Au Raica na Luve ni Tamata ni Duri Tu ena Ligai Matau ni Kalou, mai vei Walter Rane

23–29 ni Okosita

Vunau kei na Veiyalayalati 93

“Dou na Veivakataucokotaki”

E vakavulica naVunau kei na Veiyalayalati 93 ni, “dina sai koya na kena kilai na veika ena kedra ituvaki ena gauna oqo, kei na kedra ituvaki ena veigauna sa oti, kei na kedra ituvaki ena veigauna e se bera mai.” (tikina e 24). Ni ko vulica na wase oqo, vakasaqara tiko na dina ka vola na veika o sa vulica. Na cava soti e sa lomamu mo cakava mo ciqoma kina na dina? (raica na tikina e 27–28).

Vola na Veika o Uqeti Kina

“Ni o kabata e dua na ikabakaba,” a vakavulica o Josefa Simici, “o na tekivu mai ra, ka qai kabata yadudua na ikabakaba, me yacova ni ko sa yaco ki cake; sa vakakina ena ivakavuvuli ni kosipeli—mo na tekivu ena kena imatai, ka qai lako tiko me yacova ni ko sa vulica kece na ivakavuvuli ni bula vakalagilagi.(Nodra iVakavuvuli na Peresitedi ni Lotu: Josefa Simici [2007], 268).

Ena so na gauna e vaka me dredre i cake na ikabakaba ni bula vakalou, ia eda a sucu mai meda kaba ki na delana. Se cava ga na iyalayala eda raici keda kina, na Tamada Vakalomalagi kei na Luvena sa raica e dua na ka lagilagi ni tiko vei keda, e dua na ka vakalou. Me vaka ga ni o Jisu Karisito “a tiko vata kei na Tamana mai na ivakatekivu,” vakakina “dou a bula vata talega” (Vunau kei na Veiyalayalati 93:21, 23). Me vaka ga ni o Koya a “tubucake tikoga mai na iloloma soli wale ki na iloloma soli wale, me yacova ni sa rawata ena kena taucoko,” sa vakakina “o na rawata kina mai na iloloma soli wale ki na iloloma soli wale” (tikina e 13, 20). Na kosipeli vakalesui mai e vakavulici keda me baleta na ituvaki dina ni Kalou, ka sa vakavulica talega vei keda me baleti keda kei na cava eda rawa ni yacova. Se cava ga na nona sasaga “na vunica” (tikina e 39)—se cava ga na ka o nanuma ni sega vei iko—ko sa luve dina ni Kalou ka rawa ni “rawata na nona veivakataucokotaki ena kena gauna” (tikina e 19).

Vakasama ni Vuli iVolanikalou ni Tamata Yadua

Vunau kei na Veiyalayalati 93

Eda sa qarava na Kalou na Tamada kei na Luvena, o Jisu Karisito.

Ni vosataka tiko na vakatakila ena Vunau kei na Veiyalayalati 93, a vakamacalataka na Turaga, “Au sa tukuna vei kemudou na veika oqo mo dou kila kina na ivakarau mo dou qaravi koya kina, ka kilai koya dou sa qarava, mo dou lako yani kina vei Tamaqu ena yacaqu, ka rawata na nona veivakataucokotaki ena kena gauna.” (tikina e 19). Ni ko vulica na vakatakila oqo, makataka na dina o sa vulica me baleta na iBulibuli Vakalou eda sa qarava: na Kalou na Tamana kei na Luvena, o Jisu Karisito. Na cava o sa vulica me baleta na “ivakarau ni sokalou” vei Rau? na sala meda “lako mai kina vua na Tamada”?

A vakavulica na Parofita o Josefa Simici, “Kevaka era sega ni kila matua na tamata na itovo ni bula ni Kalou, era sa sega ni kilai ira matua.”(Teachings: Joseph Smith, 40). Ni o vulica na veika me baleta na iVakabula ena nomu vulica na Vunau kei na Veiyalayalati 93, vakaraica na veika talega o sa vulica me baleti iko. Me vakataka, na cava o sa vulica me baleti Koya mai na tikina e 3, 12, 21, kei na 26? Na veika dina cava vakaoqo o sa kunea me baleti iko ena tikina e 20, 23, kei na 28–29? (Raica talega na 1 Joni 3:2; 3 Nifai 27:27; Dean M. Davies, “Na Veivakalougatataki ni Sokalou,” Ensign se Liaona, Nove. 2016, 93–95.)

Vunau kei na Veiyalayalati 93:1–39

Na lagilagi ni Kalou sai koya na rarama kei na dina.

O na rairai raica ni lagilagi, rarama, kei na dina e basika tiko mai vakawasoma ena ivakatakila oqo. Ni o vulica, vakabibi na tikina e 21–39 vola na dina kece o sa vulica me baleta na lagilagi, na rarama, kei na dina. Ena vakauqeti iko vakacava na veika dina oqo mo vakasaqara na rarama kei na dina e cecere cake? Era na vakayaco-ka vakacava na veika dina oqo ki na ivakarau ni nomu bula ni veisiga?

Eda ciqoma na rarama kei na dina ni da maroroya na ivakaro ni Kalou.

Vunau kei na Veiyalayalati 93:40–50

“Vakavulici ira vinaka na lewe ni nomu matavuvale.”

Ena tikina 40, Vunau kei na Veiyalayalati 93 sa vaka me veisau mai na ivakavuvuli me baleta na lagilagi ni Kalou kei na noda inaki vakalou ki na idusidusi me baleta na bula vakaitubutubu kei na vakavulici vakavinaka ni noda matavuvale. Ena vukei iko vakacava na veivakavulici ni Turaga me baleta na rarama, dina, kei na lagilagi era tiko ena tikina e 1–39 mo kila vinaka ka muria kina na ivakasala era tiko ena tikina e 40–50?

Raica talega na David A. Bednar, “Vakavulici Ira Vakavinaka na Nomu Vuvale,” Ensign se Liaona, Nove. 2009, 17–20.

Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 93:2.Sa mai “rarama dina” tiko vakacava o Jisu Karisito ki na noda bula? Eda sa raica vakacava Nona Rarama vei ira tale eso na tamata era tiko wavoliti keda?

Vunau kei na Veiyalayalati 93:3–29.Me vukea na nomu matavuvale me veivosakitaka na veika era sa vulica ena wase 93 me baleta na iVakabula kei ira, sa rawa mo cakava e dua na qito ni veisotari. Me vakataka, sa rawa mo vakarautaka mai e vica na kadi e tiko kina na tikina eso mai na wase 93 e vakavuvulitaka na veika dina me baleta na iVakabula (raica na tikina e 3, 12, 21, 26) vata kei na vica tale era vakavulica na veika era via tautauvata me baleti keda (raica na tikina e 20, 23, 28–29). Mera qai tomika na lewe ni vuvale yadua e dua na kadi, wilika na tikina, ka saga mera raica na dina e veisotari vata. E veivakauqeti vakacava na dina oqo ki na noda nanuma me baleta na iVakabula vakakina baleti keda?

Vunau kei na Veiyalayalati 93:12–13, 20.Na cava e vakaibalebaletaki ena ciqomi ni “iloloma soli wale ena iloloma soli wale” ka me tomani “mai na iloloma soli wale ki na iloloma soli wale”? (tikina e 12–13). Na cava era vakatututaka tiko na veitikina oqo baleta na sala meda tubu ka vuli kina? E veisautaka vakacava na sala eda qaravi ira kina eso—vakakina o keda na kilai ni ka oqo?

Vunau kei na Veiyalayalati 93:24Wilika na ibalebale ni dina e tiko ena tikina oqo, ka sureti ira na lewe ni matavuvale me ra wasea na ka eso mai na wase 93 era nanuma ni sa dua na dina talei sara. Na ibalebale cava tale eso eda raica rawa ena Joni 14:6; Jekope 4:13; se dua na serenilotu baleta na dina, me vakataka “Na Cava na Dina?” (Serenilotu, naba 166).

Vunau kei na Veiyalayalati 93:40.De gauna o wilika kina na tikina oqo, sa rawa ni lagata na nomu vuvale e dua na sere me baleta na vuli e vale, me vakataka na “Teach Me to Walk in the Light” (Nodra Sere na Lalai, 177). Era na rairai marautaka na gonelalai ni cakava eso na imoimoi me lako vata kei na qaqana. Na cava beka o sa vakauqeti mo cakava mo sureta kina e levu cake na “rarama kei na dina” ki na nomu itikotiko?

Vunau kei na Veiyalayalati 93:41–50.Dou veivakasalataki vata vakamatavuvale me baleta na veika e rairai sega ni “dodonu ena nomu vuvale.” Na cava eda rawa ni cakava meda “vakavulici ira vinaka na lewe ni [noda] vuvale”? (tikina 43–44).

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleta na Lalai.

Sere e vakaturi: “Au Luve ni Kalou,” Nodra Sere na Lalai, 2–3.

Vakatorocaketaki Noda Vuli

Wilika vakavica. Sa rawa mo digitaka mo wilika vakavica na Vunau kei na Veiyalayalati 93 ena loma ni macawa. Ena gauna yadua o wiliwili kina, o na rairai siqema ni ra vakavotui se vakauqeti iko na dina duidui eso ena dua na sala vou. Ni ko wilika ena veigauna ena vakarautaka talega na veimadigi eso mo vakasamataka kina vakatitobu cake.

Rarama kei na Dina, mai vei Simon Dewey