“Wase 48: O ira Na Daukaulotu kina Veivanua Eso: Jiune 1837–Okotova 1841,” iTukuni mai na Vunau kei na Veiyalayalati (2002), 180–82
“Wase 48,” iTukuni mai na Vunau kei na Veiyalayalati, 180–82
Wase 48
O ira Na Daukaulotu kina Veivanua Eso
(Jiune 1837–Okotova 1841)
Sa gadreva na Turaga me ra rogoca talega na kosipeli ko ira ena veivanua eso. Sa vakarota vei Josefa Simici me ra kaulotu ki Igiladi eso na Yalo dodonu. Ka ratou digitaki sara o Elder Heber C. Kimball kei iratou e tolu tale me ratou lako. Era soko ena waqa ki Igiladi.
Ratou laki sotava na iliuliu ni dua na matalotu. Sa vakadonuya vei iratou me ratou na daukaulotu vunau ena nona lotu. Ka vuqa sara na lewena era vakabauti ira na daukaulotu. Era sa gadreva me ra papitaisotaki. Sa rarawa tale kina na nodra iliuliu. Ka tarova sara me ratou vunau tale vei ira.
Era sa qai veituberi ga na daukaulotu ena veivale. Me vuqa sara era curu kina Lotu i Jisu Karisito me baleti Ira na Yalo Dodonu e na Gauna Oqo.
Era sa qai lako e muri eso tale na daukaulotu ki Igiladi. Eso era Apositolo. Sa dau vakadreti ira o Josefa ni se bera ni ra lako. Ka tataunaka me ra veituberi vei ira na tamata kecega.
Sa vakaroti ira na Apositolo me ra talairawarawa kina ivakaro kecega ni Kalou. Ka wasea vei ira eso na tikina me baleta na matabete. Me tukuna kina vei ira ni sa vakatikori na matabete ena Lotu dina i Jisu Karisito.
Era sa qai vakarau me ra lako ena ilakolako vakakaulotu. Sa sega vei ira na ilavo. Ka lewe levu era tauvimate. Eso na watidra kei na luvedra era tauvimate tu. la era sa vakabauta ga na Tamada Vakalomalagi ni na vukei ira ka lomani ira na nodra vuvale.
Sa mua na ilakolako ni kaulotu ki Igiladi. Era vunau ena veikoro lalai e vuqa. Sa udolu vakacaca na bula dodonu era vakabauta na kosipeli. Me ra curuma kina na Lotu i Jisu Karisito. Ka sa lomani ira na daukaulotu o Tamada Vakalomalagi. Era lesu bula tale mai ki nodra veivale ni sa cava na nodra kaulotu.
E dua vei ira na Apositolo oqori o Orson Hyde. Sa tataunaka o Josefa ni tiko e dua na itavi bibi nei Orson me baleti ira na Jiu. Me cavutu ko Orson ki Filisitia se Palesitaina. Ka me laki vakatabuya na vanua o Filisitia se Palesitaina, ena 24 ni Okotova 1841.
E masuti Tamada Vakalomalagi me vakalougatataka na vanua koya. Sa masulaka me tovure mai na wai me rawa ni vakabulabulataki kina na kakana teivaki. Ka masulaka talega me ra lesu yani kina ki Palesitaina na kawa i Eparaama me ra laki tawana. Me ra laki teitei ka bula voli kina.
Sa kune na kalougata e Palesitaina. Sa yacana ena gauna oqo o Isireli. E cabora tale na masu me vakabui kina na were e kea, ena yabaki 1979, o Peresitedi Spencer W. Kimball. Sa vakayacani me Orson Hyde Memorial Garden.