ra tara e dua na vale tabu e Kirtland. E vinakati talega me dua na vale me ratou cakacaka kina na Veiliutaki Taumada. Ka gadreva tale ga na Lotu e dua na valenitabaivola.
Era sa talairawarawa na Yalo dodonu vua na Turaga. Era sa tekivuna na Vale Tabu i Kirtland. Sa dredre na tara na vale tabu. Sa gadrevi kina na nodra veivuke na Yalo dodonu.
Era sa curu tale kina Lotu e lewe vuqa. Sa vakaroti Josefa o Jisu me ra digitaki tale eso na nodra iliuliu na Yalo dodonu. Ka kaya vua me Peteriaki ni Lotu o tama i Josefa. Me dau veivakalougatataki na Peteriaki vei ira na Yalo dodonu. E vakaitutu o koya ena Matabete i Melikiseteki.
Sa vakaroti o Josefa me digitaka e 12 na lewe ni matabose e cake. Era vakaitutu o ira oqo ena Matabete i Melikiseteki. Me ra dusimaka tiko na veika dodonu.