Yasayasa vaka-Davies, e Misuri

14–20 ni June.

Vunau kei na Veiyalayalati 64–66

“Sa Gadreva na Turaga na Yalo kei na Vakasama sa Vakarau Tu”

Ni o vakarau veivakavulici, vakasamataka na sala o rawa ni moica kina nomu torova me veidonui kei na nodra gagadre na gone. Nanuma ni o rawa ni vakayagataka e dua ga vei ira na itaviqaravi ena ituvatuva oqo vei ira na gone sobu se qase cake.

Vola na Veika o Vakauqeti Kina

Sureta na Veiwasei

Solia vei ira yadua na gone e dua na gauna me ra taura cake e dua na iyaloyalo ni iVakabula ka wasea na veika era sa vulica tiko me baleti Koya kei na Nona kosipeli.

Vakavulica na iVunau: Gone Sobu

Vunau kei na Veiyalayalati 64:9–10

E kerei au ko Jisu Karisito meu vosoti ira na tani.

Na lesoni vakaibalebale se itaviqaravi cava o rawa ni vakasamataka ni na vukei ira na gone me ra kila na kena ibalebale me da veivosoti? Ni ko ni veitalanoataka na veivosoti, vakananuma vei ira na gone ni veivosoti e sega ni kena ibalebale me da laiva me ra vakamavoataki keda na tani.

iTaviqaravi e Rawa ni Caka

• Wilika na malanivosa “mo dou veivosoti vakataki kemudou” (Vunau kei na Veiyalayalati 64:9), ka tarogi ira na gone ena ibalebale ni vosota e dua. Me vukei ira mera kila vakavinaka, wasea e vica na kena ivakaraitaki. Vukei ira me ra matanataka na ivakaraitaki eso oqo me ra vakatovotovotaka na veivosoti.

• Wilika vakamalua na Vunau kei na Veiyalayalati 64:10 vei ira na gone, ka me ra lululu vata kei na dua tale na gone ni ra rogoca na vosa “vosoti.” Wasea na nomu ivakadinadina me baleta na vakacegu kei na marau e yaco mai ni da vosoti ira na tani.

• Lagata e dua na sere me baleta na veivosoti, me vaka na “Ni Vukei Au Mai Noqu Kalou” (iVolanisere ni Gonelalai,52). Na cava e vakatavulica vei keda na veitikina oqo me baleta na vosoti ira na tani?

Vunau kei na Veiyalayalati 64:34

Au rawa ni muri Jisu ena yaloqu kei na noqu vakasama.

A vakavulici ira na Yalododonu na Turaga me tarai cake o Saioni, me ratou na solia Vua na yalodratou kei na vakasama sa vakarau tu. Vakasamataka na sala o na vukei ira kina na gone me ra vakasamataka na kena ibalebale vei ira oqo.

iTaviqaravi e Rawa ni Caka

• Wilika vei ira na gone mai na Vunau kei na Veiyalayalati 64:34: “Raica, sa gadreva na Turaga na yalo kei na vakasama sa vakarau tu.” Tokaruataka vakavica na malanivosa oqo, dusia na utomu kei na ulumu ni o wilika na malanivosa oya, ka sureti ira na gone me ra kitaka vakakina. Me da solia vakacava vua na iVakabula na yaloda kei na noda vakasama? (Ena veivuke kevaka e vakamacalataki ni utoda e vakaibalebaletaki ki na veika eda vakila kei na loloma na noda vakasama e vakaibalebale ki na noda vakanananu.)

• Lagata e dua na sere me baleta noda lomana ka muria na iVakabula, me vakataka “Au Vakilai Koya” (iVolanisere ni Gonelalai, 42; vakabibi na tikina e 3). Me da vakaraitaka vakacava vua na iVakabula ni da lomani Koya? Wasea na nomu nanuma baleti Jisu Karisito.

Vunau kei na Veiyalayalati 66

E kilai au ka lomanu au na Turaga.

E lima na nona taro bibi vua na Turaga o Viliame Mekelelini. A ciqoma o Josefa Simici na kena isau ena dua na ivakatakila dina ga ni a sega ni kila na taro nei Viliame. Na ka oya ena rawa ni vukei iko mo vakavulica vei ira na gone ni kilai ira na Kalou ka na rawa ni sauma na nodra taro.

iTaviqaravi e Rawa ni Caka

• Tukuna na nona sauma na Turaga na taro nei Viliame Mekelelini ena dua na ivakatakila vua na Parofita o Josefa Simici (raica na Vunau kei na Veiyalayalati 66, ulutaga ni iwase). Vakadinadinataka ni kilai keda na Tamada Vakalomalagi ka vinakata me vukei keda. Kerea ira na gone me ra wasea se ra kila vakacava ni lomani ira na Kalou.

• Wilika vata kei ira na gone na Vunau kei na Veiyalayalati 66:4. Tukuna vei ira na gone e dua na gauna a vakaraitaka kina vei iko na Turaga na ka e vinakata mo cakava. Wilika tale na tiki ni ivolanikalou, ena gauna oqo vakacuruma kina na yacana e dua na gone. Mo vakayacora vakakina vei ira yadudua na gone.

  

  E lomani keda yadua o Jisu Karisito.

Vakavulica na iVunau: Gone Qase Cake

Vunau kei na Veiyalayalati 64:7–10

E vinakata na Turaga meu vosota na tamata kecega.

Me vaka e vakaraitaki ena veitikina oqo, o ira sara mada ga na tisaipeli i Jisu Karisito e dau dredre nodra veivosoti ena so na gauna. Vakasamataka mo na vukei ira vakacava na gone me ra kila vinaka na ivakaro ni Turaga “me ra vosota na tamata kecega.” (Vakamatatataka ni veivosoti e sega ni kena ibalebale mo laiva e dua me vakayaco lomana vei iko; e dodonu me ra tukuna vua e dua na qase kevaka e dua e vakayaco lomana vua.)

iTaviqaravi e Rawa ni Caka

• Sureti ira na gone mera raitayalotaka ni ra a kerei me vakatavulica e dua na tacina gone me baleta na vosoti ira na tani. Me ra cakava beka vakacava? Sureti ira mera wilika veisasa na Vunau kei na Veiyalayalati 64:7–10 ka vaqara na veimalanivosa era na vakayagataka ena nodra veivakavulici. Era rawa talega ni vakatovotovotaka na veivakavulici ga vakaiira.

• Lagata vata “Ni Vukei Au Mai Noqu Kalou” (iVolanisere ni Gonelalai, 52). E vukei keda vakacava na Tamada Vakalomalagi me da vosoti ira na tani?

• Vakasamataka e dua na vosa vakatautauvata e rawa ni vukei ira na gone me ra kila se da na “vakararawataki” vakacava ni da sega ni veivosoti (tikina e 8). Me kena ivakaraitaki, vakaraitaka vei ira na gone e dua na taga soso se qele; kerei ira me ra raitayaloyalotaka ni dua e viritaka na soso vei ira. Ena tautauvata beka vakacava kei na noda maroroya tu na soso ka kauta voli vata kei keda na noda sega ni rawa ni veivosoti? Na cava na vuna ena vinaka cake me da viritaka laivi na soso? Vukei na gone me ra vakasamataka eso tale na vosa vakatautauvata ka vakatavulica na vuna e bibi kina me da veivosoti.

Vunau kei na Veiyalayalati 64:33–34

E gadreva na Turaga na “yalo kei na vakasama sa vakarau tu.”

Tarai cake ko Saioni—se vukea me tubu na Lotu— “e dua na cakacaka cecere.” Me rawati, sa gadreva na Turaga meda solia Vua na yaloda kei na vakasama sa vakarau tu. O ira era bula mai Saioni era “yalovata ka duavata ena nodra vakasama” (Mosese 7:18).

iTaviqaravi e Rawa ni Caka

• Vakaraitaka vei ira na gone eso na ka e caka mai na vuqa na tikina lailai, me vaka e dua na iba se na ibe. Vukei ira mera vakasamataka eso tale na ivakaraitaki. Sureti ira na gone me ra wilika na Vunau kei na Veiyalayalati 64:33. Na cava e vinakata na Kalou me da cakava me da vukei Koya me rawati na Nona “cakacaka levu”? Na cava soti na “veika lalai” eda rawa ni cakava ka na vukea me rawati na cakacaka oqori?

• Kerei ira na gone me ra vakacavara e dua na cakacaka ka gadrevi kina e rua na ka, ia solia ga vei ira e dua (kena ivakaraitaki, volavola ena papa ni volavola ka sega na joke se musuka e dua na tiki ni pepa ka sega na ikoti). Sureti ira na gone me ra wilika na Vunau kei na Veiyalayalati 64:34 me vaqara na rua na ka e kerea vei keda na Turaga. Na cava na vuna eda gadreva kina me da solia ruarua na yaloda kei na noda vakasama vua na Turaga? Meda cakava vakacava oqo?

Vunau kei na Veiyalayalati 65

Au rawa ni veivuke me vakarautaki na vuravura me ciqomi Jisu Karisito.

Na itavi ni Lotu—na matanitu ni Kalou e vuravura—me vakarautaka na vuravura me baleta na nona lesu mai na iVakabula. Era dua na tiki bibi ni itavi oqo na gonelalai o vakavulica. Na cava o rawa ni vakayacora me vukea nodra vakaitavi?

iTaviqaravi e Rawa ni Caka

• Vakalasi se yarurua, wilika na Vunau kei na Veiyalayalati 65, ka wilika se basika kina vakavica na vosa “vakarautaka.” Na cava e kerea vei keda na Turaga me da vakavakarau kina? Na cava meda cakava meda vakarautaki keda kei na vuravura?

• Vakaraitaka e dua na iyaloyalo ni iKarua ni Nona Lako mai na iVakabula (raica na Gospel Art Book, naba 66), ka kerei ira na gone mera vakamacalataka na cava era raica se kila me baleta na veika oqo. Solia vei ira na gone na vosa bibi kei na malanivosa me vaqarai ena Vunau kei na Veiyalayalati 65 (me vakataka “ena vuravura taucoko” kei na “cakacaka e veivakurabuitaki”). Na cava e vakavulica vei keda na vosa kei na malanivosa oqo baleta na iKarua ni Lako Mai kei na noda itavi ena kena vakarautaki?

Vakauqeta na Vuli e Vale

Vukei ira na gone me ra raica e dua na tikina ena Vunau kei na Veiyalayalati 64–66 era taleitaka ka na vinakata me ra wasea vua e dua na lewe ni matavuvale se itokani.

Vakatorocaketaki Noda Veivakavulici

Vulica mo vakila na ivakatakila. Ni ko masu ka vakasamataka na ivolanikalou, o na kunea ni vakasama kei na nanuma e rawa ni yaco mai ena dua ga na gauna kei na dua na vanua e rawa—“ni o lako ki cakacaka, qarava na itavi e vale, se nomu veimaliwai kei ira na matavuvale kei na itokani” (Veivakavulici ena iVakarau ni iVakabula, 12).