4–10 ni Okotova

Vunau kei na Veiyalayalati 111–114

“Au na Solia Vei Kemudou na Veika Kecega Sa Ganiti Kemudou”

Kerea ena masumasu na veidusimaki ni Yalo ni ko wilika na Vunau kei na Veiyalayalati 111–14, ka vola na veika o uqeti kina. Ka qai vakasamataka na veisala o rawa ni cakacakataka kina na veivakauqeti oqori.

Vola na Veika o Uqeti Kina

Sa bau dua na ka vakayalo e sa vakavuna mo yalonuidei ka tudei tiko ena nomu vakabauta—ia sa tu na veika rarawa ni bula sa dau vakatovolea na nomu vakabauta, ka raica ni ko sa sasaga bula tiko mo taura lesu na vakacegu o a vakila e liu? E dua na ka vakaoqo a yaco kivei ira na Yalododonu e Kirtland. Ni se bera ni dua na yabaki ni oti na veisorovaki vakayalo e semati ki na vakatabui ni Valetabu e Kirtland, sa tubu na leqa eso. Na leqa vakailavo, duidui ena Kuoramu ni Le Tinikarua, kei na veivakatovolei eso a vakavuna me luluqa kina eso ena nodra vakabauta.

Eda na sega ni levea rawa na veivakatovolei, ia eda na tarovi ira vakacava ena vakarerei ni noda vakabauta kei na ivakadinadina? De dua na kune na tiki ni kena isau ena ivakasala ni Turaga ena Vunau kei na Veiyalayalati 112, e soli ena gauna a tubu tu kina na dredre eso e Kirtland. E kaya na Turaga, “Dou vakasavasavataka na lomamudou e mataqu” (tikina 28), “Dou kakua ni veivorati” (tikina 15), “Vakadreta na ivau ni tolomu me baleta na cakacaka oqo” (tikina 7), ka “Mo yalomalumalumu” (tikina 10). Ni da muria na ivakasala oqo, na Turaga ena qai “tuberi [keda] ena [ligada]” ena gauna dredre eso ki na veivakabulai kei na vakacegu (raica na tikina 10, 13).

Vakasama ni Vuli iVolanikalou ni Tamata Yadua

Vunau kei na Veiyalayalati 111

Sa rawa vua na Turaga me “solia na veika kecega sa ganiti [au].”

Ena 1836, a kumuni dinau bibi kina na Lotu ena vakayacori ni cakacaka ni Turaga. Ni lomaleqataka tu o Josefa Simici kei na so tale na dinau oqo ka navuca na sala eso me saumi kina, era a gole ki Salem, Massachusetts, de dua ena kena rogovaki ni a biu tu eso na ilavo ena dua na vale ekea (raica na ulutaga ni wase ena Vunau kei na Veiyalayalati 111). Ni oti nodra yaco ki Salem, a cauraka na Turaga, “Ia dou na kunea ena koro oqo e vuqa na iyau vinaka ka yaga” (tikina e 10)—na iyau era oka kina na tamata ena “soqoni ira vata [o Koya] ena kena gauna me yaga vei Saioni” (tikina e 2; raica talega na Lako Yani 19:5). E dina ga ni a sega ni kune na ilavo e Salem, o ira na saumaki mai ena sasaga e muri ni kaulotu ekea sa tiki ni kena vakataucokotaki na yalayala ni Turaga.

Ni o wilika na wase 111, vakasamataka na veika o leqataka tiko. Navuca na sala e rawa ni vakavotukana kina vei iko na vosa ni Turaga vei Josefa. E sa vukei iko vakacava na Turaga mo kunea na “iyau” e sega ni namaki? (tikina e 10). Vakasamataka na ka e sa cakava o Koya me “solia na veika kecega sa ganiti kemudou” (tikina e 11). Na cava sa vakavulica vei iko na malanivosa “me vaka na ka dou sa gadreva” me baleta na Tamada Vakalomalagi?

Raica talega na Maciu 6:19–21, 33; “More Treasures Than One,” Revelations in Context, 229–34.

Vunau kei na Veiyalayalati 112:3–15

Na Turaga ena liutaki ira ka vakasaqara ena yalomalumalumu na Lomana.

Sa tekivu malumalumu mai na duavata ena Kuoramu ni Le Tinikarua ena vula ikatakata ni 1837. A tiko na duidui eso vakailesilesi, ka ra vosa saqata tiko na Parofita o Josefa Simici eso na lewenilotu. A kauwai sara kina o Thomas B. Marsh, na Peresitedi taumada ni Kuoramu ni Le Tinikarua, ka gole mai Missouri ki Ohio, me kere ivakasala vua na Parofita. A ciqoma kina o Baraca Marsh ena vakatakila ena wase 112. E rawa vakacava ni a vukei koya kei na nona kuoramu na ivakasala ni Turaga? Na lesoni cava so e tiko kina me baleti iko ni o qara tu mo ulabaleta na veileti kei na yalo ca?

Vakabibi, o na vakasamataka beka vagumatua na tikina e 10.. Na cava na kena ibalebale me liutaki iko na Turaga “ena ligamu”? Cava na vuna e gadrevi kina na yalomalumalumu ena mataqali veidusimaki vakaoqo?

Raica talega na Ulisses Soares, “Dou Yalomalua ka Yalomalumalumu,” Ensign se Liaona, Nove. 2013, 9–11; “The Faith and Fall of Thomas Marsh,” Revelations in Context, 54–60.

Kevaka eda sa yalomalua, ena dusimaki keda na Turaga ka sauma na noda masu.

Vunau kei na Veiyalayalati 113

O Josefa Simici a “dua na dauveiqaravi ena ligai Karisito.”

A vakatoka o Aisea e dua vei ira na kawa i Jese me vaka e dua na “dulumi” ka dua na “coke” (Aisea 11:1, 10). Ena wase 113, e vakamacalataka na Turaga ni kawa oqo, e dua na italai i Karisito, ena vakaitavi vakabibi ena nodra vakasokomuni na tamata ni Turaga ena iotioti ni gauna (raica na Vunau kei na Veiyalayalati 113:4, 6)—e dua na parofisai e vakamacalataka saraga vakavinaka na parofita o Josefa Simici. E rawa vakacava na ka oqo kei na dina tale eso ena wase 113 me vakayaloqaqataki ira na Yalododonu ena loma ni dredre era sotava voli e Kirtland? Na cava o raica tu ena vakatakila oqo esa vakauqeti iko mo vakaitavi ena cakacaka ni Turaga nikua?

Raica talega na iDusidusi ki na iVolanikalou, “Jesse,” scriptures.ChurchofJesusChrist.org; 2 Nifai 21:10–12; Josefa Simici—Ai Tukutuku 1:40.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 111:2, 9–11.Na veitikina oqo e rawa ni vakauqeta e dua na veivosaki ena ka e vakamareqeta tu na nomu matavuvale me “iyau” tawamudu. Sa rawa ni o cakava e dua na qito ni vakasaqara iyau ena vunitaki ni ka eso wavokita na vale e matataka na veika sa dau vakamareqeta se yaga sara vua na Turaga. Ni sa kunea na yaya yadua na nomu matavuvale, veivosakitaka na ka dou rawa ni cakava me vakaraitaka ni dou vakamareqeta.

Vunau kei na Veiyalayalati 112:10.E vakamacalataki ira na tamata yalomalumalumu o Elder Ulisses Soares vakaoqo: “Era sa vakavulici rawarawa na yalomalumalumu, ni kilai na sala era vakararavi kina vua na Kalou ka gadreva tu mera okati ena Nona lewa. Era sa yalomalua na yalomalumalumu ka tiko vei ira na madigi me vakayarayarataki ira na tani mera bula vakakina” (“Dou Yalomalua ka Yalomalumalumu,” Ensign se Liaona, Nove. 2013, 10). Navuca na sala eso mo vukea kina na nomu matavuvale me kila vakamatata na ibalebale ni yalomalua. Sa rawa ni dou lagata e dua na sere ni yalomalua, me vaka na “Mo Yalo Malumalumu” (Sere ni Lotu, naba 72), ni tauri ira tiko na kena vo e dua na lewe ni matavuvale “ena ligadra” ka tuberi ira wavoki ena nomudou itikotiko. Se wasea eso na ka e a liutaka kina na Turaga na lewe ni nomu matavuvale “ena ligadra” ka solia “na isau ni [nodra] masu.”

Vunau kei na Veiyalayalati 112:11–14, 26.Na cava na kedrau duidui na kilai ni yacana e dua kei na nodra kilai? Na cava eda vulica ena tikina e 11–14 me baleta na ibalebale ni nona kilai na Turaga?

Vunau kei na Veiyalayalati 112:15.Na cava na ibalebale ni “vorata” na parofita? Na cava eda raica ena tikina oqo e vukei keda ni vinakata meda tokona na parofita?

Vunau kei na Veiyalayalati 113:7–8.Na cava eda vulica mai na tikina e 8 ena vukea me “vakabulai Saioni tale” ka vueti Isireli cake?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Sere sa vakaturi: “Mo Yalo Malumalumu,” Sere ni Lotu, naba 72.

Vakatorocaketaki Noda Veivakavulici

Bulataka na nomu ivakadinadina. “‘O vakatavulica na ka sa vakai iko,’ a vakavulica o Elder Neal A. Maxwell. ‘Ena nanumi vakalevu cake na nomu ivalavala … mai na dua na dina vakatabakidua ena dua na lesoni vakatabakidua’” (Veivakavulici ena iVakarau ni iVakabula, 13).

Sa vola o Thomas B. Marsh na vakatakila sa soli vua mai vei Josefa Simici. Mo Dou Yalo Malumalumu, mai vei Julie Rogers.