Au sa Raica na Luve ni Tamata e Liga i Matau ni Kalou, mai vei Walter Rane

23–29 ni Okosita

Vunau kei na Veiyalayalati 93

“Rawata na Nona Veivakataucokotaki”

Na gone o vakavulica era yalo vakamareqeti ka luvena tagane kei na luvena yalewa na iTubutubu Vakalomalagi ka bula vata kei Rau ni bera ni ra lako mai ki vuravura. Oti nodra vulica na Vunau kei na Veiyalayalati 93, na cava beka o vakauqeti mo cakava mo vukei ira kina na gone oqo me ra tubu cake “ena rarama kei na dina”? (tikina e 40).

Vola na Veika o Vakauqeti Kina

Sureta na Veiwasei

Vakaraitaka na iyaloyalo eso ni iVakabula (me vakataka ni tiko ena Gospel Art Book se mekesini ni Lotu ), ka kerei ira na gone me ra wasea na veika era kila me baleti Koya. O ira na gone qase cake e rawa ni ra wasea e dua na tikina mai na Vunau kei na Veiyalayalati 93 ka vukei ira mera vulica me baleti Jisu Karisito.

Vakavulica na iVunau: Gone Sobu

Vunau kei na Veiyalayalati 93:2–21

O Jisu Karisito na Luve ni Kalou.

Sa ka bibi vei ira na gone o vakavulica mera kila o cei o Jisu Karisito kei na cava na vuna era muri Koya kina. Na dina me baleti Jisu Karisito e kune ena iwase 93 e rawa ni veivuke.

Eda na ciqoma na rarama i Jisu Karisito ni da sa maroroya na Nona ivakaro.

iTaviqaravi e Rawa ni Caka

• Digitaka e vica na dina o sa vulica me baleta na iVakabula ena iwase 93 e veivakauqeti vei iko. Me baleta na dina yadua o digitaka, wilika vei ira na gone na tikina e kunei kina, ka solia vei ira e dua na vosa bibi me ra vakarogoca ena nomuni wilika. Wasea vakalekaleka na nomu ivakadinadina ni iVakabula, ka solia vei ira na gone me ra wasea na nodra. Na ituvatuva ni dina e tarava e rawa ni soli vakasama vei iko:

  O Jisu Karisito e vakaraitaka na cakacaka nei Tamana (tikina e 5).

  O Jisu Karisito na Rarama kei Vuravura (tikina e 9).

  O Jisu Karisito e Dauniveibuli kei vuravura (tikina e 10).

  O Jisu Karisito sa soli vua na kaukauwa kecega mai lomalagi kei vuravura (tikina e 17).

  O Jisu Karisito a tiko vata kei na Kalou mai na ivakatekivu (tikina e 21).

• Kerei ira na gone mera vakarogoca e dua na ka era sa vulica me baleta na iVakabula ni ko sa umana na nomu vosa eso ena dina e vakavulici ena iwase 93. (E rawa talega mo vakayagataka na “Wase 33: iVakatakila me baleti Jisu Karisito” [iTalanoa ni Vunau kei na Veiyalayalati, 126–27].)

Vunau kei na Veiyalayalati 93:23, 29

Au a tiko vata kei na Tamada Vakalomalagi ni se bera niu lako mai ki vuravura.

Na cava na vuna me bibi kina na nodra vukei o ira na gone o vakavulica me ra kila ni ra a bula tu vata kei na Tamada Vakalomalagi ni se bera ni ra qai sucu mai? Sa vakalougatataki iko vakacava na kilai ni dina oqo?

iTaviqaravi e Rawa ni Caka

• Tokaruataka vatataka kei ira na gone na vosa “Dou a bula vata talega kei na Tamada mai na ivakatekivu” (Vunau kei na Veiyalayalati na 93:23). Vakamacalataka ni se bera ni da sucu mai e vuravura, eda a bula tu vata kei na Tamada Vakalomalagi mai lomalagi. Lagata vata na “Au Luve ni Kalou” se “I Lived in Heaven” (iVolanisere ni Lalai, 2, 4).

• Sureti ira na gone me ra rokataka na tabana ni itaviqaravi ka droinitaka na kedra iyaloyalo vata kei na Tamada Vakalomalagi kei Jisu Karisito mai na bula taumada. Wasea na nomu ivakadinadina ni Kalou e lomani keda kece ka da Luvena kece.

Vakavulica na iVunau: Gone Qase Cake

Vunau kei na Veiyalayalati 93:2–21

O Jisu Karisito na Luve ni Kalou.

Na levu ni noda kila me baleti Jisu Karisito, na levu cake ni noda vinakata me da qaravi Koya vakaidina ka titobu ka lako mai vua na Tamada ena Vukuna (raica na Vunau kei na Veiyalayalati 93:19).

iTaviqaravi e Rawa ni Caka

• Vakaraitaka na iyaloyalo ni iVakabula, ka tarogi ira na gone na cava na vuna e bibi kina me da kila me baleti Jisu Karisito. Sureti ira mera vakasaqara na ikuri ni kena isau ena Vunau kei na Veiyalayalati 93:19. Sureti ira me ra vakasamataka mada e dua na sala e rawa ni ra vulica vakalevu cake me baleti Jisu ena loma ni macawa, ka solia vei ira e dua na gauna me ra wasea na nodra vakasama.

• Vakasamataka e dua na sala maqosa me vakayaloqaqataki ira na gone me ra wilika me baleta na iVakabula ena iwase 93. E rawa mo vola ena tiki ni pepa e vica na itukutuku ki na tikina mai na iwase 93 e vakavuvulitaka na veika dina me baleti Jisu Karisito (me kena ivakaraitaki, raica na tikina e 5, 9–10, 17, 21). Biuta na tiki ni pepa ki na dua na koniteina, ka kerei ira na gone me ra veivukevuke ena kena digitaki e dua me wilika na tiki ni ivolanikalou ki na kalasi. Na cava eda sa vulica baleti Jisu Karisito mai na veitikina oqo?

Vunau kei na Veiyalayalati 93:23, 29, 38

Au a bula vata kei na Tamada Vakalomalagi ni se bera niu lako mai ki vuravura.

Na iVakabula e a vakamatatataka na tolu na iyatu ena wase 93 ni da a tu vata kei na Kalou “mai na ivakatekivu” (tikina 23, 29, 38). Na cava na vuna e vinakata o Koya meda kila na ka oqo? Ena vakalougatataki ira vakacava na gone o vakavulica na kilai ni dina oqo?

iTaviqaravi e Rawa ni Caka

• Wilika vata na Vunau kei na Veiyalayalati 93:23, 29, 38 , ka sureti ira na gone me ra vaqara e dua na dina me baleti ira e tokaruataki ena veitikina oqo. Kerei ira na gone me ra wasea na veika era sa kila me baleta na noda bula vata kei na Tamada Vakalomalagi ni se bera ni da sucu mai. Solia ki na gone yadua e dua vei ira na tiki ni ivolanikalou oqo, ka vukei ira me ra kunea e dua na ivolanikalou oqo e vakatavulica me baleta na bula ni bera ni da lako mai ki vuravura: Jeremaia 1:5; Vunau kei na Veiyalayalati 138:53–56; Mosese 3:5; Epaarama 3:22–26.

• Lagata vata na “Au Luve ni Kalou” se “I Lived in Heaven” (iVolanisere ni Lalai, 2, 4). Na dina cava soti eda vulica mai na sere oqo me baleta na noda inaki ni lako mai ki vuravura?

Vunau kei na Veiyalayalati 93:24

Na dina sa veika ena kedra ituvaki ni veigauna sa oti, gauna oqo, kei na veigauna e se bera mai.

E vuqa na duidui ni nanuma ni vuravura me baleta na dina kei na kena ivakarau me ra vakasaqara kina. E rawa vakacava mo vukei ira na gone o vakavulica me ra kila ni dina e dina ga se cava ga na veika me kaya eso ia na Tamada Vakalomalagi e kila na dina taucoko?

iTaviqaravi e Rawa ni Caka

• Vola na vosa dina ena vava ni volavola, ka kerei ira na gone me ra vola e dua na ivakamacala e yasana. Wilika vata e vakamacalataka vakacava na Turaga na dina ena Vunau kei na Veiyalayalati 93:24. Lagata e dua na serenilotu me baleta na dina, me vaka “Na Cava Na Dina?” (Sere ni Lotu, naba 166), ka sureti ira na gone me ra vakasaqara ena sere na veisala tale eso me vakamacalataki kina na dina.

• Me vukei ira na gone me ra bulataka na dina e tiko ena Vunau kei na Veiyalayalati 93, vola e vica na tiki ni ivolanikalou mai na iwase oqo ena tiki ni pepa eso. Ena so tale na tiki ni pepa, vola kina na dina ni veitikina yadua oqo era vakavulica. Sureti ira na gone mera cakacaka vata mera wilika na tikina ka veidonui kei na dina ki na veitikina era sa wilika. Na cava na vuna eda vakavinavinaka ni tiko noda kila me baleta na dina?

Vakauqeta na Vuli e Vale

Sureti ira na gone me ra vola se droinitaka e dua na ka era sa vulica ena kalasi ka wasea vei ira na nodra matavuvale ni ra sa lesu ki vale.

Vakatorocaketaki Noda Veivakavulici

Vukei ira na gone me ra kila ni sa tiko na Yalo. Me vaka ni o sotava na veika vakayalo vata kei ira na gone (me kena ivakaraitaki, ni wiliki na ivolanikalou vata kei ira, rogoca na nodra ivakadinadina, se lagalaga vata), vukei ira mera kila na veivakauqeti ni Yalo Tabu.