Wase 117
Na ivakatakila sa soli yani mai vei Josefa Simici na Parofita e Fa Wesi, Misuri, ena 8 ni Julai 1838, me baleta na nodratou itavi taumada ko Viliame Makisi, Niueli K. Witini, kei Oliva Qareija.
1–9, Me ra kakua ni kocova na iyau vakavuravura ko ira na italai ni Turaga, baleta “na cava na yaga ni iyau vua na Turaga?”; 10–16, Me ra biuta tani na veibeci ni yalo, ia na nodra isoro ena qai tabu sara vua na Turaga.
1 Sa kaya vakaidina vakaoqo na Turaga vei rau ko Viliame Makisi na noqu tamata, kei Niueli K. Witini talega na noqu tamata, me rau volitaka se solia kusarawa yani na nodrau ivoli ka cavutu sara mai na vanua ko Katiladi, ni se bera niu vakatauca tale na ucacevata ki vuravura, koi Au, na Turaga.
2 Me rau yadra mai, ka duri cake, ka biuta sara ga oqo, ka kakua tale ni wawa, niu sa vakarota, koi Au, na Turaga.
3 Ia, kevaka e rau na wawa ena sega ni vinaka vei rau.
4 Me rau veivutunitaka sara na nodrau ivalavala ca kecega, kei na nodrau gagadre kocokoco kece sara, e mataqu, sa kaya na Turaga; ia na cava na yaga ni iyau vei au? sa kaya na Turaga.
5 Me volitaki na iyau kece mai Katiladi me saumi kina na dinau, sa kaya na Turaga. Laiva me lako, sa kaya na Turaga, ia na ka kece sa vo tu, me vo tikoga e ligamudrau, sa kaya na Turaga.
6 Raica au sa sega li ni lewa na manumanu vuka e macawa, kei na ika ni wasawasa, kei na manumanu kecega ni veiulunivanua? Au a sega li ni buli vuravura? Au sa sega li ni lewa na veimataivalu ena veimatanitu kecega e vuravura.
7 Raica sa dredre li vei au me’u vukica na vanua lala me tubu ka se ka vua vakalevu sara? sa kaya na Turaga.
8 Sa sega beka ni levu tu na vanua lala ena veiulunivanua e Atama-onitai-Amani, kei na bucabuca ko Ola Sainea, se na vanua a tiko kina ko Atama, mo kocova kina na tikina somidi oqori, ka vakawalena na veika e bibi cake?
9 O koya, mo drau lako cake kina ki na nodra vanua na noqu tamata, io ko Saioni.
10 Ia me yalodina mada ko Viliame Makisi ena ka e vica ga, au na qai lesi koya me lewa na ka e vuqa. Me vakatulewa vei ira na noqu tamata ena koro levu mai Fa Wesi, ka me vakalougatataki kina ena nodra veivakalougatataki na noqu tamata.
11 Me maduataka ko Niueli K. Witini na noqu tamata, na nodra ivalavala na itokani i Nikolaitani kei na nodra cakacaka butobuto kecega, kei na veibeci ni yalona taucoko vei au, sa kaya na Turaga, ka me lako cake ki na vanua ko Atama-onitai-Amani, me la’ki nodra bisopi na noqu tamata, sa kaya na Turaga, me kakua ni yacana walega ia ena kena ivalavala kece sara, sa kaya na Turaga.
12 Kei na dua tale, au sa kaya vei kemudou, au sa nanumi Oliva Qareija na noqu tamata; raica, au sa kaya vakaidina vua, ena dau nanumi ka vakatabui tu na yacana, mai na itabatamata ki na itabatamata me sega ni mudu ka sega ni mudu, sa kaya na Turaga.
13 O koya, sa kilikili kina me cakacaka sara vagumatua ena nodratou vueti na Mataveiliutaki Taumada ni noqu Lotu, sa kaya na Turaga; ia kevaka sa guce ena qai gumatua tale, ni na ka tabu cake vei au na nona solibula mai na veika e rawata.
14 O koya, me lako kusarawa mai kina ki ke, ki na vanua ko Saioni; ia ena kena gauna raica ena yaco me noqu dauveivoli ena yacaqu ena vukudra na noqu tamata, sa kaya na Turaga.
15 O koya me kakua kina ni dua na tamata e beci Oliva Qareija na noqu tamata, io me na tikoga vua na nodra veivakalougatataki na noqu tamata me sega ni mudu ka sega ni mudu, sa kaya na Turaga.
16 Kei na dua tale, au sa kaya vakaidina vei kemudou, me ra nanuma tiko ko ira kece na noqu tamata ena vanua ko Katiladi na Turaga na nodra Kalou, kei na noqu vale talega, me ra karona ka vakatabuya tiko ga, me ra vakasavi ira tani na dauveisau ilavo me vaka na noqu lewa ena gauna sa donu vei au, sa kaya na Turaga. Io ena vakakina. Emeni.