Springhill, Daviess County, Misuri, mai vei Garth Robinson Oborn

7–13 ni June.

Vunau kei na Veiyalayalati 63

“Ni sa Ka Tabu na Veika Mai Cake”

Na dina e vakavulica na Vunau kei na Veiyalayalati 63 e rawa ni vukei ira na gone o vakatavulica me taraicake nodra vakabauta na Tamada Vakalomalagi kei Jisu Karisito. Baleta ni dau vakaiyalayala ga na nomu gauna vei ira, vakasamataka na dina cava ena vakaibalebale vakalevu duadua vei ira, me vaka na nodra gagadre.

Vola na Veika o Vakauqeti Kina

Sureta na Veiwasei

Vakasamataka na sala rawarawa, vovou eso mo solia vei ira na madigi me ra wasea na veika era sa vulica. Me kena ivakaraitaki, vakarautaka na tikinipepa duidui na kena lelevu, me ra qai digitaka e dua na gone yadua. Sureta na gone e taura toka na ka balavu duadua me wasea i liu.

Vakavulica na iVunau: Gone Sobu

Vunau kei na Veiyalayalati 63:23

E vinakati au na Tamada Vakalomalagi meu digitaka na dodonu.

Era sa vuli tikoga na gone. Vukei ira me ra raica ni na vukei ira na Tamada Vakalomalagi mera kila me baleti koya, kevaka era talairawarawa ki na Nona ivakaro.

iTaviqaravi e Rawa ni Caka

• Wilika na Vunau kei na Veiyalayalati 63:23 vei ira na gone, ka kerei ira mera vakarogoca na veika ena solia vei keda na Kalou kevaka eda talairawarawa ki na ivakaro. Vukei ira mera kila ni “veika vuni” sai koya na veika e rawa ni vakavulica vei keda na Kalou, me vaka na iwalewale me da vakataki Jisu Karisito vakalevu cake.

• Kauta mai ki na kalasi na iyaloyalo ka matataka na ulutaga vakosipeli e rawa ni ra vulica vakalevu cake na gone, me vakataka na papitaiso, na iVakabula, na valetabu, kei na so tale. Vakatoboicutaka tu na iyaloyalo ena vuloa, me ra qai veivukevuke na gone me ra vakatadraicaketaka yadudua. Kerei ira me ra wasea na veika era kila kei na taro me baleta na ulutaga yadua.

Vunau kei na Veiyalayalati 63:49

Au na tucake tale.

Nikua se ni mataka, era na kune vakacegu na gone ni ra kila ena vuku ni nona Veisorovaki na iVakabula, era na tucake tale mai na mate ena dua na siga o ira kece era sa mate.

iTaviqaravi e Rawa ni Caka

• Vakaraitaka vei ira na gone e dua na iyaloyalo ni dua na nomu daulomani sa mate, ka wasea e dua na italanoa me baleta na tamata o ya. Wilika na Vunau kei na Veiyalayalati ni 63:49 vei ira na gone, ka vakadinadinataka ni dua na siga e na “tucake tale mai na mate” ka sega tale ni mate. Kerei ira na gone kevaka era kila e dua e sa mate. Vakadinadinataka ni da na tucaketale na tamata kecega ena vukui Jisu Karisito.

• Vakaraitaka na iyaloyalo ni nona bulu kei na Tucaketale ni iVakabula (raica na Gospel Art Book, naba 58, 59). Sureti ira mera veivosakitaka na veika e yaco tiko ena iyaloyalo. Sureti ira na gone me ra davo mada ni ko tukuna na bulu nei Jisu, ka me ra tucake ni o tukuna na Nona Tucaketale. Wilika na Vunau kei na Veiyalayalati 63:49, ka wasea na nomu ivakadinadina ni da na tucake mai na mate ena dua na siga me vaka ga a vakayacora o Jisu.

  

  Garden Tomb, mai vei Jon McNaughton

Vunau kei na Veiyalayalati 63:64

Sa dodonu meu qarava na veika tabu ena vakarokoroko.

Eda bula ena dua na gauna sa dau vakawaleni kina se vakalialiai sara mada ga na veika tabu. Sa rawa mo vukei ira na gone me ra tara cake e dua na yalo ni dau vakarokorokotaka na veika tabu.

iTaviqaravi e Rawa ni Caka

• Wilika vei ira na gone na Vunau kei na Veiyalayalati 63:64: “Sa ka tabu na veika mai cake.” Kerei ira me ra vakasamataka mada e dua na ka e bibi vei ira, me vaka e dua na iyaya ni vakatatalo taleitaki se na ivola. Era na qarauna ka taqomaka beka vakacava? Vukei ira mera vakasamataka na veika e bibi—se tabu—vua na Tamada Vakalomalagi. Eda na tukuna vakacava na veika oqo? Me vakacava beka na ivakarau ni noda raici ira?

• Lagata vata kei ira na gone e dua na sere ni vakarokoroko, me vaka na “Rokovi, Lomani” (iVolanisere ni Gonelalai,11). Vukei ira mera vakasamataka na sala eso e rawa ni ra vakaraitaka kina na vakarokoroko me baleta na veika tabu.

Vakavulica na iVunau: Gone Qase Cake

Vunau kei na Veiyalayalati 63:9–10

Na ivakatakilakila ena yaco mai ena vakabauta kei na loma ni Kalou.

A saumaki mai ki na Lotu o Esera Buci ni raica nona vakabula na ligai Elisa Jonesoni o Josefa Simici. Ia a qai yali e muri na nona vakabauta o Ezra, ka yaco me vakalewa na Parofita. E tu ena Vunau kei na Veiyalayalati 63 na ivakasala ni qaqarauni ena noda tovolea me da tara noda vakabauta ena ivakatakilakila, me vaka na veivakabulai ena cakamana, ka sega ena dua na veivakadeitaki vakayalo ni ka dina.

iTaviqaravi e Rawa ni Caka

• Vakaraitaka na iyaloyalo ena ituvatuva ni macawa oqo ena Lako Mai, Mo Muri Au—Baleta na Tamata Yadua kei na Matavuvale, ka tukuna vei ira na gone ni a vakayagataka na matabete o Josefa Simici me vakabula na ligai Elisa Jonesoni, ka a sega tu ni rawa ni vakayagataka ena rua na yabaki. Sureti ira na gone me ra wilika na Vunau kei na Veiyalayalati 63:9–10, ka kerei ira me ra wasea e dua na ka e tukuna na Turaga me baleta na vakabauta kei na ivakatakilakila (se caka mana).

• Sureti ira na gone me ra droinitaka e dua na vale ka dabe ena dua na yasaiva kei na dua tale na vale me dabe ena poidi ni dua na yasaitolu. Tukuna vei ira na gone ni rau matataka na vale oqori na noda vakabauta kei na ivakadinadina. Kerei ira mera wilika Vunau kei na Veiyalayalati 63:9–10 kei na Ilamani 5:12. Me ra qai vola ena yasaiva na veika e dodonu me da tara kina noda vakabauta kei na yasaitolu na veika e sega ni dodonu me tara kina na noda vakabauta. Vakamacalataka ni yasaiva e vakarautaka e dua na vanua kaukauwa me da tara cake kina ia na yasaitolu e sega ni kaukauwa ka taqomaki vinaka. Na cava na vuna e bibi kina me tara cake na noda vakabauta vei Jisu Karisito ka sega ena so tale na ka?

Vunau kei na Veiyalayalati 63:23

Ni’u talairawarawa ki na ivakaro, ena vakavulici au na Kalou ena Nona dina.

Na “veika vuni ni matanitu ni Kalou” sa vakarautaki duadua ga vei ira era maroroya na ivakaro ni Kalou. Oqo na vuna era sa ka vuni kina vei ira e vuqa na tamata. Na ivakavuvuli oqo ena vukei ira na gone ni ra vakasaqara tiko na dina.

iTaviqaravi e Rawa ni Caka

• Vakaraitaka vei ira na gone e dua na iyaloyalo ni keli-wai, ka kerei ira me ra droinitaka e dua. Ni wilika vata na Vunau kei na Veiyalayalati 63:23, vukei ira me ra vakasamataka na ka dina era kila me baleta na kosipeli, ka sureti ira me ra vola na dina eso oqo wavolita nodra keli-wai. E tautauvata vakacava kei na “wai bula” na dina oqo?

Vunau kei na Veiyalayalati 63:58–64

Meu kakua ni cavuta tu vakasausa na yaca ni Kalou.

Era dau rogoca beka na gone o vakavulica ni ra dau cavuta tu vakasausa eso na yaca ni Kalou. Mo vukei ira beka vakacava me ra kila ni dodonu me dau “qarauni na kena cavuti” na yacadrau na Tamada Vakalomalagi kei Jisu Karisito.? (Vunau kei na Veiyalayalati 63:64).

iTaviqaravi e Rawa ni Caka

• Wilika vei ira na gone na Vunau kei na Veiyalayalati 63:58: “Oqo e dua na siga ni veivunauci.” Kerei ira mera veivosakitaka na ivakasala ni qaqarauni era rogoca mai vei ira na nodra itubutubu, qasenivuli, kei ira na iliuliu ni Lotu. Qai vukei ira mera kunea na ivakasala mai vua na Turaga ena tikina e 58–64. Na cava soti eso na sala veiganiti meda “vakayagataka na yaca ni Turaga”? (tikina e 62).

• Ni railesuva vata na “iVosavosa” ena Me iSakisaki ni iTabagone (tabana e 20–21). Kerei ira na gone me ra cakava eso na posita me vakananuma vei ira e dua na ka era sa vulica me baleta na ivakarau me ra vakayagataka na yaca ni Tamada Vakalomalagi kei Jisu Karisito.

• Lagata vata e dua na sere ni vakarokoroko, me vaka na “Reverence Is Love” (Children’s Songbook,31). E rawa meda na vakadeitaka vakacava ni da sa vakarokoroko ni da vosa me baleta na Tamada Vakalomalagi kei Jisu Karisito?

Vakauqeta na Vuli e Vale

Kevaka e sega na gauna me caka ena kalasi na itaviqaravi ni macawa oqo, vakasamataka me soli vei ira yadua na gone e dua na ilavelave me kauta i vale me laki vakacavara kei na nodra matavuvale.

Vakatorocaketaki Noda Veivakavulici

Tara cake nodra yalodei na gone. Eso beka na gone era na nanuma ni ra na sega ni rawa ni vulica vakataki ira na kosipeli. E dua na sala me vukei kina nodra yalodei sai koya me ra vakacaucautaki ni ra vakaitavi ena kalasi. Yalataka vei ira na gone ni na vukei ira na Yalo Tabu ni ra vuli.