21–27 ni June.

Vunau kei na Veiyalayalati 67–70

“Yaga - na iYau ni Vuravura Taucoko”

Ni bera ni ko wilika na vakatutu e tiko ena ituvatuva oqo, vulica mada na Vunau kei na Veiyalayalati 67-70, ka vola na veivakauqeti vakayalo o ciqoma. Na veivakauqeti oqo ena vukei iko mo bulia kina e dua na ituvatuva ni veivakavulici vakauqeti vakayalo. Qai vakuria ki na ituvatuva o ya na vakasama mai na ituvatuva oqo, ena Lako Mai, Mo Muri au—Baleta na Tamata Yadua kei na Matavuvale, se ena mekesini ni Lotu.

Vola na Veika o Vakauqeti Kina

Sureta na Veiwasei

Sureti ira na gone me ra droinitaka na iyaloyalo ni dua na ka era sa vulica mai na nodra vulica na ivolanikalou ena nodra itikotiko se ena Lalai. Kevaka e dredre nodra vakasamataka na ka me ra droinitaka e rawa ni o vakananuma vei ira eso na ulutaga mai na Vunau kei na Veiyalayalati 67-70, me vaka na papitaiso, kena rawati e dua na ivakadinadina ni ivolanikalou, se o ira na itubutubu era vakavulici ira na gone ena kosipeli.

Vakavulica na iVunau: Gone Sobu

Vunau kei na Veiyalayalati 67

Na Vunau kei na Veiyalayalati e tiko kina na ivakatakila mai vua na Kalou.

Ena Noveba 1831, era sa lewa kina na iliuliu ni Lotu me biu na ivakatakila nei Josefa Simici ena dua na ivola me ra wilika na tamata kecega. Nikua sa tabaki tu na ivakatakila oqori ena Vunau kei na Veiyalayalati.

iTaviqaravi e Rawa ni Caka

• Tukuna vei ira na gone me baleta na sala a tabaki kina me dua na ivola na ivakatakila nei Josefa Simici (raica na “Wase 23: Na Vunau kei na Veiyalayalati,” iTalanoa ni Vunau kei na Veiyalayalati, 90–92, se na kena vidio ena ChurchofJesusChrist.org). Wasea na nomu ivakadinadina ni tu ena Vunau kei na Veiyalayalati na ivakatakila e rawa ni vukei keda nikua. Wasea e dua na nomu tikina talei mai na Vunau kei na Veiyalayalati.

• Vakaraitaka vei ira na gone na ivolayavu ni cakacaka va yadua ena dua na gauna, ia ni o sa taura yadua cake wasea vakalailai me baleta na sala eda rawata kina (raica na ivola yadua ena iDusidusi ki na iVolanikalou). Ni o taura cake na Vunau kei na Veiyalayalati, wasea vei ira na gone na cava e duatani kina na ivola ni ivolanikalou oqo (me kena ivakaraitaki, era tu kina na ivakatakila a soli mai ena noda gauna).

Vunau kei na Veiyalayalati 65:25–28

Au rawa ni papitaiso niu sa yabaki walu.

Ena Vunau kei na Veiyalayalati 68:25–28, a kaya na Turaga vei Josefa Simici ni dodonu me ra vulica na gone me ra vakabauti Jisu Karisito, veivutuni, ka papitaiso ni ra sa yabaki walu. A kaya talega ni dodonu mera vulica mera masu ka muria na ivakaro ni Kalou.

iTaviqaravi e Rawa ni Caka

• Sureti ira na gone mera wili ki na walu ena iqaqalo ni ligadra. Na cava na ka bibi me baleta na yabaki walu? Vukei ira na gone me ra vakadinadinataka ni ra sa yabaki walu, sa rawa me ra papitaisotaki. Ni o vakayagataka na vosa kei na malanivosa e tiko ena Vunau kei na Veiyalayalati 68: 25–28, wasea vei ira eso na ka e vinakata na Turaga mera vulica ni se bera ni ra yabaki walu (raica talega Yavu ni Vakabauta 1:4). Vukei ira mera kila deivaki na vakasama e sega ni sa matau vei ira.

• Lagata vata kei ira e dua na sere baleta na papitaiso, me vaka na “Jisu Ni A Papitaiso” se “Vaqara Drodrolagi Ni Bula Vesu No” (iVolanisere ni Gonelalai, 53, 54). Kerei ira na gone me ra wasea na veika era vakila me baleta na papitaiso kei na veika e rawa ni ra cakava me ra vakavakarau.

Vakavulica na iVunau: Gone Qase Cake

Vunau kei na Veiyalayalati 67:4, 9

Era dina na ivakatakila sa soli vei Josefa Simici.

E vuqa na itukutuku ena Vunau kei na Veiyalayalati 67–70 e baleta nodra sasaga na Yalododonu me ra tabaka vakaivola na ivakatakila nei Josefa Simici. Oqo e rawa ni madigi me vukei ira na gone me ra kila ena ivakatakila, sa tabaki ena gauna oqo ena Vunau kei na Veiyalayalati, eda rawa ni kunea kina na domo ni Turaga.

Ni ko vakavakarau mo veivakavulici, e rawa ni o railesuva na Yalododonu, 1: 140–43 se “Wase 23: Na Vunau kei na Veiyalayalati” (iTalanoa ni Vunau kei na Veiyalayalati, 90–92).

iTaviqaravi e Rawa ni Caka

• Vakaraitaka vei ira na gone na iVola Tabu, na iVola i Momani, na Vunau kei na Veiyalayalati, kei na Mataniciva Talei. Vukei ira na gone me ra vola ena vava ni volavola na vuna e duatani kina na ivola yadua ni ivolanikalou kei na cava era tautauvata kina. Kevaka era gadreva na veivuke, wasea vei ira na ivakamacala ni ivola eso oqo ena iDusidusi ki na iVolanikalou. Tarogi ira na gone era na kila vakacava ni sa dina na ivolanikalou. Na cava eda vulica mai na Vunau kei na Veiyalayalati 67:4, 9 baleta na ivakatakila a solia na Turaga vei Josefa Simici?

• Wasea e dua na tikina mai na Vunau kei na Veiyalayalati me vaqaqacotaki kina na nomu “ivakadinadina ena dina ni veivakaro oqo” (tikina e 4). Solia vei ira na gone na madigi me ra wasea e dua na tikina taleitaki. Vakamacalataka vei ira na gone ni ra sa lewa na iliuliu ni Lotu ena gauna me tabaki vakaivola na nodra ivakadinadina baleta na ivakatakila a ciqoma ko Josefa Simici. Ni ra vakayacora vakakina, e dua vei ira na iliuliu, o Livai Enikuki, e a vola tarava na yacana, “me kua sara ni bokoci laivi” (raica na “iVakadinadina, circa 2 Noveba 1831,” iVola ni Vakatakila 1, 121, josephsmithpapers.org). Na cava beka na vuna a vinakata kina o Livai Enikuki me “kua sara ni bokoci laivi” na yacana mai na ivakadinadina tabaki? Solia vei ira na gone na madigi me ra vola na nodra ivakadinadina me baleta na veika era vulica me yacova mai oqo ena Vunau kei na Veiyalayalati.

  

  Sa kerei keda na Kalou me da vulica na ivolanikalou.

Vunau kei na Veiyalayalati 68:3–4

Ni ra sa vosa na noda iliuliu ni Lotu ena veivakauqeti vakayalo, era sa tukuna “na vosa ni Turaga.”

Ni ra vosa na italai ni Turaga ena veivakauqeti ni Yalo Tabu, na ka era tukuna sa loma ni Turaga, sa nanuma ni Turaga, sa vosa ni Turaga, sa domo ni Turaga (raica na tikina e 4). Nodra kila na dina oqo e rawa ni vukei ira na gone me ra taleitaka me ra rogoca ka muria na nodra ivakavuvuli.

iTaviqaravi e Rawa ni Caka

• Sureti ira na gone me ra wilika na Vunau kei na Veiyalayalati 68:3–4 ena ilawalawa lalai ka veiwaseitaka na veika era sa vulica mai na veitikina oqo. Sureti ira na gone me ra vola e dua na ka era sa vulica ena vava ni volavola. Na cava na vuna e bibi kina me kilai na ka dina oqo?

• Ni oti na wiliki vata ni Vunau kei na Veiyalayalati 68:3–4 solia vei ira na gone na ilavelave ni vica na itukutuku buta katakata mai na koniferedi raraba. Sureti ira mera vaqara na itukutuku dina sa vakavulica vei keda na Turaga mai vei ira na Nona italai.

Vunau kei na Veiyalayalati 69:1–2

Au rawa ni “dina ka yalododonu.”

Ni gadreva ko Oliva Kaudari me lako ki Misuri, a kacivi Joni Witima e dua na tamata “dina ka yalododonu” na Turaga (tikina 1), me rau lako vata. E rawa vakacava vei ira na gone me ra dina ka yalodina me vakataki Joni Witima?

iTaviqaravi e Rawa ni Caka

• Tukuna vei ira na gone ni talai Oliva Kaudari yani ki Misuri na Turaga, a tukuna me dua na tamata “dina ka yalododonu” (tikina 1) me rau lako vata, o koya a talai Joni Witima talega kina. Na cava na kena ibalebale meda dina ka yalododonu? E rawa ni da vakadeitaka vakacava ni da sa dina ka yalododonu tiko me rawa ni vakayagataki keda na Turaga me vakalougatataki ira na tani?

• Sureta e vica na gone me ra tukuna e dua na tamata era kila, ka ra nanuma ni tamata “dina ka yalododonu.” Era na kila vakacava ni tamata dina ka yalodina na tamata oya? Vukei ira mera raica ni nuitaki Joni Witima na Turaga baleta ni ena gauna oqo, a tamata dina ka yalodina o koya (raica na Vunau kei na Veiyalayalati 69:1–2). Lagata vata e dua na sere me vakayaloqaqataki ira na gone me ra dau dina ka yalododonu tiko ga me vaka na iVakabula, me vakataka na “Meu Na Muri Jisu Tu” (iVolanisere ni Gonelalai, 40).

Vakauqeta na Vuli e Vale

Sureti ira na gone mera vakamacalataka vua e dua e vale na cava na Vunau kei na Veiyalayalati, a kau mai vakacava, kei na vuna e bibi kina vei ira.

Vakatorocaketaki Noda Veivakavulici

Moica na itaviqaravi me ganita nodra yabaki na gone o vakavulica. Era na gadreva beka na gone sobu me levu cake na idusidusi ni ra sureti me ra veiwasei. O ira na qase cake sa levu na ka era kila ka na rawa ni vinaka sara ena wasei ni nodra nanuma. Nanuma tiko na duidui vaqo ni o tuvalaka na itaviqaravi.