Campfire on the Missouri mai vei Bryan Marika Taylor

31 ni Me–6 ni Jiune

Vunau kei na Veiyalayalati 60–62

“Sa tu ena Qeteqete ni Ligaqu na Nodra Bula na Tamata Kecega”

Mo nanuma tiko ni vakavakarau vinaka duadua me vakavulici kina na Vunau kei na Veiyalayalati 60–62 ena yaco mai ena nomu vulica vakataki iko se vakamatavuvale na iwasewase oqori.

Vola na Veika o Vakauqeti Kina

Sureta na Veiwasei

Solia vei ira yadua na gone na madigi me ra wasea e dua na ka era sa vulica mai na ivolanikalou ena loma ni macawa sa oti, se mai na kalasi ni Lalai ena Sigatabu. Ni ra sa veiwasei oti na gone yadua, sureta e dua tale na gone ena kalasi me semata vakalekaleka na veika a wasei.

Vakavulica na iVunau: Gone Sobu

Vunau kei na Veiyalayalati 60:4; 61:1–2, 36; 62:1

E vakavulici au na ivolanikalou me baleti Jisu Karisito.

Na Vunau kei na Veiyalayalati 60–62 e tiko kina e vuqa na itukutuku ka na rawa ni vukei ira na gone o vakavulica me ra kila se o cei o Jisu Karisito ka vakalevutaka cake na nodra lomani koya.

iTaviqaravi e Rawa ni Caka

• Vakaraitaka e dua na iyaloyalo kei Jisu Karisito, ka kerei ira na gone mera wasea na vuna era lomani Jisu kina. Digia e vica na malanivosa oqo mai na Vunau kei na Veiyalayalati 60–62 e vakavulici iko me baleta na iVakabula, ka wasea vei ira na gone (raica, me kena ivakaraitaki, Vunau kei na Veiyalayalati 60:4; 61:1–2, 36; 62:1). Vukei ira na gone mo ni tokaruataka vata na malanivosa. Wasea na nomu nanuma baleti Jisu Karisito?

• Vakaraitaka eso na iyaloyalo kei Jisu mai na Nona gauna ni veiqaravi e vuravura (raica na Gospel Art Book, naba 34–61). Laiva me ra vukei iko na gone me vakamacalataki na ka e cakava tiko ko Jisu ena iyaloyalo. E vakaraitaka tiko vakacava o Koya na Nona loloma vei ira na luvena na Tamada Vakalomalagi? Tukuna vei ira na gone e dua na nomu ivolanikalou taleitaki ka vakavulica na veika baleti Jisu.

• Lagata vata kei ira na gone “Meu Na Muri Jisu Tu” (iVolanisere ni Gonelalai, 40; raica talega na vidio ni laga-vata ena ChurchofJesusChrist.org). Ni lagati na ivakarau me da vakataki Jisu, tu vakadua ena so na gauna ka kerei ira na gone mera vakacavara na iyatuvosa “Au rawa ni vakataki Jisu ena …”

  

  For This Purpose I Have Come, mai vei Yongsung Kim

Vunau kei na Veiyalayalati 62:3

E vinakati au o Jisu Karisito meu wasea Nona kosipeli.

Era dau taleitaka na gone me ra wasea vei ira na tani na veika era kila. Vukei ira me ra kila ni gauna era wasea kina na veika era kila me baleta na kosipeli, ena marautaki ira na Tamada Vakalomalagi.

iTaviqaravi e Rawa ni Caka

• Vakamacalataka ni Turaga a kerea na Parofita o Josefa Simici kei na so tale na iliuliu ni Lotu me ra lako mai Katiladi e Oaio, ki na yasayasa vaka-Jekesoni, Misuri. A tukuna vei ira mera vunautaka na kosipeli ena nodra ilakolako lesu ki vale. Wilika na Vunau kei na Veiyalayalati 62:3, ka kerei ira na gone mera vakarogoca na ka era a cakava o ira na daukaulotu ka a marautaka na Turaga. Vakadinadinataka ni sa dau marautaki keda na Turaga ena gauna eda wasea kina na kosipeli vei ira tale eso.

• Vukei ira na gone me ra cakava na beji e vakaraitaka ni ra vinakata tiko me ra daukaulotu ni Lotu. Me ra na dara na nodra beji ka vakarau mera wasea na nodra ivakadinadina vakai ira.

• Lagata vata e dua na sere me baleta na wasei ni kosipeli, vaka na “Au Bole Meu sa Kaulotu Edai” (iVolanisere ni Gonelalai,90). Vukei ira na gone me ra vakasamataka na veika era rawa ni kaya kevaka e taroga e dua se cava era taleitaka baleti Jisu Karisito kei na Nona Lotu. Sureti ira mera droinitaka na veika era taleitaka me baleta na kosipeli i Karisito.

Vakavulica na iVunau: Gone Qase Cake

Vunau kei na Veiyalayalati 60:7, 13; 62:3, 9

Au rawa ni dolava na gusuqu meu wasea na kosipeli i Jisu Karisito.

E rawa ni mana vakalevu na nona ivakadinadina e dua na gone me vaka ga e dua na qase, baleta na kaukauwa ni ivakadinadina e sega ni vu mai na nona yabaki se nona kila e dua ia mai na Yalo Tabu. Veivuke ena nodra yalodei na gone me ra dolava na gusudra ka wasea vei ira na tani na veika era kila ni dina.

iTaviqaravi e Rawa ni Caka

• Na veivakalougatataki cava sa yalataka na Turaga ena Vunau kei na Veiyalayalati 60:7; 62:3, 9 vei ira era na wasea na nona kosipeli? E vakalougatataki ira vakacava na tani na wasei ni kosipeli? Vakasamataka mo wasea e dua na ka mai na nomu bula ena gauna o wasea kina na kosipeli— na veivakalougatataki cava e lako mai na nomu sasaga? Sureti ira na itabagone me ra wasea eso na veika era sa sotava oti. E rawa talega ni o lagata na sere ni cakacaka ni kaulotu, me vaka na “Gole Ena Vakabauta” (Sere ni Lotu, naba 159), ka tukuna na veivakalougatataki e tukuni tiko ena sere.

• Vukei ira na gone mera vakatasuasuataka na veika e rawa ni ra wasea kina na kosipeli vei ira na itokani. Me kena ivakaraitaki, na cava era na kaya kevaka e taroga e dua na cava na vuna era gole kina ki Lotu? Se vakacava ke raici ira e dua na itokani ni ra dara tiko e dua na mama ni DND se wilika tiko na iVola i Momani ka taro? Na cava mera na kaya?

Vunau kei na Veiyalayalati 60:7; 61:1–2, 36; 62:1

Sa tu vakarau na Turaga me vosoti au kevaka au veivutuni.

A sega ni uasivi sara o Josefa Simici kei ira na iliuliu tale eso ni Lotu. Ena so na gauna era a veiba ka sega kina ni vosota (raica na “Esera Buci kei Aisake Moli,” Revelations in Context, 133). Ia sa yalololoma ga vei ira na Turaga ka dau veivosoti kevaka era veivutuni.

iTaviqaravi e Rawa ni Caka

• Wilika vata kei ira na gone na Vunau kei na veiyalayalati 60:7; 61: 2, ka kerei ira mera vakaraica na vosa e tautauvata ena veitikina oqo. Tokaruataka vei ira na gone ni a soli na ivakatakila oqo vei Josefa Simici kei na so tale na iliuliu ni Lotu. Na cava e vinakata na Turaga me ra kila? Na cava eda vulica mai na veitikina oqo baleta Nona nanuma na iVakabula ena vukuda ena gauna eda cakacala kina?

• Vola E vakacava tu o Jisu Karisito? ena vava ni volavola. Wilika vata na Vunau kei na Veiyalayalati 61:1–2, 36; 62:1, ka cakava e dua na lisi ni isau ni taro oqo era kunea na gone ena veitikina oqo. E vukei keda vakacava na ivakarau ni bula eso ena vava ni volavola me da kila na vuna sa tu vakarau kina na iVakabula me vosoti keda? Na sala cava soti e rawa ni da muria kina Nona ivakaraitaki?

Vunau kei na Veiyalayalati 60:5; 61:22; 62:5–8

E vinakata na Turaga meu vakayagataka na noqu galala ni digidigi kei na Yalona meu digidigi vinaka.

O na vakayagataka vakacava na veitikina oqo me ra vakavulici na gone, se dau vukei ira vakacava na Turaga me ra digidigi vinaka?

iTaviqaravi e Rawa ni Caka

• Kerei ira na gone mera tukuna na gauna era a vakayacora e dua na vakatulewa. Era a lewa vakacava na ka me caka? Wilika vata na Vunau kei na Veiyalayalati 62:5, 7–8 me vulici na veika e tukuna na Turaga vei ira na italatala qase era a vakarau me ra lako mai Misuri ki Katiladi, Oaio. Na digidigi cava soti a gadrevi me ra cakava me baleta na nodra ilakolako? Na cava sa solia mai na Turaga me vukei keda ena noda digidigi? Tukuna vei ira na gone na ivakarau o sa vakayagataka kina na veidusimaki ni Yalo kei na nomu vakatulewa vinaka duadua mo vakataulewa kina.

• Wasea vakatolu na kalasi, ka kerea na veiwasewase yadua me wilika e dua na tikina oqo, ka a vakarota kina na Turaga eso na daukaulotu ena ivakarau me ra qarava vinaka kina na nodra kaulotu: Vunau kei na Veiyalayalati 60:5; 61:22; 62:5. Na cava o vulica mai na nona vosa na iVakabula ena veitikina oqo? Na cava na vuna e dau vinaka kina ena so na gauna meda vakatulewa ka sega ni waraka na ivakaro mai vua na Kalou e na ka kecega?

Vakauqeta na Vuli e Vale

Sureti ira na gone me ra vakatovotovotaka na wasei ni kosipeli vua e dua ena matavuvale. Me kena ivakaraitaki, e rawa ni ra wasea e dua na ka era sa vulica ena Lalai.

Vakatorocaketaki Noda Veivakavulici

Wasea na nomu ivakadinadina ki na kalasi. Ni o wasea wasoma na nomu ivakadinadina ena vukei ira na gone o vakatavulica me ra rawata na nodra dui ivakadinadina. Na ivakadinadina e rawa ni rawarawa sara me vaka “Au kila ni lomani kemuni yadua na Tamada Vakalomalagi” se “Au vakila na vinaka ni lomaqu niu vulica na veika e baleti Jisu Karisito.”