2–8 ni Okosita

Vunau kei na Veiyalayalati 85–87

“Mo Dou Tudei ena Vanua Tabu”

Ena rawa ni tuberi iko na Yalo Tabu mo vulica na ivakavuvuli eso ena wase e 85–87 ka ra sega ni okati ena ituvatuva oqo. Vakamuria na Nona veivakauqeti.

Vola na Veika o Uqeti Kina

Na Siganisucu e dau dua na gauna me vakasamataki vagumatua kina na vei itukutuku me vaka na “veivinakati rawa ko ira e vuravura” ka “lomani ko ira na tamata” (raica na Luke 2:14). Ia, ena ika 25 ni Tiseba, 1832, a vakaogai na vakasama nei Josefa Simici ena veivakarerei ni ivalu. E a se qai bolea ga na matanitu o Amerika na Ceva kei Karolaina ka sa vakacibivalu tiko. Ka a vakatakila mai na Turaga vei Josefa ni oqo e kena itekivu walega: “Na yaco na veivaluvaluti,” a kaya oKoya, “ena veimatanitu kecega” (Vunau kei na veiyalayalati na 87:2). E a kena irairai ni na yaco totolo sara na parofisai oqo.

Ia a qai sega. Ni oti ga e vica na macawa, sa yaco e dua na veivakameautaki na Ceva kei Karolaina kei na matanitu o Amerika, ka a levei na ivalu. Ia na ivakatakila e sega ni dau vakavatukanataki ena gauna se ena sala eda namaka. Voleka ni 30 na yabaki i muri, ni sa dede sara toka na nona a vakamatei o Josefa Simici kei na nodra toki ki na ra na Yalododonu, a qai veivorati mai na Ceva kei Karolaina ka muria mai na ivalu ni vanua. Mai na gauna oya, na ivalu e vuravura taucoko sa vakavuna na “[noda] lolosi na kai vuravura” (Vunau kei na Veiyalayalati 87:6). E dina ni a qai yaco e muri na parofisai, na yaga ni ivakatakila oqo e sega so ena kena tukuni taumada na gauna ena yaco kina na veika rerevaki ia e vakalevu cake ena kena vakavulici na ka me caka ni sa yaco mai. E tautauvata ga na ivakasala ena 1831, 1861, kei na 2021: “Mo dou tudei ena vanua tabu ka kakua ni yavalati rawa” (tikina e 8).

Vakasama eso ni Vuli iVolanikalou ni Tamata Yadua

Vunau kei na Veiyalayalati 85:1–2

E vinaka “me … tiko e dua na itukutuku.”

Na “itukutuku” e vakamacalataki ena tikina e 1 a volai kina na yacadra o ira era a “ciqoma oti na nodra ivotavota vakawa” e Saioni (raica talega na Vunau kei na Veiyalayalati 72:24–26). Ia, a sega walega ni baleta na veiliutaki na itukutuku oqo—e a dua talega na itukutuku yaga ni “nodra ivakarau ni bula, … nodra vakabauta, kei na cakacaka” na Yalododonu’ (tikina 2).

O maroroya tiko li e dua na itukutuku se ivolaniveisiga vakai iko? Na cava e rawa ni o vola me baleta na nomu ivakarau ni bula, vakabauta, kei na cakacaka ka na rawa ni dua na veivakalougatataki kivei ira na itabatamata ni veisiga ni mataka? E rawa vakacava ni dua na veivakalougatataki vei iko na itukutuku oqo?

Raica talega na “iVolaniveisiga: ‘Ka Levu Cake mai na Koula,’” Nodra iVakavuvuli na Peresitedi ni Lotu: Wilford Woodruff (2011), 125–33; “Turning Hearts” (vidio, ChurchofJesusChrist.org).

Vunau kei na Veiyalayalati 85:6

E dau vosa mai na Yalotabu ena dua na “domo lailai malumu.”

Vakasamataka vakatitobu na veivosa a vakayagataka o Josefa Simici me vakamacalataka na Yalotabu ena Vunau kei na Veiyalayalati 85:6. Ena vakasama cava e “lailai” ka “malumu” kina na domo ni Yalotabu? Na cava eso na ka e “laubasikata” ena nomu bula?

Ni o vakasamataka na sala e dau vosa kina vei iko na Yalotabu, okata na ivakamacala eso oqo ka a soli mai vei Josefa Simici: Vunau kei na Veiyalayalati 6:22–24; 8:2–3; 9:7–9; 11:12–13; 128:1. Mai na veika o sa wilika, na cava beka o vakila ni o na gadreva mo cakava mo kila vakavinaka cake kina na domo ni Yalotabu?

Raica talega na 1 Tui 19:11–12; Ilamani 5:30.

Na vulici ni ivolanikalou e dau vukei keda meda rogoca na Yalo Tabu.

Vunau kei na Veiyalayalati 86

Era sa sokumuni na buladodonu ena veisiga e muri.

Na Vunau kei na Veiyalayalati 86:1–7 e tiko kina na ivakamacala ni Turaga ni italanoa vakaibalebale ni sila vinaka kei na sila ca, ka duidui vakalailai ga na kena vakabibitaki mai na kena a solia ena Maciu 13:24–30, 37–43. Ni o veidutaitaki rau, na duidui cava so o raica? Vakasamataka na vuni italanoa vakaibalebale oqo—vata kei na duidui eso oqo—e yaga me tokaruataki tiko “ena veisiga e muri, ena gauna sara mada ga oqo” (Vunau kei na Veiyalayalati 86:4). Na cava o rawa ni vulica mai na italanoa vakaibalebale oqo kei na kena ivakavakadewa edaidai?

Me vaka e volai ena tikina e 8–11, na Turaga a qai vosa me baleta na matabete, na veivakalesui mai, kei na nodra vakabulai na Nona tamata. Na isema cava o raica ena kedra maliwa na veitikina oqo kei na italanoa vakaibalebale ni sila vinaka kei na sila ca? E rawa vakacava ni o “vakabulai ira na … tamata [ni Turaga]”? (tikina e 11).

Raica talega na Gospel Topics, “Apostasy,” “Restoration of the Priesthood,” topics.ChurchofJesusChrist.org.

Vunau kei na Veiyalayalati 87

E kunei na vakacegu ena “vanua tabu.”

Me ikuri ni veika rerevaki vakayago ni “vakadave dra; … kei na dausiga, kei na mate dauveitauvi, kei na tavuki ni vanua”(Vunau kei na Veiyalayalati 87:6), na ivakasala ena ivakatakila oqo e sa baleta talega na veika rerevaki vakayalo eda sotava kece tiko edaidai. Na cava soti na nomu “vanua tabu” (tikina e 8) o kunea kina na vakacegu kei na veimaroroi? Na cava e cakava e dua na vanua me tabu? Me ikuri ni veivanua vakayago, e rairai tu talega na gauna tabu, ivakarau tabu, se na vakasama savasava ka rawa ni vakarautaka na vakacegu. Na cava na kena ibalebale mo “kakua ni yavalati rawa” mai na veivanua oqo?

Raica talega na Henry B. Eyring, “Na iTikotiko e Vakaicili kina na Yalo ni Turaga,” Ensign se Liaona, Me 2019, 22–25; Saints, 1:163–64; “Peace and War,” Revelations in Context, 158–64.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 85:6.O na vakavulica vakacava nomu matavuvale me kila na domo lailai, malumu ni Yalo Tabu? O na rawa beka ni qitora e dua na qito oya me dua e vakasolokakanataka eso na ivakaro bibi ena maliwa ni rorogo kosakosa eso. Na cava beka e vakaseva tiko na noda rogoca na Yalo Tabu? Ena rawa beka ni ra wasea na lewe ni matavuvale na veika era cakava mera rogoca kina na domo ni Yalotabu.

Vunau kei na Veiyalayalati 86.Na droini se saravi ni iyaloyalo e rawa ni vukea na nomu matavuvale mera kila vakavinaka na italanoa vakaibalebale ni sila vinaka kei na sila ca. O na gadreva beka mo tekivu ena iyaloyalo eso ni veika e vakamacalataki ena Maciu 13:24–30. Sa qai rawa me vakayacana na nomu matavuvale na iyaloyalo ena ivakamacala eso mai na Vunau kei na Veiyalayalati 86:1–7. Eda sa tautauvata vakacava beka kei na sila vinaka? Eda na vakataki ira beka vakacava na agilosi era mai vakasokomuna na sila vinaka?

Vunau kei na Veiyalayalati 87:8.Me rawa ni tauyavutaki e dua na veivosaki me baleta na ivakarau mo cakava kina na nomu vale me dua na vanua tabu, sa rawa mo sureti ira na lewe ni matavuvale me droinitaka e dua na itikotiko ena vukuna e dua e dau lomana na iVakabula. Oqo ena rawa ni veimuataki ki na vakasama eso me baleta na sala me “vakavoui” kina na nomu vale me vanua ni vakacegu ena loma ni veika rerevaki vakayalo e vuravura. Na sere me vaka na “Loloma e Vale,” “Vale Me Vaka Mai Lagi” (sere ni Lotu, naba 178, 181), se “Loloma Talei Tu” (iVolanisere ni Gonelalai, 76) e rawa ni solia vei iko na vakasama eso.

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleti Ira na Lalai.

Sere vakaturi: “Loloma Talei Tu,” iVolanisere ni Gonelalai, 76.

Vakatorocaketaki Noda Veivakavulici

Vakayagataka nomuni vakasama vinaka. Ni o vakavulica na nomu matavuvale mai na ivolanikalou, kakua ni yalani iko ki na taro kei na vakasama ni itaviqaravi e vakatututaki ena ituvatuva oqo. Me vakauqeta na nomu bulibulika na vakasama eso oqo. Vakasamataka na veika ena taleitaka na nomu matavuvale kei na veika ena vukei ira mera kunea na isema eso ni ivolanikalou kei na nodra bula.

A vakayagataka na Turaga na italanoa vakaibalebale ni sila vinaka kei na sila ca me vakaraitaka na sala mera vakasokumuni kina na Nona tamata ena veisiga e muri.