Mua-i-Ra, mai vei Al Rounds

11–17 ni Okotova

Vunau kei na Veiyalayalati 115–120

“Ni Na Ka Tabu Cake Vei Au na Nona Solibula Mai na Veika e Rawata ”

Sa vinakata na Kalou me vosa vei iko. Ni ko vulica na ivolanikalou, masu ka kerei Koya me vukei iko ni raica na Nona itukutuku baleti iko.

Vola na Veika o Uqeti Kina

Sa dodonu me da nuidei tu ena nodra vanua vou ni vakasoqoni vata na Yalododonu, e Far West, Missouri, ena Julai, 1838. A tubu vakatotolo sara na siti, sa vaka me sautu mai na vanua, ka sa vakatakilai mai ni vakalekaleka yani ki na vualiku sa toka kina o Atama-onitai-Amani, e dua na vanua ni veika vakayalo cecere (raica na Vunau kei na Veiyalayalati 107: 53–56; 116). Ia, se vaka me dredre tikoga vei ira na Yalododonu mera kua ni vakasamataka na ka era sa vakayalia. Era a vakatalai tani mai Independence, na vanua digitaki me itikotiko liu kei Saioni, ia na madigi ni lesu tale mai walega qo sa vaka me sega ni yaco. Me kena ikuri, era sa qai dro mai Kirtland, Ohio na Yalododonu, ka ra biuta tu yani na nodra valetabu lomani ni oti toka ga e rua na yabaki. Ia ena gauna oqo e sega walega ni o ira na meca ena taudaku ni Lotu e vakavu ca tiko—e vuqa na lewenilotu kilai levu sa saqati Josefa Simici, oka kina na Tolu na Vakadinadina ni iVola i Momani kei na va na lewe Tinikarua. Eso ena rairai vakananuma, E se tubu kaukauwa vakaidina tiko li na matanitu ni Kalou, se sa malumalumu tiko mai?

Ia a sega ni vakatara na yalodina me tarovi ira na mataqali taro vaka o ya. Ia, era sa tekivu tara e dua na vanua tabu vou, ena gauna oqo e Far West. Era sa tuvanaka me dua na valetabu vou. E sa kacivi e va na iApositolo vou, oka kina e rua—o John Taylor kei Wilford Woodruff—ka rau a qai Peresitedi ni Lotu e muri (raica na Vunau kei na Veiyalayalati 118:6). Era sa vulica na Yalododonu na vakayacori ni cakacaka ni Kalou e sega ni kena ibalebale o sega ni lutu; e kena ibalebale mo “tucake tale.” E dina ga o na solia yani eso na ka, na solibula vakaoqori sa na ka tabu tu vua na Kalou, ka sa “ka tabu cake … mai na ka [o sa] rawata” (Vunau kei na Veiyalayalati 117:13).

Raica na Saints, 1:296–99; “Far West and Adam-ondi-Ahman,” Revelations in Context, 235–41.

Vakasama ni Vuli iVolanikalou ni Tamata Yadua

Vunau kei na Veiyalayalati 115:4–6

Na yaca ni Lotu a lesi mai vua na Turaga.

E kaya o Peresitedi Russell M. Nelson ni yaca ni Lotu sa “dua na ka bibi sara” (“Na Yaca Dodonu ni Lotu,” Ensign se Liaona, Nove. 2018, 87). Vakasamataka na vuna e dina kina oqo ena nomu wilika na Vunau kei na Veiyalayalati 115:4–6. Na cava sa vakavuna na yaca ni Lotu me baleta na kena cakacaka kei na ilesilesi?

Raica talega na 3 Nifai 27:1–11.

Vunau kei na Veiyalayalati 115:5–6

Sa vakarautaka o Saioni kei na kedra iteki na “ivakaruru mai na cava.”

Se cava ga na dredre era sotava tu na Yalododonu ena 1838, sa nuitaki ira tikoga vakalevu na Turaga. Vakaraica na vosa eso ena Vunau kei na Veiyalayalati 115:5–6 e vakabibitaka na itavi sa vinakata na Turaga me vakataucokotaka na Nona Lotu kei ira na lewena ena vuravura oqo. Me ivakaraitaki, na cava o nanuma sa dodonu mo cakava mo “tucake ka cila yani”? (tikina e 5). Na cagilaba vakayalo cava soti o siqema wavoliti iko tu, ka rawa vakacava ni da raica na “ivakaruru” ena vakasoqoni vata? (tikina e 6).

Raica talega na 3 Nifai 18:24.

Vunau kei na Veiyalayalati 117

Sa ka tabu vua na Turaga na noqu solibula.

Na biubiu mai Kirtland e rairai ka dredre sara ki na tamata vakataki Newel K. Whitney, ka sa tauyavutaka tu e dua na bula vuavuai vinaka ki na nona matavuvale ekea. Na cava o sa raica ena Vunau kei na Veiyalayalati 117:1–11 e rawa ni na vukei ira ni vakayacora na solibula oqo? E veisautaka vakacava na nomu rai na veitikina oqo ena ka sa bibi vakaidina?

Na solibula a kerei vei Oliver Granger a duidui toka: a lesi koya na Turaga me tiko e Kirtland ka vakameautaka na ka vakailavo ni Lotu. E sa itavi bibi saraga, ia ni matataka vakadodonu tu na Lotu, a sega ni rawata lesu vakaoti o koya e levu na ilavo. Navuca na sala e rawa ni tutaki kina na vosa ni Turaga eso ena tikina e 12–15 ki na veika sa kerea vei iko o Koya.

Raica talega na Maciu 6:25–33; Boyd K. Packer, “Sa Lailai Vei Ira Oqo,” Ensign se Liaona, Nove. 2004, 86–88; “Far West and Adam-ondi-Ahman,” Revelations in Context, 239–40.

A vakaroti o Newel K. Whitney me toki ki Atama-onitai-Amani, taba toka oqo.

Vunau kei na Veiyalayalati 119–20

Ena saumi ikatini, au sa vukea ni tara ka “vakatabuya na vanua o Saioni.”

Na ivakasala eso ena wase 119 kei na 120 e rogorogo vata kei na sala e vakailavotaki kina na cakacaka ni Turaga ena noda gauna. Nikua, era sa solia na Yalododonu “na ikatini ni ka era rawata ena veiyabaki” [sa kilai tu nikua me isau] (Vunau kei na Veiyalayalati 119: 4), ka sa dau qarava na ilavo oqo e dua na matabose e lewena tiko na Mataveiliutaki Taumada, Kuoramu ni Le Tinikarua, kei na Matabisopi Vakatulewa. Navuca na taro eso oqo ni ko vulica na veiwase oqo:

• E rawa vakacava ki na vakamuri ni lawa ni ikatini me “vakatabuya na vanua o Saioni”? E rawa vakacava ki na lawa oqo me vukea na caka ni vanua o vakaitikotiko kina me “dua na vanua o Saioni kivei iko”? (Vunau kei na Veiyalayalati 119:6).

• Na cava e bibi kina vei iko na malanivosa “na domoqu koi au vei ira” ena Vunau kei na Veiyalayalati 120?

Raica talega na Malakai 3:8–12; David A. Bednar, “Na Katuba ni Lomalagi,” Ensign se Liaona, Nove. 2013, 17–20; “The Tithing of My People,” Revelations in Context, 250–55.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 115:4–6.Ena cakacaka beka ki na nomu vuvale na wiliki ni veitikina oqo ni dou sarava tiko na cabe ni matanisiga? Ena rawa ni vukei iko ni veivosakitaka na ibalebale ni “tucake ka cila yani” (tikina e 5). Se rawa ni o veivosakitaka talega e vakacava tu na qarai ni idrodro ena gauna ni cagilaba. E rawa vakacava na gauna oya me vaka na raici ni “ivakaruru” ena Lotu? (tikina e 6). Sa rawa ni o qai veivosakitaka na sala eso e rawa ni vukei ira kina na tani na nomu vuvale mera marautaka na ivakaruru e vakarautaka tu na Lotu.

Vunau kei na Veiyalayalati 117:1–11.Sa rawa ni vakatauvatana na nomu vuvale e dua na “tikina somidi” ki na ka e “bibi cake” sara (tikina e 8), me vaka e dua na joke wai. Oqo e rawa ni mua ki na veivosakitaki ni ka eso e sega soti ni bibi ki na noda bula e rawa ni tarovi keda ena ciqomi ni veivakalougatataki vakaiyauyau ni Kalou.

Vunau kei na Veiyalayalati 119.Sa rawa ni o lagata e dua na sere me vaka na “I Want to Give the Lord My Tenth” (Children’s Songbook, 150). Na cava e vakavulica na sere kei na wase 119 me baleta na vuna eda saumi ikatini kina? Sa rawa ni yaga talega vei ira na gonelalai na lesoni ivakaraitaki: sa rawa ni o solia vei ira na yaya lalai eso, vukei ira ni cakacakataka e dua na ikatini, ka tukuna vei ira na vuna o saumi ikatini kina. (Raica talega na Tudei ena Vakabauta, 180–82.)

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Na sere e vakaturi: “I Want to Give the Lord My Tenth,” Children’s Songbook, 150.

Vakatorocaketaki ni Noda Veivakavulici

Vakauqeta na bula rawati koya. “Ni ra vakatataro [na vuvale], so na gauna e vinaka cake me ra vakavulici ena sala me ra raica kina na isaunitaro vakai ira, mai na kena saumi vakatotolo na taro” (Veivakavulici ena iVakarau ni iVakabula,28).

Na soli ni noda 10 na pasede kivua na Turaga me ikatini esa vukea na toso ni Nona cakacaka ni veivakabulai.