Veivakalesuimai, mai vei Liz Lemon Swindle

26 ni Jiulai–1 ni Okosita

Vunau kei na Veiyalayalati 84

“Na Kaukauwa ni Bula va-Kalou”

Ni o wilika na Vunau kei na Veiyalayalati 84, na dina cava soti e sa veivakauqeti mo vakadreta vei ira na gone o vakavulica? Vola na vakasama eso e yaco mai vei iko mai vua na Yalo Tabu.

Vola na Veika o Vakauqeti Kina

Sureta na Veiwasei

Kerea na gone mera wasea na veika era kila tu me baleta na matabete. Sa rawa ni o vakaraitaka na iyaloyalo ni dua ka vakalougatataki tiko ena kaukauwa ni matabete, vaka na iVola ni iYaloyalo Vakosipeli, naba 103–10, ka tarogi ira na gone ena sala e vakalougatataka kina na matavuvale na matabete.

Vakavulica na iVunau: Gone Sobu

Vunau kei na Veiyalayalati 84:19–22, 26–27

Na matabete sai koya na kaukauwa ni Kalou.

Era sa kila tu li na gone o vakavulica na inaki eso ni matabete? Ena Vunau kei na Veiyalayalati 84, sa vakatakila na Turaga e dua na inaki: me vukei keda ni lesu tale vua na Tamada Vakalomalagi. (Mo vulica eso tale, raica na Gospel Topics, “Priesthood,” topics.ChurchofJesusChrist.org.)

iTaviqaravi e Rawa ni Caka

• Wilika na Vunau kei na Veiyalayalati 84:20, ka kerea na gone mera tucake ni ra rogoca na vosa “cakacaka vakalotu.” Me vukei ira mera kila na ibalebale ni cakacaka vakalotu, vakaraitaka na iyaloyalo eso ni cakacaka vakalotu ni matabete, vaka na iVola ni iYaloyalo Vakosipeli, naba 103–8, ka kerea na gone mera vakamacalataka na ka e yaco tiko ena iyaloyalo yadua (raica talega na iDusidusi ki na iVolanikalou, “Cakacaka Vakalotu,” scriptures.ChurchofJesusChrist.org). Vakamacalataka ni sa solia vei keda na Tamada Vakalomalagi na veicakacaka vakalotu oqo me vukei keda ni lesu tale ka bula vata kei Koya.

• Me ra qai rokataka na gone na draunipepa ni itaviqaravi. Ni ra vakayacora, vakamacalataka na veimataqali cakacaka vakalotu ni matabete e vakaraitaki tu ena draunipepa kei na vuna o vakavinavinakataka kina na veicakacaka vakalotu oya.

Vunau kei na Veiyalayalati 84:77

Au sa weka i Jisu ni’u muri Koya tu.

O rawa vakacava ni vukea na gone mera kila ni sa lomani keda vakalevu cake na iVakabula mai na nona lomani keda e dua na itokani lomani?

iTaviqaravi e Rawa ni Caka

• Vakaraitaka e dua na iyaloyalo ni iVakabula ni ko wilika na Vunau kei na Veiyalayalati 84:77. Sureta na gone mera dusia na iyaloyalo ni iVakabula ena veigauna era rogoca kina na vosa “wekaqu.” Vakamacalataka ni gauna eda saga kina ni muria na ivunau, eda sa vakaraitaka vei Jisu ni da lomani Koya. Wasea na cava e kena ibalebale vei iko me sa wekamu o Jisu.

• Vukea na gone mera vola eso na ka era rawa ni cakava me vakaraitaka ki na nodra itokani ni ra lomani ira. Na cava e cakava o Jisu me vakaraitaka ni sa wekada o Koya? Na cava eda rawa ni cakava me vakaraitaka vua na iVakabula ni da Wekana? Lagata vata e dua na sere baleti Jisu, vaka na “Jisu sa Wekada Ga” (Volanisere ni Gonelalai, 37).

Vunau kei na Veiyalayalati 84:88

Sa dau vukei ira na Nona daukaulotu na Tamada Vakalomalagi.

Na vakasama ni o na dua na daukaulotu ena dua na siga sa rawa ni veivakayavalati ia e veivakayalolailaitaki talega ki na so na gone. Vunau kei na Veiyalayalati 84:88 e rawa ni vakavulici ira ena sala e vukei ira kina na Tamada Vakalomalagi o ira mera vunautaka na Nona kosipeli.

iTaviqaravi e Rawa ni Caka

• Vukea na gone mera vakasamataki ira na daukaulotu era kila. Tukuna vei ira ni sa cakava na Tamada Vakalomalagi e dua na yalayala vuni vei ira na daukaulotu. Wilika na Vunau kei na Veiyalayalati 84:88, ka vukea na gone mera vakasamataka na veivalavala e salavata kei na yalayala eso ena tikina oqo. Tukuna e dua na gauna o a qarava voli kina na Turaga ka vakila ni sa tiko vata kei iko o Koya, me vaka e vakamacalataki ena tikina 88.

• Wasea na italanoa ni gonetagane yabaki va ena vosa nei Elder Takashi Wada “Kana Magiti ena Vosa i Karisito” (Ensign se Liaona, Me 2019, 38 – 40). Vukea na gone yadua me vakasamataka e dua na ka era rawa ni tukuna me wasei kina na nodra ivakadinadina ki vua e dua—vaka na wasei ni dua na yavu ni vakabauta. Kerea na gone yadua me vakalecalecataka ni wasea tiko na kosipeli ki na dua na itokani. Vakadinadinataka ni sa dau vukei keda na Tamada Vakalomalagi me kilai na ka me tukuni ni da veivosakitaka na kosipeli kei ira tale eso.

Vakavulica na iVunau: Gone Qase Cake

Vunau kei na Veiyalayalati 84:4–5, 18–28, 30

Na cakacaka vakalotu sa vukea na noqu vakarautaki au ni laki bula vata tale na Tamada Vakalomalagi.

Ni ra sa qase cake, sa rawa ni ra vakaitavi na gone o vakavulica ena levu sara na cakacaka vakalotu ni matabete, oka kina na veipapitaisotaki kei na veivakadeitaki ena vukudra na mate ena valetabu. O rawa vakacava ni vukei ira me kila vakavinaka na inaki kei na kaukauwa ni cakacaka vakalotu ni matabete?

iTaviqaravi e Rawa ni Caka

• Vola ena papa Matabete i Eroni kei na Matabete i Melikiseteki . Wilika vata na Vunau kei na Veiyalayalati 84:18, 26–28, 30, ka vukea na gone mera vola na dina eso era sa vulica me baleta na Matabete i Eroni mai na veitikina oqo. Qai wilika vata na Vunau kei na Veiyalayalati 84:18–25, ka vola na dina eso me baleta na Matabete i Melikiseteki.

• Sureta na gone mera vola na cakacaka vakalotu eso era sa vakaitavi kina se vakadinadinataka, vaka na veipapitaisotaki, veivakadeitaki, veivakalougatataki ni matabete, se na sakaramede. Kerea mera wasea na ka era sotava ena veicakacaka vakalotu oqo. Wilika vata na Vunau kei na Veiyalayalati 84:20 (vukea mera kila vakavinaka na veivosa tawamatata). Cava na vuna e sureti keda kina na Turaga meda vakaitavi ena cakacaka vakalotu eso? E vukei keda vakacava na matabete meda lesu tale vua na Tamada Vakalomalagi?

  

  Na cakacaka vakalotu e vukei keda me nanuma na noda yalayala vua na Kalou.

• Cakava e dua na vakilakila mai na iyaloyalo ni dua na valetabu. Wilika vata kei ira na gone na Vunau kei na Veiyalayalati 84:5, ka kerea mera vakarogoca na ka e vakarota na Turaga mera tara na Yalododonu. Solia ki na gone yadua e dua na tiki ni vakilakila, ka kerea mera wasea e dua na ka era rawa ni cakava mera vakavakarau kina ni curuma na valetabu.

Vunau kei na Veiyalayalati 84:64–72, 81–88

Na Turaga sa dau taqomaki ka vakaukauwataki ira na na daukaulotu.

Sa tiko ena veitikina oqo na yalayala eso a cakava na Turaga kivei ira a kaciva me vunautaka na kosipeli. Na veiyalayala oqo sa rawa talega ni vakauqeti ira na gone ni ra wasea na kosipeli i Jisu Karisito vei ira na tani.

iTaviqaravi e Rawa ni Caka

• Veisasataki ira na gone vakailawalawa, ka solia ki na veisa yadua e vica na tikina mera wilika mai na Vunau kei na Veiyalayalati 84:64–72, 81–88. Sureta mera vakaraica na yalayala eso sa solia na Turaga vei ira ka wasea na kosipeli. Kerea mera wasea na ka era sa vulica ki na kalasi. Vukea na gone mera vakasamataki ira na tamata era kila, se tamata ena ivolanikalou, ka ciqoma na veivuke ni Turaga ni ra vunautaka voli na kosipeli (vakataki Samuela na Lemanaiti [raica na Ilamani 13:2–4; 16:6–7] se o Amoni [raica na Alama 17:32–38]). Wasea na ka e sotavi o a vakila kina na veitokoni ni Turaga ena nomu a qaravi Koya voli.

• Kauta mai na bilo se koniteina tautauvata ki na kalasi. Vola ena veitiki ni pepa na sala eso era rawa kina oqo ni daukaulotu na gone, ka biuta na tiki ni pepa yadua ki na dua na bilo. Tuvai ira veivolekati na bilo ena vuloa, ni vuki cake na vanua e tadola. Sureta na gone mera veivukevuke ni kolotaka e dua na iyaya lailai ki na dua vei ira na bilo ka qai matanataka na ka e tiko ena pepa ena bilo oya. E rawa ni vukei keda vakacava na Tamada Vakalomalagi ni da wasea na kosipeli vei ira na tani, ena gauna mada ga e dredre beka kina se da lomataqaya?

• Vukea na gone mera raica ni da sa lewe taucoko ni Lotu i Jisu Karisito ni Yalododonu Edaidai ena vuku ni cakacaka ni kaulotu—era a vakavulica na kosipeli na daukaulotu kivei keda, noda itubutubu, se na tubuda. Tukuna vei ira na gone na sala era a vukei iko kina se tubumu na daukaulotu me ciqoma na kosipeli. Me ra qai wasea na gone eso na ka vata oya? Vakauqeta mera taroga na nodra itubutubu se ra a vulica vakacava na kosipeli na imatai ni lewe ni Lotu ena nodra matavuvale.

Vakauqeta na Vuli e Vale

Sureta na gone mera cakava e dua na ka ena macawa oqo ni wasea na kosipeli ki na dua ena nodra itikotiko se itokani. Vakauqeta mera kerea na veivuke ni Tamada Vakalomalagi ka sarava tu na ka e vakayacora me vukei ira kina.

Vakatorocaketaki Noda Veivakavulici

Okata na wakilakila. “Era vuli vakavinaka cake e levu na gone (kei na qase) ni vakayagataki e vica na wakilakila. Raica na sala eso me vukei kina na gone mera vakayagataka na nodra wakilakila ni rai, rorogo, kei na tatara ni ra vuli” (Veituberi ena iVakarau ni iVakabula, 25).