1 Au sa kaya vakaidina vei kemudou na wekaqu, au sa solia vei kemudou e dua na ivakasala, kei na dua na ivakaro, me baleta na iyau taucoko e taukena na isoqosoqo ka’u a vakarota me tauyavu ka vakadeitaki, me dua na isoqosoqo cokovata, ka me isoqosoqo tawavakaiyalayala me yaga ki na noqu lotu, kei na nodra vakabulai na tamata me yacova na noqu lesu mai—

2 Kei na kena yalayala sega ni veivukiyaki, ni kevaka era yalodina tikoga ko ira au sa vakarota, sa dodonu me ra na vakalougatataki ena veivakalougatataki e vakaikuritaki;

3 Ia kevaka era sa sega ni yalodina tiko ga era sa voleka sara yani ki na cudruvi.

4 Ia, kevaka era na sega ni muria eso na noqu tamata na ivakaro, ka ra voroka na veiyalayalati ena nodra kocokoco, kei na vosa veicavilaki, au sa cudruvi ira ena dua na cudru mosi ka veivakararawataki.

5 Niu sa lewa oti e lomaqu koi Au na Turaga, ni kevaka e dua na tamata lewe ni noqu isoqosoqo e kunei ni dau talaidredre, se ena dua tale na kena itukutukuni, e voroka na veiyalayalati dou sa vauci kina, ena cudruvi ena nona bula, ka na buturaki sobu mai vei koya au sa lewa;

6 Koi Au na Turaga, me’u kakua ni vakalialiai ena veika oqo—

7 Ia na veika kece oqo me ra kakua kina ni cudruvi vata kei ira na sega ni bula dodonu ko ira ena kemudou maliwa sa sega na nodra cala; ka me ra kakua kina ni dro bula ko ira ena kemudou maliwa sa kunei ni ra sa cala; baleta koi Au na Turaga au sa yalataka oti vei kemudou na isala ni lagilagi ena ligaqu imatau.

8 Ia, kevaka sa kunei ni dou sa dau talaidredre, dou na sega ni drotaka rawa na noqu cudru ena nomudou bula.

9 Kevaka dou sa muduki tani ni dou sa talaidredre, dou na sega ni drotaka rawa na veivakararawataki nei Setani me yacova na siga ni veivueti.

10 Ka’u sa solia kina vei kemudou na kaukauwa ena gauna sara ga oqo, kevaka e dua na tamata vei kemudou, ena isoqosoqo, e kunei ni dau talaidredre ka qai sega ni veivutunitaka na ca, mo dou soli koya yani ki na veivakararawataki nei Setani; ka na sega ni rawa vua me kauta mai vei kemudou na ca oqori.

11 O koya sa noqu lewa yalomatua, e dua na ivakaro au sa solia vei kemudou, mo dou vakarautaki kemudou, ka lesia na tamata yadua ki na itavi me qarava;

12 Me na qai solia kina vei au na tamata yadua, e dua na itukutuku ni veiqaravi sa lesi vua.

13 Ni sa kilikili sara vei Au, na Turaga, me ra saumi taro vei au na tamata yadua, me vaka na ivakarau ni nodra qarava na veivakalougatataki vakavuravura, au a cakava ka vakarautaka me baleti ira na noqu veika bula kecega.

14 Koi Au na Turaga, au sa tevuka yani na lomalagi, ka bulia na vuravura, ena cakacaka ni ligaqu; kei na veika kecega sa tu kina e noqu.

15 Ka sa noqu inaki me’u vakarautaka me yaga vei ira na noqu yalododonu, ni sa noqu na ka kecega.

16 Ia sa dodonu me caka ena noqu sala ga; ka raica sai koya oqo na sala au sa lewa koi Au na Turaga me’u vakarautaka kina vei ira na noqu yalododonu na veika eso, me ra vakalevulevui na dravudravua, ka ra vakalolovirataki ko ira na vutuniyau.

17 Ni sa sinai tu ko vuravura, ka sa veirauti na veika e tu ka na vo tale; io, au sa vakarautaka na ka kecega, ka solia vei ira na luve ni tamata na galala me ra dui vakatulewa ga vakataki ira.

18 Ia, kevaka e dua sa rawata vakalevu mai na veika au sa vakarautaka tu, ka sega ni wasea na nona ivotavota vei ira na dravudravua kei na vakaloloma me vaka na lawa ni noqu kosipeli, ena tacake ko koya, vata kei ira na dau caka ca mai eli, ni ra sa vakararawataki tiko.

19 Ia oqo, au sa kaya vakaidina vei kemudou, me baleta na iyau ni isoqosoqo—

20 Me lesi vei Sidini Rikitoni na noqu tamata na vanua sa tawana tiko oqo, kei na vanua ni caka kuli ni manumanu me qarava, me rawata tiko kina na nona bula ni sa cakacaka tiko ena noqu were ni vaini, me vaka na noqu lewa, ena gauna au na qai vakaroti koya kina.

21 Ia me vakayacori na ka kecega me vaka na lewa ni isoqosoqo, kei na ka era sa vakadonuya ka sa domo ni isoqosoqo, ka ra tiko ena vanua ko Katiladi.

22 Ia na itavi ni veiqaravi kei na veivakalougatataki oqo, au sa solia koi Au na Turaga vua na noqu tamata ko Sidini Rikitoni me vakalougatataki kina, vata kei ira na nona kawa era qai muri mai;

23 Ia au na vakaikuritaka vua na veivakalougatataki, kevaka sa vakamalumalumutaki koya vei au.

24 Kei na dua tale, me lesi vua na noqu tamata ko Matini Erisi, me qarava, na tikiniqele ka rawata mai na noqu tamata ko Joni Jonesoni ni a veisau vata kei na nona ivotavota vakawa e liu, me baleti koya kei ira na nona kawa era na qai muri mai;

25 Ia kevaka sa yalodina tiko ga, au na vakaikuritaka na veivakalougatataki ki vua kei ira na nona kawa era qai muri mai.

26 Me vagoleya ko Matini Erisi na noqu tamata na nona ilavo me baleta na vunautaki ni noqu vosa, me vaka ena dusimaki koya kina ko Josefa Simici Lailai na noqu tamata.

27 Kei na dua tale, me soli vei Veretariki G. Viliame na noqu tamata na vanua e tiko kina oqo me nona.

28 Ia me soli me taukena ko Oliva Kaudari na noqu tamata na qele ka toka tikiva na vale ni tabaivola, sai koya na iwasewase naba dua, na qele tale ga ka taukena tiko oqo ko tamana.

29 Me soli talega vei rau ko Veretariki G. Viliame kei Oliva Kaudari na noqu tamata, me rau qarava na vale ni tabaivola kei na kena iyaya kece.

30 Ia oqo na itavi sa lesi vei rau me rau qarava.

31 Ia kevaka erau sa yalodina tiko, raica au na veivakalougatataki, ka vakaikuritaka na veivakalougatataki vei rau.

32 Raica oqo sa itekivu ni itavi au sa lesia vei rau me rau qarava, vei rau kei ira tale ga na nodrau kawa mai muri.

33 Ia kevaka erau sa yalodina tiko, au na vakalougatataka na veivakalougatataki vei rau kei ira na nodrau kawa mai muri, io na veivakalougatataki e vakaikuritaki.

34 Kei na dua tale, me taura ko Joni Jonesoni na noqu tamata na vale e tawana tiko ena gauna oqo, kei na ivotavota vakawa taucoko me vakavo ga na qele sa vakatikitikitaki tiko me baleta na kena tara na noqu veivale, me vaka sa lewai ena taukeni ni vanua ko ya, kei na vanua tale ga sa vakayacani tu me nei Oliva Kaudari.

35 Ia kevaka sa yalodina tiko ga, au na vakaikuritaka na veivakalougatataki ki vua.

36 Ka sa noqu lewa me volitaka ko koya na veitiki ni qele a nanumi tu me tara kina na nodra koro na noqu yalododonu, kevaka sa vakavotuya vua na Yalo, me vaka na ivakasala ni isoqosoqo, kei na domo ni isoqosoqo.

37 Ka sai koya oqo na itekivu ni itavi ni veiqaravi au sa lesia vua, me vakalougatataki kina ko koya kei ira na nona kawa mai muri.

38 Ia kevaka sa yalodina tiko ga, au na vakaikuritaka na nona kalougata ena veivakalougatataki e vakaikuritaki.

39 Kei na dua tale, me na lesi me nei Niueli K. Witini na noqu tamata na veivale kei na tikiniqele sa tawana tiko ena gauna oqo, kei na tikiniqele kei na vale sa tiko kina na sitoa, ka vakatalega kina na qele ena ilesu ni sala ena ceva ni sitoa, ka vakatalega kina na qele ka tiko kina na vale ni caka potasi.

40 Ia na veika kece oqori au sa lesia vei Niueli K. Witini na noqu tamata me qarava, me vakalougatataki kina o koya kei ira na nona kawa mai muri, me yaga ki na cakacaka ni veivoli ni noqu isoqosoqo ka’u sa tauyavutaka ena noqu iteki, ena vanua ko Katiladi.

41 Io, sai koya dina oqo na itavi au sa lesia me qarava ko N. K. Witini na noqu tamata, na itikotiko kece sara ni veivoli oqo, ko koya kei ira na nona itini, kei ira na nona kawa mai muri.

42 Ia kevaka sa yalodina tiko ga ni muria na noqu ivakaro ka’u sa solia vua, au na vakaikuritaka na nona veivakalougatataki kei ira na nona kawa mai muri, io na veivakalougatataki e vakaikuritaki vakalevu sara.

43 Kei na dua tale, me lesi vei Josefa Simici Lailai na noqu tamata, na tikiniqele sa vakatikitikitaki tu me tara kina na noqu vale, ka ruanadrau na mita na kena balavu ka onosagavulu na mita na kena raba, ka vakatalega kina na ivotavota vakawa sa tawana tiko ena gauna oqo na tamana;

44 Ka sai koya oqo na itekivu ni itavi ni veiqaravi au sa lesia vua, me vakalougatataki kina ko koya kei tamana talega.

45 Ia raica, au sa maroroya tiko e dua na ivotavota vakawa me baleti tamana, me bula kina; o koya me na okati kina me lewe ni vale nei Josefa Simici Lailai na noqu tamata.

46 Ia au na vakaikuritaka na veivakalougatataki ena vale nei Josefa Simici Lailai na noqu tamata, kevaka sa yalodina tiko ga, io na veivakalougatataki sa vakaikuritaki vakalevu sara.

47 Ia oqo, e dua na ivakaro au sa solia vei kemudou me baleti Saioni, dou sa na sega ni okati vata tiko ga me dua na isoqosoqo cokovata kei ira na wekamudou e Saioni, ia ena sala ga oqo—

48 Ni dou sa tauyavutaki oti, dou sa na vakatokai me iSoqosoqo Cokovata ni Iteki kei Saioni, ena Koro ko Katiladi. Ia ko ira na wekamudou, ni ra sa tauyavutaki oti, era na vakatokai me i Soqosoqo Cokovata ni Koro ko Saioni.

49 Raica era na tauyavutaki ena dui yacadra yadua, kei na yaca ni nodra isoqosoqo; ia era na cakava na nodra bisinisi ena yaca ni nodra isoqosoqo, kei na dui yacadra yadua.

50 Io dou na dui cakava ga na nomudou bisinisi ena yaca ni nomudou isoqosoqo, kei na dui yacamudou yadua.

51 Kau sa vakarota me vakayacori vakaoqo mo dou vakabulai kina, ka ra vakabulai tale ga kina ko ira, me isau ni nodra vakasavi tani kei na veika ena vakarau yaco mai.

52 Na veiyalayalati sa voroki ena vuku ni talaidredre, ena kocokoco kei na vosa veicavilaki—

53 A ka oqo dou sa tawasei tani kina mai na nodra isoqosoqo cokovata na wekamudou, ia me tekivu oqo dou sa sega tale ni okati vata kei ira, ia ena sala duadua ga oqo, ena dinau me vaka sa vakadonui ena bose ni isoqosoqo, me vaka na ivakarau ni nomu rawa ka, ia me vakatau ena domo ni lewa ni matabose.

54 Kei na dua tale, e dua na ivakaro au sa solia vei kemudou me baleta na nomudou itavi ni veiqaravi kau sa lesi kemudou kina.

55 Raica, na iyau kece oqo e noqu, kevaka e sega sa ka wale na nomudou vakabauta, ka dou na kunei ni dou sa dauveivakaisini, ka sa voroki kina na veiyalayalati dou sa cakava vei au;

56 Ia kevaka sa noqu na iyau, dou sa qai dauveiqaravi koi kemudou; kevaka e sega dou sa sega ni dauveiqaravi koi kemudou.

57 Ia, au sa kaya vakaidina vei kemudou, au sa lesi kemudou mo dou qarava na noqu vale; io mo dou dauveiqaravi dina sara.

58 Ia ena inaki oqo au sa vakaroti kemudou kina mo dou cokonaki kemudou vinaka, mo dou tabaka na noqu vosa, na taucoko ni noqu ivolanikalou, na ivakatakila au sa solia oti vei kemudou, kei na kena au na qai solia yani vei kemudou ena veigauna eso, me tekivu oqo ka lako yani—

59 Me baleta na kena tara cake na noqu lotu kei na noqu matanitu e vuravura, ka me vakarautaki ira na noqu tamata ki na gauna au na mai tiko kina vata kei ira, ni sa voleka sara mai.

60 Dou vakarautaka tale ga me baleti kemudou e dua na vanua me noqu lololo, ia mo dou vakatabuya sara ena yacaqu.

61 Raica mo dou digitaka e dua vei kemudou me dauniyau, io me qai tabaki ki na veivakalougatataki oqo.

62 Raica me na tiko e dua na ivakatakilakila ena lololo, io na veika tabu kece me kau yani ki na lololo; ka me kakua ni dua na tamata vei kemudou me kaya ni nona, se me dua mada ga na tikina, ni sa nomudou kece vakatautauvata.

63 Kau sa solia vei kemudou ena gauna sara ga oqo; mo dou raica, mo dou lako sara ga oqo ka vakayacora na itavi ni veiqaravi au sa lesi kemudou kina, ka vakavo ga na veika tabu, me baleta na kena tabaki na veika tabu oqo me vaka au sa tukuna vei kemudou.

64 Ia na veika kece e rawa mai na veika tabu oqori me na tu ga ena lololo, ka me dregati; me na kakua ni vakayagataki se kau tani mai na lololo mai vua e dua, me kakua talega ni kau tani na ivakatakilakila ena biu kina, ia ena domo ni lewa ga ni isoqosoqo, se ena ivakaro.

65 Ia ena vakaoqori na nomudou na maroroya na veika e rawa mai na veika tabu ena lololo, me baleta na veika tabu kei na inaki savasava.

66 Ia ena vakatokai me lololo tabu ni nona iyau na Turaga; raica ena dregati ka vakatabui me nona na Turaga.

67 Kei na dua tale, me na vakarautaki tale e dua na lololo, ka lesi e dua na dauniyau me maroroya na lololo, ka me dregati;

68 Ia na ilavo kecega dou sa rawata ena ilesilesi dou qarava, ena nomudou cakacakataka na iyau au sa lesia vei kemudou, na vale, na qele, na manumanu, se na veika kecega ka vakavo ga na ivola tabu ka savasava, kau sa maroroya tu vei au me baleta na veinaki tabu ka savasava, me biu ki na lololo ena kena gauna totolo ga dou ciqoma kina na ilavo, ena veiyadrau, se yalimasagavulu, se yaruasagavulu, se yatini, se yalima.

69 Se ena dua tale na kena itukutukuni, kevaka e dua vei kemudou sa rawata e lima na dola me solia me maroroi ena lololo; se kevaka e rawata e tini, se ruasagavulu, se limasagavulu, se dua na drau, me vakayacora talega vakakina;

70 Ia me kakua ni dua vei kemudou e okata me nona vakaikoya ga; raica ena sega ni vakatokai me nona, e sega mada ga ni dua na tikina.

71 Ia ena sega ni vakayagataki e dua na tikina, se me kau tani mai na lololo, ia ena domo kei na lewa duadua ga era sa duavata kina ena isoqosoqo.

72 Ia ena vakaoqo na domodra kei na veika me ra vakadonuya na lewe ni isoqosoqo—me dua vei kemudou e lako vua na dauniyau ka kaya: Yalovinaka mo vukei au vakailavo me’u qarava rawa na noqu ilesilesi—

73 Kevaka e lima na dola, se tini na dola, se ruasagavulu, se limasagavulu, se duanadrau, me na solia vua ko dauniyau na kena levu e gadreva me vukei koya ena nona veiqaravi—

74 Me yacova na gauna sa kunei kina ni sa dau talaidredre, ka sa vakaraitaki yani vakamatata ki na matabose ni isoqosoqo ni sa sega ni yalodina ka sega ni dauveiqaravi vakayalomatua.

75 Ia ena gauna kece e cakacaka tu kina ka kilai ni sa yalodina ka qarava vakavinaka tiko na nona ilesilesi, oqori sa kena ivakatakilakila vua na dauniyau me kakua kina ni bureitaka vua.

76 Ia ni sa talaidredre, me na vakarorogo ko dauniyau ki na domo ni lewa ni matabose ni isoqosoqo.

77 Ia kevaka e kunei ni sa sega ni yalodina ka sega ni dauveiqaravi yalomatua na dauniyau, sa na vakarorogo ki na domo ni lewa ni matabose ni isoqosoqo, io me na vakasivoi mai na nona itutu, ka lesi e dua me kena isosomi.

78 Kei na dua tale, au sa kaya vakaidina vei kemudou, ena vuku ni nomudou dinau—raica au sa lewa mo dou sauma kece na nomudou dinau.

79 Ka sa noqu lewa mo dou vakayalomalumalumutaki kemudou vei au, ka rawata na veivakalougatataki oqo ena nomudou gugumatua kei na yalomalumalumu kei na masu ni vakabauta.

80 Ia kevaka dou sa gugumatua ka yalomalumalumu, ka daumasu ena vakabauta, raica, au na vakamalumalumutaka na yalodra o ira dou sa dinau tu vei ira, me yacova na gauna au sa vakavotuya kina e dua na sala mo dou vagalalataki kina.

81 Mo dou volavola kusarawa ki Niu Ioka ka vola me vaka sa vakauqeti kemudou kina na Yaloqu; au na vakavinakataka na yalodra ko ira dou sa dinau tu kina, me tababokoci kina mai na nodra vakasama na vakanananu ni veivakararawataki vei kemudou.

82 Ia kevaka dou sa yalomalumalumu ka yalodina tiko ga ka daumasuta na yacaqu, raica, au na solia me nomudou na qaqa.

83 Au sa yalataka vei kemudou, dou na vagalalataki ena gauna oqo mai na dinau dou sa vesuki tu kina.

84 Ia kevaka sa rawa mo dou kere dinau ena yadrau se yaudolu, se mo dou kerea na veika me rauta mo dou vagalalataki kina mai na kemudou ivesu, oqori me qai vakatau vei kemudou.

85 Ka mo dou solia me kena ivakadei na qele au sa solia ki ligamudou, ena gauna oqo, mo dou tabaka kina na yacamudou ni dou sa vakadonuya kece se kevaka e sega, na ka ga sa dodonu vei kemudou.

86 Au sa solia vei kemudou na galala oqo, ena gauna ga oqo; ia raica, kevaka dou vakayacora na veika au sa biuta e matamudou, me vaka na noqu ivakaro, na veika kece oqo e noqu, koi kemudou na noqu dauveiqaravi, ia ena sega ni laiva na turaga me vakacacani na nona vale. Io ena yaco vakakina. Emeni.