9–15 ni Okosita

Vunau kei na Veiyalayalati 88

“Dou Tauyavutaka … e dua na Vale ni Kalou”

Vunau kei na Veiyalayalati 88:118 e vakasalataka, “Dou veivakavulici vakataki kemudou ena vosa ni yalomatua.” Na “vosa ni yalomatua” cava so ena Vunau kei na Veiyalayalati 88 e veiganiti tu kei ira na gone o vakavulica?

Vola na Veika o Vakauqeti Kina

Sureta na Veiwasei

Tukuna vei ira na gone ni vinakata na Tamada Vakalomalagi kei Jisu Karisito meda vuli tikoga ena noda bula taucoko. Qai kerea mera wasea e dua na ka era sa vulica tiko e vale, koronivuli, se valenilotu.

Vakavulica na iVunau: Gone Sobu

Vunau kei na Veiyalayalati 88:63

Sa vinakata na Kalou me’u voleka Vua.

Na cava o rawa ni cakava me vukei ira na gone o vakavulica mera vakila na Kalou ena nodra bula?

iTaviqaravi e Rawa ni Caka

• Ni o wilika na Vunau kei na Veiyalayalati 88:63, sureta na gone mera matanataka na vosa eso era rogoca. Me ivakaraitaki, rawa ni ra vakalecalecataka mo vakasaqara e dua na ka se tukituki.

• Kerea e dua na gone me taura tu na iyaloyalo kei Jisu ena muailiu ni rumu ni ra duri tu na vo ni gone ena muaimuri ni rumu. Sureta na gone mera kalawa ki liu ena veigauna o kaya e dua na ka eda rawa ni cakava meda voleka kina vua na iVakabula ka kalawa lesu ena veigauna o kaya e dua na ka e vakayawaki keda mai vua na iVakabula. Wasea na nomu ivakadinadina ni gauna eda saga me voleka kina vua na Turaga, e dau toro voleka mai veikeda o Koya.

Vunau kei na Veiyalayalati 88:118

Sa vinakata na Tamada Vakalomalagi me’u vuli.

“Na vuli sa dua na tiki bibi ni ituvatuva ni Tamada Vakalomalagi me vukei iko mo vakataki Koya vakalevu cake. … Na vuli o rawata rawa ena yaga sara vei iko ena gauna ni bula oqo kei na bula sa roro tiko mai” (Ai Sakisaki ni iTabagone, 9).

iTaviqaravi e Rawa ni Caka

• Vakaraitaka na iyaloyalo ni dua na koronivuli, se droinitaka e dua ena papa, ka sureta na gone mera vakamacalataka se cava na koronivuli kei na cava e dau yaco ekea. Tukuna na koronivuli a tekivutaka o Josefa Simici (raica na “Wase 31: Na Vosa ni Vuku,” iTalanoa ni Vunau kei na Veiyalayalati, 119–22). Vakaraitaka vei ira na gone na iyaloyalo ni dua na vale, valenilotu, kei na valetabu, ka tarogi ira se tautauvata vakacava kei na koronivuli na veitikotiko oqo.

• Lagata e dua na sere ni vuli, vaka na “Vaqaqara ka Masu” (Volanisere ni Gonelalai,, 66). Taroga na gone na cava era taleitaka tu ni vulica.

• Wilika na Vunau kei na Veiyalayalati 88:118, ka vakadreta na malanivosa “dou veivakavulici vakataki kemudou.” Wasea eso na rai yalomatua o sa vulica mai vei ira yadua na gone ena nomu kalasi, ka sureta mera wasea na rai yalomatua era sa vulica.

  

  Sa dodonu me da vakasaqara na vuku kei na vuli.

Vunau kei na Veiyalayalati 88:119

Na valetabu e sa vale ni Kalou

Navuca na sala o na vukea kina na gone mera taleitaka na valetabu ka gadreva ni qarava ekea na Turaga ni ra sa vakavakarau tu.

iTaviqaravi e Rawa ni Caka

• Vakaraitaka vei ira na gone na ivakarau ni kena caka e dua na “dudukilagi” ni valetabu ena laveti ni ligadra kei na vakasotari vata ni nodra iqaqalo e cake. Wilika na Vunau kei na Veiyalayalati 88:119, ka kerea mera cakava e dua na dudukilagi ena veigauna o kaya kina na vosa “vale.” Vakamacalataka ni a vinakata na Tamada Vakalomalagi me tara o Josefa Simici kei ira na Yalododonu e dua na valetabu, se na “vale ni Kalou.” Vakaraitaka na iyaloyalo ni dua na valetabu voleka ni o veivosakitaka na kedrau duidui na valetabu, kei na vale ni Lotu.

• Wasea na nomu ivakadinadina me baleta na valetabu ka lagata vata e dua na sere ni valetabu, vaka na “Raica na Valetabu” (Volanisere ni Gonelalai,, 99). Sureta na gone mera droinitaka e dua na kedra iyaloyalo ni ra lako tiko ki na valetabu.

Vakavulica na iVunau: Gone Qase Cake

Vunau kei na Veiyalayalati 88:68, 74

Sa rawa ni savai au o Jisu Karisito mai na ivalavala ca.

Me da vakatabui sai koya meda savai ka taucoko tu. O rawa ni vukea vakacava na gone o vakavulica mera kila vakamatata ni sa rawa ni ra vakatabui ni ra muri Jisu Karisito?

iTaviqaravi e Rawa ni Caka

• Sureta e dua na gone me wilika icake na Vunau kei na Veiyalayalati 88:68 ka dua tale me wilika na tikina e 74. Kerea na gone mera vakarogoca e dua na malanivosa e tiko ruarua ena veitikina oqo. E rawa vakacava ni da “vakatabui” keda? (Ke gadrevi, vukea na gone mera raica na “Sanctification” ena Guide to the Scriptures.) Droinitaka e dua na iyaloyalo ni uto, na liga, kei na yava ena papa. Vukea na gone mera vakasamataka se cava e kena ibalebale meda “vakasavasavataka” ka “savata” na lomada, ligada, kei na yavada. E vukei keda vakacava na iVakabula meda vakayacora oqo? Eda rawa ni vakayagataka vakacava na lomada, ligada, kei na yavada meda vakataki Jisu vakalevu cake?

• Vakamacalataka ni sa vinakata na Turaga mera vakatabui na Nona tamata ni bera ni ra lako ki na valetabu. Navuca mo sureta e dua na cauravou se goneyalewa ka tiko vua e dua na ivolatara ni valetabu me sikova na kalasi. Sureti koya me vakaraitaka vei ira na gone na irairai ni dua na ivolatara, veivosakitaka na ka e vakayacori mera bula kilikili kaya, ka wasea na vuna e bibi kina me tiko e dua na ivolatara ni valetabu kevaka mada ga eda sega ni volekata tu e dua na valetabu.

Vunau kei na Veiyalayalati 88:77–80, 118

Sa vinakata na Tamada Vakalomalagi me’u vuli.

O rawa ni vukea na gone mera kila vakavinaka ni vulici ruarua ni veika vakayalo ka vakayago sa rawa ni vakarautaki ira me qarava na Turaga.

iTaviqaravi e Rawa ni Caka

• Vola ena papa Cava, Vuna, kei na Sala. Sureti ira na gone mera veisasa ka wilika na Vunau kei na Veiyalayalati 88:77–79 ka cakava e dua na lisi ni cava e vinakata na Turaga meda vulica. Qai kerea mera vakaraica na tikina e 80 me raici na vuna e vinakata kina o Koya meda vuli. Rawa mera qai vakaraica na tikina e 118 me raici na sala meda vuli kina. Na cava eda vulica mai na veitikina oqo ena nona rai na Turaga me baleta na vulika kei na vuli?

• Vakaraitaka e dua na mape ni vuravura, ka wilika vata na Vunau kei na Veiyalayalati 88:79. Cava na vuna e bibi kina vei keda na vulici ni veivanua tale eso kei na kedra itovo? Ke o iko se o ira na gone o vakatavulica sa sikova se bula oti ena dua tale na vanua, vakaraitaka na veika e matataka na kedra itovo, ka wasea na veika o vulica.

Vunau kei na Veiyalayalati 88:119–26

“Dou tauyavutaka … e dua na vale ni Kalou.”

Sa rawa ni idusidusi yaga vei keda na ivakasala ni Turaga me baleta na “vale ni Kalou” ni da taracake noda bula kei na noda itikotiko.

iTaviqaravi e Rawa ni Caka

• Sureta na gone mera digitaka e vitu na vosa e vakamacalataka na nodra itikotiko se dua tale na itikotiko era sa sikova. Qai kerea mera wilika na Vunau kei na Veiyalayalati 88:119 ka raica na vosa e vitu e vakayagataka na Turaga me vakamacalataka kina na Nona vale. Vukea na gone mera vakasamataka na sala eso era rawa ni cakava kina na nodra itikotiko me “vale ni Kalou.”

• Solia ki na gone yadua e dua na malanivosa mai na Vunau kei na Veiyalayalati 88:119–26 mera droinitaka. Ni ra vakaraitaka vei ira vakai ira na nodra iyaloyalo, mera qai vaqara na gone na tikina eso me vakilakilai kina na malanivosa cava e matataka na iyaloyalo yadua.

• Vola ena papa Cakava kei na Kua. Sureta na gone mera wilika na Vunau kei na Veiyalayalati 88:119–26 ka vola na veika e vinakata na Turaga mera cakava na Yalododonu se kua me vakarautaki kina na vuli ena valetabu. Sa rawa mera vakaraica na veivosa tawamatata ena dikiseniri. Sureta na gone mera digitaka e dua na ka era na tekivu cakava se dua na ka era na muduka.

Vakauqeta na Vuli e Vale

Sureta na gone mera vola se droinitaka e dua na ka era sa vulica ka ra na via wasea ki na nodra matavuvale.

Vakatorocaketaki Noda Veivakavulici

Vukea na gonelalai mera vakaitavi ena veivosaki vakosipeli. O na rairai gadreva mo vakasamataka eso na sala me vakayacori kina na veivosaki vakosipeli kei ira na gone sobu. Me ivakaraitaki, o na kauta mai ki na kalasi e dua na ka era rawa ni taura na gone ni sa nodra gauna ni vosa.