Valetabu e Kirtland, mai vei Jon McNaughton

27 ni Sepiteba–3 ni Okotova.

Vunau kei na Veiyalayalati 109–110

“Ni Sa Nomuni Vale, na Nomuni Vanua Tabu”

Ni raici na Vunau kei na Veiyalayalati 109: 24–28, e kaya kina o Elder David A. Bednar, “Au sureti kemuni mo ni vulica wasoma ka vakasamataka vakatitobu ena masumasu na ibalebale ni ivolanikalou oqo ena nomuni bula kei na nomuni matavuvale” (“Honorably Hold a Name and Standing,” Ensign se Liaona, Me 2009, 99). Vakasamataka na veisureti oqo ni ko vulica tiko.

Vola na Veika o Uqeti Kina

Na katuba ni Valetabu e Kirtland e sega ni dodonu me dola ni se bera na 8:00 ena mataka ni ika 27 ni Maji, 1836. Ia o ira na Yalododonu era sa nuitaka tiko me ra tiko ena lotu ni veivakatabui era sa tekivu yatuni mai ni se qai 7:00 na kaloko. Ena kena sa totolo sara ni vakatawani na idabedabe kei na olo maivei ira na ivavakoso yalomaqusa, a vakatura sara o Josefa Simici me sa vakalevutaki na vanua ni soqo. Ni sa vakasinaiti o ya, sa tuvai me dua tale na kena soqoni. Ia a sega walega ni o ira na bula era a yalomaqusa me ra tiko kina. E vica vata na tamata era a vakadinadinataka ni ra a raici ira na agilosi, ena loma ni valetabu ka vakakina ena na delavuvu ni vale, ena gauna ni caka tiko na veivakatabui vakakina ni sa oti. E sa vaka dina ni “mataivalu kei lomalagi” era sa yaco mai mera “lagasere ka [mera] kaila” vata kei ira na Yalododonu Edaidai (“Na Yalo ni Noda Kalou,” Serenilotu, naba 2).

Na cava me yaco kina na mamarau levu—ena yasa ruarua ni ilati? Na yalayala ni o ira na Yalododonu era na qai “vakalougatataki ena kaukauwa mai lomalagi” a dua na vuna era a soqoni yani kina ki Ohio ena imatai ni gauna (Vunau kei na Veiyalayalati 38: 32). A yalataki kina na veika cecere me baleta na veisiga ni mataka. “Oqo,” a kaya na Turaga, “sa itekivu ni veivakalougatataki ena sovaraki ki uludra na noqu tamata” (Vunau kei na Veiyalayalati 110:10). Na gauna eda sa bula donuya tiko— ena vakusakusataki ni cakacaka ni valetabu kei na veicakacaka vakalotu e vakarautaki tu kivei ira na milioni na bula kei na mate — a tekivu mai Kirtland, ni “[a] basuka na ilati ni vuravura oqo” (“Na Yalo ni Noda Kalolu”).

Raica talega na Yalododonu, 1:232–41; “E Dua na Vale me Baleta na Noda Kalou,” Revelations in Context, 169–72.

Vakasama ni Vuli iVolanikalou ni Tamata Yadua

Vunau kei na Veiyalayalati 109

E vinakata na Turaga me vakalougatataki au ena Nona vale tabu.

Ena so na sala, na Valetabu e Kirtland a duidui sara mai na valetabu eda kila tu nikua. A sega ni dua na icabocabo ni soro kei na tobu ni papitaiso, kei na cakacaka vakalotu me vaka na papitaiso ena vukudra na mate kei na veivauci a se bera ni vakalesuimai. Ia na veivakalougatataki e vakamacalataki tiko ena wase 109, na masu ni veivakatabui ni Valetabu e Kirtland, sa veivakalougatataki eda sa ciqoma tiko ena vale ni Turaga nikua. Raicalesu na veitikina oqo me laurai eso na veivakalougatataki oqo. Ena nomu wilika oqo, vakasamataka na cava na vuna e bibi kina vei iko kei na nomu matavuvale.

Tikina e 5, 12–13 (raica talega na Vunau kei na Veiyalayalati 110: 6–8): Ena loma ni valetabu na Turaga e rawa ni vakaraitaki Koya kivei keda ka da rawa ni vakila na Nona kaukauwa.

Tikina e 9, 17–19, 26, 78–79: Ena loma ni valetabu eda sa taura vei keda na yaca ni Turaga.

Tikina e 22–23: Me vaka ni da sa cakava ka rokova tiko na veiyalayalati ni valetabu, sa solia kina vei keda na Turaga na kaukauwa meda cakava na Nona cakacaka.

Tikina 24–33: Me vaka ni da curuma na valetabu ena bula kilikili, e rawa ni da ciqoma na veitaqomaki ni Turaga.

Na veivakalougatataki tale eso:

Na cava sa vakauqeti kemuni kina na Yalo mo ni cakava mo ciqoma kina na veivakalougatataki oqo?

Vunau kei na Veiyalayalati 109

Na masu ni veivakatabui ni valetabu e Kirtland e rawa ni vakavulici au me baleta na masu.

Wase 109 sai koya e dua na masu ni veivakatabui a soli vei Josefa Simici mai na ivakatakila (raica na ulutaga ni iwase). Na cava o sa vulica me baleta na masu mai na iwase oqo? Ni o wilika tiko, sa rawa mo nanuma na nomu masu. Na veivakauqeti cava o sa ciqoma e rawa ni vukei iko mo vakatorocaketaka kina na nomu veitaratara kei na Tamada Vakalomalagi? Me vakataka, na cava a masulaka na parofita ena masu oqo?

Vunau kei na Veiyalayalati 110:1–10

Sa rawa vua na Turaga me vakaraitaki Koya kivei au ena loma ni valetabu.

Na cava na nomu nanuma baleta na iVakabula ni o wilika oti na Vunau kei na Veiyalayalati 110: 1–10? Ena sala cava sa vakaraitaki Koya kina vei iko ena loma ni valetabu? Ena sala cava e sa vukei iko kina mo kila ni sa ciqoma o Koya na nomu sasaga kei na solibula?

Ena tutu yadua ni Valetabu e Kirtland sa tu kina na itutu ni vunau me baleti ira na iliuliu ni matabete.

Vunau kei na Veiyalayalati 110:11–16

Na idola ni matabete e gadrevi me rawati kina na cakacaka ni Kalou sa tiko ena Lotu nikua.

Me kilai vakavinaka na idola ni matabete era sa solia ko Mosese, Ilaisa, kei Ilaija vei Josefa Simici kei Oliver Cowdery ena Valetabu e Kirtland, sa rawa mo wilika na itukutuku nei Elder Quentin L. Cook “Vakavakarau me Sota kei na Kalou” (Ensign se Liaona, Me 2018, 114–17). A vakamacalataka o Elder Cook na kena sema na idola oqo kei na cakacaka ni Lotu nikua. Sa rawa talega mo vulica na veika baleti ira na parofita oqo ni gauna makawa ena nomu vulica na “Moses,” “Elias,” kei na “Elijah” ena Guide to the Scriptures (scriptures.ChurchofJesusChrist.org). Vakasamataka vakatitobu na cava o rawa ni cakava mo veivuke ena cakacaka e sema tiko ki na idola oqo.

Raica talega na “iDola ni Matabete,” Tudei ena Vakabauta, 126–27.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 109.Vakamatavuvale, dou vakasaqara eso na tikina ena wase 109 e vakauqeti kemudou mo dou gole vakawasoma e valetabu (me vakataka, raica na tikina e tuvai tu ena ruku ni “Vakasama ni Vuli iVolanikalou ni Tamata Yadua”). Me veivosakitaki na sala mo cakava kina na vakatutu nei Peresitedi Russell M. Nelson: “Vakasaqara e dua na sala mo drau sota vakawasoma kina kei na Turaga—mo tiko ena Nona valetabu—mo qai maroroya na gauna ni sota o ya ena kena dodonu kei na marau” (“Becoming Exemplary Latter-day Saints,” Ensign se Liaona, Nove. 2018, 114). Kevaka o iko se nomu matavuvale dou se bera ni lako ki na valetabu, ena rawa mo sikova na temples.ChurchofJesusChrist.org me vukea nomudou vakavakarau mo dou gole kina.

Vunau kei na Veiyalayalati 109:78–80.Na serenilotu “Na Yalo ni Kalou” (Serenilotu, naba 2) a volai me baleta na vakatabui ni Valetabu e Kirtland—ia e sa dau lagati tu mai liu sara ena veivakatabui yadua ni valetabu. Sa rawa mo ni lagata vata na serenilotu oqo ka vakasaqara na veimalanivosa eso e vakatubura na nomu vakavinavinaka baleta na valetabu ena gauna oqo. E sema vakacava na serenilotu oqo ki na itukutuku ni Vunau kei na Veiyalayalati 109:78–80?

Sa rawa mo raica na masu ni veivakatabui ni valetabu e voleka vei iko ena temples.ChurchofJesusChrist.org.

Vunau kei na Veiyalayalati 110.Ni ratou sa wilika na nomu matavuvale na wase 110 ka raica na iyaloyalo ena mua ni ituvatuva oqo, sureta me ratou raitayalotaka na nodratou nanuma ke ratou a tiko vata kei Josefa Simici kei Oliver Cowdery ena Valetabu e Kirtland. Solia ki na nomu matavuvale e dua na madigi me ra wasea na veika era nanuma me baleta na iVakabula.

Vunau kei na Veiyalayalati 110:15.Na cava ena rawa ni vukea na “vagolei ni yalodra” na luvemuni vei ira na nodra qase e liu? Sa rawa mo raica eso na vakasama me marautaki ena FamilySearch.org/discovery. Sa rawa mo ni cakacaka vata mera kilai na qase eliu era gadreva tu na cakacaka vakalotu ni valetabu ka tuvai me vakayacori na cakacaka vakalotu oqori e valetabu. Sa rawa talega me veivosakitaki na cakacaka a vakalesuyamai o Ilaija ena Vale Tabu e Kirtland sa vakatubura kina na nomu lomani ira na nomu qase e liu.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Sere sa vakaturi: “Na Yalo ni Noda Kalou,” Serenilotu, naba 2.

Domo ni Vakalesuimai

iVakatakilakila Vakayalo kei na Valetabu e Kirtland

Me Vaka e Dua na Buka Waqa, mai vei Glen S. Hopkinson

E ra oqo na nodra vosa na Yalododonu Edaidai era a tiko ena kena vakatabui na Valetabu e Kirtland kei na veisoqoni tale eso ka tarava. E vuqa era a vakatauvatana na veika era a sotava ki na veika era a sotava taumada na Yalododonu ena gauna makawa na “kaukauwa mai cake” ena siga ni Penitiko (Luke 24:49; raica talega na Cakacaka 2:1–4; Vunau kei na Veiyalayalati 109:36–37).

Eliza R. Snow

“Na soqo ni vakatabui o ya sa rawa me vakatovotovotaki, ia e sega ni dua na vosa vakatamata me na vakamacalataka rawa na veivakaraitaki vakalomalagi ni siga guiguilecavi dredre o ya. Era a rairai na agilosi vei ira eso, ka a vakilai na iserau vakalou vei ira kece a tiko kina, ka vakasinaiti na yalo yadua ena ‘reki tawa vakamacalataki rawa ka ra sinai ena lagilagi.’”¹

Sylvia Cutler Webb

“E dua vei ira na noqu vakanananu taumada o ya na kena vakatabui na Valetabu. A kauti keirau cake o tamaqu ka kaya na vuna keitou lako kina kei na ibalebale ni kena vakatabui e dua na vale vua na Kalou. Ia e dina ga niu se gone sara ena gauna o ya, au se nanuma vakamatata tu na soqo o ya. Au rawa ni raicalesu na veiyabaki sa oti yani ka raica ena gauna o ya o Josefa na Parofita, ni sa tucake ka laveta cake na ligana ruarua ki lomalagi, ka malumalumu toka na rairai ni matana, ka drodro na wai ni matana e baluna ni sa vosa ena siga guiguilecavi dredre o ya. E voleka ni ra sa tagi kece na tamata. A oso sara na vale era tene na gonelalai vei ira na qase; o ganequ a tene tiko vei tamaqu, kau tene tiko vei tinaqu. Au nanuma sara na ivinivo keirau a dara tiko. Se gone sara na noqu vakasama ena gauna o ya meu kila rawa na bibi ni ka kece o ya, ia ni toso na gauna au sa qai kila rawa cake tikoga, kau sa vakavinavinaka vakalevu niu a tiko rawa e kea.”²

Oliver Cowdery

“Ena yakavi o ya au a sota vata kei ira na vakailesilesi ni Lotu ena vale ni Turaga. A sovaraki mai na Yalo—au a raica na lagilagi ni Kalou, me vaka e dua na o levu, a lako sobu mai ka solega na vale, ka vakasinaita ena cagi vakacevaruru kaukauwa sara. Au a raica talega na veiyameyame, ni bukawaqa sa tiko vei ira e vuqa, … ni ra sa vosataka na vosa eso ka parofisai.”³

Benjamin Brown

“A raici e vuqa na raivotu. E dua a raica e dua na ilokoloko se o sa lako sobu ki na vale, sa ramase sara me vaka na gauna e cilava kina na matanisiga ena dua na o me vaka na koula. E rua tale a raica e tolu na tamata e ratou vuka voli ena rumu vata kei na ki e ligadratou, vakakina e dua na sinucodo rarama ena ligadratou.”⁴

Orson Pratt

“Sa tu e kea na Kalou, kei ira na nona agilosi a tiko e kea, na Yalo Tabu a tiko ena kedra maliwa na tamata … ia era sa vakasinaiti mai na uludra ki na qeteqete ni yavadra ena kaukauwa kei na veivakauqeti ni Yalo Tabu.”⁵

Nancy Naomi Alexander Tracy

“[Ni] gauna sa tara oti ka vakatabui na valetabu … e a rua na siga marautaki duadua ena noqu bula. Na serenilotu a buli me baleta na soqoni o ya ‘Na Yalo ni Noda Kalou sa Serau Tu.’ Sa dina sara ni Veivakauqeti Vakalomalagi sa tiko sobu ena vale ko ya. … Au vakila ni ko lomalagi sa tu e vuravura.”⁶

iDusidusi

1. Ena Edward W. Tullidge, The Women of Mormondom (1877), 95.

2. Ena Karl Ricks Anderson, Joseph Smith’s Kirtland: Eyewitness Accounts (1996), 182–83.

3. Oliver Cowdery diary, Mar. 27, 1836, Church History Library, Salt Lake City.

4. iVola nei Benjamin Brown vei watina o, Sarah, circa April 1836, Benjamin Brown family collection, Church History Library, Salt Lake City; punctuation and capitalization modernized.

5. Orson Pratt, “Remarks,” Deseret News, Jan. 12, 1876, 788.

6. Ena Richard E. Turley Jr. kei Brittany A. Chapman, eds., Women of Faith in the Latter Days (2011), 1:442.

Sa Rairai o Mosese, Ilaisa, kei Ilaija ena Valetabu e Kirtland, mai vei Gary E. Smith