“Wase 3: Na Agilosi o Moronai kei na Peleti Koula: 1823–1827,” iTukuni mai na Vunau kei na Veiyalayalati (2002), 13–16
“Wase 3,” iTukuni mai na Vunau kei na Veiyalayalati, 13–16
Wase 3
Na Agilosi o Moronai kei na Peleti Koula
(1823–1827)
Sa sivi e tolu na yabaki mai na imatai ni nona raivotu ko Josefa. E sa yabaki tinikavitu kina. Ka liaca tiko e yalona se cava e gadreva na Kalou me vakayacora. E masu tale ko Josefa ena dua na bogi. Sa vakabauta ni na tukuna vua na Kalou na ka me cakava.
Sa raica ko Josefa e dua na rarama levu e loma ni nona rumu. Ka tucake tu e loma ni rarama koya e dua na agilosi. E ramase sara na matana na agilosi. Sa tokara tu e dua na isulu vulavula.
E tukuna na agilosi ni yacana o Moronai. Sa talai mai vua na Kalou me mai veivosaki kei Josefa. E tukuna o Moronai ni sa tiko e dua na cakacaka e vinakata na Kalou me cakava ko Josefa.
E talanoa vei Josefa na Agilosi ko Moronai me baleta e dua na ivola. Ka tukuni tu ena ivola koya na kedra itukutuku ko ira era tawani Amerika mai liu. E a talevi ira oqo ko Jisu Karisito. Ka mai tuberi ira ena nona kosipeli.
E tukuna ko Moronai ni ivola oqo e ceuti tu ena taqana koula. Sa vakatokai na taqana koula me peleti koula. E volai tu na ivola ena dua na ivosavosa ka sa yali vei keda ena gauna oqo. Me vakadewataka ko Josefa kina vosa vakaVavalagi ka rawa ni da wilika.
E kaya na Agilosi o Moronai ni vunitaki tiko na peleti koula ena dua na delana e volekata na nodratou itikotiko Josefa. Sa buluti tu. E kaya talega ni buluti vata tiko na peleti koula kei na rua na vatu. Na vatu erua oqo e vakatokai me Urimi kei na Cumimi. Erau na veivuke na vatu oqo me vakadewataka kina ko Josefa na ivola.
E talanoataki Ilaijia ko Moronai vei Josefa. Ko Ilaijia e dua vei ira na parofita rogolevu, ka a bula mai liu. Sa vakaitutu ena matabete ko Ilaijia. Na italanoa kei Ilaijia e kunei tu ena Veiyalayalati Makawa. Sa tataunaka ko Moronai ni na lesu tale mai ki vuravura ko Ilaijia. Ena mai tukuna vei ira na tamata kecega me ra qara na itukutuku ni tubudra. Ko ira na tubudra oqo era lewe ni nodra vuvale ka ra a bula mai liu.
Sa qai vakamacalataka vei Josefa ko Moronai na veika e baleta na matabete. E vakaivotavota na matabete ena kaukauwa ni Kalou. E tukuna talega ko Moronai na kena vakasukai tale mai ki vuravura na kaukauwa ni Kalou ena ligai Ilaijia. Sa na veivuke na matabete kivei ira na vuvale bula dodonu. Me ra vauci kina vakavuvale. Sa na qai rawa kina ni ra na bula vata mai muri me tawamudu. Sa qai gole yani ko Moronai.
E qai lesu tale mai vakarua na Agilosi o Moronai e na bogi koya. E vuqa tale na ka vou e mai kaya vei Josefa. Sa qai biuti koya ni sa mataka. Qai tucake sara ko Josefa me laki vukei tamana ena nodratou iteitei.
E wawale vakalevu ko Josefa, ka dredre me cakacaka. Ka qai davo sobu ki ra. Ena nona davo tiko, sa qai lesu tale mai na Agilosi o Moronai. Sa mani tukuna vei tamana ko Josefa na veika e mai tukuna vua o Moronai. E vakabauti koya sara ko tama i Josefa. E kila ni talai Moronai mai na Kalou. Sa dusimaka vei Josefa me muria na vosa i Moronai.
Sa lako ko Josefa me laki raica na peleti koula. Sa cabeta kina na delana ena yasa ni nodratou itikotiko. Oqo o Delai Kumora. Sa tu kina na peleti koula. Era bulu tiko ena dua na ruku ni vatu. Era a tiko ena loma ni kisivatu. E tiko talega e loma na Urimi kei na Cumimi.
Sa lakovi Josefa tale mai na Agilosi o Moronai. E tarova na nona via kauta ki vale ko Josefa na peleti koula. E tataunaka vua me tiko ena vanua koya ena siga vata ga ni veiyabaki me va na yabaki vakaveitaravi.
Sa vakamuria na vosa i Moronai ko Josefa. Sa cabeti Delai Kumora ena veiyabaki. E dau tuberi e kea mai vei Moronai. Sa qai tukuna vei Josefa ko Moronai na veika e baleta na Lotu dina i Jisu Karisito. Ena mai tauyavutaka tale na nona Lotu ko Jisu Karisito.
Sa qai solia ko Moronai na peleti koula vei Josefa ena yabaki 1827. E waraka tiko mai ko Josefa me taura na peleti koula mai na yabaki va. E tataunaka to Moronai vei Josefa me taqomaka na peleti koula.
Sa kauta sara ki vale ko Josefa na peleti koula. E gadreva mai vu ni yalona me qarauna vinaka. Era qai tovolea na tamata ca me ra butakoca. Sa qai laki vunitaka ko Josefa na peleti koula ena vanua era na sega ni raica rawa kina ko ira na tamata ca. Na Kalou talega sa dau vukei Josefa ena kena maroroi na peleti koula.