Talei ki na Uto ni iVakatawa, mai vei Simon Dewey

28 June–4 Jiulai

Vunau kei na Veiyalayalati 71–75

“Ena Sega ni Rawata e Dua na Ka na iYaragi Kecega sa Caka me Saqati Kemudrau”

E rawa ni ra vulica e levu na ka na gone o vakavulica ena kalasi, ia era na vulica e levu cake sara ke ra taracake e dua na ivakarau ni vuli ivolanikalou e vale. Navuca na sala o rawa ni vakauqeta ka tokona kina na vulici ni kosipeli e vale.

Vola na Veika o Vakauqeti Kina

Sureta na Veiwasei

Sureta na gone mera dabe wavoki ena vuloa, ka vaqiqica e dua na polo ki na dua vei ira. Kerea na gone oya me wasea e dua na ka se qai vulica wale toka ga me baleta na kosipeli e vale se ena Lalai. Qai sureta na gone oya me vaqiqica na polo vua e dua tale. Me caka tiko ga me yacova ni ra sa vakaitavi kece na gone ena veiwasei.

Vakavulica na iVunau: Gone Sobu

Vunau kei na Veiyalayalati 72:2, 10

Na Turaga e sa kaciva e dua na bisopi me vukei au.

Era na sega tu beka ni kila na gone na veika e dau vakayacora na nodra bisopi me qaravi ira kei na lewe ni tabanalevu tale eso. Sa rawa ni o vukei ira me vakavinavinakataka na veiqaravi ni nodra bisopi.

iTaviqaravi e Rawa ni Caka

• Kauta mai eso na ka ki na kalasi e matataka na itavi eso ni bisopi, vaka na tikidua ni ikatini, na ivolanikalou, se iyaloyalo ni dua na bisopi e soli vakasala tiko (raica na iyaloyalo ena mua ni ituvatuva ni macawa oqo ena Lako Mai, Mo Muri Au—Me Baleta na Tamata Yadua kei na Matavuvale) . Wilika na Vunau kei na veiyalayalati 72:2, ka vakamacalataka ni sa kaciva na bisopi na Turaga me vukei keda. Vakayagataka na veika o kauta mai me vukei ira na gone mera kila vakavinaka eso na ka e dau vakayacora na bisopi me qarava kina na tabanalevu.

• Vakataubaletaki ira na gone ki na valenivolavola ni bisopi (o na rairai via veitaratara kei na so na qasenivuli). Vakamacalataka vei ira na ituvaki eso era na rairai dabe vata kina kei na bisopi ena nona valenivolavola ( vaka na veivakatarogi ni papitaiso se na veivakatarogi ni soli ikatini). Tukuna vei ira na gone na sala o sa vakalougatataki kina mai na veiqaravi ni bisopi.

• Vukea na gone mera caka kadi eso me soli vua na bisopi, ni vakavinavinakataki tu na ka e vakayacora me vukea kina na cakacaka ni Turaga.

Vunau kei na Veiyalayalati 75:3

Au rawa ni solia na noqu igu vinaka duadua vua na Turaga.

Ena yabaki mada ga vagone, era rawa ni kune marau na gone ena nodra caka vinaka ni muria na ivunau ni Turaga.

iTaviqaravi e Rawa ni Caka

• Sureta na gone yadua me vakaitavi ni vakatakila na sala era na matanataka kina na veiqaravi, vaka na samaki ni dua na rumu ena valenilotu se na masi veleti e vale. Wilika na Vunau kei na Veiyalayalati 75:3, ka kerea na gone mera vakaraitaka na sala era na cakacaka kina vakavucesa ni ko kaya “kakua ni vakawelewele” ka vakaraitaka na iwalewale ni cakacaka vakaukauwa ni ko kaya “ia mo dou cakacaka vagumatua sara.” Cava na vuna e bibi kina meda caka vinaka sara ni da qarava tiko na Turaga?

• Wasea vei ira na gone na italanoa i Peresitedi Dieter F. Uchtdorf me baleta na cakacaka mai na “Rua na iVakavuvuli Baleta na Draki ni Bula Kecega” (Ensign se Liaona, Nove. 2009, 55–58). Na cava eda vakila ni da kila ni da sa cakava na noda vinaka taucoko?

• Lagata e dua na sere ni cakacaka vata, vaka na “Ni Da Dau Veivuke Tu” (Volanisere ni Gonelalai, 108b). Vukea na gone mera caka ivukivuki me salavata kei na vosa.

  

  Ena so na gauna era soli kakana ki na Lotu na lewe ni Lotu taumada me vukei ira na tani.

Vakavulica na iVunau: Gone Qase Cake

Vunau kei na Veiyalayalati 71

Au rawa ni taqomaka na dina mai na wasei ni noqu ivakadinadina.

Na Turaga e sega ni namaka na gone mera sausaumi kivei ira na dauvakalewa na Lotu me vaka e sa kacivi Josefa Simici kei Sidini Rikitoni vakakina. Ia sa rawa ni o vukea na gone mera kila vakamatata ni sa rawa ni kaukauwa sara na revurevu ni nodra ivakadinadina vei ira tale eso.

iTaviqaravi e Rawa ni Caka

• Vakayagataka na ulu ni wase ni Vunau kei na Veiyalayalati 71 se “Chapter 25: Joseph Smith and Sidney Rigdon Go on a Mission” (Doctrine and Covenants Stories, 96) me vakavulici ira na gone ena ituvaki eso e vakauqeta na wase 71. Wilika vata kei ira na gone na Vunau kei na Veiyalayalati na 71:1 ka vukei ira mera raica na ka e vinakata na Turaga me cakava o Josefa kei Sidini me baleta na “veimaliwai ca” e tiko vei ira na tamata ki na Lotu (ulutaga ni wase). Na cava e kaya o Koya ni na soli vei rau me vukei ira? E rawa vakacava ni da vakataki Josefa kei Sidini?

• Sureta na gone mera veisa ni vakatovotovotaka na sala me wasei kina vei ira na tani na ka era kila tu me baleta na Lotu. Me ivakaraitaki, sa rawa ni ra wasea e dua na ivakadinadina rawarawa se wasea e dua na Yavu ni Vakabauta.

Vunau kei na Veiyalayalati 72:8

Sa kacivi ira na bisopi na Turaga me vukei Koya me kitaka na Nona cakacaka.

Sa rawa ni veivakayarayarataki kaukauwa sara na bisopi ki na bula ni dua na tamata gone. Na cava o rawa ni cakava me vukei ira na gone mera raica na bisopi vaka e dua ka matataka na Turaga o Jisu Karisito?

iTaviqaravi e Rawa ni Caka

• Vakamacalataka ena 1831 na Turaga a kaciva na bisopi ni Lotu, o Etuwate Patereji, me toki mai Katiladi, Oaio, me mai bisopi e Indipenideni, Misuri (raica na “Chapter 17: The First Bishops of the Church,” Doctrine and Covenants Stories, 64–66). Wilika vata kei ira na gone na Vunau kei na Veiyalayalati ni 72:8 , ka kerea mera vakarogoca se o cei sa kaciva na Turaga me veiqaravi vaka-bisopi vou e Katiladi. Cava na vuna e kacivi ira kina na bisopi na Turaga? Wasea vei ira na gone na ka o sotava ena nomu a vakalougatataki mai na nona veiqaravi e dua na bisopi.

• Sureta na gone mera vola eso na ka era sa raica ni cakava na bisopi me vukei ira kina na tamata ena tabanalevu. Kerea na gone mera droinitaka na iyaloyalo ni nona cakava tiko o bisopi e dua na ka era a tukuna. Wasea na nomu ivakadinadina ni sa kacivi mai vua na Turaga na nomu bisopi me Nona italai. Cava na vuna eda vakavinavinaka kina ni sa kaciva na Turaga e dua na bisopi ena noda tabanalevu?

Vunau kei na Veiyalayalati 73:3

A vakaroti Josefa Simici na Turaga me vakalesuya mai na dina vakasakiti eso ka a yali mai na iVola Tabu.

Me tiki ni nona kacivi me parofita, a vakaroti Josefa Simici na Turaga me cakava na veisau veivakauqeti eso ki na iVola Tabu. Na veisau eso qo, ka sa vakatoka na Turaga me “vakadewa” (Vunau kei na Veiyalayalati 90:13), sa vakalesuya mai na vei dina bibi e a mai yali se vagalalataki mai na iVola Tabu ena veisenitiuri sa oti.

iTaviqaravi e Rawa ni Caka

• Vakamacalataka ni sa lesu mai o Josefa Simici kei Sidini Rikitoni ena kaulotu lekaleka voleka e Katiladi, Oaio, a vinakata na Turaga me rau tomana ni qarava e dua na cakacaka bibi. Sureta na gone mera wilika na Vunau kei na Veiyalayalati 73:3 me vaqaqai se cava mada na cakacaka oya. Me vukea na gone mera kila vakamatata na ka a vinakata na Turaga me vakadewataka o Josefa kei Sidini, wilika vata kei ira na veitiki ni iVolavosa ni iVola Tabu “iVakadewa nei Josefa Simici (VJS).”

• Solia wavoki e dua na ilavelave ni iVola Tabu, ka vakatara na gone mera dolava ka raica se vica sara na draunipepa e tiko kina. Sureta na gone mera raitayaloyalotaka ni ra a kerei me vakadewataka na iVola Tabu ki na dua tale na vosa. Na cava na veisala era rawa ni vakayacora kina eso na cala? Vakamacalataka ni gauna era vakadewataka se lavetaka kina na tamata na iVola Tabu ni bera na gauna i Josefa Simici, era a vakayacora eso na cala, ka so na gauna era vagalalataka na dina bibi eso. Na Turaga a vakarota na Parofita o Josefa Simici me cakava na veivakadodonutaki veivakauqeti eso. Cava na vuna e yaga kina vei keda na cakacaka i Josefa Simici?

Vakauqeta na Vuli e Vale

Sureta na gone mera digitaka e dua na ka era na cakava baleta na ka era sa vulica nikua, vaka na vakavinavinakataki bisopi ena nona veiqaravi se vakarautaki ni kena taqomaki na nodra vakabauta ena vulici ni Yavu ni Vakabauta.

Vakatorocaketaki Noda Veivakavulici

Okata na wakilakila. “Era vuli vakavinaka cake e levu na gone (kei na qase) ni vakayagataki e vica na wakilakila. Raica na sala eso me vukei kina na gone mera vakayagataka na nodra wakilakila ni rai, rorogo, kei na tatara ni ra vuli” (Veituberi ena iVakarau ni iVakabula, 25).