“Wase 40: Raivotu e Loma ni Vale Tabu e Kirtland: Epereli 1836,” iTukuni mai na Vunau kei na Veiyalayalati (2002), 155–157
“Wase 40,” iTukuni mai na Vunau kei na Veiyalayalati, 155–157
Wase 40
Raivotu e Loma ni Vale Tabu e Kirtland
(Epereli 1836)
Ena dua na yakavi ni Siga Tabu, era soqoni kina ena Vale Tabu e Kirtland o ira na Yalo dodonu. Ka ra cabora na sakaramede na Apositolo. Ratou qai veisoliyaka vei ira na Yalo dodonu na sakaramede o Josefa Simici kei rau na nona ivukevuke.
V&V 110: iVakamacala
E rau lako vakatikitiki ko Josefa Simici kei Oliver Cowdery kina dua tale na tikina ena vale tabu me rau laki tiko kina. Me rau tekiduru ka masumasu. Ni sa tini na nodrau masu, sa qai yaco e dua na ka taleitaki. E qai rairai mai vei rau o Jisu Karisito. Sa serau na matana, me vaka na bukawaqa. Sa vulavula na drau ni uluna me vaka na ucacevata. Ka ramase cake na matana mai na matanisiga.
Sa vakaraitaka o Jisu vei Josefa kei Oliver e vuqa na ka talei. Ka tukuna vei rau ni sa ikoya na nodrau iVakabula. Ni a mate ena vukudrau. Ka sa tucake tale mai na mate. E qai kaya kina o Jisu ni sa dodonu me ra marau o ira taucoko e ra tara na vale tabu. Sa kaya kina o Jisu ni sa taleitaka na vale tabu. E nona vale tabu. Sa tukuna kina ni na lesuva mai vakawasoma. Me mai vosa vei ira na Yalo dodonu. Ia kevaka era sega ni vakamareqeta na Yalo dodonu na vale tabu, ena sega ni lakova mai.
Sa rau qai raici ira na agilosi era tu e loma ni Vale Tabu e Kirtland o Josefa kei Oliver. E rairai mai e liu vei rau o Mosese. E a parofita o Mosese ka bula ena gauna e liu. Ka tuberi ira tani mai Ijipita na kawa i Isireli. E tu ena Veiyalayalati Makawa kei na Mataniciva Talei na italanoa kei Mosese. Sa soli vei rau o Josefa kei Oliver eso na ikuri ni kaukauwa vakabete. Me rau tuberi ira kina mai na veimatanitu kei vuravura o ira na kawa i Isireli.
Sa qai rairai mai ko Ilaisa vei Josefa kei Oliver. E kauta mai o llaisa na kaukauwa vakabete nei Eparaama kina Lotu i Jisu Karisito. E a bula e liu o Eparaama. Sa vakalougatataki Eparaama na Kalou. Ka solia kina vua na isolisoli bibi vakabete. Me tiko ga ena vuvale nei Eparaama na kaukauwa vakabete. O ira taucoko na lewe ni Lotu bula dodonu era veiwekani voleka kei Eparaama.
Sa qai rairai vei rau o Josefa kei Oliver o Ilaijia. Ko Ilaijia oqo e dua na parofita ka a bula mai liu. E vakarota ko Ilaijia me dau vaqaqai na kedra itukutuku na tubudra. Me dau qaravi na cakacaka ena vale tabu me baleti ira na tubudra. Sa solia kina o Ilaijia vei Josefa kei Oliver na kaukauwa vakamareqeti me baleta na matabete. Ena vukei ira na vuvale bula dodonu na kaukauwa vakabete oqo. Me ra vauci rawa kina vakavuvale. Ka rawa me ra bula vata tiko me tawamudu.
V&V 2:2; 110:13–16; 1 Tui 17–2 Tui 2 Malakai 4:5–6