“Wase 26: Na Matanitu Lagilagi e Tolu mai Lomalagi: 16 Feperueri 1832,” iTukuni mai na Vunau kei na Veiyalayalati (2002), 97–103
“Wase 26,” iTukuni mai na Vunau kei na Veiyalayalati, 97–103
Wase 26
Na Matanitu Lagilagi e Tolu mai Lomalagi
(16 Feperueri 1832)
E rau vakawilika tiko ena dua na siga o Josefa Simici kei Sidney Rigdon na Veiyalayalati Vou. E tukuni kina ni ra na lako ki lomalagi o ira na ivalavala dodonu ena nodra sa tucake tale. Sa qai lomatarotarotaka o Josefa na nodra icavacava na tamata kecega mai lomalagi. Rau sa qai masumasu o Josefa kei Sidney. Ka rau kerei Tamada Vakalomalagi me tukuna vei rau na veika me baleti lomalagi.
V&V 76: iVakamacala
Sa sauma mai vei rau ko Tamada Vakalomalagi na nodrau masu. E rau taura kina edua na ivakatakila. Sa raivotu taleitaki dina. Ni rau raica kina o Josefa kei Sidney na matanitu vakasilesitieli. Ka laurai kina o Jisu ni vakavolivoliti tu ena rarama. Kei ira talega na agilosi ni ra wavoliti o Jisu kei na Tamada Vakalomalagi.
Rau sa kila kina o Josefa kei Sidney ni bula tiko o Jisu. E rau raici koya. Ka qai rogoca o Josefa kei Sidney na voqa ni vosa. E tukuna ni o Jisu ga na Luve ni Kalou. Sa biu mai ki vuravura. Me mai vakaraitaka o Jisu vei ira kecega na sala me ra lesu tale kina vua na Tamada Vakalomalagi.
Rau sa qai raica o Josefa kei Sidney na vanua era lakova o ira era tucake tale. E tolu na icavacava ni noda bula oqo. O ira na Yalo dodonu me ra na laki tini sara ena matanitu vakasilesitieli. E rau bula ena matanitu vakasilesitieli o Tamada Vakalomalgi kei Jisu.
O ira na Yalo dodonu era sa vakabauti Jisu ena nona bula voli e vuravura. Era sa qai papitaisotaki. Ka tuberi mai vua na Yalo Tabu ena sala ni bula.
Era qai sotava na leqaleqa o ira na Yalo dodonu, ia era sa dau vakabauta. Sa dau vukei ira o Jisu ena gauna ni nodra sotava na leqa. Ka ra sa cakacaka vagumatua. Era qai veivutuni ka talairawarawa ki na ivunau kecega ni Kalou. Ka qai vorati Setani rawa ena nona veitemaki o Setani.
O ira ga na Yalo dodonu era na ucui Tamada Vakalomalagi kei Jisu. Era na kila na veika kecega. Me ra uasivi sara kina. Me yaco me ra kalou.
E rau sa qai raica o Josefa kei Sidney e dua tale na matanitu. Ka vakatokai me matanitu vaka-teresitieli. Eso na tamata era na curuma na matanitu vakateresitieli ni ra sa tucake tale.
O ira ka lewena na matanitu vakateresitieli era tamata vinaka e vuravura. Era sega ga ni Yalo dodonu dina. Ni ra sega ni vakabauti Jisu. Ka vakamuria eso ga na ivakaro ni Kalou. Ka ra sega ni muria taucoko kina na īvunau.
Era a sega ni vakabauta na kosipeli ena nodra rogoca e vuravura. Ka qai laki vakabauta ga ni ra sa mate.
O ira na lewe ni matanitu vakateresitieli era na raici Jisu. Era na sega ga ni bula maliwai o Tamada Vakalomalagi se o Jisu. Era na sega ni yaco me ra kalou.
Rau sa qai raica na ikatolu ni matanitu. E vakatokai me matanitu vakatilesitieli. O ira na lewena era a sega ni bula dodonu e vuravura.
Era sega ni vakabauti Jisu o ira oqo. Ka sega ni vakabauta na nodra vosa na parofita. Me sega ni ra papitaisotaki. Ni ra a sega ni talairawarawa kina ivunau ni Kalou.
O ira era lewena na matanitu vakatilesitieli era na sega ni raici Jisu kei Tamada Vakalomalagi. Era na talevi ga mai vei ira na agilosi. Ka na vakatavulici ira na Yalo Tabu. O ira na lewena na matanitu vaka-tilesitieli era na kilai Jisu kei na Tamada Vakalomalagi. Era na sega ga ni bula vata kaya.
O ira era na lewena na matanitu teresitieli kei na tilesitieli, era na tucake tale ena gauna e lesu tale mai o Jisu. O ira era na lewena na matanitu vaka-tilesitieli era na sega ni tucake tale ena gauna e lesu mai kina o Jisu. Me ra na waraka na 1,000 na yabaki me ra qai tucake tale.
Sa raica o Josefa kei Sidney na vanua era na lakova na tamata ca. Era na laki tiko kei Setani. Ena sega ni laki maliwai Tamada Vakalomalagi, Jisu, se na Yalo Tabu.
O ira na laki maliwai Setani tiko era a rogoca yani e vuravura na kosipeli. Ka sa dau vakatavulici ira na Yalo Tabu ena veika me baleti Jisu Karisito.
Era kila ni a bula o Jisu. Ka kila ni a mate o Jisu ena vukuda. Sa qai temaki ira o Setani. Sa qai tovolea me dusimaka vei ira na veika ca. Era sa qai talairawarawa vei Setani. Sa mai tamusuki kina na nodra vakarorogo kina Yalo Tabu. Sa cavuka kina na nodra vakabauti Jisu. Me ra yaco me ra tamata ca sara. Me ra na laki maliwai Setani tikoga me tawamudu.
E rau sa raica e vuqa tale na ka ena nodrau raivotu. Sa vakarota o Jisu me rau kakua ni vola taucoko na veika e rau raica. Era na rawa ni raica vakaira na Yalo dodonu. Me dau vakatavulici ira na Yalo Tabu. E rau sa vakavinavinaka o Josefa kei Sidney vua na Kalou ena vuku ni raivotu talei oqo.