“Wase 46: JoCuru e Vale ni Veivesu e Liberty o Josefa Simici: Maji 1839,” iTukuni mai na Vunau kei na Veiyalayalati (2002), 173–75
“Wase 46,” iTukuni mai na Vunau kei na Veiyalayalati, 173–75
Wase 46
Curu e Vale ni Veivesu e Liberty o Josefa Simici
(Maji 1839)
Sa batabata na vale ni veivesu e Liberty ka duka vakalevu. Era sa vakararawataki vakalevu o Josefa kei ira na nona itokani. Era dau vesu ena sinucodo ena so na gauna. Ka moce ga ena vuloa.
E sega ni vinaka na kakana. E so na gauna e dau biu kina na waigaga ka vakavuna me ratou tauvimate vakaca sara.
Sa rarawa vakalevu na lomai Josefa. Eratou sa curu tiko me dua na gauna balavu. Sa vakatitiqataka ni ratou na sereki tale. Sa lomaleqataka na Lotu.
Sa masumasu o Josefa vua na Tamada Vakalomalagi. E taroga kina se me vakacava na dede ni gauna me ratou na vakararawataki tiko kina. Ka qai kerei Tamada Vakalomalagi me vukei iratou. Sa kerei Tamada Vakalomalagi o Josefa me kanakuitataki ira na nodra meca.
Sa yalataka o Jisu vei Josefa ni na sega ni dede na nona donuya tiko na rarawa. Ka vakarota kina me yaloqaqa. Me qai lomani koya kina na Kalou. Sa yalataka vei Josefa o Jisu ni sa voleka na gauna me na sotavi ira tale kina na wekana. Era sa lomani koya o ira na wekana ka na marautaka me ra veisotari tale.
Sa kila o Jisu na veika era sa cakava ko ira na tamata ca. Sa vakaraitaka vei Josefa na nodra kanakuitataki. O ira na tamata ca era na sega sara ni vakaivotavota ena matabete. Era na sega ni vakaitutu ena matabete o ira na luvedra. O ira na tamata ca era na vakararawataki ka mate.
Sa tukuna vei Josefa o Jisu e vuqa na ka vinaka ka na yaco vei ira na Yalo dodonu. Ena sega ni tarovi rawa na veivakalougatataki ni Kalou kivei ira. Ka me tuberi ira tiko na Yalo Tabu kina veika cecere me baleta na kaukauwa ni Kalou. Me ra kila kina na veika me baleti lomalagi kei vuravura.
Sa vakarota ko Jisu me kakua ni rerevaka o Josefa na veikararawataki. Me kakua talega ni lomaleqataka na veika dredre ena sotava. E kaya o Jisu ni na vakavinakataki keda na veika dredre eda sotava. Ena veivuke na leqa eda donuya kina noda vakavulici. Sa sotava na veika e dredre duadua o Jisu.