16–22 ni Okosita

Vunau kei na Veiyalayalati 89–92

“iVakavuvuli ka Sala Vata kei na Kena Yalayala”

Vulica ena masumasu na Vunau kei na Veiyalayalati 89–92, ka vola na veivakauqeti vakayalo o ciqoma. Mo qarauna ni “na vakatakila na ka dina na Yalo” vei iko ena nomu vulica na (Vunau kei na veiyalayalati na 91:4).

Vola na Veika o Uqeti Kina

A vakavulici ira na italatala qase i Isireli na Parofita o Josefa Simici ena Koronivuli ni Parofita, me baleta na tarai cake ni matanitu ni Kalou e vuravura. Era a veivosakitaka na veika dina vakayalo, masu vata, lolo, ka vakavakarau mera vunautaka na kosipeli. Ia e a dua na ka me baleta na ituvaki ka na rairai duatani beka vei keda nikua, ka a sega ni vaka me donu talega vei Ema Simici. Ena gauna ni soqoni, era a dau vakatavako ka mama tavako na tagane, ka sega ni vaka me duatani ena gauna oya, ia a vakaloaloataka na vuloa kau ka biuta tu mai e dua na iboi kaukauwa sara e macawa. A wasea vei Josefa na nona kauwai o Ema, ka a taroga na Turaga o Josefa. Na kena isau oya e dua na ivakatakila ka lako sivita sara na vakuvukuvu kei na duka ni tavako. A solia kina vei ira na Yalododonu, me baleta na veitabatamata sa bera mai e dua na, “ivakavuvuli ka sala vata kei na kena yalayala”—na yalayala ni bulabula ni yago, “vakavukui,” ka “kila ka vakalevu” (Vunau kei na Veiyalayalati 89:3, 19).

Raica talega na Saints, 1:166–68.

Vakasama eso ni Vuli iVolanikalou ni Tamata Yadua

Vunau kei na Veiyalayalati 89

Na Vosa ni Vuku e sa “ivakavuvuli ka sala vata kei na kena yalayala.”

Ni ra rogoca taumada na italatala qase ena Koronivuli ni Parofita ni wilika o Josefa Simici na Vosa ni Vuku, era a kusarawa ka “viritaka yani nodra paipo kei na iyaya ni mama tavako ki na bukawaqa” (Saints, 1:168). Ena gauna o ya, na vosa ni vuku a okati tu vakalevu cake me dua na ivakasala mai na dua na ivakaro, ia era a vinakata mera vakaraitaka na nodra lomasoli mera muria. E rairai beka o sa “viritaka yani” mai na nomu bula na veika e vakasalataki keda kina na Vosa ni Vuku meda biuta laivi, ia na cava tale o rawa ni vulica mai na ivakatakila oqo? Nanuma mo taurivaka na vakasama eso oqo:

• Vaqara na veimalanivosa o a sega beka ni kila tu—se vakasamataka vakalevu—e liu. Na cava o vulica mai kina?

• Na Vunau kei na Veiyalayalati 89 e oka kina e vica na vosa ni yalayala (raica na tikina e 18–21). Na cava o nanuma ni kena ibalebale na yalayala eso oqo?

• Na cava e vakavulica vei iko na ivakatakila oqo me baleta na Turaga?

• Na ivakaraitaki cava soti ni “ca kei na ilawaki … ena qai basika ena yalodra na tamata inaki ca” o sa bau raica? (tikina e 4).

• Vakasamataka na ivakatakila me vaka na “ivakavuvuli ka sala vata kei na kena yalayala” (tikina e 3)—gumatuataka na dina e dusimaka na vakataulewa—sega ni dua walega na lisi ni veika me caka se me kua. Na ivakavuvuli cava o raica ni rawa ni dusimaka na nomu vakataulewa?

Era sa veivakasalataki talega na parofita ni gauna oqo me baleta na waigaga kei na itovo veivakaleqai eso e sega ni tukuni ena Vosa ni Vuku (raica na “Tiko Bulabula ni Yago kei na Vakasama,” Me iSakisaki ni iTabagone, 25–27). Na cava soti o sa vakauqeti kina mo cakava me maroroi vakavinaka cake kina na nomu vakasama kei na yagomu?

Raica talega na Taniela 1; 1 Korinica 6:19–20; Gospel Topics, “Word of Wisdom,” topics.ChurchofJesusChrist.org; “The Word of Wisdom,” Revelations in Context, 183–91; addictionrecovery.ChurchofJesusChrist.org.

E vakatavulici keda na Vosa ni Vuku meda maroroya na yagoda.

Vunau kei na Veiyalayalati 90:1–17

Na Mataveiliutaki Taumada e taura tu na “idola ni matanitu.”

Ena wase 90, a solia kina na Turaga na idusidusi me baleta na “cakacaka ni kaulotu kei na mataveiliutaki” (tikina e 12) vei Josefa Simici, Sidini Rikitoni, kei Veretariki G. Viliame—ratou lewe ni ka eda sa vakatoka tu oqo me Mataveiliutaki Taumada. Na cava o vulica me baleta na Mataveiliutaki Taumada mai na tikina e 1–17? Railesuva na veitukutuku wale tikoga oqo mai vei iratou na lewe ni Mataveiliutaki Taumada. E yaga vakacava na nodratou vosa ni “tevuki kina na veika vuni ni matanitu” vei iko? (tikina e 14). Eratou cakava vakacava me “lewa vakavinaka na cakacaka ni lotu kei na matanitu”? (tikina e 16).

Raica talega na Henry B. Eyring, “Na Kaukauwa ni Veitokoni ena Vakabauta,” Ensign se Liaona, Me 2019, 58–60.

Vunau kei na Veiyalayalati 90:24

“Na yaco me vinaka vei [au] na veika kece.”

Vakasamataka mada na veika o sa sotava e vakadinadinataka na yalayala ni Turaga ena Vunau kei na Veiyalayalati 90:24. Okata mo volaitukutukutaka na veika o sa sotava, ka wasea vata kei dua na lewe ni matavuvale se daulomani—e dua beka e gadreva na veivakadeitaki se na veivakauqeti. Kevaka o se waraka tiko na veivakalougatataki, vakananuma vakatitobu na ka o rawa ni cakava mo dina tikoga ni o wawa toka mo raica ni “yaco me vinaka vei [iko] na veika kece.”

Vunau kei na Veiyalayalati 90:28–31

O cei beka o Viena Jekesa?

A sucu o Viena Jekesa ena ika 10 ni June, 1787, e Masasuseti. O Viena, e dua na marama vakabauta ka tu vinaka sara vakailavo, a sotavi rau taumada na daukaulotu ena 1831. Ni oti nona rawata e dua na ivakadinadina vakayalo ni sa dina na nodrau itukutuku, a lako yani me rau sota kei na parofita e Katiladi, Oaio, na vanua a papitaiso kina okoya.

A talairawarawa o Viena ki na ivakasala ni Turaga vei koya ena Vunau kei na Veiyalayalati 90:28–31. Na nona vakatatabu vua na Turaga, ka oka kina na nona cau a solia oti mai Katiladi, a lako mai ena dua na gauna bibi sara me baleta na Lotu, ni ra a tovolea tiko na iliuliu mera volia na vanua me na tara kina na valetabu e Katiladi. O Viena e a “yalodina tikoga, ka … [sega] ni vakawelewele” ena nona bula taucoko, ka qai yaco emuri me rawa ni “tiko … ena vakacegu” (tikina e 31) ena buca o Salt Lake, na vanua a qai mate kina ni sa yabaki 96.

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 89.Era na taleitaka beka na nomu lewe ni matavuvale mera droinitaka se vaqara na iyaloyalo eso ni kakana kei na veika tale eso e tukuni ena Vunau kei na Veiyalayalati 89. Sa qai rawa ni o qitora e dua na qito—mera veivukevuke na lewe ni matavuvale ena kena digitaki yadudua na iyaloyalo eso, ka biuta na veika e sega ni dodonu meda vakayagataka ena kavanibenu kei na veika e dodonu meda vakayagataka ena dua na peleti. E sa vakayacori beka vakacava na yalayala ena tikina e 18–21 ki na noda bula?

Na wiliki ni “Tiko Bulabula ni Yago kei na Vakasama” ena Me iSakisaki ni iTabagone (25–27) e rawa ni uqeta na kena veivosakitaki na vei sala tale eso me baleta na maroroi ni noda bula kei na veivakalougatataki sa yalataka tu na Kalou.

Vunau kei na Veiyalayalati 90:5.Veivosakitaka mada na sala mo rawa kina ni “ciqoma na ivakatakila [ivakatakila se parofita] ni Kalou.” Eda na vakaraitaka vakacava ni da na sega ni “raica vakamamada” na veika oqori?

Vunau kei na Veiyalayalati 91.Ena rawa beka ni o veivosakitaka na ivakarau e vagolei kina na ivakasala ni Turaga me baleta na Apokirifa (raica na tikina e 1–2) ki na vei sala ni vakau itukutuku ka sotava tiko na nomu matavuvale nikua (raica talega na Guide to the Scriptures, “Apocrypha,” scriptures.ChurchofJesusChrist.org). E rawa talega mo wasea na veika o sotava vakai iko ni o “vakararamataki [mai] na Yalo” (tikina e 5) ka vukei iko kina mo kila na dina kei na cala.

Vunau kei na Veiyalayalati 92:2.Na cava na kena ibalebale meda dua na “lewe ni isoqosoqo bulabula” ni Lotu?

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleti Ira na Lalai.

Sere vakaturi: “Ko ni Solia Mai vei Au Nomuni Vale,” iVolanisere ni Gonelalai, 73.

Vakatorocaketaki Noda Veivakavulici

Vakayagataka na iwalewale duidui eso. Vakaraica na sala duidui eso mera vakaitavitaki ira kina na nomu matavuvale ena vulici ni ivolanikalou vakamatavuvale. Me ivakaraitaki, na lewe ni matavuvale e rawa ni lagata na serenilotu se nodra sere na gonelalai e semati ki na dua na tikina, droinitaka na veika era sa wilika, se vakalekalekataka e dua na tikina ena nodra vosa ga.

“Ko ira kecega na yalododonu … ka vakayacora na veika sa tukuni oqo, ka ra sa bula ka talairawarawa tiko ki na ivunau, ena ka ni bula ki na nodra ivicovico ka vakauto kina na suidra” (Vunau kei na Veiyalayalati 89:18).