O Karisito kei na Cauravou Vutuniyau, mai vei Heinrich Hoffman

19–25 ni Jiulai

Vunau kei na Veiyalayalati 81–83

Ko “Koya Sa Soli Vakalevu Vua ena Gadrevi Vakalevu Mai Vua”

E rawa vakacava ni vukei ira na gone o vakavulica na vei ivakatakila ena Vunau kei na Veiyalayalati 81–83 mera caka vinaka ki na nodra matavuvale kei na veitokani?

Vola na Veika o Vakauqeti Kina

Sureta na Veiwasei

Sureta na gone me ra wasea e dua na ka era kitaka me vukea kina e dua ena macawa oqo. E rawa vakacava ni vukei keda na nodra qaravi na tani meda vakataka na noda iVakabula?

Vakavulica na iVunau: Gone Sobu

Vunau kei na Veiyalayalati 81:3

Sa dodonu me’u masu tikoga.

Ni kacivi Veretariki G. Viliame na Turaga me dua na daunivakasala kivua na Parofita o Josefa Simici, a vakasalataki Veretariki me “yalodina … tikoga ena masumasu.”

iTaviqaravi e Rawa ni Caka

• Wilika vei ira na gone na ivakasala ni Turaga mera “yalodina … tikoga ena masumasu, vakadomoilevu kei na masu ni yalomu, ena matanalevu kei na tikina vuni” (Vunau kei na veiyalayalati na 81:3). Vakamacalataka na ibalebale ni masu ena vu ni yaloda, ka wasea e dua na nomu ivakaraitaki. Vukea na gone mera vakasamataka na gauna eso era rawa ni masu kina “ena matanalevu kei na tikina vuni.”

• Vakatavulici ira na gone ena ivakarau ni masu. Vakadreta ni ra rawa ni vakavinavinakataka na Tamada Vakalomalagi ena nodra vakalougatataki ka kerea Vua na ka era gadreva. Dua na sere me baleta na masu, vaka na “Vinaka Tamaqu Dauloloma” (iVolanisere ni Lalai, 9), e rawa ni vukei ira na gone ni kila na ka mera kaya ena nodra masu. Solia na gauna ki na gone yadua me cavuta e dua na masu lekaleka.

• Kerea na gone mera vakasamataka na veika era na vakavinavinakataka kina na Tamada Vakalomalagi se kerea Vua. Me ra qai droinitaka na iyaloyalo ni veika oqo ka wasea ki na kalasi.

Vunau kei na Veiyalayalati 81:5; 82:19

Au rawa ni qaravi ira na tiko wavoliti au.

Sa kila tu na Tamada Vakalomalagi nodra gagadre yadua na Luvena, ka sa dau vakayagataki ira na tamata eso—vakai ira na gone o vakavulica—me veivuke ni sotava na veigagadre oya. E rawa vakacava ni o vukea na gone mera vakila na gagadre ni tani ka qaravi ira?

iTaviqaravi e Rawa ni Caka

• Wilika na Vunau kei na Veiyalayalati 81:5 vei ira na gone, ka vukei ira mera kila vakamatata na malanivosa vaka na “vukei ira sa malumalumu” ka “laveta cake na liga sa wadamele.” Me ra qai matanataka na sala eso eda rawa ni cakava kina na ka e kerea na Turaga ena tikina oqo. Vakayagataka nai yaloyalo se vidio mo tukuna na italanoa eso kei Jisu Karisito ni qaravi ira tiko na tani (raica na iVola ni iYaloyalo Vakosipeli, naba. 41, 42, 46, 47, 55; biblevideos.ChurchofJesusChrist.org). E rawa vakacava ni da muria na ivakaraitaki ni iVakabula ena nodra vukei na tani?

• Lagata nai ka va ni qaqa ni “Au Vakilai Koya” (iVolanisere ni Gonelalai, 42-43) se dua tale na sere baleta na veiqaravi. Tukuna na gauna e a vukei iko kina e dua ka vakila na loloma ni iVakabula ena nona qaravi iko.

• Wilika na Vunau kei na Veiyalayalati 82:19 vei ira na gone, ka vakadreta na malanivosa “me vukea na wekana.” Vakamacalataka ni sa kena ibalebale na caka ni veika mera vukei kina na wekada—oka kina noda matavuvale. Vukea na gone me ra vakasamataka na sala eso era rawa ni qarava kina e dua ena macawa oqo.

  

  Sa kerea na Kalou meda qaravi ira na tani me ivakaraitaki ni noda loloma ki Vua.

Vunau kei na Veiyalayalati 82:10

Sa yalataka na Kalou na veivakalougatataki niu sa talairawarawa Vua.

Ni ra tubu tiko, era na rairai lomatarotaro na gone ena vuna e solia kina vei keda na Kalou e vuqa na ivakaro. Sa rawa mo vukei ira na gone mera kila vakavinaka ni sa solia vei keda na ivakaro me vakalougatataki keda.

iTaviqaravi e Rawa ni Caka

• Vukea na gone mera vakasamataka na ivakaro eso sa solia vei keda na Kalou (raica, me ivakaraitaki, Lako Yani 20:4–17; Maciu 22:37–39; Vunau kei na Veiyalayalati 89:5–17). Droinitaka nai yaloyalo eso ena papa me vukea nodra kila vakavinaka ka nanuma na gone na veivakaro oqo. Vakatakila na ivakaraitaki eso e rawa ni vakalougatataki ka taqomaki keda kina na ivakaro ni Kalou.

• Wilika vei ira na gone, “Koi au, na Turaga, au sa vauci ni dou muria na noqu vosa” (Vunau kei na Veiyalayalati 82:10). Kerea na gone mera tokaruataka vakavica vata kei iko na malanivosa oqo, ka vakasamataka na sala eso mo vukei ira kina mera nanuma, vaka nodra sureti mera vakasausau ki na irogorogo ni malanivosa. Vakadinadinataka ni gauna eda talairawarawa kina ki na ivakaro ni Kalou, sa dinata o Koya na Nona yalayala kivei keda.

Vakavulica na iVunau: Gone Qase Cake

Vunau kei na Veiyalayalati 81:3

Au rawa ni masu “vakadomoilevu kei na masu ni [yaloqu].”

O na vakauqeti ira vakacava na gone me ra gole vua na Turaga “ena masu tikoga” ni ra gadreva tu na veivuke?

iTaviqaravi e Rawa ni Caka

• Sureta e dua me wilika na Vunau kei na Veiyalayalati 81:3, ka tarogi ira na gone ena ibalebale ni masu “ni [yalomu].” Wasea e dua na ka ni o masu vakadomoilevu se ena yalomu ka vukei iko kina na Turaga. Kerea talega na gone mera wasea na veika era dui sotava. E rawa vakacava ni vakavolekati keda sara kivua na Tamada Vakalomalagi na masu?

• Wilika se lagata vata kei ira na gone e dua na serenilotu me baleta na masu, vaka na “Bera Ni Ko Gole Yani?” se “Na Masu Lo” (Serenilotu, naba 78, 82). Sureta na gone mera wasea e dua na malanivosa mai na serenilotu e vukei ira mera kila vakavinaka e dua na ka me baleta na masu. Solia na gauna vei ira mera vakasamataka vagumatua na ka era rawa ni cakava mera vakavinakataka kina na nodra masu ka qai vola na nodra vakasama.

Vunau kei na Veiyalayalati 81:5

Sa vinakata na Kalou meu veiqaravi ka vaqaqacotaki ira na vakaleqai tu.

Vukea na gone mera kila vakamatata ni sa vuqa tu na sala era rawa ni qarava kina nodra matavuvale, veitokani, kei na wekadra ena veisiga.

iTaviqaravi e Rawa ni Caka

• Droinitaka nai yaloyalo ni liga kei na duru ena papa. Kerea na gone mera wilika na Vunau kei na Veiyalayalati 81:5 mera vulica na ka e kaya na Turaga me baleta na veitiki ni yago oqo. Sarava na vidio “Pass It On” (ChurchofJesusChrist.org), se wasea na nomu a raica kei ira na gone na tamata ka ra veiqaravi vakai ira. E rawa vakacava ni da kauwaitaki ira vakalevu na vakaleqai ka wavoliti keda tu? Sureta na gone mera qarava mada ga e dua na tamata ena macawa oqo. Ena vakasama ni sala eso ni nodra qaravi na tani, lagata e dua na sere ni veiqaravi, vaka “Na Cakavinaka?” (Serenilotu, naba 131).

• Sureta na gone mera veivukevuke ena vakarautaki ni domino (se so na ka vakatautauvata) ni vakayacani na sala eso era rawa ni qaravi kina na tani. Kerea e dua na gone me vakabalea e dua na domino ka raica na vatukana ki na kena vo. Ena tautauvata vakacava na kena revurevu vei ira na wavoliti keda tu na noda veiqaravi? (Raica talega na vidio “Dominoes,” ChurchofJesusChrist.org.) Talanoataka na kena vakauqeti iko na nona veiqaravi yalololoma e dua mo qarava kina e dua tale.

Vunau kei na Veiyalayalati 82:8–10

Sa yalataka na Kalou na veivakalougatataki niu sa talairawarawa Vua.

Ni ra sa vakararavi dei tu na gone ki na yalayala eso ni Kalou, ena tubu na nodra gagadre ni muria na Nona ivakaro.

iTaviqaravi e Rawa ni Caka

• Sureta na gone mera raitayaloyalotaka ni tiko e dua na nodra itokani ka nanuma tu ni sa rui levu na ivakaro e solia na Kalou. Kerea mera vakasaqara na Vunau kei na Veiyalayalati 82:8–10 ena ka e rawa ni vukea na nodra itokani me kila vakavinaka na vuna e solia kina na Kalou na ivakaro. Wasea na sala e sa vakalougatataki iko kina na ivakaro ni Kalou, ka sureta na gone mera wasea vakakina na nodra nanuma.

• Me vukei ira na gone mera kila vakavinaka na yalayala eso ni Tamada Vakalomalagi vei keda, wasea vakatolu na kalasi, ka solia ki na ilawalawa yadua na ivolanikalou oqo mera wilika: Vunau kei na Veiyalayalati 1:37–38; 82:10; 130:20–21. Sureta mera wasea na ka era vulica me baleta na yalayala eso ni Tamada Vakalomalagi. E vakayaco ka vakacava na noda talairawarawa, ki na veivakalougatataki eda rawa ni ciqoma? Vukea na gone mera vakasamataka na ivakaraitaki eso ni nodra bula se mai na ivolanikalou ni sa vu ni veivakalougatataki mai vua na Kalou na talairawarawa.

• Wasea e dua na ka o sotava e vakadinadinataka na ivakavuvuli eso e vakavulici ena Vunau kei na Veiyalayalati 82:8–10. E yaco vakacava na nomu sa mai vakararavi tu vua na Turaga kei na Nona yalayala?

Vakauqeta na Vuli e Vale

Sureta na gone mera vakasamataka na sala era vinakata tu mera qarava kina e dua ena nodra matavuvale ena macawa oqo. Ena gauna ni lesoni ni macawa ka tarava, mera qai wasea kina na ka era a cakava.

Vakatorocaketaki Noda Veivakavulici

Vukea na gone mera daunivuli vinaka sara. Na veivakavulici e sega ni kena ibalebale walega na votai ni dina. Ia na nodra vukei na tani ena taraicake ni bula rawati ira vakayalo. Mai na kena tukuni tu ga vei ira na gone na sala era rawa ni qarava kina na tani, me ivakaraitaki, vakauqeti ira mera vakasamataka na nodra dui nanuma.