“Wase 2: Na iMatai ni Raivotu nei Josefa Simici: 1820,” iTukuni mai na Vunau kei na Veiyalayalati (2002), 9–12
“Wase 2,” iTukuni mai na Vunau kei na Veiyalayalati, 9–12
Wase 2
Na iMatai ni Raivotu nei Josefa Simici
(1820)
Ko Josefa kei iratou na nona vuvale eratou vakabauta na Kalou. Eratou dauwilika vata na iVola Tabu. Sa dau veidusimaki ko tama i Josefa kei tinana me ra dau vinaka na gone.
E levu sara na matalotu e Palmyra. Era duitukuna ga ni dina na nodra lotu. Me ra tukuna talega ni lasu na lotu tale eso. E sega ni kila rawa ko Josefa se lotu cava me curuma. Sa gadreva sara me kila na Lotu dina i Jisu Karisito.
Ena nona wilika tiko na iVola Tabu ko Josefa ena dua na siga. E yaco tiko oqo gauna e se qai yabaki tinikava kina. Ka wilika kina me da dau kerea vua na Kalou na veika eda dau via kila. Sa qai lewa me masu. Me taroga na Kalou se lotu cava me lewena.
E donuya e dua na siga ni vulaitubutubu. E lakova ko Josefa na veikau, ka toka tikiva na nodratou vale. E tekiduru. Ka cavuigusutaka e cake na nona masu me rawa ni rogoci. E vakabauta dina tiko ni na rogoca ka sauma mai na nona masu ko Tamada Vakalomalagi.
E sega ni lomai Setani me masu ko Josefa. Ka tovolea ko Setani me tarovi koya. Sa qai voliti Josefa na butobuto mai na cakacaka nei Setani. Sa sega ni vosa rawa. E yacovi koya mai na rere.
E sega ni cavuka na masu i Josefa. Sa sega ni tarova rawa ko Setani na nona masu.
Sa qai dolavi vei Josefa na raivotu. E kunea kina e dua na rarama kaukauwa, ka uasivi. Sa wavolivoliti koya na rarama. Ka raici Tamada Vakalomalagi kei Jisu Karisito. E rau tucake tu ena rarama. Sa dusi Jisu na Tamada Vakalomalagi ka kaya, “Oqo na noqu Gone ni Toko. Mo rogoci koya!”
Sa tarogi Jisu ko Josefa se lotu cava e dina. E taroga se lotu cava me lewena. Sa vakaroti Josefa ko Jisu me kua ni curu kina dua na lotu. E tukuna ni sega ni dodonu taucoko na nodra ivakavuvuli. E sega kina na nona lotu. E vuqa tale na ka e tukuna vei Josefa. Me mai cava kina na nona raivotu, ka tiko taudua tale ko Josefa.
Sa lesu ki vale ko Josefa. E tarogi koya ko tinana se bula vinaka tiko. Me sauma yani ko Josefa ni toso vinaka tiko na nona bula. Sa qai talanoataka vei tinana na nona raivotu. Sa tukuna talega vua na veika e vulica mai na raivotu.
E talanoataka ko Josefa vei ira eso na nona lewenikoro na veika e raica. Era sega ni vakabauti koya na tamata. Era nanuma ni lasu tiko. Sa dua tani na nodra cudru. Era qai vakalialiai koya.
E dau tukuna na ka dina ko Josefa me baleta na nona raivotu. E kila vinaka tu ni a raici Tamada Vakalomalagi kei Jisu Karisito. E kila kina ni sega na lotu e vuravura e dina.