Spring Hill, Daviess County, Missouri, mai vei Garth Robinson Oborn

7–13 ni June

Vunau kei na Veiyalayalati 63

“Sa Ka Tabu na Veika Mai Cake”

E kaya na Turaga, “Dou na rawata na Yalo ena nomudou masumasu” (Vunau kei na Veiyalayalati 63:64). Sa rawa mo masuta na Yalo me dusimaka na nomu vuli.

Vola na Veika o Uqeti Kina

Sa digitaki na vanua me baleta na korolevu o Saioni. Era sa sikova na iliuliu ni lotu na vanua o ya ka ra sa vakatabuya me sa vanua ni nodra vakasoqoni vata kina na Yalododonu. Me vaka na itukutuku nei Josefa Simici, “Sa ka vakayago bibi duadua ena gauna oqo na vanua ko Saioni” (Vunau kei na Veiyalayalati 63, ulutaga ni wase). Ia a veicurumaki na nanuma baleti Saioni. E vuqa na Yalododonu era a gadreva mera tekivu vakasoqoni vata mai Misuri. Ena yasana kadua, o ira era vakataki Esera Buci era a sega ni taleitaka na vanua ko Saioni ka ra a vakatakila na nodra nanuma. Na ka dina, ni gauna a lesu tale o Josefa ki Katiladi mai Misuri, a kunea ni sa basika mai ki na Lotu na veileti kei na vuki tani ena gauna a gole tu kina. Ena kena mai yaco oqo a ciqomi kina na ivakatakila e tiko ena Vunau kei na Veiyalayalati 63 . Eke sa lewa kina na Turaga na ka e baleta na voli ni qele kei na nodra tokitaki na Yalododonu ki Misuri. Ia ena kedra maliwa na veika rawarawa vakaoqo e dua na ivakananumi ni gauna donu: “Koi au na Turaga, au sa vakarogoya na domoqu, ka me muri” (tikina e 5). Na Domona, na Lomana, na Nona ivakaro—o ira kece oqo “sa [mai] cake”—mera kakua ni beci se vakawaleni. Sa “ka tabu, me qarauni na kena cavuti” (tikina e 64).

Vakasama ni Vuli iVolanikalou ni Tamata Yadua

Vunau kei na Veiyalayalati 63:1–6, 32–37

Sa tau na cudru ni Turaga vei ira na tamata ca kei ira na talaidredre.

Ena gauna e ciqomi kina na ivakatakila oqo, a sotava tiko o Josefa Simici na nodra vakacacani koya vakalevu tiko e so na lewe ni Lotu era sa saqati koya mai (raica na “Ezra Booth and Isaac Morley,” Revelations in Context, 130–36). Na ivakaro cava a solia na Turaga ena Vunau kei na Veiyalayalati 63:1– 6, 32–37 me baleti ira “na dau caka ca kei ira sa veisaqasaqa”? E yaco vakacava na veivakaroti oqo me sa ivakadinadina ni loloma ni Kalou?

Vunau kei na Veiyalayalati 63:7–12

Era na yaco mai na ivakatakilakila ena vakabauta kei na loma ni Kalou.

Na vei ivakatakilakila se cakamana era sega duadua ga ni vakavurea na vakabauta tudei. Ena itekivu ni 1831 sa lomana kina o Esera Buci, e dua na talatala ni Lotu Wesele me sa papitaiso ni oti nona raici Josefa Simici ni a vakabula na ligai Elsa Johnson na itokani nei Buci.

Ia, ena loma ga ni vica na vula, a yali na vakabauta nei Buci ka yaco me vakacacana sara na Parofita. E rawa me yaco vakacava oqo, baleta ni a raica o koya na cakamana o ya? Vakasamataka vakatitobu oqo ena nomu wilika na Vunau kei na Veiyalayalati 63:7–12. Sa rawa talega mo raica na vuna era ciqoma kina eso na ivakatakilakila “me ra vinaka kina na tamata ka me vakalagilagi kina na [Kalou]” (tikina e 12) kei ira tale eso era sa ciqoma mera “na … cudruvi ga” kina (tikina e 11). Ni yavutaki ena veika o sa wilika oti, na cava o nanuma e vinakata na Turaga mo vakasamataka ka nanuma baleta na ivakatakilakila?

Raica talega na Maciu 16:1–4; Joni 12:37; Momani 9:10–21; Ica 12:12, 18.

Vunau kei na Veiyalayalati 63:13–23

Na tiko savasava sa kena ibalebale meu maroroya na noqu vakanananu kei na ivalavala me savasava.

E vuqa na tamata era kila tu ni veibutakoci e cala. Ia, ena Vunau kei na Veiyalayalati 63:13–19, sa vakamatatataka tu kina na iVakabula ni vakanananu garogaro ca e kauta mai na veika vakayalo sa butobuto sara. “Na cava na vuna sa ivalavala ca veivakarusai kina na garogaro ca?” E taroga o Elder Jeffrey R. Holland. “Io, me ikuri ni ravuravu veivakarusai ki na Yalotabu e yaco ki yaloda, au nanuma ni oqo e dua na ivalavala ca baleta e vakaduka na veimaliwai cecere ka savasava e solia na Kalou vei keda ena bula oqo—oya na nodrau veilomani e dua na tagane kei na dua na yalewa kei na nodrau gadreva me rau vakaluveni ena loma ni nodrau matavuvale sa nakiti tu me tawamudu.”(“Au sa Sega ni Soli Au Vei Noqu Meca,” Ensign se Liaona, Me 2010, 44).

Na revurevu cava e vakamacalataka tiko na Turaga ena Vunau kei na Veiyalayalati 63:13–19 e dau yacovi ira era sega ni veivutunitaka na vakanananu kei na ivalavala tawasavasava? Me raici na veivakalougatataki sa yalataka tu na iVakabula ena tikina e 20 kei na 23 vei ira sa yalodina tiko. Na veivakalougatataki cava soti sa yaco mai ki na nomu bula mai na talairawarawa ki na lawa ni tiko savasava? Na sala cava e vukei iko kina na iVakabula mo tudei se yaco mo na yalosavasava?

Raica talega na Vunau kei na Veiyalayalati 121:45; Linda S. Reeves, “Bula Kilikili ki na Noda Veivakalougatataki Yalataki,” Ensign se Liaona, Nove. 2015, 9–11.

Eda sa vakalougatataki ni da maroroya na noda vakasama kei na ivalavala me savasava.

Vunau kei na Veiyalayalati 63:24–46

E dusimaka tiko na Turaga na nodra bula vakayalo ka vakayago raraba na Nona Yalododonu.

Ni sa oti nona vakatakila na Turaga na vanua me tara kina o Saioni, era se gadreva tiko ga na Yalododonu mai Oaio mera dusimaki ki na gauna mera tekivu toso kina kei na vanua mera kau ilavo mai kina me voli na qele. Ni ko wilika na Vunau kei na Veiyalayalati 63:24–46, vakasaqara na veidusimaki vakayalo ka vakayago a solia na Turaga baleti Saioni. Na veidusimaki vakayalo ka vakayago cava sa solia tiko na Turaga vei iko?

Na Vakasama baleta na Vuli iVolanikalou Vakamatavuvale kei na Lotu Vakamatavuvale

Vunau kei na Veiyalayalati 63:7–12.Na italanoa ni nona biuta na Lotu o Esera Buci ni oti mada ga nona vakadinadinataka na vakabulai nei Elsa Johnson (raica na ivakamacala lekaleka ena “Vakasama ni Vuli iVolanikalou ni Tamata Yadua” kei na droini e salavata na ituvatuva oqo) ena rawa me uqeta na veivosakitaki ni cakamana. Sa rawa ki na nomu matavuvale me ratou veivosakitaka na cakamana e sa vaqaqacotaka na nodratou vakabauta, oka kina na veika e ratou sa sotava se nomu itukutuku makawa ni matavuvale. Era a cakacakataka vakacava na nodra vakabauta a gadrevi mera ciqoma kina na cakamana oqo? Na cava e vakavulica na Vunau kei na Veiyalayalati 63:7–12 baleta na veisemati ni vakabauta kei na cakamana?

Vunau kei na Veiyalayalati 63:13–19.Eda na taqomaki keda rawa vakacava mai na veivakauqeti tawakilikili, oka kina na iyaloyalo vakasisila? (Ko na kunea e vuqa na ivurevure ni veivuke me baleta na matavuvale ena AddressingPornography.ChurchofJesusChrist.org.) Na cava so na veivakalougatataki ni kena maroroi na lawa ni tiko savasava?

Vunau kei na Veiyalayalati 63:23.O na vukea vakacava na nomu matavuvale mera kila vakavinaka vakacava ni “veika vuni [ni] matanitu,” se na dina ni kosipeli, e sa vaka e dua na “ivurevure ni wai bula”? Me vakataka, nomu rawa ni gole ki na dua na waidrodro se uciwai e voleka toka ga (se vakaraitaka e dua na vidio se kena iyaloyalo). Na dina ni kosipeli eso sa vakataka vakacava na wai?

Vunau kei na Veiyalayalati 63:58.Na ivakaro ni qaqarauni cava eda sa raica ena wase 63? Na cava soti na ivakaro ni qaqarauni eda sa rogoca tiko nikua mai vei ira na noda iliuliu ni Lotu?

Vunau kei na Veiyalayalati 63:58–64.Vakaraitaka ki na nomu matavuvale e dua na iyau vakamareqeti ni matavuvale. Eda sa dau mareqeta vakacava na iyaya oqo mai vei ira na iyaya tale eso era sega soti ni yaga cake? Na cava e vakavulica vei keda na Vunau kei na Veiyalayalati 63:58–64 me baleta na ka meda cakava meda rokova kina na veika tabu?

Me baleta na ikuri ni vakasama ni nodra vakavulici na gone, raica na ituvatuva ena macawa oqo ena Lako Mai, Mo Muri Au—Baleti Ira na Lalai.

Na sere sa vakaturi tiko: “Reverence Is Love,” Nodra Sere na Lalai, 31.

Vakatorocaketaki ni Vuli Yadudua

Bulataka na ka o vulica tiko. “Ena nomu marautaka tiko na nomu kila vinaka na kosipeli, o na via vakayacora na ka ko sa vulica. Segata mo bula voli ena veika o sa kila vinaka tiko. Ni ko cakava oqo ena vaqaqacotaka na nomu vakabauta, kila-ka, kei na ivakadinadina” (Vunautaka Na Noqu Kosipeli, 19).

Na Vakabulai ni Tabai Elsa Johnson, mai vei Sam Lawlor