“Wase 17: O ira na Bisopi Taumada ena Lotu: Feperueri 1831,” iTukuni mai na Vunau kei na Veiyalayalati (2002), 64–66
“Wase 17,” iTukuni mai na Vunau kei na Veiyalayalati, 64–66
Wase 17
O ira na Bisopi Taumada ena Lotu
(Feperueri 1831)
Era tiko e New York eso na tamata ca. Era dau vakacacani ira na lewe ni Lotu ka vinakata me ra toki tani. Sa vakaroti Josefa Simici o Jisu me biuti New York ka lako ki Kirtland e Ohio.
Eratou sa lako ki Kirtland o Josefa Simici, kei Ema na watina, Sidney Rigdon, kei Edward Partridge. Me ratou laki valevata ko Josefa kei Ema, kei na dua tale na lewe ni Lotu. Na yacana o Newell K Whitney.
E rauta tiko e 1,000 na lewe ni Lotu e Kirtland. Era tovolea tiko me ra talairawarawa vua na Kalou. Era sega tiko ga ni kila vakavinaka na kosipeli.
V&V 41: iVakamacala
Sa masuta na Kalou ko Josefa Simici. E qai solia vei Josefa o Jisu e dua na ivakatakila. Sa kaya o Jisu vei Josefa ni ra vinakata me dua na bisopi o ira na Yalo dodonu e Kirtland. Me dau solia na nona gauna o koya na bisopi me veituberi ka veivukei vei ira na Yalo dodonu. Na imatai ni bisopi ena Lotu o Edward Partridge.
Sa vakarota o Jisu vei Josefa na veika e nona itavi na bisopi. Me dau qarava e dua na sitoa ni Lotu. Me dau kumuna kina na isolisoli kakana kei na isulu era solia mai na Yalo dodonu. Ka me qai solia na bisopi vei ira era gadreva tu na kakana kei na isulu.
Me dau qarauna o bisopi na ilavo ni Lotu. Me ra dau soli ilavo vei bisopi o ira na Yalo dodonu. Sa na qai sauma kina o bisopi na bili ena vuku ni Lotu. E dau solia talega na veivuke vakailavo kivei ira na Yalo dodonu vakaloloma.
Me dau lomani ira na Yalo dodonu na bisopi. Ka tovolea me dau vukei ira. Ena veivosaki kei ira na lewe ni matabete. Era na veivosakitaka kina na veika era qarava tiko me baleti ira na Yalo dodonu.
Era sa qai curu kina Lotu e lewe vuqu tale. Sa gadrevi me so tale na bisopi. Me ikarua kina ni bisopi ni Lotu o Newell K. Whitney.
E nodra iliuliu na Yalo dodonu ena veitabana levu na bisopi. E tautauvata ga kei peresitedi ni tabana o bisopi. Sa nodra iliuliu talega na Yalo dodonu ena dua na tabana o peresitedi ni tabana.
Sa udolu edaidai na iwiliwili ni bisopi ena Lotu.