C. C. A. Christensen (1831–1912), Na Keba kei Saioni, c. 1878, tempera ena muslin, 78 × 114 na idi. Brigham Young University Museum of Art, isolisoli ni makubui C. C. A. Christensen, 1970

13–19 ni Sepiteba

Vunau kei na Veiyalayalati 102–105

“Sa Oti Na Veivakararawataki … Qai Yaco na Veivakalougatataki”

Na nomu vulica na Vunau kei na Veiyalayalati 102–5 e dua na tiki bibi ni nomu vakavakarau mo vakavulica. Vakarorogo ki na veivakauqeti vakayalo me baleta na ivakarau me ra vukei na gone me ra kila vakavinaka cake na ivolanikalou.

Vola na Veika o Vakauqeti Kina

Sureta na Veiwasei

Vukei ira na gone me digia e dua na sere me ra lagata ka vakananuma kina vei ira e dua na ka era sa vulica tiko e vale se e valenilotu.

Vakavulica na iVunau: Gone Sobu

Vunau kei na Veiyalayalati 103:9

Au sa rawa ni “dua na rarama kei vuravura.”

E rawa vakacava ni o vakayaloqaqataki ira na gone o vakavulica me ra wasea na rarama ni kosipeli vata kei ira era tiko voliti ira?

iTaviqaravi e Rawa ni Caka

• Wilika na Vunau kei na Veiyalayalati 103:9 vei ira na gone, ka sureti ira me ra taura tu na iyaloyalo ni dua na matanicina, na kadrala, se so tale na ivurevure ni rarama. Kerei ira me ra vakaraitaka na nodra iyaloyalo ki na dua tale na lewe ni kalasi. Tukuna vei ira na gone na sala era sa vaka na rarama vei ira na tani ni ra muri Jisu Karisito.

• Lagata vata e dua na sere kei ira na gone me baleta na ivakaraitaki, me vaka na “Meu Rarama i Jisu” se “Kalokalo Serau” (iVolanisere ni Lalai, 38, 84). Vukei ira mera vakasamataka na ivalavala me salavata kei na vosa. Eda rawa vakacava me dua na rarama, se ivakaraitaki vinaka, vei ira na tamata tu wavoliti keda?

  

  Au rawa ni dua na rarama ki na vuravura oqo.

Vunau kei na Veiyalayalati 104:42

Ena vakalougatataki au na Turaga ni’u talairawarawa ki na Nona ivunau.

So na gauna ena wase 104, e yalataka na Turaga “na veivakalougatataki e vakaikuritaki” kivei ira era talairawarawa ena yalodina ki na Nona ivakaro. O na vukei ira vakacava na gone me ra vakila ni vinakata o Koya me vakalougatataki keda vakalevu?

iTaviqaravi e Rawa ni Caka

• Sureti ira na gone me ra matanataka me vaka, na nona yavalata na iqaqalo ni ligadra ena gauna era rogoca kina na vosa “veivakalougatataki” ni ko wilika na Vunau kei na Veiyalayalati 104:42. Tukuna vei ira na gone ni Tamada Vakalomalagi e sa vakalougatataki iko vakacava ni ko muria na nona ivakaro. Kerei ira na gone mera wasea na sala era sa vakalougatataki kina. Sureti ira yadua na gone me ra wasea e dua na ivakaro era na talairawarawa kina.

• Me vukei ira na gone mera kila vakavinaka na cava na ibalebale ni “vakaikuritaki,” droinitaka e dua na iwirini ena vava ni volavola, se e dua na tiki ni pepa. Kerei ira na gone me ra vukea mo vakatubura na iwiliwili ni wirini—droinitaka e rua, e qai lewe va, qai walu, qai lewe tinikaono, kei na so tale—me yacova ni sa sinai tu ena iwirini na papa taucoko se na pepa. Ena veigauna kece mo vakuria, vukei ira na gone me ra vakasamataka e dua na veivakalougatataki e solia vei ira na Tamada Vakalomalagi. Vakamacalataka ni kena ibalebale na “veivakalougatataki e vakaikuritaki” ena vakasinaita na noda bula na Turaga ena veivakalougatataki kevaka eda talairawarawa ki na Nona ivakaro.

Vunau kei na Veiyalayalati 105:38–40

E rawa niu dautataro.

E tiko e vuqa na lesoni e rawa ni da vulica mai na veika sotavi ena keba kei Saioni. E dua e rawa ni vakabibitaki vei ira na gone o ya ni na veileti kei na veivala e kauta mai na veika dredre, ni na duavata kei na vakacegu e kauta mai na veivakalougatataki.

iTaviqaravi e Rawa ni Caka

• Ena nomu vosa ga, tukuna vei ira na gone na italanoa kei na keba kei Saioni (raica na ivakamacala taumada ki na ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale; Saints, 1:194–206; se “The Acceptable Offering of Zion’s Camp” [Revelations in Context, 213–18]). Cegu ena veigauna eso mo dusia na lesoni e rawa ni da vulica mai na keba mai Saioni—me kena ivakaraitaki, ni vinakata na Turaga me da sautu ka cakacaka vata me isosomi ni veiba kei na veivala.

• Wilika na Vunau kei na Veiyalayalati 105:38-40, ka kerei ira na gone mera tucake ena vei gauna era rogoca kina na vosa “sautu.” Vakamacalataka na ka e vinakata na Turaga vei ira na Yalododonu me ra veivakameautaki vata kei ira na tamata yaloca. Vukei ira na gone me ra vakasamataka na veika era rawa ni cakava me ra dautataro, ka sureti ira me ra matanataka eso na veika era sotava.

• Wasea e dua na italanoa me baleta e dua na gone e dau veivakameautaki ena nomu bula, se mai na Friend se Liaona. Lagata na sere me baleta na lomani ira tale eso, me vakataka na “Dauloloma ko Jisu” (iVolanisere ni Lalai, 39), se vakalewena na tabana ni itaviqaravi ena macawa oqo.

Vakavulica na iVunau: Gone Qase Cake

Vunau kei na Veiyalayalati 104:13–18

E vinakata na Turaga me’u wasea na veika sa tu vei au vata kei ira era gadreva tu na veivuke.

Vakasamataka na sala o na vukea kina na gone me ra kila na sala ni Turaga ena veivakarautaki ki vei ira na nona tamata ni ra gadreva tu na veivuke.

iTaviqaravi e Rawa ni Caka

• Solia vei ira na gone e vica na miniti me ra vola na veivakalougatataki sa solia tu vei ira na Kalou. Vakayaloqaqataki ira me ra vola na kena levu era rawata. e vuqa na veika era rawa ni cakava. Qai wilika vata na Vunau kei na Veiyalayalati 104:13–18, ka vakaraica na isau ni taro vakaoqo: O cei na itaukei dina ni veika kecega? Na cava na vuna e solia kina mai vei keda o Koya? Na cava e vinakata o Koya meda cakava ena veivakalougatataki oqo? Vukea na gone me ra vakasamataka na sala eso e rawa ni ra wasea kina na nodra veivakalougatataki kei ira na tani.

• Wasea na gauna e dua e solia kina vei iko e dua na ka ko sa gadreva, ka kerei ira na gone mera wasea vakakina. Se vakaraitaka e dua na vidio me baleta na qaravi ira na tani, me vaka na “The Coat” (ChurchofJesusChrist.org). Na cava eda vulica mai na veitikina oqo me baleta noda qaravi ira na tani? Sureti ira na gone mera kilai ira era vakaleqai ka kunea e dua me qarava ena macawa oqo, me vaka e dua e koronivuli se vakabibi e dua ena nodra matavuvale.

• Sureti ira na gone me ra vakasaqara na iVolanisere ni Lalai se na Sere ni Lotu me baleta na sere ni veiqaravi se vukei ira na tani (raica na Iulutaga). Lagata vata e dua se rua na sere, ka wasea na veika e vakavulica na sere oqori vei keda.

Vunau kei na Veiyalayalati 105:9–19

Au rawa ni muria na ivakaro ni Turaga ena gauna mada ga au sega ni kila kina na vuna.

Na veika era sotava na Keba kei Saioni sa rawa me dua na sala kaukauwa me vakaraitaka kina na veivakalougatataki e yaco mai ena noda sasaga me muria na lewa ni Turaga.

iTaviqaravi e Rawa ni Caka

• Vakaraitaka na iyaloyalo mai na ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka sureti ira na gone me ra wasea na ka era kila me baleta na Keba kei Saioni. Kevaka era gadreva na veivuke, vakayagataka ivakamacala taumada ni ituvatuva ena macawa oqo ena Lako Mai, Mo Muri Au—Baleta na Tamata Yadua kei na Matavuvale; Saints, 1:194–206; se “The Acceptable Offering of Zion’s Camp” (Revelations in Context, 213–18). Sureti ira na gone me ra raitayaloyalotaka ni ra sa lewe ni Keba kei Saioni, ka tukuna tiko vei ira na luvedra me baleta na veika era sotava. Na cava era na vinakata me ra vulica na luvedra mai na veika oqori?

• Wilika vata na Vunau kei na Veiyalayalati 105:13–14, ka vakamacalataka ni nodra yaco yani na Keba kei Saioni ki Misuri, sa kaya na Turaga vei ira me ra na kua ni tovolea me tauri lesu tale na nodra vanua na Yalododonu. Eso na lewe ni keba e sa rarawataka ka vakataroga se cava na vuna era a vakaroti me ra gole kina ki kea. Na cava e dodonu me da cakava ni da sa sega ni kila na vuna me baleta e dua na ivakaro? Wasea na italanoa eso mai na “Voices of the Restoration: Zion’s Camp”(ena Lako Mai, Mo Muri Au—Baleta na Tamata Yadua kei na Matavuvale) me vukei ira na gone me ra raica ni veivakalougatataki e yaco mai na gauna eda sa talairawarawa kina ki na ivakaro e solia mai na Kalou vei ira na Nona parofita, kevaka sara mada ga eda sega ni kila na vuna taucoko.

Vakauqeta na Vuli e Vale

Vakayaloqaqataki ira na gone me ra wasea na veika era sotava na Keba kei Saioni vua e dua e vale, vata kei na dua na lesoni era sa vulica mai na veika a sotavi oqori. Se sureti ira me ra vakasamataka e dua na ka sa vakalougatataki ira kina na Kalou era rawa ni wasea vua e dua vakaleqai tu.

Vakatorocaketaki Noda Veivakavulici

Sotava na vakasausa ena loloma. “Eso na gauna na nona ivakarau e dua na gone e rawa ni vakacacana nodra vuli na vo ni kalasi. Ni yaco oqori, mo dau vosota, yalololoma, ka veiciqomi ena bolebole eso ena rairai sotava tiko na gone oya. … Kevaka e vakaleqai tu nona bula na gone e vakasausa tiko, veitalanoa kei na kenadau ena tabanalevu se iteki baleti ira na vakaleqai tu se sikova na [disabilities.ChurchofJesusChrist.org] mo rawa ni kila na ivakarau me sotavi kina na gagadre eso oqori” (Veivakavulici ena iVakarau ni iVakabula,26).