9–15 ni Okosita

Vunau kei na Veiyalayalati 88

“Tauyavutaka … me Vale ni Kalou”

A kaya o Peresitedi Russell M. Nelson, “Au yalataka ni ko cakacaka vagumatua mo vakatura vou nomuni itikotiko me vale ni vuli kosipeli, … na yaco na veiuqeti nei vu-ni-meca ena nomuni bula kei na nomuni itikotiko me malumalumu” (“Meda iVakaraitaki Uasivi ni Yalododonu Edaidai,” Ensign se Liaona, Nove. 2018, 113).

Vola na Veika o Uqeti Kina

Sa dau vakawasoma, e solia vei keda na Turaga e dua na kena irairai lailai sara ni Nona “lagilagi kei na kaukauwa” tawa yalani (Vunau kei na veiyalayalati na 88:47) ena ivakatakila raraba kivei ira na Nona parofita. Na Vunau kei na Veiyalayalati 88. sai koya e dua na ivakatakila vaka oya—e dua me baleta na rarama kei na lagilagi kei na matanitu ka rawa ni vakatawayagataka na noda ogaoga vakavuravura ni vakatauvatani. Kevaka sara mada ga eda sega ni rawa ni taura taucoko na veika e vakavulica tiko vei keda na Turaga, eda rawa ni vakila ni sa levu cake sara na veika ki na gauna tawamudu mai na veika eda vakasamataka ena gauna oqo. E dina sara, ni a sega ni vosa na Turaga baleta na veika vuni cecere oqo me vakarerei keda se meda yalolailai kina. Na ka dina, a yalataka o Koya, “Ena yaco na siga dou na kila kina na Kalou” (tikina e 49; vakuri ena matanivola kala). E rairai a inaki cecere ni Turaga a vakauqeti ira na Nona Yalododonu e Katiladi mera tauyavutaka na Koronivuli ni Parofita. “Dou cokonaki kemudou,” a kaya oKoya. “Dou vakarautaka na veika sa yaga vei kemudou; dou tauyavutaka … [na] vale ni Kalou” (tikina e 119). Ni sai koya ena loma ni vale tabu ni Kalou—kei na noda itikotiko—ni rawata o Koya, vakalevu cake mai na dua na vanua tani tale, me laveta na noda rai ka sivita yani na vuravura vakayago, “cereka na ilati ni matana vei [keda],” ka vakarautaki keda meda “tiko rawa ena lagilagi vakasilesitieli” (tikina e 68, 22).

Vakasama eso ni Vuli iVolanikalou ni Tamata Yadua

Vunau kei na Veiyalayalati 88

E solia vei keda na Turaga na inuinui kei na vakacegu.

Vica ga na siga ni oti na veivakasalataki ni na “yaco na veivaluvaluti ena veimatanitu kecega” (Vunau kei na veiyalayalati na 87:2), a solia na Turaga e dua na ivakatakila ka vakatoka o Josefa Simici me dua na “‘drau ni olive’ … sa beti mai na Kau ni Parataisi, na itukutuku ni vakacegu ni Turaga vei keda” (Vunau kei na Veiyalayalati 88, ulutaga ni iwase). E vakataka vakacava e dua na drau ni olive na ivakatakila oqo, e dua na ivakatakarakara matau ni vakacegu? (raica talega Na iVakatekivu 8:11). Na dina cava so ena iwase oqo e vukei iko mo vakila na inuinui kei na vakacegu vei Karisito?

Vunau kei na Veiyalayalati 88:6–67

Na rarama kei na lawa e lako mai vei Jisu Karisito.

Na vosa na rarama kei na lawa e rau tokaruataki vakavica ena wase 88. Na vosa oqo a sa vakayagataki ena so tale na ivolanikalou me vakamacalataki Jisu Karisito kei na Nona kosipeli (me ivakaraitaki, raica na Aisea 60:19; Joni 1:1–9; 3 Nifai 15:9). Makata se vola na tikina eso o kunea kina na veivosa oqo ena Vunau kei na Veiyalayalati 88:6–67, ka vola na veika o sa vulica me baleta na iVakabula, na rarama, kei na lawa. Na veitikina oqo ena rawa ni vakauqeti iko mo vakayacora na veisau eso ena nomu bula mo ciqoma na rarama ka bulataka na “lawa i Karisito” vagumatua cake ena yalodina (tikina e 21).

Raica talega na Sharon Eubank, “Karisito: Na Rarama Sa Cilava na Butobuto,” Ensign se Liaona, Me 2019, 73–76.

Na ivolanikalou sa tu kina na lawa i Karisito.

Vunau kei na Veiyalayalati 88:62–126

Dou vakarautaka na veika sa yaga vei kemudou.

Ena so na sala, eda sa bula donuya tiko na gauna a vakamacalataka na Turaga ni na “yavavala na ka kecega; ia sa dina sara, ni ra na kani yatedra na tamata” (Vunau kei na Veiyalayalati 88:91). Ni o wilika na tikina e 62–126, vakasamataka na sala ena vukei iko kina na ivakasala ni Turaga mo vakavakarau ki na iKarua ni Lako Mai ni iVakabula. Oqo e vica na taro me nanumi tiko:

Tikina e 62–76.Ni ko vakasamataka vakatitobu na tikina eso oqo, na cava o sa vakauqeti kina mo cakava mo “dou toro voleka mai” vua na Kalou? (tikina e 63). Vakasamataka na cava na kena ibalebale vei iko na ivakaro ni Turaga mo “vakatabui kemudou” (tikina e 68).

Tikina 77–80, 118–26.Na cava beka ena “dodonu mo dou kila” kina na iulutaga vakaivunau ka vakayago? (tikina e 78). O sa vakamuria tiko beka vakacava na ivakaro mo “vakasaqara na kila ka”? (tikina e 118). Na cava beka na kena ibalebale mo vulica “ena vuli kei na vakabauta”?

Tikina 81–116.Okata mo vola toka na parofisai eso me baleta na iKarua ni Lako Mai ni iVakabula ena veitikina oqo. Na cava na vuna o nanuma ni na vinakata na Turaga mo kila kina na veika oqo?

Tikina e 117–26.Okata mo wilika na veitikina oqo ni o vakasamataka tiko na valetabu; na cava o kunea eke ka na rawa ni vukei iko ena nomu vakavakarau mo curu ki na vale ni Turaga?

Raica talega na D. Todd Christofferson, “Vakavakarau ki na Lesu Mai ni Turaga,” Ensign se Liaona, Me 2019, 81–84; David A. Bednar, “Vakasaqara na Vuli ena Vakabauta,” Ensign, Sepi. 2007, 61–68; Saints, 1:164–66; “A School and an Endowment,” Revelations in Context, 174–82.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 88:14–33, 95–101.Na cava eda vulica baleta na Tucaketale mai na veitikina oqo? Ena veivakauqeti vakacava na dina eso oqo ki na digidigi eda dau vakayacora?

Vunau kei na Veiyalayalati 88:33.Ena rawa mo tekivuna e dua na veivosaki ena tikina oqo ena nomu taroga na lewe ni matavuvale mera tukuna me baleta na isolisoli ka sa soli vei ira—na kena era a ciqoma ena marau, kei na kena tale eso a sega ni vakakina. Eda na vakaraitaka vakacava vua na Turaga ni da sa rekitaka na isolisoli ni lagilagi vakasilesitieli sa solia mai vei keda oKoya? Eda rekitaka vakacava o “koya e solia na iloloma”?

Vunau kei na Veiyalayalati 88:63, 68Na veitikina oqo e tiko kina eso na vosa ni cakacaka ena rawa ni vakauqeti iko mo vakasamataka na sala me vakavulici kina na itukutuku ena tikina eso vei ira na luvemu. Me ivakaraitaki, o na rawa beka ni qitora e dua na qito veivuni me veivosakitaka na malanivosa “vakasaqarai au vagumatua dou na qai kunei au” (tikina e 63; vakuri ena matanivola kala).

Vunau kei na Veiyalayalati 88:81.Vaka matavuvale, vakaraica eso na ivakatakilakila ni ivakaro ni qaqarauni ka tu wavolita nomu vale, me vaka na ivakatakilakila ni ivakaro ni qaqarauni ena wainimate se ivakatakilakila ni veitosoyaki me baleti ira na draiva. Era vukei keda vakacava na ivakaro eso oqo? Na cava e vinakata na Tamada Vakalomalagi meda “vunauca [vei ira] na weka[da]”?

Vunau kei na Veiyalayalati 88:119.Me vakauqeta na nomu matavuvale me cakava na nomu itikotiko me vaka na ivakamacala ena tikina e 119, tovolea e dua na ka vaka oqo: Vola na veimalanivosa mai na tikina oqo ena tikitiki ni pepa, ka ubia kina e dua na iyaloyalo ni valetabu. Wilika vata na Vunau kei na Veiyalayalati 88:119 ka mera qai kauta laivi yadudua na lewe ni matavuvale na tikitiki ni pepa ni ra rogoca na malanivosa veisemati ena tikina. Na cava e rawa ni da kitaka me cakava na noda itikotiko me “vale ni Kalou”? (tikina e 119).

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleti Ira na Lalai.

Sere vakaturi: “Au Toro Yani Tu,” Sere ni Lotu, naba 53.

Vakatorocaketaki Noda Veivakavulici

Laivi ira na gone mera vakaraitaka na nodra dau bulibuli ka. Ni o sureta na gone me bulia e dua na ka e semati ki na dua na ivakavuvuli ni kosipeli, o sa vukei ira me ra kila vakavinaka cake na ivakavuvuli, ka solia vua e dua na vatuka ni ka e vulica (raica na Veivakavulici ena iVakarau ni iVakabula, 25).

Sa solia tu vei keda o Jisu Karisito na vakacegu. Au Sa Laiva Vei Kemudou na Vakacegu mai vei Walter Rane