Vakalesui Mai, mai vei Liz Lemon Swindle

26 ni Jiulai–1 ni Okosita

Vunau kei na Veiyalayalati 84

“Na Kaukauwa ni Bula Vakalou”

Ni o wilika na Vunau kei na Veiyalayalati 84, vakasamataka vakatitobu na ivakasala mo “bula ena vosa kecega e tau mai na gusuna na Kalou” (tikina e 44). O na bula beka vakacava ena veivosa e tiko ena ivakatakila oqo?

Vola na Veika o Uqeti Kina

Tekivu mai na gauna a vakalesui mai kina na matabete ena 1829, era sa vakalougatataki na Yalododonu Edaidai mai na kaukauwa vakalou o ya. Era a papitaiso, vakadeitaki, ka kacivi mera veiqaravi ena lewa ni matabete, me vakai keda nikua. Ia na nodra rawa ni vakayagataka na kaukauwa ni matabete e sega ni tautauvata me vaka na kena kilai vakavinaka sara, ka tu eso tale na ka a vinakata na Kalou mera kila na Nona Yalododonu—vakabibi na veivakalesui mai ni cakacaka vakalotu ni valetabu ka roro tiko mai. Na ivakatakila ni matabete ni 1832 , oqo na Vunau kei na Veiyalayalati 84, a vakarabailevutaka na nodra rai na Yalododonu se cava sara mada na matabete. Ka na rawa ni vakayacora vakakina vei keda nikua. Me ilutua, e vuqa na ka me vulici me baleta na kaukauwa vakalou ka taura tu na “idola ni nona kilai na Kalou,” ka vakaraitaka “na kaukauwa ni bula vakalou”, ka vakarautaki keda oqori meda “raica rawa na … matana na Kalou, io na Tamana, me qai bula tiko” (tikina e 19–22).

Vakasama eso ni Vuli iVolanikalou ni Tamata Yadua

Vunau kei na Veiyalayalati 84:1–5, 17–28

Au sa rawata na kaukauwa ni matabete kei na veivakalougatataki ni Kalou.

Ni o vakananuma na vosa na matabete, na cava na nomu vakasama? E vakacava na wasoma ni nomu dau vakananuma me baleta na matabete kei na kena veivakauqeti ki na nomu bula e veisiga? Ni o vakasamataka oti na taro oqo, vulica na Vunau kei na Veiyalayalat 84:1–5, 17–28, ka okata na veika e vinakata na Turaga mo kila me baleta na Nona kaukauwa ni matabete. O na vakayagataka vakacava na veitikina oqo mo vakamacalataka kina na matabete vua e dua, ka vakamacalataka na kena inaki?

O na rawa beka ni vakasamataka talega vakatitobu na cakacaka vakalotu ni matabete eso o sa vakaitavi oti kina. O sa raica vakacava ni vakatakilai kina “na kaukauwa ni bula vakalou” (tikina e 20)? Vakasamataka na veika e vinakata na Turaga mo cakava mo ciqoma vakalevu cake kina na Nona kaukauwa ki na nomu bula.

Raica talega na M. Russell Ballard, “Men and Women and Priesthood Power,” Ensign, Sepi. 2014, 28–33; Gospel Topics, “Priesthood,” topics.ChurchofJesusChrist.org.

Vunau kei na Veiyalayalati 84:31–42

Kevaka au ciqoma na Turaga kei ira na Nona italai, au na ciqoma na ka kecega sa tu vei Tamada.

A vakavulica o Elder Paul B. Pieper: “E ka taleitaki ni ena bubului kei na veiyalayalati ni matabete [Vunau kei na Veiyalayalati 84:31–42], e vakayagataka na Turaga na vosa na rawata kei na ciqoma. E sega ni vakayagataka oKoya na vosa na tabaka. Sa ikoya ena loma ni valetabu na turaga kei na marama—sa—rawata vata kina ka ciqoma na veivakalougatataki kei na kaukauwa ni Matabete i Eroni kei na Matabete i Melikiseteki ruarua” (“Revealed Realities of Mortality,” Ensign, Janu. 2016, 21).

Ni o vulica na Vunau kei na Veiyalayalati 84:31–42, vakaraica na vosa “na rawata” kei na “ciqoma.” Vakasamataka vagumatua na cava e rawa ni kedra ibalebale ena itukutuku oqo. O sa “ciqoma” tiko beka vakaevei na Turaga kei ira na Nona italai?

Sa rawa talega mo vola toka na yalayala eso ena veitikina e salavata na bubului kei na veiyalayalati ni matabete, ka na “sega vakadua ni voroka” na Kalou (tikina e 40). Na cava beka o raica e vakauqeti iko mo yalodina vakalevu cake mo ciqoma na Tamada, ira na Nona italai kei na Nona kaukauwa ni matabete?

Raica talega na Guide to the Scriptures, “Covenant,” “Oath,” scriptures.ChurchofJesusChrist.org.

Vunau kei na Veiyalayalati 84:43–58

Au lako mai vei Karisito ni’u rogoca na Nona vosa ka vakatudaliga ki na Nona Yalotabu.

Na wiliki wasoma ni ivolanikalou kei na nodra vosa na parofita e bibi cake sara mai na dua na itavi me toqai ena dua na lisi ni veika me caka. Na dina cava soti o raica ena Vunau kei na Veiyalayalati 84:43–58 ena veivuke mo kila na vuna o gadreva kina mo dau vulica vagumatua na vosa ni Kalou? Raica na kedrau veibasai na rarama kei na butobuto ena veitikina oqo; na sala cava e sa kauta mai kina na rarama, dina, kei “na Yaloi Jisu Karisito” ki na nomu bula na nomu “gumatua ni muria na veivosa ni bula tawamudu”? (tikina e 43, 45).

Raica talega na 2 Nifai 32:3; “Na iVola i Momani—Vatuivakadei ni Noda Lotu,” Nodra iVakavuvuli na Peresitedi ni Lotu: Ezra Taft Benson (2014), 125–35.

E vukei au meu vakila na veivakauqeti ni Yalotabu ni’u dau vulica na ivolanikalou.

Vunau kei na Veiyalayalati 84:62–91

Na Turaga ena tiko vata kei au ni’u tiko ena Nona veiqaravi.

Ni o wilika na veitikina oqo, e rawa ni o vakaraica na sala eso a kaya na Turaga ni na tokoni ira kina na Nona iApositolo kei ira na daukaulotu. Ena yaga vakacava beka na yalayala eso oqo ki na cakacaka sa kerei iko oKoya mo cakava? Me ivakaraitaki, sa vakayacori beka vakacava na vosa ni yalayala ena tikina e 88 ena nomu bula?

Eso na Vakasama me baleta na Vuli iVolanikalou Vakavuvale kei na Lotu Vakavuvale

Vunau kei na Veiyalayalati 84:6–18.Ni oti na kena wiliki me baleta na sala a ciqoma kina na nona lewa ni matabete o Mosese, e rawa ni wasea e dua na lewe ni matabete ena nomu matavuvale se dua na dauveiqaravi turaga na veika a sotava ena nona a tabaki ki na dua na itutu ni matabete. Kevaka e rawa, me wasea ka veivosakitaka na nona laini ni lewa ni matabete. Na cava e bibi kina ni rawa ni da muria ni lewa ni matabete ena loma ni Lotu nikua ka lesu sara tale ki na lewa i Jisu Karisito? Me kerei na laini ni lewa ni matabete, vakauta na nomu imeli ki na [e-mail].

Vunau kei na Veiyalayalati 84:20–21.Na gauna cava beka a vakila kina na nomu matavuvale “na kaukauwa ni bula vakalou” ka a vakatakilai mai ena dua na cakacaka vakalotu me vaka na papitaiso se na sakaramede? Ena rawa beka ni o veivosakitaka na sala e kauta mai kina na kaukauwa ni Kalou ki na noda bula na veicakacaka vakalotu oqo. O rawa talega ni vakaraitaka tu e dua na iyaloyalo ni dua na valetabu ka veivosakitaka na sala e solia kina vei keda na cakacaka vakalotu ni valetabu na ikuri ni kaukauwa meda yaco me vakataka na iVakabula. O na gadreva beka mo lagata e dua na sere me baleta na matabete, me vaka na “Matabete Sa Lesu Mai” (iVolanisere ni Gonelalai, 60), ka veivosakitaka na veika e vakavulica na sere oqo me baleta na matabete.

Vunau kei na Veiyalayalati 84:43–44.O na rawa ni vakarautaka vata e dua na kakana se dua na ivakalomavinaka ka vakatoka yadua na veitikina ena dua na vosa se na malanivosa mai na tikina e 44. Na cava e bibi kina meda okata na veitikina kece sara? Na cava e bibi kina meda bula ena vosa kecega ni Kalou?

Vunau kei na Veiyalayalati 84:98–102.Na cava eda vulica baleti Jisu Karisito mai na “sere vou” (tikina e 98) ena veitikina oqo? Na cava e rawa ni da cakava ena noda gauna oqo me vakayacori kina na ituvaki eso e vakamacalataki ena sere oqo?

Vunau kei na Veiyalayalati 84:106–10.E rawa vakacava me “veivakatataki cake vata” na noda matavuvale mai na isolisoli kei na sasaga eso ni “veitikina kece sara”? (tikina e 110).

Me baleta eso tale na vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Me Baleti Ira na Lalai.

Sere vakaturi: “Matabete Sa Lesu Mai,” iVolanisere ni Gonelalai, 60; raica talega na “Vakasama Eso me Vakatorocaketaka na Vuli iVolanikalou ni Nomu Matavuvale.”

Vakatorocaketaki Noda Veivakavulici

Solia ka vakamuria na veisureti me cakacakataki. Ni o sureta na nomu matavuvale me cakacakataka na veika era sa vulica tiko, o sa vakaraitaka tiko vei ira ni kosipeli e sa ka me bulataki, sega walega ni veivosakitaki. Na cava o rawa ni sureti ira kina mera cakacakataka mai na nomu vulica na Vunau kei na Veiyalayalati 84?

Valetabu e Roma Itali