Wase 41

Sotavi na Leqa e Kirtland

(1837)

Era sa tiko marau na Yalo dodonu e Ohio. Sa dau lomani ira na Turaga.

Eso na italatala qase era sa biuti Kirtland. Me ra laki vakatavulici ira na tamata ena kosipeli. Sa vuqa era rogoca na nodra vunau na italatala qase ka curu sara kina Lotu.

Sa qai tekivu na leqa e Kirtland. E dua tiko na nodra baqe na Yalo dodonu. Era vakacuruma kina na nodra ilavo.

E vuqa vei ira na Yalo dodonu era vinakata me ra vakailavo. E dua ka cakacaka ena baqe e sega ni yalo dina ena cakacaka. Ka butakoca kina eso na ilavo.

Sa tukuna vei ira na kena vo o Josefa Simici me ra taqomaka vinaka na ilavo. Era sega ni qai muria na vosa i Josefa. Ka vuna me sogo kina na baqe. Sa oti vakadua na ilavo. Era sega ni taura tale na nodra ilavo ko ira na Yalo dodonu.

Era sa rarawa ko ira na Yalo dodonu. E sa bilitaki Josefa Simici ni vakavuna na sogo ni baqe. Ni so sara ga vei ira na wekana voleka era cavuta eso na ka ca me baleti koya. Ka so era vinakata sara me ra vakamatei koya.

Era sa rarawa talega eso na iliuliu ni Lotu. Era sa via biuta vakadua na Lotu. Ka yaco me ra meca kaukauwa ni Lotu. Era sa tamata ca sara. Sa rarawa vakalevu o Josefa Simici.

Eso tale na iliuliu ni Lotu era lomani Josefa ka ra vukei koya. Ni ra kila tu na dina ni Lotu i Jisu Karisito. E dua vei ira na iliuliu bula dodonu oqori ko Brigham Young. Sa tusanaka ko Brigham vei ira na tamata ni parofita ni Kalou o Josefa.

Era sa cudruvi Brigham Young o ira na meca ni Lotu. Sa dro ki Kirtland me levei ira rawa kina ena nodra vinakata me ra vakamavoataki koya.

Era vakacaca sara vakalevu mai Kirtland ko ira na meca ni Lotu. Ni ra cabe kina vale tabu ka vakayacora eso na ka vakasisila.

Sa oti kina na kena vakamareqeti na vale tabu. Ena sega kina ni wili me Vale ni Turaga. Sa rarawataka o Josefa na veika ca era cakava tiko na tamata. E rarawa talega ena vuku ni levu ni nodra caka ca o ira na tamata. Sa rarawa voli na lomana ena levu ni leqa era donuya.