Valetabu e Kirtland, mai vei Al Rounds

30 ni Okosita–5 ni Sepiteba

Vunau kei na Veiyalayalati 94–97

“Me Vakabulai Saioni”

Na ivakavuvuli kei na ivunau cava e matata vei iko ni ko vulica na Vunau kei na Veiyalayalati 94–97? Raica mo vola na veika o uqeti kina.

Vola na Veika o Uqeti Kina

Ena gauna sa vakaroti Mosese kina na Turaga me tara e dua na valecavu, a tukuna vei Mosese me “cakava na ka kecega me tautauvata kei na kena ivakatakarakara ka vakatakila vei [koya] ena ulunivanua” (Iperiu 8:5; raica talega na Lako Yani 25:8–9). Na valecavu me sa itikotiko liu ni keba ni Isireli ena lekutu (raica Na Tiko Mai Na Lekutu 2:1–2). E muri, a qai vakarota na Kalou vei Solomoni kei ira na nona tamata mera tara e dua na valetabu me vaka na kena ivakarau a vakatakila mai o Koya (raica na 1 Veigauna 28:12, 19).

Me vaka ni sa vakalesuya mai na Turaga na taucoko ni kosipeli, a vakaroti Josefa Simici kina me tara valetabu me vaka na kena ivakarau sa vakatakilai mai. “Me tara e dua na vale, ia ena sega ni vaka na kena itaratara e kila ko vuravura,” a kaya na Turaga. “Me tara kina ena kena ivalavala au na vakaraitaka” (Vunau kei na Veiyalayalati 95:13–14; raica talega na 97:10). Me vaka ga na valecavu ena lekutu, na inaki ni valetabu me ivakatakilakila laurai levu e Kirtland (raica na Vunau kei na Veiyalayalati 94:1).

Nikua era sa laurai tu na vale ni Turaga e vuravura raraba. Kevaka sara mada ga era sega tu ni laurai levu ena noda veikoro lelevu, e rawa ni ra laurai levu ki na noda bula. E dina ga ni duidui tu na irairai ni veivaletabu yadua, ia e loma eda sa vulica kina e dua vata ga na ivakarau vakalou—na ituvatuva vakalomalagi me kauti keda lesu ki na iserau ni Kalou. Na cakacaka vakalotu tabu, ka tawamudu eso ena vukei keda me tarai cake na noda bula ka vaqaqacotaka na noda vuvale “sega ni vaka na kena itaratara e kila ko vuravura” ia sa vaka na ivakarau sa vakaraitaka vei keda na Kalou.

Raica na Yalododonu, 1:169–70; “E Dua na Vale me Baleta na Noda Kalou,” Revelations in Context, 165–73.

Vakasama ni Vuli iVolanikalou ni Tamata Yadua

Vunau kei ana Veiyalayalati 94; 97:15–17

E rawa ni tiko vata kei au na Turaga ena noqu bula e veisiga.

Na ivakaro eso era tiko ena Vunau kei na Veiyalayalati 94 kei na 97 a soli ena siga vata ga o ya—2 ni Okosita, 1833. NaWase 97 e tukuna tiko vakatikina e dua na valetabu a tuvai me baleti Jackson County, Missouri, ia na wase 94 e tukuna tiko na veivale veiliutaki e Kirtland, Ohio. O na raica beka eso na veika tautauvata ena ka e tukuna na Turaga me baleti ira na veimataqali vale vakaoqo (raica na Vunau kei na Veiyalayalati 94:2–12; 97:10–17). Ni ko vakasamataka vakatitobu na ivakaro eso oqo, vakasamataka na cava o rawa ni cakava mo sotava wasoma kina na lagilagi kei na iserau ni Turaga, e loma ni veivale ni Lotu kei na nomuni bula ni veisiga.

Vunau kei na Veiyalayalati 95

Na Turaga sa dau vunauci ira e lomana.

Ni oti rauta e lima na vula mai na Janueri 1833, sa vakarota kina na Turaga vei ira na Yalododonu e Kirtland me ra tara na vale ni Kalou ka vakayacora e dua na soqoni tabu (raica na Vunau kei na Veiyalayalati 88:117–19). Ena gauna a ciqomi kina na ivakatakila ka volai tu ena wase 95 ena June ni 1833, era a se bera mada ni cakacakataka na ivakaro o ya. Na cava o sa vulica ena sala a veivunauci kina na Turaga vei ira na Yalododonu ena ivakatakila oqo? Era tiko beka eso na ivakaro se vosa ni vakasala o se bera ni cakacakataka tu? Na cava o sa bau vakauqeti kina mo cakava?

Raica talega na D. Todd Christofferson, “O Ira Kecega Kau sa Lomana, Kau sa Vunauca ka Cudruva,” Ensign se Liaona, Me 2011, 97–100

Vunau kei na Veiyalayalati 95:8, 11–17; 97:10–17

Sa vakalougatataki ira na Nona tamata na Kalou ena valetabu.

Ni oti nodra cudruvi ni ra a sega ni tara e dua na vale ni Turaga e Kirtland, era sa qai digitaka na iliuliu ni Lotu e dua na vanua ena dua na were ni witi mera tara kina. A cici kusarawa o Hyrum Smith, na tuakana na parofita, me kauta mai e dua na isele ni were ka tekivu me samaka na were. “Eda sa vakavakarau tiko ni tara e dua na vale ni Turaga,” a kaya o koya, “kau sa navuca tu meu na imatai ki na cakacaka” (ena Nodra iVakavuvuli na Peresitedi ni Lotu: Josefa Simici [2007], 271, 273). Vakasamataka vakatitobu na maqusa nei Hyrum ni ko wilika na Vunau kei na Veiyalayalati 95:8, 11–17; 97:10–17. Na cava beka o sa raica e vakauqeta na igu e tiko vei iko mo laki ciqoma kina na veivakalougatataki ni valetabu?

Samaka Tiko na Vanua O Hyrum Smith, mai vei Joseph Brickey

Vunau kei na Veiyalayalati 97:18–28

O Saioni sai “ira na yalosavasava.”

A vakavulica na Parofita o Josefa Simici, “Sa dodonu me noda inaki levu duadua na tarai cake i Saioni.”(iVakavuvuli: Josefa Simici, 186). Kivei ira na Yalododonu ena 1830 vakacaca, o Saioni sa dua na vanua, vakaidina sara sa “koro ni noda Kalou” (Vunau kei na Veiyalayalati 97:19). Ia ena ivakatakila sa volai tu ena wase 97, a vakarabailevutaka na Turaga na vakasama o ya. Sa vakatakilai talega na tamata e Saioni me—“savasava na lomadra” (tikina e 21). Ni o wilika na tikina 18–28, vakasamataka na kena ibalebale oqo ni ko wilika na vosa “Saioni” Na cava na kena ibalebale vei iko me savasava na lomamu? E veivuke vakacava na valetabu ni vakataucokotaka “na vakabulai i Saioni”? (tikina e 12).

Raica talega na Mosese 7:18; Ulutaga Vakosipeli, “Saioni,” topics.ChurchofJesusChrist.org.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 95:8.Sa yaco vakacava na kena caka ka maroroi na veiyalayalati ni valetabu me kauta mai na “kaukauwa mai lomalagi” ki na noda bula? Sa rawa vei ira na lewe ni vuvale mera wasea na nodra nanuma baleta na valetabu se wasea na veika era sotava ena gauna era a vakila ni ra vakalougatataki ena “kaukauwa mai lomalagi” ena sokalou ena valetabu.

Mera vukei o ira era vakavakarau tiko mera curu ki na valetabu, sa rawa me saravi tale na vidio, itaba, kei na ivakasala era tiko ena temples. ChurchofJesusChrist.org. Me vukei ira na gone ni vulica na veika baleta na valetabu, sa rawa ni o vakayagataka na “Your Path to the Temple” (ena Temples of The Church of Jesus Christ of Latter-day Saints [ilavelave digitaki ni Ensign se Liaona, Okot. 2010], 72–75).

Vunau kei na Veiyalayalati 95:1–11.Na cava eda vulica me baleta na veivunauci ena veitikina oqo? Na cava eda vulica me baleta na Turaga? Era vakayaco-ka vakacava na veivakararamataki oqo ki na sala eda ciqoma kina na veivunauci se vunauci ira na tani?

Vunau kei na Veiyalayalati 97:8.Me vaka e tukuna na tikina oqo, e rawa vakacava ni da “vakadonui mai vua” na Turaga? E duidui vakacava oya mai na veivakadonui ni vuravura? Na cava na kena ibalebale meda “muria na [noda] veiyalayalati ena solibula”? Eda sa cakava vakacava oqo?

Vunau kei na Veiyalayalati 97:10–21.A vakavulica na Parofita o Josefa Simici, “Na vanua cava ga era soqoni kina na Yalododonu sai Saioni, ni na tara cake na tagane [se yalewa] yalododonu na vanua o ya me itikotiko taqomaki vei ira na luvena” (iVakavuvuli: Josefa Simici, 186). E rawa vakacava meda tarai Saioni cake ena noda itikotiko? Na ivakavuvuli cava so eda raica ena Vunau kei na Veiyalayalati 97:10–21? Digitaka vakamatavuvale e dua na ivakavuvuli mo dou vakanamata kina ena macawa oqo.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Sere e vakatututaki: “I Love to See the Temple,” Nodra Sere na Lalai, 95.

Vakatorocaketaki ni Vuli ni Tamata Yadua

Vola na veika o sa sotava. Vola na veika o a sotava ena ivakavuvuli eso kei na ivunau o sa vulica tiko. Na veika e sotavi oqo sa rawa ni yaco me tiki ni tukutuku ni tamata yadua ena vakalougatataka na itabatamata mai muri.

Tara Tiko ni Valetabu e Kirtland, mai vei Walter Rane